Tali Atu ke he Loto Manamanatu Haau

“Kua mea e tau mena oti kana ke he tau tagata loto mea, ka ko e tau tagata loto pilo mo e nakai tua, kua nakai mea ha mena taha.”​—TITO 1:15.

1. Putoia fēfē a Paulo ke he tau fakapotopotoaga i Kereta?

HE OTI katoatoa e tau fenoga misionare ne tolu he aposetolo ko Paulo, ne tapaki a ia mo e fakahiku fakafano ki Roma, ne nofo pagotā ai a ia ke ua e tau. Ko e heigoa haana ne taute he magaaho ne fakatoka mai ai? He taha magahala ni, ne aahi atu a ia ke he aelani ko Kereta fakalataha mo Tito, ko ia ne hagaao e tohi a Paulo ki ai: “Ne toka ai e au a koe i Kereta, kia fakahakohako e koe e tau mena ne toe, mo e kotofa e tau patu.” (Tito 1:5) Ko e kotofaaga ia ne taute e Tito kua putoia e tau loto manamanatu.

2. Ko e heigoa e lekua ne fehagai mo Tito he aelani ko Kereta?

² Ne fakatonu age e Paulo ki a Tito hagaao ke he tau kotofaaga he tau motua he fakapotopotoaga ti tala age “kua tokologa a lautolu kua holifono, kua vagavagahau fakahanoa, mo e fakahehe atu.” “Kua fakamafoki kehe e lautolu [nei] e falu a faoa katoa, kua fakaako foki e tau mena nakai lata.” Kua lata ia Tito ke ‘akonaki fakalahi a lautolu.’ (Tito 1:10-14; 1 Timoteo 4:7) Ne talahau e Paulo kua “pilo” e tau loto manamanatu ha lautolu, he fakaaoga e kupu ne fakamaama e ilaila, tuga e tapulu mitaki ka liga ilaila he vai fakahū. (Tito 1:15) Ko e falu tagata taane nei kua liga fai feakiaga faka-Iutaia, ha kua ‘pipiki ke he peritome.’ Ko e tau fakapotopotoaga he vahā nei kua nakai fakalolelole he tau tagata taane ne moua e tau onoonoaga pihia; ka e kua lahi agaia e mena kua ako mai e tautolu hagaao ke he loto manamanatu he fakatonuaga ne foaki e Paulo ki a Tito.

Lautolu ne Pilo e Loto Manamanatu

3. Ko e heigoa ne tohi e Paulo ki a Tito hagaao ke he loto manamanatu?

³ Mailoga e tuaga ne totoku e Paulo e loto manamanatu. “Kua mea e tau mena oti kana ke he tau tagata loto mea, ka ko e tau tagata loto pilo mo e nakai tua, kua nakai mea ha mena taha kia lautolu, ka kua pilo e tau loto, katoa mo e tau loto manamanatu hifo ha lautolu. Kua talahau e lautolu kua iloa e lautolu e Atua, ka kua fakatikai e lautolu a ia ke he tau gahua ha lautolu.” Kitia maali ai, kua fai tagata he vahā ia ne lata ke taute e tau hikiaga ke maeke ke ‘malolo ai ke he tua.’ (Tito 1:13, 15, 16) Ne nakai maeke a lautolu ke kitia e kehekehe he vahāloto he tau mena meā mo e nakai meā, ti putoia ai e loto manamanatu ha lautolu.

4, 5. Ko e heigoa e tau mena nakai katoatoa ne haia he falu i loto he fakapotopotoaga, ti lauia fēfē a lautolu?

⁴ Molea e hogofulu tau, ne fakapuloa he kau fakatufono Kerisiano kua nakai lata ke peritome ke eke mo tagata tapuaki mooli, ati fakailoa e lautolu ke he tau fakapotopotoaga oti. (Gahua 15:1, 2, 19-29) Pete ia, kua fai tagata agaia i Kereta ne ‘pipiki ke he peritome.’ Ne nakai mahalo a lautolu ke talia mo e kau fakatufono ti “fakaako foki e tau mena nakai lata.” (Tito 1:10, 11) Mo e tau manamanatu keukeu, ne liga fakaohooho e lautolu e tau matafakatufono mai he  Fakatufono hagaao ke he tau mena kai mo e tuaga meā. Ne liga fakalaulahi e lautolu e tau mena ne talahau he Fakatufono, tuga ne taute he tau tupuna ha lautolu he vahā a Iesu, ti fakaohooho foki e tau tala tuai he tau tagata Iutaia mo e tau poakiaga he tagata.​—Mareko 7:2, 3, 5, 15; 1 Timoteo 4:3.

⁵ Kua fakahagahaga kelea he manamanatuaga pihia e puhala fifili mo e mahani mitaki ha lautolu, ko e loto manamanatu. Ne tohia e Paulo: “Ko e tau tagata loto pilo mo e nakai tua, kua nakai mea ha mena taha.” Kua lahi mahaki e keukeu he loto manamanatu ha lautolu ti kua nakai maeke ke takitaki fakamitaki e tau gahua mo e tau fifiliaga ha lautolu. Mua atu, ne fakafili e lautolu e tau matakainaga Kerisiano ke he tau mena fakatagata, ko e tau mena ka liga kehe e fifiliaga he taha Kerisiano mai he taha. Ke he mena nei ne mailoga he tau tagata Kereta kua nakai meā e tau mena kua meā. (Roma 14:17; Kolose 2:16) He talahau na iloa e lautolu e Atua, ne nakai fakakite pihia he tau gahua ha lautolu.​—Tito 1:16.

‘Mea ke he Tau Tagata Loto Mea’

6. Ko e heigoa e tau vahega tagata ne totoku e Paulo?

⁶ Aoga fēfē a tautolu mai he tau mena ne tohia e Paulo ki a Tito? Kia mailoga e kehekehe i loto he talahauaga nei: “Kua mea e tau mena oti kana ke he tau tagata loto mea, ka ko e tau tagata loto pilo mo e nakai tua, kua nakai mea ha mena taha kia lautolu, ka kua pilo e tau loto, katoa mo e tau loto manamanatu hifo ha lautolu.” (Tito 1:15) Kua nakai pehē a Paulo ko e tau Kerisiano ne meā e tau mahani, kua meā mo e talia e tau mena oti kana. Kua talitonu a tautolu ke he talahauaga ia ha kua fakamahino mai e Paulo he taha tohi foki ko ia ne faivao, hufeilo ke he tupua, eke e lagatau taulaatua, mo e falu mena foki to “nakai eke ma lautolu e kautu he Atua.” (Kalatia 5:19-21) Ti lata ia tautolu ke fakahiku nukua tutala a Paulo ke he tuaga mooli he ua e vahega tagata, ko lautolu ne mahani mitaki mo e meā fakaagaaga mo lautolu ne nakai.

7. Ko e heigoa ne fakaheu he tohi a Heperu 13:4, ka ko e heigoa e hūhū ka liga mafuta hake?

⁷ Ko e tau mena kua lata he Kerisiano loto fakamooli ke kalo mai ai kua nakai fakakaupā ni ke he tau mena ne fakahala pauaki he Tohi Tapu. Ma e fakatai, manamanatu ke he talahauaga mooli nei: “Kia eke e mutolu ke mitaki he fai hoana e tau tagata oti kana, mo e mohega foki kua nakai fakakelea; ka e fakahala he Atua e tau tagata feuaki mo e faivao.” (Heperu 13:4) To liga talahau foki e lautolu ne nakai ko e tau Kerisiano mo lautolu ne nakai fai iloaaga ke he Tohi Tapu kua fakaheu he kupu nei e mahani faivao. Kua fakakite fakamahino mai he kupu nei mo e he falu vala foki he Tohi Tapu ne fakahala he Atua e matutakiaga he mahani fakataane mo e fifine he vahāloto he tagata kua mau mo e taha tagata ne nakai ko e taane po ke hoana mau haana. Ka e kua mogoia e tau tagata tokoua ne nakai mau ne putoia ke he mahani fakataane mo e fifine ke he puhala halagutu? Tokologa e tau fuata mui ne talahau kua nakai hagahaga kelea e mena nei kakano kua nakai matutaki ke he mahani fakataane mo e fifine. Kua lata kia e Kerisiano ke manatu kua meā e mahani fakataane mo e fifine ke he puhala halagutu?

8. Hagaao ke he mahani fakataane mo e fifine ke he puhala halagutu, kehe fēfē e tau Kerisiano mai he tau tagata he lalolagi?

 ⁸ Ne fakakite he Heperu 13:4 mo e 1 Korinito 6:9 kua nakai talia he Atua e mahani feuaki mo e faivao (faka-Heleni, por·neiʹa). Ko e heigoa ne putoia ke he kupu fakamui? Kua putoia ke he kupu Heleni e fakaaoga he tau vala kakano he mouiaga ke he puhala kua lata po ke fakalialia ne kelea muitui. Kua putoia e tau faahi oti kana he matutakiaga fakahanoa he mahani fakataane mo e fifine i fafo he fakamauaga faka-Tohi Tapu. Ti putoia ai foki e mahani fakataane mo e fifine ke he puhala halagutu, pete kua fitā e tala age ke he tokologa he tau fuata mui he lalolagi katoa po ke hoko mai ke talitonu kua talia e mahani fakataane mo e fifine ke he puhala halagutu. Kua nakai toka he tau Kerisiano mooli e tau manatu he ‘tau tagata ne vagavagahau fakahanoa, mo e fakahehe atu’ ke takitaki e manamanatuaga mo e tau gahua ha lautolu. (Tito 1:10) Kua pipiki mau a lautolu ke he tau tutūaga tokoluga he tau Tohiaga Tapu. Ti, he nakai lali ke kumi e hako ma e mahani fakataane mo e fifine ke he puhala halagutu, ne maama e lautolu na talahau he Tohiaga Tapu ko e mahani faivao a ia, por·neiʹa, ti kua fakamahani e loto manamanatu ha lautolu hagaao ki ai. *​—Gahua 21:25; 1 Korinito 6:18; Efeso 5:3.

Kehekehe e Tau Leo, Kehekehe e Tau Fifiliaga

9. Kaeke ke “mea e tau mena oti,” ko e heigoa mogoia e matagahua he loto manamanatu?

⁹ Ka ko e heigoa e kakano ha Paulo he magaaho ne pehē a ia “kua mea e tau mena oti kana ke he tau tagata loto mea”? Kua hagaao a Paulo ke he tau Kerisiano ne tamai e tau manamanatu mo e mahani ha lautolu ke fakatatai mo e tau tutūaga he Atua, ne moua e tautolu i loto he Kupu omoomoi haana. Ne mailoga he tau Kerisiano pihia ke he tau tutūaga loga ne nakai fakahala fakahako mai he Atua, nukua fai fakaatāaga ma e tau puhala kehekehe he tau tagata talitonu. He nakai fakafili e falu, ne mailoga e lautolu kua nakai fakahala he Atua e tau mena “mea.” Ne nakai amanaki a lautolu ke tatai oti e tau manatu he falu mo e ha lautolu hagaao ke he tau faahi kehekehe he moui ne nakai foaki fakahako mai he Tohi Tapu e takitakiaga. Kia fakatutala a tautolu ke he falu fakataiaga he mena nei.

10. Puhala fe ka liga tamai he mauhoana (po ke mauku) e paleko?

¹⁰ Kua loga e magafaoa ne taha e hoa kua Kerisiano ka e nakai la pihia ia taha. (1 Peteru 3:1; 4:3) Liga to tamai he mena nei e tau paleko loga, tuga he magaaho ka ha ha ai e mauhoana po ke mauku he taha he magafaoa. Manamanatu ke he mena ne tupu ke he hoana Kerisiano ne nakai la fakalataha e taane ke he tua haana. Ne amanaki taha he magafaoa he taane ke mau, ti taute e fakamauaga i loto he fale tapu ha Kerisitenitome. (Po ke taha he magafaoa, liga ko e matua, ne mate, ti taute e mauku i loto he fale tapu.) Ne uiina a laua, ti manako e taane ke he hoana ke ō tokoua. Ko e heigoa la ka talahau he loto manamanatu he hoana po ke fano nakai? Ko e heigoa haana ka taute? Kikite ke he tau tutūaga ua nei.

11. Fakamaama e puhala ne maeke he taha hoana Kerisiano ke manamanatu ke fano ke he mauhoana he fale tapu po ke nakai, ti ko e heigoa e fakahikuaga?

¹¹ Ne manamanatu a Lois ke he hokulo he poaki he Tohi Tapu, ‘Ati ō kehe mai ia Papelonia Lahi,’ ko e kautu he tau lotu fakavai he lalolagi. (Fakakiteaga 18:2, 4) Ne fano fakamua a ia ke he lotu ia ka taute ai e mauhoana ti iloa e ia to ole ke he tau tagata oti ne ha ha ai he fakamauaga ke fakalataha ke he tau matagahua fakalotu, tuga e liogi, lologo, po ke taute e tau mena fa mahani he lotu. Ne fakamalolō a ia ke nakai fakalataha ki ai ti nakai manako foki ke fano neke fakaohooho a ia ke holitū e loto fakamooli haana. Ne fakalilifu e Lois e taane haana mo e manako ke kaufakalataha mo ia, ko e ulu haana ne kotofa he Tohi Tapu; ka e nakai manako a ia ke fakahui e tau matapatu fakaakoaga he Tohi Tapu. (Gahua 5:29) Ko e mena ia, ne fakamaama fakamitaki e ia ke he taane haana kaeke ke fifili e taane ke fano, to nakai maeke a ia. Liga fakamaama  age kaeke ke fano a ia ti nakai talia ke fakalataha ke he falu a matagahua, liga to fakamā he mena nei e taane, ti mitaki mogoia ma e taane ke nakai fano e hoana. Ne meā e loto manamanatu haana ha ko e haana fifiliaga.

12. Liga manamanatu fēfē taha tagata mo e tali atu ke he uiina ke he mauhoana i loto he fale tapu?

¹² Ne teitei pihia foki e lekua ne fehagai mo Ruth. Ne fakalilifu e ia e taane haana, mauokafua ke fakamooli ke he Atua, mo e tali atu ke he loto manamanatu haana ne fakamahani he Tohi Tapu. He mole e manamanatu ke he tau matakupu tuga ia ha Lois, ne liogi a Ruth ti kitekite ke he “Tau Hūhū Mai he Tau Tagata Totou” he The Watchtower ia Me 15, 2002. Ne manatu e ia ne omaoma e tau Heperu tokotolu ke he poaki ke ō ke he mena ka tapuaki tupua ai, pete ia ne fakatumau e lautolu e loto fakamooli ha lautolu he nakai fakalataha ke he tau matagahua he tapuaki tupua. (Tanielu 3:15-18) Ne fifili e ia ke faihoani e taane haana ka e nakai fakalataha ke he ha matagahua fakalotu, ti kua tatai haana fifiliaga mo e loto manamanatu. Ne fakamaama fakamitaki mo e fakamahino e ia ke he taane e tau mena ne fakaatā he loto manamanatu haana a ia ke taute mo e nakai maeke ke taute. Ne amanaki a Ruth to mailoga he taane haana e kehekehe he vahāloto he tapuakiaga mooli mo e fakavai.​—Gahua 24:16.

13. Ko e ha kua nakai lata ke tupetupe he kehekehe e fakahikuaga he tau Kerisiano tokoua?

¹³ Ha kua liga kehekehe e fakahikuaga he tau Kerisiano tokoua kua pehē kia e mena ia kua nakai fai kehe e mena ka taute he tagata po ke liga kua lolelole e loto manamanatu he taha ia laua nei? Nakai. Ha ko e feua fakamua haana ke he leo kofe mo e falu matagahua pauaki he lotu, ne liga mailoga e Lois to fakahagahaga kelea lahi ki a ia ka fano. Mo e tau matutakiaga fakamua haana mo e taane ke he tau matakupu fakalotu ka liga lauia e loto manamanatu haana. Ti kua mauokafua a ia kua mitaki lahi e fifiliaga haana ki a ia.

14. Ko e heigoa e tau matakupu kua lata he tau Kerisiano ke manatu hagaao ke he fifiliaga fakatagata?

¹⁴ Ka kua kelea kia e fifiliaga ha Ruth? Nakai ko e mena ma e falu a ia ke talahau. Kua nakai lata ia lautolu ke fakafili po ke tuhituhi ki a ia he fifili ke fano ki ai ka e nakai fakalataha ke he ha matagahua fakalotu. Kia manatu e fakatonuaga ha Paulo ke he tau fifiliaga fakatagata hagaao ke he kai po ke nakai kai e falu mena: “Ko ia kua kai aua neke fakalialia a ia kia ia kua nakai kai, aua neke fakafili e ia kua nakai kai kia ia kua kai. . . . Kua tumau a ia po ke veli ke he hana ni a iki; ka e tumau ni a ia, ha kua maeke ke he Atua ke fakatumau a ia.” (Roma 14:3, 4) Ne nakai manako e Kerisiano mooli ke fakaohooho ha tagata ke fakaheu e takitakiaga he loto manamanatu ne kua fakamahani, ha ko e mena ka taute pihia kua tatai mo e nakai fanogonogo ke he leo ne liga talahau e fekau fakamoui.

15. Ko e ha kua lata ke manamanatu fakalahi ke he loto manamanatu mo e tau logonaaga he falu?

¹⁵ Ke matutaki e tuaga nei, kua lata he tau Kerisiano tokoua ke manamanatu ke he falu mena  foki, taha ko e puhala ka lauia e falu. Ne fakatonu e Paulo a tautolu: “Ke manatu ke he mena nai, aua neke tuku age he taha ha mena ke tauveli ai, po ke mena ke tupetupe ai e matakainaga.” (Roma 14:13) Liga iloa e Lois ne tupu lahi e tupetupe ha ko e tau tutūaga pihia i loto he fakapotopotoaga po ke he magafaoa haana, ti ko e mena ne taute e ia kua liga hokulo e lauiaaga ke he fanau haana. Ke he taha faahi, liga mailoga e Ruth ne nakai fakatupu he tau fifiliaga pihia e tupetupe i loto he fakapotopotoaga po ke he maaga. Ko e tau fifine tokoua​—mo tautolu oti—​kua lata ke mailoga na tētotonu e loto manamanatu ne kua fakamahani fakamitaki neke lauia e falu. Ne pehē a Iesu: “Ko ia ka fakatupetupe taha ia lautolu nai kua fakateaga, ko lautolu kua tua kia au, po kua laukauka ke he tagata ia ane tau e makaholo lahi ke he hana ua, mo e fakatomo hifo a ia ke he moana hokulo.” (Mataio 18:6) Kaeke ke fakaheu he tagata e hatakiaga neke fakatupetupe falu, to liga moua e ia e loto manamanatu kua pilo, tuga e falu Kerisiano i Kereta.

16. He fai magaaho ne mole, ko e heigoa e tau hikiaga ma e Kerisiano ne amanaki a tautolu ki ai?

¹⁶ Ko e tupuaga fakaagaaga he Kerisiano kua lata ke hololoa, ti pihia foki e holo ki mua haana ke fanogonogo mo e tali atu ke he loto manamanatu haana. Kia manamanatu la ki a Mark, ne papatiso laia. Ne tala age e loto manamanatu haana ke tiaki e tau gahua nakai faka-Tohi Tapu ne taute fakamua e ia, liga putoia e tau tupua po ke toto. (Gahua 21:25) Ti he mogonei, kua tiaki katoatoa e ia e tau mena ne teitei tatai ke he tau mena ne fakahala he Atua. Ke he taha faahi, kua ofo a ia hagaao ke he kakano ne tiaki he falu e tau mena ne fiafia a ia ki ai, tuga e falu polokalama he televisoni.

17. Fakamaama e puhala ka liga lauia e loto manamanatu mo e tau fifiliaga he Kerisiano ha kua fai magaaho ne mole mo e he tupu fakaagaaga a ia.

¹⁷ Fai magaaho, ne tupu ki mua e iloilo ha Mark ti fakatata fakalahi atu ke he Atua. (Kolose 1:9, 10) Ko e heigoa e lauiaaga? Ko e leo he loto manamanatu haana kua moua e fakamahani lahi. Mogonei kua hihiga lahi a Mark ke fanogonogo ke he loto manamanatu haana mo e ke filifilia e tau matapatu fakaakoaga he Tohi Tapu. Ati mailoga e ia ko e tau mena ne “teitei tatai” ne tiaki e ia kua nakai kehe mai he manamanatuaga he Atua. Mua atu, ha kua matakaki lahi ke he tau matapatu fakaakoaga he Tohi Tapu mo e fakamakai ke tali atu ke he loto manamanatu haana ne kua fakamahani, kua omoi mogonei he loto manamanatu ha Mark a ia ke tiaki e tau polokalama ne fiafia fakamua ki ai. E, kua fakameā e loto manamanatu haana.​—Salamo 37:31.

18. Ko e heigoa ne fakatupu e fiafia ha tautolu?

¹⁸ Ke he laulahi he tau fakapotopotoaga, kua haia e tau tagata he tau tutūaga kehekehe he tupuaga faka-Kerisiano. Ko e falu ia lautolu kua foou ke he tua. Ko e loto manamanatu ha lautolu kua liga nonoiki ke he falu matakupu, ka e vagahau fakalahi hagaao ke he falu mena. Ko lautolu ia kua liga lata ke fai magaaho mo e fai lagomatai ke fakatatai atu ke he takitakiaga a Iehova mo e tali atu ke he loto manamanatu ni ha lautolu ne kua fakamahani. (Efeso 4:14, 15) Fiafia ai, he tau fakapotopotoaga ia ni, kua liga ha ha ai falu ne mua atu e iloilo, mahani lahi he fakagahuahua e tau matapatu fakaakoaga he Tohi Tapu, mo e moua e loto manamanatu ne felauaki lahi mo e manamanatuaga he Atua. Ko e fiafia ha ia ke fakalataha mo e “tau tagata loto mea” ne mailoga kua talia he Iki e mahani mitaki mo e “mea” fakaagaaga! (Efeso 5:10) Kia foli ā a tautolu oti ke tutupu hake ke he tuaga pihia mo e fakatumau ke fakatauō e loto manamanatu pihia mo e maama mitaki ke he kupu mooli mo e mahani Atua.​—Tito 1:1.

[Matahui Tala]

To Tali Fēfē e Koe

• Ko e ha ne pilo ai e tau loto manamanatu he falu Kerisiano i Kereta?

• Ko e ha ne kehekehe e tau fifiliaga ne taute he tau Kerisiano tokoua ne ha ha ai e tau loto manamanatu ne fakamahani fakamitaki?

• He fai magaaho, ko e heigoa kua lata ke tupu ke he loto manamanatu ha tautolu?

[Tau Hūhū he Fakaakoaga]

[Mepe he lau 14]

(Ma e puhala katoa ne tohi aki, kikite e tohi)

Sisilī

HELENI

Kereta

ASIA TOTE

Kuperu

TAHI METITERANEANI

[Fakatino he lau 16]

Ua e Kerisiano ne taha e tuaga ne fehagai ki ai ka liga taute e tau fifiliaga kehekehe