Tatali ke he Aho a Iehova mo e Fakauka
Tatali ke he Aho a Iehova mo e Fakauka
‘Kia lafilafi ke he tua ha mutolu e fakauka.’—2 PETERU 1:5, 6.
1, 2. Ko e heigoa e fakauka, ti ko e ha ne lata ai ma e tau Kerisiano?
KUA tata mafiti mai e aho lahi a Iehova. (Ioelu 1:15; Sefanaia 1:14) Ko e tau Kerisiano ne fakamalolō ke fakatumau e fakamooli ha tautolu ke he Atua, ne tatali fakamakai a tautolu ke he magaaho ka fakatokoluga e pule katoatoa ha Iehova. Ka e mogonei, kua fehagai a tautolu ke he vihiatia, ekefakakelea, favale, mo e mate ha ko e tua ha tautolu. (Mataio 5:10-12; 10:22; Fakakiteaga 2:10) Kua latatonu ni mogoia ke moua e fakauka—ko e lotomatala ke kautū ke he tau matematekelea. Ne tomatoma he aposetolo ko Peteru a tautolu: ‘Kia lafilafi ke he tua ha mutolu e fakauka.’ (2 Peteru 1:5, 6) Kua latatonu a tautolu ke fakauka, he pehē a Iesu: “Ka ko ia ke tumau ato hoko ke he fakaotiaga, to fakamoui na ia.”—Mataio 24:13.
2 Kua hokotia foki ki a tautolu e gagao, maanu, mo e falu a kamatamata. To fiafia lahi mooli a Satani kaeke ke mate e tua ha tautolu! (Luka 22:31, 32) Mo e lalagoaga ha Iehova, maeke ia tautolu ke fakauka ke he tau kamatamata kehekehe. (1 Peteru 5:6-11) Kia mailoga e falu mena ne tutupu mooli he moui ne fakakite kua maeke ia tautolu ke fakatali ke he aho a Iehova mo e fakauka mo e tua tukumalagi.
Ne Nakai Taofi he Gagao a Lautolu
3, 4. Foaki e fakafifitakiaga ke fakakite kua maeke ia tautolu ke fekafekau mo e tua fakamooli ki a Iehova pete he gagao.
3 Kua nakai fakamaulu fakamana he Atua a tautolu he mogonei, ka e mai e ia ki a tautolu e malolō ke fakauka ke he gagao. (Salamo 41:1-3) “Ke he mena ne manatu e au,” he talahau e Sharon, “ko e nofoa fakataveli ni e hoa tumau haaku. Tali mai he fanau, ne fofō he gagao cerebral palsy e fiafia haaku he vahā tama.” He ako hagaao ki a Iehova mo e tau maveheaga haana ke he malolō tino mitaki katoatoa ne foaki ki a Sharon e amaamanakiaga. Pete he uka a ia ke vagahau mo e fanofano, ne moua e ia e fiafia he fekafekauaga faka-Kerisiano. Kavi ke 15 e tau he mole, ne talahau e ia: “Pete kua lolelole fakahaga tumau e malolō tino haaku, ko e falanaki haaku ke he Atua mo e fakafetuiaga haaku mo ia ne eke mo lagomatai mau he moui haaku. Ko e fiafia ha ia haaku ke fakalataha mo e tau tagata ha Iehova ti moua e lagomatai mauokafua haana!”
4 Ne tomatoma he aposetolo ko Paulo e tau Kerisiano i Tesalonia “kia fakamafana a lautolu kua manava tote.” (1 Tesalonia 5:14) Ko e tau mena pihia tuga e hogohogomanava lahi ka fakatupu e gagao fakaagitau. He 1993, ne tohia e Sharon: “He logona hifo kua tuga e kaumahala au ke he tau mena oti, ne . . . hufia au ke he fakaagitau lahi ke tolu e tau. . . . Ne foaki mai he tau motua e fakamafanaaga mo e fakatonuaga. . . . He puhala he The Watchtower, ne foaki fakaalofa mai e Iehova e lotomatala hagaao ke he gagao kelea lahi he fakaagitau. E, kua manatu mooli e ia e tau tagata haana ti maama e tau logonaaga ha tautolu.” (1 Peteru 5:6, 7) Hane fekafekau mo e tua fakamooli agaia a Sharon ke he Atua he tatali a ia ke he aho lahi a Iehova.
5. Ko e heigoa e fakamooliaga kua maeke he tau Kerisiano ke fakauka ke he tupetupe lahi mahaki?
5 Kua matematekelea e falu Kerisiano he tupetupe lahi mahaki ha ko e tau mena ne tutupu fakamua he moui. Ko Harley ne kitia e ia e latau kelea muitui he Felakutaki II he Lalolagi ti miti kelea hagaao ke he felakutaki ia. Magaaho ka mohe ai, ne fakatutū a ia: “Kia takahao! Kia matakaki!” Kua palakotiho a ia he kavakava he ala hake. Pete ia, ne maeke ia ia ke tutuli e moui mahani Atua, ti fai magaaho, ne nakai miti kelea tumau pihia a ia.
6. Fehagai fēfē e taha Kerisiano ke he tau lekua he logonaaga?
6 Taha e Kerisiano ne moua he gagao bipolar (fa vikoia e manamanatuaga) ti uka lahi ke fakamatala ke he taha gutuhala mo e taha gutuhala. Ka e, fakamakamaka a ia ke he gahua ia, he mailoga e ia to fakamoui he fekafekauaga a ia ti pihia foki a lautolu ne fanogonogo mai. (1 Timoteo 4:16) Falu magaaho ne nakai maeke ia ia ke ta e logo he gutuhala, ka e pehē a ia: “Fai magaaho he mole ne maeke ia au ke tautaofi e tau logonaaga haaku, ti fano ke he taha gutuhala, mo e liu lali foki. He fakatumau ke fakalataha ke he fekafekauaga, ne moua e au e fuafuaaga mitaki he malolō fakaagaaga.” Ko e finatu ke he tau feleveiaaga kua paleko foki, ka kua mauokafua e matakainaga taane nei ke he aoga he feoaki fakaagaaga. Ko e mena ia, ne taute e ia e laliaga kua lata ke ha ha i ai.—Heperu 10:24, 25.
7. Pete kua matakutaku falu ke vagahau i mua he tau tagata po ke ō ke he feleveiaaga, kua fakakite fēfē e lautolu e fakauka?
7 Kua moua he falu Kerisiano e tau gagao phobia—ko e matakutakuina ke he tau tutūaga po ke ke he tau mena pauaki. Ke tuga anei, liga kua matakutaku a lautolu ke vagahau i mua he tau tagata po ke ō ke he feleveiaaga. Manamanatu la e uka lahi ha lautolu ke tali he tau feleveiaaga Kerisiano po ke ke lauga he Aoga Fekafekau Fakateokarasi! Pete he pihia, kua fakauka a lautolu, ti loto fakaaue lahi a tautolu ha kua fakalataha mai mo e fai vala a lautolu.
8. Ko e heigoa kua lauia mitaki lahi he magaaho ka fahia ke he tau logonaaga kua uka?
8 He lahi e magaaho ke okioki mo e mohe ka liga lagomatai e tagata ke fakauka ke he tau logonaaga uka. Liga lata ke moua e lagomatai fakaekekafo. Ka kua lauia mitaki lahi ke falanaki ke he Atua puhala he liogi. “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe,” he talahau he Salamo 55:22. “Nakai [to] tuku e ia tukulagi e tau tagata tututonu ke fagahuatia.” Ti “kia [“falanaki,” NW] a koe kia Iehova mo e hāu a loto katoa.”—Tau Fakatai 3:5, 6.
Fakauka ke he Mauku
9-11. (a) Ko e heigoa ka lagomatai a tautolu ke fakauka ke he momoko ka mate a ia ne ofania? (e) Lagomatai fēfē he fakafifitakiaga ha Ana a tautolu ke fakauka ke he mauku?
9 He magaaho ka vevehe he mate e tau tagata he magafaoa, mahani ke lahi e momoko ha kua galo tuai. Ne tagi tatuki a Aperahamo he mate e hoana fakahele haana, ko Sara. (Kenese 23:2) Pihia foki e tagata mitaki katoatoa ko Iesu ne “tagi” a ia he mate e kapitiga haana ko Lasalo. (Ioane 11:35) Ti ko e mena fa mahani mau ke momoko ka mate taha ne ofania e koe. Pete ia, na iloa he tau Kerisiano to ha ha ai e liu tu mai. (Gahua 24:15) Ko e mena ia, ne “nakai momoko a [la]utolu, tuga ne falu kua nakai ha i ai e amaamanaki.”—1 Tesalonia 4:13.
10 Maeke fēfē a tautolu ke fahia ke he mauku? Liga to lagomatai he fakataiaga nei. Kua nakai fa mahani a tautolu ke momoko hololoa ka fano fenoga e kapitiga ha kua amanaki a tautolu ke liu kitia a ia he magaaho ka liu mai. He pihia e onoonoaga ke he mate he Kerisiano tua fakamooli kua fakatote hifo e maanu ha tautolu ha kua iloa e tautolu kua mavehe to liu tu mai a ia.—Fakamatalaaga 7:1.
11 He falanaki katoatoa ke he ‘Atua he tau fakamafanaaga oti’ ka lagomatai a tautolu ke fakauka ke he mauku. (2 Korinito 1:3, 4) Ti pihia foki ka fakaata atu ke he mena ne taute he takape ko Ana he senetenari fakamua. Ne takape a ia he mole fitu laia e tau he mau. Ka e he 84 e tau he moui, ne foaki agaia e ia e fekafekauaga tapu ki a Iehova i loto he faituga. (Luka 2:36-38) Ko e moui fakamooli pihia ne lagomatai a ia ke fahia ke he maanu mo e matimati. He fakalataha tumau ke he tau gahua faka-Kerisiano, putoia e gahua fakamatala he Kautu, ka lagomatai a tautolu ke fakauka ke he tau lauiaaga he mauku.
Fehagai mo e Tau Kamatamata Kehekehe
12. Ko e heigoa e kamatamata ne lauia e moui fakamagafaoa ne fakauka e falu Kerisiano ki ai?
12 Ko e falu Kerisiano kua fakauka ke he tau kamatamata ne lauia e moui fakamagafaoa. Tuga anei, kaeke ke mahani feuaki e taha hoa, kua lauia kelea ai ke he magafaoa! Ha kua ofogia mo e maanu, liga to nakai maeke e hoa ne fakamooli ke mohe ti liga tagi tumau. Kua lahi ai e tupetupe ka taute e tau matagahua ikiiki mo e taute e tau mena puleheu po ke tōtamaki taha mena. Ko e hoa ne nakai agahala kua liga ai kai, liga memege e tino, ti liga lekua e logonaaga. Kua liga uka ke fakalataha ke he tau gahua faka-Kerisiano. Ti liga lahi mooli e lauia ke he fanau!
13, 14. (a) Ko e heigoa e fakamafanaaga ne moua e koe mai he liogi ha Solomona he fakauluaga he faituga? (e) Ko e ha ne liogi a tautolu ma e agaaga tapu?
13 He magaaho ka hokotia a tautolu ke he kamatamata pihia, ne foaki e Iehova e lagomatai ne lata mo tautolu. (Salamo 94:19) Na logona he Atua e tau liogi he tau tagata haana, tuga ne kitia ke he liogi he Patuiki ko Solomona he fakauluaga he faituga a Iehova. Ne liogi a Solomona ke he Atua: “Ko e tau liogi oti, mo e tau ole oti, ke eke ai he tagata, po ke hau a motu oti ko Isaraela; ko e takitaha e tau tagata oti mo e iloa e malaia he tau loto ha lautolu, mo e fakaolo atu e lautolu ha lautolu a tau lima ke he fale nai; kia fanogonogo mai a a koe mai he lagi, ko e mena kua haele ai a koe, mo e fakamagalo mai, mo e eke, mo e foaki mai e koe ke he tau tagata takitokotaha ke lata mo e hana a tau mahani oti, kua iloa ai e koe hana loto; ha kua iloa ni e koe e tau loto he tau tagata oti kana; kia matakutaku a lautolu kia koe ke he tau aho oti ke momoui ai a lautolu ke he kelekele kua foaki mai e koe ke he tau matua ha mautolu.”—1 Tau Patuiki 8:38-40.
14 Kua lagomatai lahi ke liogi tumau ma e agaaga tapu. (Mataio 7:7-11) Ko e fua he agaaga kua putoia ai e tau mahani tuga e fiafia mo e mafola. (Kalatia 5:22, 23) Ko e fakatotoka ha ia he magaaho ka tali he ha tautolu a Matua he lagi e tau liogi ha tautolu—kua hukui he fiafia e maanu, mo e hukui he mafola e ita!
15. Ko e heigoa e tau kupu tohi ka lagomatai ke fakatote e fakaatukehe ha tautolu?
15 Kua fai fuafuaaga he fakaatukehe ka amanaki ki ai he magaaho ka lata ia tautolu ke fakauka ke he tupetupe lahi mahaki. Ka kua maeke ke fakatote e falu tupetupe nei kaeke ke manatu e tautolu e tau kupu ha Iesu: “Aua neke fakaatukehe a mutolu ke he moui ha mutolu, ke he tau mena ke kai ai a mutolu, mo e tau mena ke inu ai a mutolu; po ke tau tino ha mutolu ke he tau mena ke tapulu ai a mutolu. . . . Ka kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia kia mutolu.” (Mataio 6:25, 33, 34) Ne fakamafana mai e aposetolo ko Peteru ki a tautolu ‘kia tuku atu ke he Atua e tau mena oti kua fakaatukehe ai a tautolu, ha ko e mena kua manatu e ia a tautolu.’ (1 Peteru 5:6, 7) Kua tonu ke taute e tau laliaga ke fakamitaki e lekua. Ti he mole e taute e tautolu e tau mena ne fahia ki ai, kua nakai maeke he tupetupe ke hukui e liogi. “Kia tuku atu hāu a puhala kia Iehova, kia tua foki a koe kia ia, ti eke ai e ia,” he lologo he salamo.—Salamo 37:5.
16, 17. (a) Ko e ha kua nakai atāina katoatoa a tautolu mai he fakaatukehe? (e) Ko e heigoa ka iloa e tautolu kaeke ke fakagahua e tautolu e Filipi 4:6, 7?
16 Ne tohia e Paulo: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e [“mafola,” NW] foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) Mooli ai, kua nakai maeke e tau hologa nakai mitaki katoatoa ha Atamu ke atāina katoa mai he fakaatukehe. (Roma 5:12) Ko e tau hoana Heti ha Esau “ne fakamamahi” ke he tau matua mahani Atua ha Esau, ko Isaako mo Repeka. (Kenese 26:34, 35) Ne liga ko e gagao ne fakatupu e tau Kerisiano tuga a Timoteo mo Tofimo ke fakaatukehe. (1 Timoteo 5:23; 2 Timoteo 4:20) Ne kapaletū po ke, fakaatukehe a Paulo ma e tau matakainaga talitonu. (2 Korinito 11:28) Ka ko e ‘Fanogonogo liogi’ kua haia tumau mo lautolu ne fakaalofa ki a ia.—Salamo 65:2.
17 He tatali a tautolu ke he aho a Iehova, ne ha ha ia tautolu e lalago mo e mafanatia mai he ‘Atua he mafola.’ (Filipi 4:9) Ko Iehova kua “fakaalofa hofihofi, mo e fakaalofa noa,” ko ia ‘kua mitaki ke fakamagalo e tau hala,’ ti “kua manatu e ia ko e kelekele ni a tautolu nai.” (Esoto 34:6; Salamo 86:5; 103:13, 14) Ati o mai ā a tautolu ke ‘fakailoa kia ia e tau manako ha tautolu’ ha ko e fua to moua e tautolu e ‘mafola he Atua’—ko e totokaaga ne nakai fakaai he tagata ke maama.
18. Tuga ne kitia ia Iopu 42:5, kua maeke fēfē ke “kitekite” ke he Atua?
18 He magaaho ne tali e tau liogi ha tautolu, kua iloa e tautolu ko e Atua haia mo tautolu. He mole e fakauka a Iopu ke he tau kamatamata haana, ne pehē a ia: “Ne fanogonogo au kia koe [Iehova], he fanogonogo ai haku tau teliga; ka ko ainei kua kitekite atu haku tau mata kia koe.” (Iopu 42:5) Mo e tau mata he maama, tua, mo e loto fakaaue, maeke ia tautolu ke onoono atu ke he tau fehagai he Atua mo tautolu mo e maeke ke “kitekite” fakalahi atu ki a ia. Kua tamai mooli he fakafetuiaga tata pihia ki a tautolu e mafola he loto manamanatu!
19. Ko e heigoa ka tupu kaeke ke ‘tuku atu e tautolu kia Iehova e tau mena oti kua fakaatukehe ai a tautolu’?
19 Kaeke ke ‘tuku atu e tautolu kia Iehova e tau mena oti kua fakaatukehe ai a tautolu,’ maeke ia tautolu ke fakauka ke he tau kamatamata mo e fakatotoka foki ne puipui e tau loto mo e tau manamanatuaga ha tautolu. Ke he hokulo he tau loto ha tautolu, to iloa e tautolu e atāina mai he tehatehaua, matakutaku, mo e hopoate. Ko e tau manamanatuaga ha tautolu to nakai fakalavelave he tau mena uka po ke fakaatukehe.
20, 21. (a) Ko e heigoa ne fakamooli he totokaaga ne foaki he mena ne tupu ki a Setefano he magaaho he favaleaga? (e) Talahau e fakafifitakiaga he vahā foou nei ke he fakatotokaaga he fakauka ke he tau kamatamata.
20 Ne fakatātā he tutaki ko Setefano e fakatotoka he magaaho ne fakauka a ia ke he kamatamata velagia he tua haana. Ato fakamatala fakahiku a ia, ko lautolu oti he Saneheturini ne ‘kitia hana mata kua tuga ne fofoga he agelu.’ (Gahua 6:15) Kua fakatotoka e fofoga haana—tuga he agelu, ko e utafekau he Atua. He mole e fakatapakupaku e Setefano e hala ha lautolu ke he mate ha Iesu, ko e tau ikifakafili kua “vale lahi ai ha lautolu a tau loto; kua fakakonokonoi foki ha lautolu a tau nifo kia ia.” “Kua puke a [Setefano] ke he [a]gaga [t]apu, kua mataono ke he lagi, kua kitia atu e lilifu he Atua, mo Iesu ha ne tu ke he fahi matau he Atua.” Kua fakamalolō ai he fakakiteaga ia, ne fakatumau a Setefano ke tua fakamooli ke hoko ke he mate. (Gahua 7:52-60) Pete he nakai ha ha ia tautolu e tau fakakiteaga, kua maeke ia tautolu ke moua e totokaaga ne foaki he Atua he magaaho ka favale mai.
21 Onoono ke he tau talahauaga he falu Kerisiano ne hokotia ke he mate he tau lima he tau Nasi he Felakutaki II he Lalolagi. He talahau e mena ne tupu ki a ia ke he hopoaga, ne pehē taha: “Ne poaki e fakahala ke mate. Ne fanogonogo au, ti he mole e talahau e au e tau kupu, ‘To tua fakamooli au ke hoko ke he mate,’ mo e falu kupu gahoa foki he Iki ha tautolu, ti fakaoti tuai he naia. Ka kia nakai manamanatu ki ai mogonei. Ha kua ha ha ia au e mafola pauaki, totokaaga pauaki, ne nakai fakaai ia koe ke manamanatu ki ai!” Ko e Kerisiano fuata ne fehagai mo e mate he hio e ulu, ne tohia ke he tau matua haana: “Kua mole tuai e tulotopō. Ti fai magaaho agaia au ke hiki e manatu haaku. Ae! ka to liu nakai au ke fiafia he lalolagi nei ka fakatikai e au e Iki ha tautolu? Nakai pihia! Ka e mogonei kua iloa mooli e mua to toka e au e lalolagi nei mo e fiafia mo e mafola.” Kua nakai fakauaua na lalago e Iehova e tau fekafekau fakamooli haana.
Maeke a Koe ke Fakauka!
22, 23. Ko e heigoa ne iloa mooli e koe he tatali a koe ke he aho a Iehova mo e fakauka?
22 Liga to nakai fehagai a koe ke he tau paleko ne fakatutala a tautolu ki ai. Pete ia, kua hako a Iopu ne matakutaku Atua he magaaho ne pehē a ia: “Ko e tagata ne fanau ai he fifine, kua gahoa hana tau aho, ti puke ai ke he fakaatukehe.” (Iopu 14:1) Liga ko koe ko e matua hane gahua fakamakamaka ke foaki ke he fanau haau e takitakiaga fakaagaaga. Kua lata a lautolu ke fakauka ke he tau kamatamata he aoga, ka kua fiafia lahi ha ia haau he magaaho ka tutū mauokafua a lautolu ma Iehova mo e tau matapatu fakaakoaga tututonu haana! Liga kua hoko foki ki a koe e tau mena uka mo e tau kamatamata he gahuaaga. Ka ko e tau mena nei mo e falu a tutūaga kua maeke ke fakauka ki ai kakano ‘kua fua e Iehova ke he taha aho mo e taha aho e tau kavega haau.’—Salamo 68:19.
23 Liga manamanatu hifo a koe ko e taha tagata noa ni a koe, ka e manatu to nakai fakanimonimo e Iehova e tau gahua haau mo e fakaalofa ne fakakite e koe ma e higoa tapu haana. (Heperu 6:10) Mo e lagomatai haana, to maeke ia koe ke fakauka ke he tau kamatamata he tua. Ti, kia putoia tumau e taute he finagalo he Atua ke he tau liogi mo e tau pulega haau. Mogoia ka mauokafua ai a koe ke he monuina mo e lalago faka-Atua he tatali a koe ke he aho a Iehova mo e fakauka.
To Tali Fēfē e Koe?
• Ko e ha ne lata e tau Kerisiano ke fakauka?
• Ko e heigoa ka lagomatai a tautolu ke fakauka ke he gagao mo e mauku?
• Lagomatai fēfē he liogi a tautolu ke fakauka ke he tau kamatamata?
• Ko e ha kua maeke ke tatali ke he aho a Iehova mo e fakauka?
[Tau Hūhū he Fakaakoaga]
[Fakatino he lau 15]
Falanaki ki a Iehova ti maeke ia tautolu ke fakauka ke he mauku
[Fakatino he lau 17]
Lagomatai he liogi mai he loto a tautolu ke fakauka ke he tau kamatamata he tua