Kua Moui e Kupu ha Iehova

Tau Fakamaamaaga Mai he Tohi a Hosea

KUA teitei tuai e tapuakiaga mooli ke galo katoatoa mai he kautu he magafaoa hogofulu ha Isaraela he faahi tokelau. I lalo hifo he pule ha Ierepoamo II, ne mautū fakatino a Isaraela, ka kua temotemoai he mole e mate haana. Ti mole ia kua ha ha ai e miha mo e maluelue fakapolitika he magahala ia. Tokofā mai he tau patuiki tokoono ne kua tamate. (2 Tau Patuiki 14:29; 15:8-30; 17:1-6) Ne 59 e tau he gahua fakaperofeta a Hosea, kamata he 804 F.V.N., ti hoko mai ke he magahala nei ne miha lahi.

Ko e tau logonaaga ha Iehova ke he motu matahavala ha Isaraela kua fakakite maaliali he tuaga fai hoana ha Hosea. Ko e fakatapakupaku he hehē a Isaraela mo e tau fakafiliaga fakaperofeta hagaao ki ai mo e kautu ha Iuta ko e tau matakupu he fekau ha Hosea. He fakaaoga e tau kupu hofihofi mo e manamanatu mo e tau vagahau malolō mo e maō, ne tohia oti e Hosea e tau mena nei he tohi ne ui aki e higoa haana. Ha ko e vala omoomoi he Kupu he Atua, ko e fekau i ai kua moui mo e gahua malolō.​—Heperu 4:12.

‘KE FAI HOANA KE HE FIFINE FEUAKI’

(Hosea 1:1–3:5)

Ne tala age a Iehova ki a Hosea: “Fano a koe, ke fai hoana ke he fifine [“feuaki,” NW].” (Hosea 1:2) Ne omaoma a Hosea ti fanau mai e tama taane ia Komeri. Ko e fanau tokoua fakamui ha Komeri ne fanau ko e tau tama tokotaha mooli haana. Ko e kakano he tau higoa ha laua, Loruama mo Loama, kua hagaao ki a Iehova ne taofi e fakaalofa noa mai i Isaraela mo e tiaki haana tau tagata nakai mahani fakamooli.

Fēfē e logonaaga mooli ha Iehova hagaao ke he haana tau tagata totoko? Kua tala age a ia ki a Hosea: “Kia fano foki a koe, kia fakaalofa atu a koe ke he fifine kua ofania he hana kapitiga, ka ko e fifine faivao a ia, tuga he fakaalofa a Iehova ke he fanau a Isaraela ko lautolu ne hagao atu ke he tau atua kehe.”​—Hosea 3:1.

Tali he Tau Hūhū Faka-Tohiaga Tapu:

1:1​—Ko e ha ne totoku oti e Hosea e tau patuiki tokofā ne pule i Iuta he vahā he fekafekauaga haana ka e taha ni e patuiki i Isaraela ne totoku? Ko e kakano he mena nei ha ko e tau patuiki hokoia ni he magafaoa ha Tavita ne fai tohiaga ko e tau patuiki kua tonuhia he motu fifili he Atua. Ko e tau patuiki he kautu he faahi tokelau ne nakai mai he ohi ha Tavita, ka e tupu mai pihia e tau patuiki ha Iuta.

1:2-9​—Ne fai hoana mooli kia a Hosea ke he fifine feuaki? E, ne mau mooli a Hosea ke he fifine ne mahani faivao he magaaho fakamui. Ne nakai fai talahauaga e perofeta ke fakakite aki ko e miti kia po ke fakakiteaga e tau mena ne talahau e ia ke he moui magafaoa haana.

1:7​—Magaaho fe ne fakakite ke he magafaoa ha Iuta e fakaalofa hofihofi noa mo e laveakiaga? Ne fakamooli e mena nei he 732 F.V.N., he vahā he Patuiki ko Hesekia. He magahala ia, ne fakaoti e Iehova e fakamatakutaku ha Asuria ki Ierusalema he taha e agelu ne kelipopo 185,000 he tau kautau he fī he taha e po. (2 Tau Patuiki 19:34, 35) Ne fakahao e Iehova  a Iuta, nakai “ke he kaufana, po ke pelu, po ke tau, po ke solofanua, po ke kau heke solofanua,” ka e puhala he agelu.

1:10, 11​—Ha kua kaumahala e kautu ha Isaraela he faahi tokelau he 740 F.V.N., puhala fe he fanau ha Isaraela kua “fakapotopoto fakalataha” mo e fanau a Iuta? Tokologa he kautu he faahi tokelau ne fitā e o atu ki Iuta ato uta fakapaea e tau tagata i Iuta ki Papelonia he 607 F.V.N. (2 Nofoaga he Tau Patuiki 11:13-17; 30:6-12, 18-20, 25) Magaaho ne liliu e tau Iutaia ne fakapaea ke he motu mooli ha lautolu he 537 F.V.N., ko lautolu foki he ohi he kautu he faahi tokelau ha Isaraela e falu ne liliu.​—Esera 2:70.

2:21-23​—Ko e heigoa ne talahau tuai he tau kupu ha Iehova: ‘To tō e au a Isereelu ke he kelekele ke eke maku; to fakaalofa atu foki au kia ia’? Ko e higoa he tama taane fakamua ha Hosea ne fanau e Komeri ko Isereelu. (Hosea 1:2-4) Ko e kakano he higoa ia, “To Tō he Atua e Tega,” kua hagaao fakaperofeta ki a Iehova kua fakapotopoto a lautolu ne tua fakamooli ne toe he 537 F.V.N. mo e tō a lautolu tuga e tega i Iuta. Ko e motu ne toka noa ke 70 e tau kua lata ke moua mai e saito, uaina foou, mo e puke lolo. He fakapoeme, kua talahau he perofetaaga ko e tau mena mitaki nei to ole ke he kelekele ke fakatoka mai e tau huhua i ai, mo e to ole e kelekele ke he lagi ma e uha. Ti, to ole e lagi ke he Atua ma e tau aolū uha. Ko e tau mena oti nei kua lata ai ke leveki fakalahi aki e tau manako he matakau tote kua liliu. Ne hagaao e tau aposetolo ko Paulo mo Peteru he Hosea 2:23 ke he fakapotopoto mai ha lautolu ne toe he Isaraela fakaagaaga.​—Roma 9:25, 26; 1 Peteru 2:10.

Tau Fakaakoaga ma Tautolu:

1:2-9; 3:1, 2. Manamanatu la ke he foaki noa fakatagata ne taute e Hosea he nofo mau mo e hoana ha ko e omaoma ke he finagalo faka-Atua! Ka hoko ke he taute he finagalo he Atua, to lahi fēfē e makai ha tautolu ke fakatikai e tau manako fakatagata?

1:6-9. Vihiatia e Iehova e faivao fakaagaaga, tuga ni he vihiatia e ia e faivao fakatino.

1:7, 10, 11; 2:14-23. Ko e tau mena ne talahau tuai e Iehova hagaao ki Isaraela mo Iuta ne kua fakamooli ai. Kua mooli tumau e kupu ha Iehova.

2:16, 19, 21-23; 3:1-4. Kua makai a Iehova ke fakamagalo a lautolu ne fakakite e fakatokihala mai he loto. (Nehemia 9:17) Tuga a Iehova, kua lata ia tautolu ke fakaalofa hofihofi noa mo e fakaalofa noa he tau fakafetuiaga ha tautolu mo e falu.

“KUA FAI TAUFETOKO A IEHOVA”

(Hosea 4:1–13:16)

“Kua fai taufetoko [po ke, fakafiliaga] a Iehova mo lautolu kua nonofo ke he motu.” Ko e ha? Kakano “kua nakai ha ha ia lautolu ha fakamoli, to nakai fai fakaalofa, to nakai ha i ai foki ke he motu, a lautolu kua iloa e Atua.” (Hosea 4:1) Ko e tau Isaraela ne liliu kehe kua fakalataha ke he fofō mo e kelipopo ti kua taute e feuaki fakatino mo e fakaagaaga. Na kua lata ke kumi ke he Atua ma e lagomatai, ka “kua ui age a lautolu ki Aikupito kua o age a lautolu ki Asuria.”​—Hosea 7:11.

Ne fakailoa e Iehova e fakafiliaga haana, he pehē: “Kua fakaoti a Isaraela.” (Hosea 8:8) Kua nakai hao e kautu a Iuta mai he agahala. “Kua taufetoko a Iehova mo Iuta,” he talahau he Hosea 12:2, “to fakahala foki e ia a Iakopo ke lata mo e hana tau mahani; to taui atu kia ia ke lata mo e hana tau mena ne eke.” Ka e to fakafoou mooli ni, ha kua mavehe e Atua: “To laveaki e au a lautolu mai he malolo he tukuaga; to fakamoui e au a lautolu mai he mate.”​—Hosea 13:14.

 Tali he Tau Hūhū Faka-Tohiaga Tapu:

6:1-3​—Ko hai ne pehē: “O mai a, kia liliu atu a tautolu kia Iehova”? Ko e tau Isaraela ne nakai tua fakamooli kua liga fefakamafanaaki e lautolu a lautolu ke liliu ki a Iehova. Kaeke ke pihia mooli e mena nei, kua liga fakatupua a lautolu ke tokihala. Ko e fakaalofa-totonu ha lautolu kua kū mo e galo vave tuga “ne aolu ke he pogipogi [mo e] hahau foki ne mole atu ke he magaaho pogipogi.” (Hosea 6:4) Ke he taha faahi, ne liga ko Hosea e tagata fa e vagahau he ole ke he tau tagata ke liliu ki a Iehova. Ko e heigoa ni e tuaga, kua lata e tau tagata matahavala he kautu he magafaoa hogofulu ha Isaraela ke fakakite e fakatokihala mooli ti liliu mooli ki a Iehova.

7:4​—Puhala fe he tau Isaraela faivao kua tuga ‘e gutu umu kaka ne tafu’? Ko e fakatataiaga nei kua fakatai ke he malolō he kelea muitui he tau fatuakiloto ha lautolu.

Tau Fakaakoaga ma Tautolu:

4:1, 6. Ka manako a tautolu ke nonofo mau he taliaaga ha Iehova, kua lata ia tautolu ke fakatumau ke moua e lotomatala hagaao ki a ia mo e momoui ke he tau mena kua ako e tautolu.

4:9-13. To fai fakalagoaga a Iehova ki a lautolu ne taute e mahani feuaki fakalialia mo e taute agaia e tapuakiaga nakai meā.​—Hosea 1:4.

5:1. Ko lautolu ne takitaki e tau tagata he Atua kua lata ke tiaki katoatoa e tiaki taofiaga. Neke fakaohooho e lautolu falu ke fakalataha ke he tapuaki fakavai, ati eke mo ‘hele mo e kupega’ ki a lautolu.

6:1-4; 7:14, 16. Ke fakatokihala ke he tau kupu ni hokoia kua fakavai mo e nakai aoga. Ke maeke ke moua e fakaalofa noa he Atua, kua lata e tagata ne taute mena hehē ke fakakite e fakatokihala mai he loto, he fakakite mooli he liliu ke he “Mua ue atu,” kakano ke liliu ke he tapuakiaga tokoluga. Ko e tau gahua haana kua lata ke lautatai mo e tau tuaga tokoluga he Atua.​—Hosea 7:16.

6:6. He taute e agahala ko e fakakiteaga kua nakai fai fakaalofa fakamooli ma e Atua. Nakai fai foakiaga fakaagaaga ke totogi aki e agahala nei.

 8:7, 13; 10:13. Ko e matapatu fakaakoaga “ko e mena kua gana he tagata, ko e mena ia ni ke helehele mai ai e ia” kua fakamooli ai ke he tau Isaraela tapuaki tupua.​—Kalatia 6:7.

8:8; 9:17; 13:16. Ko e tau perofetaaga hagaao ke he kautu he faahi tokelau ne fakamooli ai he magaaho ne fofō e Asuria e maaga lahi i ai, ko Samaria. (2 Tau Patuiki 17:3-6) Kua mauokafua a tautolu to taute he Atua e mena ne talahau e ia mo e fakahoko e tau mena kua vagahau e ia.​—Numera 23:19.

8:14. Ne fakafano e Iehova e “afi ke he . . . tau maga [ha Iuta]” he 607 F.V.N. puhala he lima he tau Papelonia, ti fakahoko e moumouaga ne talahau tuai ki Ierusalema mo e motu ko Iuta. (2 Nofoaga he Tau Patuiki 36:19) Nakai to ni ha kupu taha he Atua.​—Iosua 23:14.

9:10. Pete kua tukulele ke he Atua mooli, ko e tau Isaraela kua “o age ki Paalapeoro, ne vevehe atu a lautolu ke he tau mena ke ma ai.” Kua pulotu a tautolu kaeke ke hataki mai a tautolu he fakafifitakiaga kelea ha lautolu mo e puipui neke fakakelea e tukuleleaga ha tautolu ki a Iehova.​—1 Korinito 10:11.

10:1, 2, 12. Kua lata ia tautolu ke tapuaki ke he Atua mo e nakai lotolotoua. Ka ‘gana saito e tautolu mo e mahani tututonu, kia helehele mai ai mo e fakaalofa-totonu he Atua.’

10:5. Ko Petavene (kakano “Fale he Fakamamahi”) ko e higoa fakalialia ma Peteli (kakano “Fale he Atua”). Magaaho ne uta fakapaea ai e punua povi tupua ha Petavene, ne maanu e tau tagata i Samaria ha kua galo ha lautolu a tupua talaga ne fakamooli ki ai. Ko e goagoa ha ia ke falanaki ke he tupua ne ai fai moui mo e nakai maeke ke puipui a ia ni!​—Salamo 135:15-18; Ieremia 10:3-5.

11:1-4. Kua fehagai fakaalofa tumau a Iehova mo e tau tagata haana. Kua nakai favale e omaoma ke he Atua.

11:8-11; 13:14. Ko e kupu a Iehova hagaao ke he liuakiaga he tau tagata haana ke he tapuakiaga mooli ‘ne nakai liu noa ki a ia ka to eke ni.’ (Isaia 55:11) He 537 F.V.N., ne oti e paeaaga ki Papelonia ti liliu e matakau tote ki Ierusalema. (Esera 2:1; 3:1-3) Ko e ha mena ni kua talahau e Iehova puhala mai he haana tau perofeta to fakamooli tumau.

12:6. Kua lata ia tautolu ke eketaha mauokafua ke fakakite e fakaalofa-totonu, ke fakagahuahua e fakafili tonu, mo e amaamanaki tumau ki a Iehova.

13:6. Ko e tau Isaraela “ne makona a lautolu, ti fakatokoluga ai e tau loto ha lautolu; ko e mena ia ne nimo [a Iehova ki a] lautolu.” Kua lata ia tautolu ke puipui mai neke hihiga ke fakatokoluga he tagata a ia ni.

“KO E MENA HAKOHAKO E TAU PUHALA A IEHOVA”

(Hosea 14:1-9)

Ne ole a Hosea: “Isaraela na e kia liu mai a kia Iehova hau a Atua; ha ko e tau mahani kelea hau kua veli ai a koe.” Kua fakamalolō e ia e tau tagata ke ui ki a Iehova: “Kia uta kehe e koe e tau mahani kelea oti, mo e talia e koe e mena ne mitaki ti ta atu ai e mautolu kia koe e tau poa he tau laugutu ha mautolu.”​—Hosea 14:1, 2.

Ko e tagata taute mena hehē kua lata ke liu mai ki a Iehova, talia haana tau puhala, mo e foaki e poa fakaheke ki a ia. Ko e ha? Kakano “ko e mena hakohako e tau puhala a Iehova, to o ai a lautolu kua mahani tututonu.” (Hosea 14:9) Kua fiafia ha a tautolu he tokologa ka “o mai mo e matakutaku foki a lautolu kia Iehova mo e hana mahani mitaki ke he tau aho ke fakahiku ai”!​—Hosea 3:5.

[Fakatino he lau 5]

He veliaga ha Samaria he 740 F.V.N., ne fakaoti ai e kautu he magafaoa hogofulu ha Isaraela