‘Ne Fakaalofa Noa e Matua ha Mutolu’

‘Hanai, kia fakaalofa noa, tuga ne fakaalofa noa e Matua ha mutolu.’​—LUKA 6:36.

1, 2. Fakakite fēfē he tau kupu ha Iesu ke he tau tohikupu mo e tau Farasaio mo e ke he tau tutaki haana ko e mahani mitaki lahi e fakaalofa noa?

KO E Fakatufono ne foaki puhala ia Mose kua toka ai 600 e tau poakiaga mo e tau matafakatufono. Pete ni kua lata ke taute e tau poakiaga he Fakatufono faka-Mose, ne aoga lahi mahaki foki ke fakakite e fakaalofa noa. Mailoga e mena ne talahau e Iesu ke he tau Farasaio ne fakakite e mahani nakai fakaalofa noa. Ne fakatikai lagaua e ia a lautolu, he talahau e poaki he Atua: ‘Mena loto au ke he fakaalofa noa, ka e nakai ko e poa.’ (Mataio 9:10-13; 12:1-7; Hosea 6:6) Ke he fakahikuaga he gahua haana, ne pehē a Iesu: “Oi fakaalofa kia mutolu e tau tohikupu mo e tau farasaio, ko e tau tagata fakavai! ha kua ta atu e mutolu e mena ne hogofulu aki e mili, mo e aneto, mo e kumina; ka kua tiaki e mutolu e tau mena he fakatufono ne mua, ko e [“fakafili tonu mo e fakaalofa noa,” NW] mo e fakamoli.”​—Mataio 23:23.

² Nakai fakatikai ai, na aoga lahi mahaki ki a Iesu e fakaalofa noa. Ne talaage a ia ke he tau tutaki haana: ‘Hanai, kia fakaalofa noa, tuga ne fakaalofa noa e Matua ha mutolu.’ (Luka 6:36) Ka e, ke ‘fifitaki a tautolu ke he Atua’ hagaao ke he mena nei, kua lata ia tautolu ke iloa e fakaalofa noa mooli. (Efeso 5:1) Mua atu, ko e loto fakaaue ke he tau aoga he fakaalofa noa ka omoi a tautolu ke fakakite katoatoa e mahani nei he tau momoui ha tautolu.

Fakaalofa Noa ki a Lautolu ne Nonofogati

3. Ko e ha kua lata a tautolu ke onoono ki a Iehova ke iloa ko e heigoa e fakaalofa noa mooli?

³ Ne lologo e salamo: ‘Kua fakaalofa mai a Iehova, mo e fakaalofa noa; kua fakatuai hana ita, ti lahi ni hana fakaalofa-totonu. Kua mahani mitaki mai a Iehova ke he tau mena oti, ko e hana fakaalofa noa foki kua hoko ia ke he hana tau mena oti kana ne eke e ia.’ (Salamo 145:8, 9) Ko Iehova ‘ko e Matua he fakaalofa noa ko e Atua foki he tau fakamafanaaga oti.’ (2 Korinito 1:3) Kua fakakite e fakaalofa noa ka fehagai ke he taha tagata he puhala kua fakaalofa hofihofi noa. Ko e vala mua ue atu anei he aga fakaperesona he Atua. Kua fakaako mai he fakafifitakiaga mo e tau hatakiaga haana ki a tautolu e kakano he fakaalofa noa mooli.

4. Ko e heigoa ne fakaako he Isaia 49:15 ki a tautolu hagaao ke he fakaalofa noa?

⁴ Tuga ne fakamau he Isaia 49:15, ne pehē a Iehova: “To nimo kia he fifine hana tama kai huhu, ke nakai [“fakaalofa hofihofi,” NW] a ia ke he tama ne fanau ai e ia?” Ko e tau kupu Heperu ne matutaki lahi ke he kupu nei ne fakaliliu ko e “fakaalofa hofihofi” kua  fakaaoga ke matutaki ke he fakaalofa noa ia Salamo 145:8, 9 ne totoku i luga. Ko e logonaaga ne omoi a Iehova ke fakakite e fakaalofa noa kua tatai ke he logonaaga mafanatia ne fa mahani ke moua he fifine fakahuhu tama ke he haana tama. Liga kua hoge e tama mukemuke po kua fai manako foki. Kua omoi he tau logonaaga he fakaalofa hofihofi noa po ke he fakaalofa ne fakalagalaga he mena nei a ia, ne leveki ai he matua fifine e tau manako he tama mukemuke haana. Kua ha ha ia Iehova e tau logonaaga totonu pihia ma lautolu ne fakakite e ia e fakaalofa noa ki ai.

5. Fakakite fēfē e Iehova ‘kua lahi ue atu e fakaalofa noa’ haana ke he tau Isaraela?

⁵ Ko e taha mena ke logona hifo e fakaalofa hofihofi noa ka ko e taha mena foki ke fakagahua e fakaalofa hofihofi noa ia ke aoga ai a lautolu ne nonofogati. Manamanatu ke he puhala ne tali atu a Iehova he magaaho ne fakatupa e tau tagata tapuaki haana i Aikupito kavi ke 3,500 e tau tau kua mole. Ne talaage a ia ki a Mose: “Kua kitekite ni au ke he matematekelea he haku motu ha i Aikupito, kua fanogonogo foki e au ke he tagi ha lautolu ha ko lautolu kua pule favale kia lautolu, ha kua kitia e au ha lautolu a mamahi. Hanai, to hifo au, ti laveaki e au a lautolu mai he tau lima a Aikupito, to ta hake e au a lautolu mai he motu ia ke he motu mitaki mo e lahi, ko e motu ne tafe ai e puke huhu mo e meli.” (Esoto 3:7, 8) Kavi ke 500 e tau he mole e laveaki e tau Isaraela mai i Aikupito, ne fakamanatu e Iehova ki a lautolu: “Ko au ni, ne ta hake ai e au a Isaraela i Aikupito, ti laveaki e au a mutolu mai he tau lima he tau tagata Aikupito, mo e tau lima he tau kautu oti ne favale atu kia mutolu.” (1 Samuela 10:18) Ha kua fuluhi kehe mai he tau tutūaga tututonu he Atua, ne matematekelea tumau e tau Isaraela. Pete ia, ne fakaalofa hofihofi noa a Iehova ki a lautolu mo e laveaki tumau a lautolu. (Tau Fakafili 2:11-16; 2 Nofoaga he Tau Patuiki 36:15) Ne fakakite he mena nei e mataala he Atua fakaalofa ki a lautolu ne manako lagomatai, po ke hagahaga kelea, po ke he tuaga uka. Kua ‘lahi ue atu e fakaalofa noa’ ha Iehova.​—Efeso 2:4.

6. Fifitaki fēfē e Iesu Keriso e Matua haana he fakakite e fakaalofa noa?

⁶ He nofo he lalolagi, ne fifitaki katoatoa e Iesu Keriso e Matua haana he fakatātā e fakaalofa noa. Tali atu fēfē a Iesu he magaaho ne olelalo e tau tagata matapouli tokoua ki a ia, he pehē: ‘Ko e Iki na e, ko e tama a Tavita, kia fakaalofa noa mai a koe kia maua’? Ne ole a laua ki a Iesu ke taute e mana ke liu a laua ke kitia. Ne taute ai e Iesu, ka e nakai taute noa e ia e mana mo e nakai fai logonaaga fakaalofa. “Ti hofihofi ai e fakaalofa a Iesu,” he talahau he Tohi Tapu, “kua piki atu ke he tau mata ha laua; ti ala ai agataha ha laua a tau mata.” (Mataio 20:30-34) Ne omoi he fakaalofa hofihofi a Iesu ke taute e tau mana ka tamai e totokaaga ke he tau tagata ne matapouli, ne heke he tau temoni, tau tagata lepela, mo e tau matua he fanau ne matematekelea.​—Mataio 9:27; 15:22; 17:15; Mareko 5:18, 19; Luka 17:12, 13.

7. Ko e heigoa ne fakaako ki a tautolu he tau fakafifitakiaga ha Iehova ko e Atua mo e Tama haana hagaao ke he fakaalofa noa?

⁷ Ne fakakite he tau fakafifitakiaga ha Iehova ko e Atua mo Iesu Keriso ko e mena ua e vala he fakaalofa noa​—ko e tau logonaaga he fakaalofa hofihofi noa, loto fakaalofa, po ke fakaalofa hofihofi ki a lautolu ne nonofogati mo e he taute taha mena ke moua he tagata matematekelea e totokaaga. Ke fakakite mogoia e fakaalofa noa kua lata ke ha ha ai e tau vala ua ia. I loto he tau Tohiaga Tapu, ne fa hagaao e fakaalofa noa ke he tau kupu atihake he manamanatu totonu atu ki a lautolu ne manako lagomatai. Ka e fakakite fēfē mogoia e fakaalofa noa ke he tau fekau he fakafiliaga? Kua putoia foki kia e tau matagahua ne iloa ke nakai tonu, tuga e mataofi ke fakahoko e fakahala?

Fakaalofa Noa ki a Lautolu ne Holifono

8, 9. Ko e heigoa ne putoia ke he fakaalofa noa ne fakakite ki a Tavita he mole e agahala haana mo Patesepa?

⁸ Mailoga e mena ne tupu he mole e fakafehagai a Natano mo e Patuiki ko Tavita ha Isaraela i tuai hagaao ke he fakafetuiaga faivao ha Tavita mo Patesepa. Ne liogi a Tavita ne tokihala: “Ko e Atua na e, kia fakaalofa mai  a koe kia au, ke lata mo e hau a [“fakaalofa-totonu,” NW]; ke lata mo e lahi he hau a [“fakaalofa noa,” NW] kia holoholo kehe haku a tau holifono. Kia mulu fakalahi e koe au ke he haku a tau mahani hepehepe, mo e fakamea e koe au he haku a tau hala. Ha kua iloa ni e au haku a tau holifono; ha i mua foki ia au haku tau hala nakai noa. Kua hala tuai au kia koe hoko koe ni; ne eke foki e au e mena kelea nai ki ho mua.”​—Salamo 51:1-4.

⁹ Ne tokihala lahi e loto ha Tavita. Ne fakamagalo e Iehova e agahala haana ti fakagahuahua e fakauka ke he fakafiliaga ki a Tavita mo Patesepa. Hagaao ke he Fakatufono faka-Mose, kua latatonu na Tavita mo Patesepa ke tamate. (Teutaronome 22:22) Pete kua nakai tokanoa a laua mai he tau fua kelea oti kana he agahala, ne fakaatā a laua ke momoui. (2 Samuela 12:13) Ko e fakaalofa noa he Atua kua putoia e fakamagalo he hala. Pete ia, kua nakai mataofi a ia mai he fakahoko e fakahala kua latatonu.

10. Pete kua fakaalofa noa a Iehova he fakahoko e tau fakafiliaga, ko e ha kua nakai lata ia tautolu ke fakateaga ke he fakaalofa noa haana?

¹⁰ He “hoko mai ai e hala ke he lalolagi ke he tagata tokotaha [Atamu]” mo e “ko e mate ko e palepale ia he hala,” ati hoko ai e mate ke he tau tagata oti kana. (Roma 5:12; 6:23) Ko e loto fakaaue ha ia ha tautolu he fakakite e Iehova e fakaalofa noa he magaaho ka fakahoko e fakafiliaga! Pete ia, kua lata ia tautolu ke mataala ke nakai fakateaga ke he fakaalofa noa he Atua. ‘Kua fakafili tonu e tau puhala oti ha Iehova,’ he tohi he Teutaronome 32:4. He fakakite e fakaalofa noa, kua nakai fakaheu he Atua e tau tutūaga mitaki katoatoa haana he fakafili tonu.

11. Fakakite fēfē e Iehova e fakalilifu ma e fakafili tonu he fehagai mo Tavita ha ko e agahala haana mo Patesepa?

¹¹ He mena ne tupu ki a Tavita mo Patesepa, ato fakatote hifo e fakafiliaga he fakahala mate, kua lata ke fakamagalo e tau agahala ha laua. Ne nakai age e pule malolō ke he tau ikifakafili Isaraela ke taute e mena nei. Ane mai fakaatā a lautolu ke fakafili e mena ne tupu, to liga nakai fai puhala foki a lautolu ka e ke fakahoko e fakahala mate. Ko e mena hanei ne poaki he Fakatufono. Ka e, he fakalilifu e maveheaga haana mo Tavita ne manako a Iehova ke kitia ko e fai fakavēaga nakai ke fakamagalo e agahala a Tavita. (2 Samuela 7:12-16) Ti ko Iehova ko e Atua, ko e “fakafili he lalolagi oti,” ko e ‘kamatamata he loto,’ kua fifili ai ke fakafili ne ia e matalekua. (Kenese 18:25; 1 Nofoaga he Tau Patuiki 29:17) Kua maeke he Atua ke kitia tonu e loto ha Tavita, filifilia e mooli he tokihala haana, ti foaki e fakamagaloaga.

12. Liga maeke fēfē he tau tagata agahala ke moua e fakaalofa noa he Atua?

¹² Ko e fakaalofa noa ne fakakite e Iehova ki a tautolu he laveaki a tautolu mai he totogi he tuaga agahala nukua lautatai mo e fakafili tonu haana. Ke fakamagalo e tau agahala ka e nakai holia e fakafili tonu haana, ne foaki e Iehova e poa lukutoto he haana Tama, ko Iesu Keriso ​—ko e fakakiteaga ne mua ue atu he fakaalofa noa. (Mataio 20:28; Roma 6:22, 23) Ke moua e tautolu e aoga he fakaalofa noa he Atua, nukua fakahao a tautolu neke moua he fakahala he tuaga agahala, kua latatonu a tautolu ke ‘tua ke he Tama.’​—Ioane 3:16, 36.

Ko e Atua he Fakaalofa Noa mo e Fakafili Tonu

13, 14. Kua fakamāmā kia he fakaalofa noa he Atua e fakafili tonu haana? Fakamaama.

¹³ Pete kua nakai holia he fakaalofa noa ha Iehova e tau tutūaga haana he fakafili tonu, kua pehē kia e mena ia na maeke foki e fakafili tonu haana ke hikihiki ke he falu a puhala? Kua fakamāmā kia he fakaalofa noa e lauiaaga he fakafili tonu he Atua he fakatote ai? Nakai pihia.

¹⁴ Puhala he perofeta ko Hosea, ne talaage a Iehova ke he tau Isaraela: ‘To eke foki e taua mo au e maveheaga tukulagi; to eke foki e taua mo au e maveheaga mo e tututonu, mo e fakafili tonu, mo e fakaalofa-totonu, mo e fakaalofa noa.’ (Hosea 2:19) Ne fakakite fakamahino mai he tau kupu nei ne fakagahuahua e Iehova e fakaalofa noa ke tatai tumau mo e falu a mahani haana, putoia e fakafili tonu. Ko Iehova ‘ko e Atua fakaalofa noa, mo e fakaalofa; kua fakamagalo foki e ia e mahani hepehepe, mo e holifono, mo e hala, ka e nakai toka noa e ia a lautolu kua hala.’ (Esoto 34:6, 7) Ko Iehova ko e Atua he fakaalofa noa mo e fakafili tonu. Hagaao ki a ia, ne pehē e Tohi Tapu: ‘Ko e Maka tumau a ia, kua katoatoa ni e mitaki hana gahua; ha kua fakafili tonu hana tau puhala oti ni.’ (Teutaronome 32:4) Kua mitaki katoatoa e fakafili tonu he Atua, tuga ne fakaalofa noa haana. Kua nakai mua hake e taha mena ia ke he taha, ti nakai lata he taha ke fakamāmā e lauiaaga he taha. Ka kua gahuahua lagotatai katoatoa e tau mahani ua ia.

15, 16. (a) Ko e heigoa ne fakakite na nakai maō kikiha e fakafili tonu he Atua? (e) He magaaho ka fakahoko e Iehova e fakafiliaga haana ke he fakatokaaga kelea nei, ko e heigoa kua lata ke iloa mooli he tau tagata tapuaki haana?

¹⁵ Kua nakai maō kikiha e fakafili tonu ha Iehova. Kua teitei tumau e fakafili tonu ke ha ha e hihiga matafakatufono, ti fa mahani e fakafiliaga ke fakahoko e fakahala tonuhia ki a lautolu ne taute e tau mena hehē. Pete ia, kua maeke foki e fakafili tonu faka-Atua ke putoia e fakahaoaga ha lautolu kua lata. Ke fakatai ki ai, he magaaho ne moumou e tau tagata mahani kelea he tau maaga ha Sotoma mo Komora, ne hao e tupuna ko Lota mo e fanau fifine tokoua haana.​—Kenese 19:12-26.

¹⁶ Kua lata ia tautolu ke mauokafua ko e magaaho ka fakahoko e Iehova e fakafiliaga ke he fakatokaaga kelea he vahā nei, to fakahao e “moto tagata tokologa” he tau tagata tapuaki mooli, ne “kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe.” Ko e mena ia, ko lautolu na to “o mai mai he matematekelea lahi.”​—Fakakiteaga 7:9-14.

Ko e Ha kua Lata ke Fakaalofa Noa?

17. Ko e heigoa e matapatu kakano ke fakakite e fakaalofa noa?

¹⁷ Kua fakaako mooli he tau fakafifitakiaga ha Iehova mo Iesu Keriso e fakaalofa noa mooli ki a tautolu. Ti kua tuku mai ki a tautolu e matapatu kakano ke fakakite e fakaalofa noa, ne tohi he Tau Fakatai 19:17: “Ko ia kua fakaalofa ke he tagata nofogati kua ta age e ia hana tau mena kia Iehova; to taui mai foki e ia e  tau mena ne ta age kia ia.” Kua fiafia a Iehova he magaaho ka fifitaki e tautolu a ia mo e Tama haana he fakakite e fakaalofa noa he tau fehagaiaga ha tautolu ke he taha mo e taha. (1 Korinito 11:1) Ti kua fakamalolō ke he falu ke fakakite e fakaalofa noa, ha kua tupu mai he fakaalofa noa ko e fakaalofa noa.​—Luka 6:38.

18. Ko e ha kua lata ia tautolu ke eketaha ke fakakite e fakaalofa noa?

¹⁸ Ko e fakaalofa noa kua moua mai he loga e tau mahani mitaki. Putoia ai e ofania, fakaalofa, totonu, mo e mitaki. Ko e tau logonaaga he fakaalofa hofihofi noa po ke loto fakaalofa ko e punaaga he tau gahua he fakaalofa noa. He nakai fakahui he fakaalofa noa he Atua e fakafili tonu, kua fakatuai a Iehova ke ita mo e fakamanavalahi a ia ti foaki ke he tau tagata taute mena hehē taha magaaho ke hohoko ke he tokihala. (2 Peteru 3:9, 10) Ko e mena ia ne matutaki ai e fakaalofa noa ke he fakamanavalahi mo e fakauka. Ha kua lafilafi e tau mahani mitaki loga​—putoia e tau vala kehekehe he fua he agaaga he Atua—​ne eke e fakaalofa noa mo fakavēaga ka liga ati hake ai e tau mahani nei. (Kalatia 5:22, 23) Kua aoga lahi ha ia ke eketaha a tautolu ke fakakite e fakaalofa noa!

“Fiafia a Lautolu ne Fakaalofa Noa”

19, 20. Puhala fe ne olioli e fakaalofa noa ke he fakafiliaga?

¹⁹ Ne talamai he tutaki ko Iakopo e kakano kua lata ia tautolu ke taute e fakaalofa noa mo mahani kua uho he tau momoui ha tautolu. Ne tohi e ia: ‘Ko e fakaalofa noa, kua olioli a ia ke he fakafiliaga.’ (Iakopo 2:13e) Kua vagahau a Iakopo ke he fakaalofa noa ne fakakite he tagata tapuaki ha Iehova ke he falu. Kua olioli lahi ai ke he fakafiliaga ti ka hoko e magaaho ma e tagata ke “talatala atu hana mahani ke he Atua,” ne mailoga e Iehova e tau fehagai fakaalofa noa haana ti fakamagalo atu ki a ia he fakavē ke he poa lukutoto he Haana Tama. (Roma 14:12) Nakai fakauaua, ko e taha kakano ne fakakite e fakaalofa noa ki a Tavita ma e agahala haana mo Patesepa ha ko ia ni ko e tagata fakaalofa noa. (1 Samuela 24:4-7) Ke he taha faahi, ‘ko ia ne nakai fakagahua e fakaalofa noa, to fakafili a ia mo e nakai fakaalofa noa ki ai.’ (Iakopo 2:13a) Kakano haia ne tohi fakalataha a lautolu ne ‘nakai fakaalofa noa’ mo lautolu ne mailoga he Atua ke “lata he mamate”!​—Roma 1:31, 32.

²⁰ He haana a Lauga he Mouga, ne pehē a Iesu: “Fiafia a lautolu ne fakaalofa noa, ha ko e mena to fakakite atu e fakaalofa noa ki a lautolu.” (Mataio 5:7, NW) Ko e malolō ha ia he tau kupu nei he fakakite ko lautolu ne kumi e fakaalofa noa he Atua kua lata ni ia lautolu ke fakaalofa noa! Ko e vala tala ka mui mai to fakatutala ke he puhala ka fakagahua e tautolu e fakaalofa noa he tau momoui ha tautolu he tau aho takitaha.

Ko e Heigoa ne Ako e Koe?

• Ko e heigoa e fakaalofa noa?

• Ko e heigoa e tau puhala ne fakakite e fakaalofa noa?

• Ko e heigoa e puhala ne eke a Iehova mo Atua he fakaalofa noa mo e fakafili tonu?

• Ko e ha kua lata ia tautolu ke fakaalofa noa?

[Tau Hūhū he Fakaakoaga]

[Fakatino he lau 11]

Ko e logonaaga fakaalofa ha Iehova ma lautolu ne manako lagomatai kua tuga ni he matua fifine ke he tama mukemuke haana

[Fakatino he lau 13]

Ko e heigoa ne ako e tautolu hagaao ke he fakaalofa noa mai he tau mana ha Iesu?

[Fakatino he lau 14]

Holia kia e Iehova e fakafili tonu haana he fakakite e fakaalofa noa ki a Tavita?

[Fakatino he lau 15]

Kua felauaki e fakaalofa noa he Atua ma e tau tagata agahala mo e fakafili tonu haana