Kumikumi Hifo e “Tau Mena Hokulo Ia he Atua”
Kumikumi Hifo e “Tau Mena Hokulo Ia he Atua”
“Ko e mena kumi hifo he [a]gaga e tau mena oti, ko e tau mena hokulo ia he Atua.”—1 KORINITO 2:10.
1. Ko e heigoa e falu kupu mooli he Tohi Tapu ka fakatupu e tau tagata fakaako Tohi Tapu foou ke fiafia?
LAULAHI ia tautolu he fakapotopotoaga Kerisiano kua manatu e fiafia ne logona he magaaho fakamua ne ako e tautolu e kupu mooli. Ne ako e tautolu e kakano ne aoga lahi e higoa a Iehova, kakano ne fakaatā e ia e matematekelea, kakano ne ō falu tagata ke he lagi, mo e tau mena kua fakatoka mai anoiha ma e tau tagata tokologa ne tua fakamooli. Liga kua fitā a tautolu he kumikumi fakamua ke he Tohi Tapu, ka kua galo e tau mena nai ki a tautolu, ti pihia ke he laulahi he tau tagata. Kua tatai a tautolu mo e tagata ne kitekite hifo ke he tau uluulu-feo. He nakai fai lagomatai, kua tote ne mena ka kitia e ia he tau mena fulufuluola he uhotoka. Ka e, mo e lagomatai he tau mata ukuuku po ke he poti ne fai hio e kelekele, ne olioli lahi a ia ke kitia fakamua e lanu he tau feo kehekehe, tau ika, mo e tau anemone (tau manu tahi ne tuga e tau lakau fiti) he tahi, mo e falu a mena momoui ofoofogia. Tatai foki, he kamata taha tagata ke lagomatai a tautolu ke maama e tau Tohiaga Tapu, ne kitia e tautolu ke he magaaho fakamua e “tau mena hokulo ia he Atua.”—1 Korinito 2:8-10.
2. Ko e ha kua maeke ke fiafia tukulagi he ako mai he Kupu he Atua?
2 Kua lata kia a tautolu ke makona ha ko e mena tote ne iloa he kupu mooli he Tohi Tapu? Ko e talahauaga “tau mena hokulo ia he Atua” kua putoia e maama ke he pulotu he Atua ne fakakite he agaaga tapu ke he tau Kerisiano ka e fakagalo ke he falu. (1 Korinito 2:7) Ko e laulahi ha ia e tau faahi kehekehe ke kumikumi ke he pulotu he Atua ne foaki mai ke olioli ai a tautolu! To nakai fakaai ke iloa e tautolu e tau mena oti kana hagaao ke he pulotu po ke tau puhala he Atua. Ko e fiafia ne moua e tautolu he magaaho ne ako fakamua e tautolu e tau matapatu fakaakoaga he Tohi Tapu to ha ha ai tukulagi ia tautolu kaeke ke nakai okioki a tautolu he kumikumi ke he “tau mena hokulo ia he Atua.”
3. Ko e ha kua lata ke maama katoatoa e tau kakano he tau taofiaga ha tautolu?
3 Ko e ha kua lata ia tautolu ke maama e “tau mena hokulo ia”? He maama e tau mena ne talitonu mo e kakano ne talitonu ai a tautolu—ko e fakavēaga he tau taofiaga—ka atihake e tua mo e mauokafua ha tautolu. Ne talamai he tau Tohiaga Tapu ke fakaaoga ha tautolu a “manamanatuaga iloilo” (NW) ke ‘kumikumi e tautolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.’ (Roma 12:1, 2) He maama e kakano ne ole mai a Iehova ke momoui ke he puhala pauaki ka fakamalolō e fifiliaga ha tautolu ke omaoma ki a ia. Ko e mena ia, ko e iloilo ke he “tau mena hokulo” kua foaki e malolō ki a tautolu ke totoko e tau kamatamata ke taute e tau gahua holifono ti maeke foki ke omoi a tautolu ke “fakamakutu ke he tau gahua mitaki.”—Tito 2:14.
4. Ko e heigoa ne putoia ke he fakaakoaga he Tohi Tapu?
4 Ke maama e tau mena hokulo kua latatonu ni ke fakaako. Pete ia, kua nakai tatai e fakaako mo e totou holo ke he taha mena. Kua putoia ki ai e kumikumi fakamitaki ke he tau vala tala ke kitia e puhala ne tatai ke he tau mena ne fitā he iloa e tautolu. (2 Timoteo 1:13) Kua lata ke mailoga e tau kakano ne talahau pihia ai. Lata ke putoia ke he fakaakoaga he Tohi Tapu e manamanatu hokulo ke he puhala ka fakaaoga e tautolu e tau mena ne ako ke taute e tau fifiliaga pulotu mo e ke lagomatai falu. Ha kua ‘mai foki he agaaga he Atua e tau Tohi Tapu oti kana,’ ti kua lata ke putoia ke he fakaakoaga ha tautolu e “tau kupu oti ne to mai he fofoga he Atua.” (2 Timoteo 3:16, 17; Mataio 4:4) Ko e gahua uka e fakaako ke he Tohi Tapu! Ka e maeke foki ke fiafia lahi, ti nakai uka lahi ke maama e “tau mena hokulo ia he Atua.”
Lagomatai e Iehova a Lautolu ne Loto Molū ke Maama
5. Ko hai kua maeke ke maama e “tau mena hokulo ia he Atua”?
5 Pihia foki ka nakai kautū a koe he aoga ti nakai mahani ke fakaako, kua nakai lata a koe ke manatu ko e “tau mena hokulo ia he Atua” kua nakai fakaai ia koe ke maama. He fekafekauaga ha Iesu he lalolagi, ne fakamaama e Iehova e finagalo Haana, nakai ke he tau pulotu mo e tau tagata lotomatala, ka ke he tau tagata ne nakai ako mo e tau tagata goagoa ne fakatokolalo ke fakaako he fekafekau he Atua. Ne tuga e tau tama mukemuke a lautolu he fakatatai atu ki a lautolu ne fakaako he tau aoga. (Mataio 11:25; Gahua 4:13) Hagaao ke he “tau mena kua taute he Atua ma lautolu kua fakaalofa kia ia,” ne tohia he aposetolo ko Paulo ke he tau matakainaga talitonu haana: “Kua fakakite mai he Atua e tau mena ia kia tautolu ke he hana [a]gaga; ha ko e mena kumi hifo he [a]gaga e tau mena oti, ko e tau mena hokulo ia he Atua.”—1 Korinito 2:9, 10.
6. Ko e heigoa e kakano he 1 Korinito 2:10?
6 Kumi hifo fēfē he agaaga he Atua “e tau mena oti, ko e tau mena hokulo ia he Atua”? He nakai age e fakakiteaga ke igatia e tau Kerisiano, ne fakaaoga e Iehova e agaaga haana ke takitaki e fakatokatokaaga haana, ne foaki ke he tau tagata auloa he Atua e maamaaga ke he Tohi Tapu. (Gahua 20:28; Efeso 4:3-6) Ke he lalolagi katoa, ne tatai e tau fakaholoaga fakaako Tohi Tapu ne olioli he tau fakapotopotoaga oti. Mai he tau tau loga, kua ako katoatoa e lautolu e tau fakaakoaga kehekehe he Tohi Tapu. Kua gahuahua e agaaga tapu ke he fakapotopotoaga ke lagomatai e tau tagata ke hiki e tau aga kua lata ke maama e “tau mena hokulo ia he Atua.”—Gahua 5:32.
Ko e Heigoa Foki e ‘Tau Mena Hokulo he Atua’
7. Ko e ha ne nakai maama he tau tagata tokologa e “tau mena hokulo ia he Atua”?
7 Nakai lata a tautolu ke manamanatu kua uka pauaki e “tau mena hokulo.” Ko e iloilo ke he “tau mena hokulo ia he Atua” kua galo ke he laulahi he tau tagata, nakai ha kua uka lahi e pulotu he Atua ke maama, ka e ha kua fakavai e Satani e tau tagata ke tiaki e lagomatai ne foaki e Iehova puhala he fakatokatokaaga Haana.—2 Korinito 4:3, 4.
8. Ko e heigoa e tau mena hokulo ne hagaao a Paulo ki ai he veveheaga ke toluaki he tohi haana ke he tau Efeso?
8 Ne fakakite he veveheaga ke toluaki he tohi ha Paulo ke he tau Efeso ko e “tau mena hokulo ia he Atua” kua putoia e tau kupu mooli loga ne kua maama lahi he tau tagata ha Iehova, tuga e mailoga e Tega ne mavehe, ko lautolu ne fifili mai he tau tagata ne moua e amaamanakiaga ke he lagi, mo e Kautu faka-Mesia. Ne tohia e Paulo: “Nakai fakailoa atu [e mena galo nai] ke he tau tagata he tau hau kehe, tuga e fakailoa mai nai he [a]gaga ke he hana tau aposetolo tapu mo e hana tau perofeta tapu; kia eke e tau motu kehe mo hakeaga fakalataha mo tino taha kia igatia fakalataha foki ke he hana mena kua talahaua mai kia Keriso.” Ne pehē a Paulo kua kotofa a ia ke “fakamaama atu ke he tau tagata oti kana e kakano he fakafetui he mena galo, ne galo ke he tau hau i tuai ha he Atua.”—Efeso 3:5-9.
9. Ko e ha kua monuina ke maama e “tau mena hokulo ia he Atua”?
9 Ne holo atu a Paulo ke fakamaama e finagalo he Atua kua ha ha foki “ke he tau mena ha he lagi, ke he ekalesia e pulotu kehekehe loga he Atua.” (Efeso 3:10) Kua aoga e tau agelu he kitekite mo e maama e pulotu he tau fehagai ha Iehova mo e fakapotopotoaga Kerisiano. Ko e monuina ha ia ha tautolu ke maama e tau mena ne fiafia foki ke he tau agelu! (1 Peteru 1:10-12) Ti, pehē foki a Paulo kua lata a tautolu ke lali fakalahi ke ‘iloa tonuhia mo e tau tagata tapu oti kana, po ke heigoa e laulahi, mo e loa, mo e hokulo, mo e tokoluga’ he tua faka-Kerisiano. (Efeso 3:11, 18) Kia fakatutala a tautolu mogonei ke he falu fakataiaga he tau mena hokulo ka fakalaulahi e maamaaga ha tautolu.
Tau Fakataiaga he Tau Mena Hokulo
10, 11. Hagaao ke he tau Tohiaga Tapu, i ne fe ne eke a Iesu mo matapatu vala he “tega” he “fifine” he lagi he Atua?
10 Iloa e tautolu ko Iesu e matapatu vala he “tega” he “fifine” he Atua he lagi ne talahau he Kenese 3:15, NW. Ke fakalaulahi e maamaaga ha tautolu, liga hūhū hifo: ‘I ne fe ne eke a Iesu mo Tega ne mavehe? He taha vahā kia ne nakaila eke a ia mo tagata, he mogo ne fanau a ia ko e tagata, he papatisoaga haana, po ke he liu tū mai haana?’
11 Ne mavehe e Atua ko e vala he fakatokatokaaga haana he lagi, ne hagaao ki ai he perofetaaga ko e “fifine” haana, ka fanau mai e tega ke tatuki e ulu he gata. Ka kua totou afe tuai e tau he mole, ne nakaila fai tega ia ne fanau he fifine he Atua ke fakaotioti aki a Satani mo e tau gahua haana. Ati talahau he perofetaaga ha Isaia a ia ko e “fifine tufua” mo e “mamahi ai haana loto.” (Isaia 54:1, 5, 6) Fakahiku, ne fanau mai a Iesu i Petelehema. Ka e he mole e papatisoaga haana, magaaho ne fanau he agaaga ke eke mo tama fakaagaaga he Atua, ne fakapuloa laia e Iehova: ‘Ko e haku a Tama hanā.’ (Mataio 3:17; Ioane 3:3) Ko e matapatu vala he “tega” he fifine kua kitia tuai. Mole atu, ne fakauku mo e fanau foki he agaaga tapu e tau tutaki ha Iesu. Ko e “fifine” ha Iehova, ne leva tigahau e logona hifo ke tuga e ‘fifine kua nakai fanau,’ ne fakahiku ke “kalaga fiafia.”—Isaia 54:1; Kalatia 3:29.
12, 13. Ko e heigoa e tau kupu tohi ne fakakite na fakakatoatoa he tau Kerisiano fakauku oti he lalolagi e “fekafekau fakamoli mo e loto matala”?
12 Ko e fakataiaga ke uaaki ke he tau mena hokulo ne fakakite ki a tautolu kua hagaao ke he finagalo he Atua ke fifili e 144,000 mai he tau tagata. (Fakakiteaga 14:1, 4) Kua talia e tautolu e fakaakoaga na fakakatoatoa he tau tagata fakauku oti ne moui he lalolagi he taha magaaho e “fekafekau fakamoli mo e loto matala” ne talahau e Iesu ke foaki e “tau mena kai” he magaaho tonu ma e haana tau fekafekau. (Mataio 24:45) Ko e heigoa e tau kupu Tohi Tapu ne fakamooli kua hako e maamaaga nei? Kua liga hagaao kia a Iesu ke he ha Kerisiano ni ne atihake e tau matakainaga haana aki e tau mena kai huhua fakaagaaga?
13 Ne tala age e Atua ke he motu ko Isaraela: “Ko e haku a tau fakamoli a mutolu, mo e haku a tau fekafekau ne fifili e au.” (Isaia 43:10) Ka e he Nisana 11 he tau 33 V.N., ne tala age a Iesu ke he tau takitaki ha Isaraela kua tiaki tuai he Atua e motu ha lautolu he eke mo fekafekau Haana. Ne pehē a ia: “To uta kehe ia mutolu e kautu he Atua, ka e age ke he taha motu ke ta mai ai e tau fua hana.” Ne pehē a Iesu ke he moto tagata: “Kitiala kua toka atu kia mutolu ha mutolu a fale kua moumou.” (Mataio 21:43; 23:38) Ko e fekafekau ha Iehova, ko e fale ha Isaraela kua nakai fakamooli po ke loto matala. (Isaia 29:13, 14) He matahiku he aho taha ia ni, he magaaho ne hūhū a Iesu: “Ko hai foki e fekafekau fakamoli mo e loto matala?” ko e kakano he hūhū haana, ‘Ko hai e motu kua loto matala ke hukui a Isaraela ke eke mo fekafekau tua fakamooli he Atua?’ Ne foaki he aposetolo ko Peteru e tali he magaaho ne tala age a ia ke he fakapotopotoaga he tau Kerisiano fakauku: “Ko mutolu . . . ko e motu tapu, mo e motu kua moua māna.” (1 Peteru 1:4; 2:9) Ko e motu fakaagaaga ia, ko “Isaraela he Atua,” ne eke mo fekafekau foou ha Iehova. (Kalatia 6:16) Ke tuga e tau tagata oti ha Isaraela i tuai ne fakakatoatoa e “fekafekau” ne tokotaha, ti pihia foki e tau Kerisiano fakauku oti he lalolagi he taha magaaho ne fakakatoatoa e “fekafekau fakamoli mo e loto matala” ne tokotaha. Ko e monuina ha ia ma tautolu ke moua e “tau mena kai” puhala he fekafekau he Atua!
Maeke ke Fiafia e Fakaakoaga Fakatagata
14. Ko e ha ne mua atu e fiafia he fakaakoaga he Tohi Tapu ke he totou holo?
14 He magaaho ka hafagi e maama foou ki a tautolu he tau Tohiaga Tapu, kua fiafia nakai a tautolu ha ko e puhala ne atihake ai e tua ha tautolu? Kakano haia kua maeke e fakaakoaga he Tohi Tapu ke mua atu e fiafia ke he totou holo. Ko e mena ia, he magaaho ka totou e koe e tau tohi faka-Kerisiano, hūhū ki a koe ni: ‘Tatai fēfē e fakamaamaaga nei ke he matakupu ne fitā he maama e au? Ko e heigoa la falu kupu po ke tau fakamooliaga he Tohi Tapu ka manamanatu au ki ai ke lalago atu foki e talahauaga ē i loto he vala tala nei?’ Kaeke kua lata ke kumikumi atu foki, kia tohi hifo e hūhū ne manako a koe ke fai tali ki ai, ti taute mogoia mo matakupu ke kumikumi ki ai i mua.
15. Ko e heigoa e tau matagahua kumikumi kua maeke ke fiafia, ti maeke fēfē ke aoga tukulagi?
15 Ko e heigoa e tau matagahua kumikumi ka foaki ki a koe e fiafia he moua e lotomatala foou? Ko e tau matagahua tuga e filifilia fakahokulo ke he tau maveheaga kehekehe ne taute he Atua ke aoga ai e tau tagata kua moua e maamaaga. Maeke ia koe ke atihake e tua haau he fakaako ke he tau perofetaaga ne tuhi atu ki a Iesu Keriso po ke filifilia e tau kupu takitaha he tau tohi fakaperofeta he Tohi Tapu. Kua atihake foki e tua ka kumikumi ke he fakamauaga tala he vahā foou nei he Tau Fakamoli a Iehova, he fakaaoga e tohi Jehovah’s Witnesses—Proclaimers of God’s Kingdom, kaeke kua ha ha e tohi nei ke he vagahau haau. * Mo e kumikumi ke he tau vala fakamua he “Tau Hūhū Mai he Tau Tagata Totou” ne taute fakailoa i loto he Ko e Kolo Toko ka takitaki mooli a koe ke moua e maamaaga foou ke he falu matakupu foki. Kia mataala pauaki ke he fakamaamaaga he tau Tohiaga Tapu ne fakaaoga ke moua aki e talahauaga fakahiku he matakupu. To lagomatai he mena nei a koe ke fakamahani haau a “manamanatuaga” mo e ke feaki e fifiliaga mitaki. (Heperu 5:14, NW) He fakaakoaga haau, kia tohi hifo e tau fakamauaga ke he lagaki he Tohi Tapu fakatagata haau ni po ke he laupepa ke maeke he fakaakoaga ke ha ha ai e aoga tukulagi ki a koe ni mo lautolu kua maeke ia koe ke lagomatai.
Lagomatai e Fanau Ikiiki ke Fiafia he Fakaako e Tohi Tapu
16. Maeke fēfē ia koe ke lagomatai e fanau ikiiki ke fiafia ke he fakaakoaga Tohi Tapu?
16 Maeke he tau matua ke lahi e mena ka taute ke fakalagalaga e manako fakaagaaga he fanau ha lautolu. Kia nakai fakateaga ke he lotomatala he fanau ke maama e tau mena hokulo. Kaeke ke kotofa e koe e matakupu ke kumikumi he fanau he tauteute ma e fakaakoaga Tohi Tapu he magafaoa, maeke ia koe ke hūhū ki a lautolu hagaao ke he tau mena ne ako ki ai. Kua maeke foki e fakaakoaga he magafaoa ke putoia e tau magaaho fakamahani ke lagomatai e fanau ikiiki ke ako e puhala ke lalago e tua ha lautolu mo e ke fakamooli kua hako e tau mena ne fakaako ki a lautolu. Lafi ki ai, maeke ke fakaaoga e porosua “See the Good Land” * ke fakaako ke he tau matakavi he Tohi Tapu mo e ke fakamahino e tau mena ne moua e koe he haau a totouaga he Tohi Tapu fakafaahi tapu.
17. Ko e ha kua lata a tautolu ke lagotatai ke he tau matagahua he fakaako fakatagata ha tautolu ke he Tohi Tapu?
17 Ko e tau matagahua ke fakaako fakatagata ke he Tohi Tapu kua fiafia lahi mo e atihake e tua, ka kia fakaeneene neke fakaaoga oti he fakaakoaga ia e magaaho ne lata ke tauteute ma e tau feleveiaaga he fakapotopotoaga. Ko e tau feleveiaaga e taha puhala ne fakaako e Iehova a tautolu puhala he “fekafekau fakamoli mo e loto matala.” Pete ia, liga to lagomatai he kumikumi fakalahi haau a koe ke talahau e tau tali kua kakano he tau feleveiaaga—ke fakatai ki ai, he Fakaakoaga Tohi he Fakapotopotoaga po ke ka fakamaama e totouaga he Tohi Tapu fakafaahi tapu he Aoga Fekafekau Fakateokarasi.
18. Ko e ha kua aoga lahi e laliaga ke fakaako e “tau mena hokulo ia he Atua”?
18 Maeke he fakaako fakatagata hokulo ke he Kupu he Atua ke lagomatai a koe ke fakatata atu ki a Iehova. He fakakite e aoga he fakaakoaga pihia, ne pehē e Tohi Tapu: “Kua eke e iloilo mo mena ke malu ai, kua eke foki e tau tupe mo mena ke malu ai; ka ko e aoga he iloilo kua moua, kua moui ai a ia ne toka ai.” (Fakamatalaaga 7:12) Ha kua pihia, kua aoga lahi e laliaga haau ke hokulo e maama ke he tau mena fakaagaaga. Ne mavehe e Tohi Tapu ki a lautolu ne kumikumi tumau: “[To] moua ai e koe e iloilo ke he Atua.”—Tau Fakatai 2:4, 5.
[Tau Matahui Tala]
^ para. 15 Taute fakailoa he Tau Fakamoli a Iehova.
^ para. 16 Taute fakailoa he Tau Fakamoli a Iehova.
Maeke Nakai a Koe ke Fakamaama?
• Ko e heigoa e “tau mena hokulo ia he Atua”?
• Ko e ha kua nakai lata ke fakaoti e fakaako ha tautolu ke he tau mena hokulo?
• Ko e ha kua hafagi ke he tau Kerisiano oti e fiafia he maama e “tau mena hokulo ia he Atua”?
• Maeke fēfē a koe ke aoga katoatoa mai he “tau mena hokulo ia he Atua”?
[Tau Hūhū he Fakaakoaga]
[Fakatino he lau 28]
I ne fe ne eke a Iesu mo Tega ne mavehe?
[Fakatino he lau 31]
Maeke e tau matua ke kotofa ke he fanau ha lautolu e tau matakupu ke kumikumi he tauteute ma e fakaakoaga he magafaoa