Ko e Paleko he Mahani Fakatokolalo

KE HE tau tagata tokologa, kua tuga ke nakai aoga e mahani fakatokolalo ke he lalolagi he vahā nei. Ko lautolu ne pule ke he falu tagata mo e hihiga ke mua atu e kautū ko lautolu haia kua fakahakehake ne lautolu a lautolu, kua fakatokoluga, mo e fakamakamaka ke taute ni ke he puhala ha lautolu. Kua mahekeheke e tau tagata tokologa ke he puhala moui ha lautolu ne mautū mo e talahaua, ka e nakai pihia ki a lautolu ne mahani fakatokolalo mo e mahani molū. Ko lautolu ne kautū kua fa fiafia ke palau he mautū ha ko e gahua malolō ni ha lautolu. He mamao ligo mai he mahani fakatokolalo, ne nava fakatokoluga ni ki a lautolu ha ko e tau kautūaga ha lautolu.

Ko e tagata kumikumi i Kanatā ne tala ke he “tupu lahi he aga ‘ko au ni’” he motu haana. Ko e falu ne logona hifo kua nonofo a tautolu he magahala kua mua atu e fiafia fakatagata he taute e tau matagahua he moui ti mailoga kua holo ki mua e manamanatu he tau tagata ki a lautolu ni. He lalolagi pihia, kua liga nakai fai talahauaga mitaki ke he mahani fakatokolalo.

Mooli, kua gahoa ka nakai talia e manatu ko e mahani fakatokolalo kua mitaki ni ma e falu, ha ko e tau tagata fakatokolalo kua mukamuka ke gahua mo lautolu. Pete ia, he lalolagi aga fetoko ha tautolu, falu ne matakutaku neke mahani fakatokolalo a lautolu ti kitia he falu ko e lolelole.

Kua talahau tuai he Kupu he Atua he Tohi Tapu, ko e tau tagata he vahā ha tautolu to “hula noa, to fakatokoluga.” (2 Timoteo 3:1, 2) Talia nakai e koe kua hane fakamooli e perofetaaga ia? Maeke nakai ia koe ke kitia e aoga he mahani fakatokolalo? Po ke manatu a koe to onoono ke he tagata mahani fakatokolalo ko e tagata lolelole ne mukamuka ke fakaaoga fakahehē?

Kua foaki he Tohi Tapu e tau kakano mitaki hagaao ke he aoga mo e ke he feaki he mahani fakatokolalo. Kua foaki mai e onoonoaga lagotatai mo e mitaki e mahani ia ti fakakite e mahani fakatokolalo mooli ko e fakamailoga he malolō, nakai ko e lolelole. To fakamaama e kakano he vala tala ka mui mai.

[Fakatino he lau 3]

Lata ke fēfē e logonaaga ha tautolu ke he tau mena ne moua e tautolu?