Fakaaoga Nakai e Koe e Tau Magaaho ke Talahau e Tau Taofiaga Haau?

“HA HA i ai nakai e mooli katoatoa?” Ko e matakupu a ia he esei fetoko he motu ko Polani. Ko e tau fakamaamaaga ma e esei ne pehē: “Kua nakai lata a tautolu ma e mooli katoatoa. Nakai fai tagata ne manako ki ai. Kua nakai fai mooli katoatoa foki ni.” Ko Agata, ko e tama fifine fano aoga ne 15 e tau ko e taha he Tau Fakamoli a Iehova, ne fifili ke fakaaoga e magaho nei ke talahau e tau taofiaga fakalotu haana ke he falu.

Ke tauteute e esei, ne ole fakamua a Agata ki a Iehova ma e haana takitakiaga ti kamata ke fakaputu vala tala ke he matakupu. Ne moua e ia e tau vala tala he The Watchtower ia Iulai 1, 1995. Ne fatiaki e ia e hūhū ne hūhū e Ponotio Pilato ki a Iesu: “Ko [e] heigoa e kupu moli?” (Ioane 18:38) Ko e hūhū ia, he mailoga e ia, ne fakaata e aga tuahā, ke tuga kua pehē: ‘Kupu mooli? Ko e heigoa e mena ia? Nakai fai mena pihia!’ “Ko e hūhū ha Pilato,” he tohi e Agata, “kua fakamanatu ki a au e matakupu ma e fetoko mo e tau fakaakoaga ma e esei.”

Ne holo atu a Agata ke tutala ke he tupumaiaga he tau taofiaga kehekehe​—ko e manatu kua hako ke he taha tagata ka e nakai hako ke he taha ka e liga “hako” ua ni. Ne talahau e ia e tau hūhū tuga, “Ko hai ia tautolu ne toa ke heke he vakalele kaeke ke nakai manatu a tautolu kua mooli katoatoa e tau fakatufono he pulagi?” Ti tuhi atu a ia ke he Tohi Tapu, he pehē: “Ko e falanaki ke he Kupu he Atua kua fakavē ke he tau mena moolioli.” Ne talahau e ia e amaamanakiaga haana, ko lautolu ne kumi fakamakutu ke he mooli katoatoa to lahi e fakauka ha lautolu ke moua ai.

Ne moua e Agata e tipiloma pauaki ti maeke foki a ia ke talahau ai ki mua he vahega katoa. Loga e kapitiga aoga haana ne talia e foakiaga haana ke fakaako e Tohi Tapu mo lautolu. Ne fiafia lahi a Agata he fakaaoga e ia e magaaho nei ke talahau e tau taofiaga haana ke he tokologa. E, ko e mataala ke fakaaoga e magaaho ke tutala ke he falu hagaao ke he tua haau ka fai fua. Ko e heigoa e tau magaaho ka fakaaoga e koe?