Fakaako e Tama Haau ke Aga Mafola

He fiafia lahi ko e hiki fai e magafaoa haana ke he taha faahi mamao he motu, ne tala tumau a Nicole ne valu e tau he moui ke he kapitiga uho haana ko Gabrielle ke he tau mena oti. He taha aho, ne amanaki ni a Gabrielle ti vale ki a Nicole kua ai fia iloa a ia he hiki haana. He mamahi lahi mo e ita, ne tala age a Nicole ke he matua fifine haana, “Ai fia liu au ke kitia a Gabrielle!”

KO E tau lekua he tau fanau ikiiki tuga ha Nicole mo Gabrielle kua mahani ke fakatonu he tau matua​—nakai ni ke fakatotoka e logonaaga mamahi ka e fakakite foki e puhala ke taute aki e lekua. Kua fakakite pauaki he tau fanau ikiiki e “tau mahani he tama tote,” ti nakai mailoga e lautolu e hukia ka tupu mai he tau kupu mo e tau gahua ha lautolu. (1 Korinito 13:11) Kua lata ke lagomatai a lautolu ke feaki e tau aga ne maeke ke lafi ke he tau fakafetuiaga mafola mo e falu i loto he magafaoa mo e falu mena foki.

Ko e tau matua Kerisiano kua manako lahi ke fakamahani e tau fanau ha lautolu ke “kumi e mafola mo e tutuli ki ai.” (1 Peteru 3:11) Ko e fiafia ka moua mai he taute e mafola ati kua aoga ai ke lali fakalahi ke kautū mai he tau logonaaga tuahā, hogohogo manava, mo e fakafualoto. Kaeke ko e matua a koe, maeke fēfē ia koe ke fakaako e tau fanau haau ke aga mafola?

Atihake e Manako ke Fakafiafia ‘e Atua he Mafola’

Kua fakahigoa a Iehova ko e ‘Atua haana e mafola,’ ti kua iloa ko e Atua ne ha ha e ‘mafola.’ (Filipi 4:9; Roma 15:33) Ti, ko e tau matua lotomatala kua fakaaoga fakailoilo e Kupu he Atua, ko e Tohi Tapu, ke feaki ke he tau fanau ha lautolu e manako ke fakafiafia e Atua mo e fifitaki e tau mahani haana. Ma e fakatai, lagomatai e tau fanau ha mutolu ke fakatino ke he tau loto e aposetolo ko Ioane ne kitia e fakakiteaga ofoofogia​—ko e tagaloa homo ue atu ne lanu samaraki, kua agaagai he nofoaiki ha Iehova. * (Fakakiteaga 4:2, 3) Fakamaama ko e tagaloa nei kua hagaao ke he mafola mo e milino ne agaagai ia Iehova mo e ko e tau monuina pihia to moua e lautolu oti kua omaoma ki a ia.

 Kua foaki foki e Iehova e tau takitakiaga puhala mai he haana Tama, ko Iesu, ne fakahigoa ko e ‘Iki he Mafola.’ (Isaia 9:6, 7) Ko e mena ia, totou ti fakamaama ke he tau fanau ha mutolu e tau tala Tohi Tapu ne fakaako e Iesu e tau fakaakoaga aoga ke kalo mai he latau mo e taufetoko. (Mataio 26:51-56; Mareko 9:33-35) Fakamaama hagaao ki a Paulo, ko ia he taha vahā ne “fakakelea atu,” ne hiki ai haana tau puhala ti tohi “kua nakai lata ke taufetoko e fekafekau he Iki, ka kia mahani molu a ia ke he tau tagata oti, . . . kia fakauka a ia.” (1 Timoteo 1:13; 2 Timoteo 2:24) To liga ofo a koe he fiafia ha ko e tali he tama haau.

Ne manatu e Evan a ia he fitu e tau ne vaiga he taha tama taane he pasi aoga. “Ne ita lahi au ke he tama taane ia ti loto au ke taui atu!” he talahau e ia. “Ka kua manatu e au e fakaakoaga ne ako i kaina hagaao ki a lautolu ne fakalagalaga tau. Ne iloa e au kua manako a Iehova ki a au ke ‘nakai taui atu e kelea ke he kelea he taha’ ka “kia nonofo fakamitaki mo e tau tagata oti kana.” (Roma 12:17, 18) Ne moua mogoia e Evan e mauokafua mo e loto malolō ke tali totonu ke he tuaga fakaita nei. Ne manako a ia ke fakafiafia e Atua he mafola.

Kia Eke mo Matua Aga Mafola

Kua ha ha nakai he kaina haau e takatakaiaga mafola? Kaeke ke pihia, to lahi e mena he tau fanau haau ka ako ke he mafola he kitekite ki a koe. Ke lauia mitaki e tau fakaakoaga haau ke he tau fanau ke moua e aga mafola, kua fakavē ni ke he puhala kua fifitaki e koe e mafola he Atua mo e Keriso.​—Roma 2:21.

Ko Russ mo Cindy ne gahua lahi ke fakaako e fanau taane tokoua ha laua, he tomatoma ki ai ke fehagai ke he puhala fakaalofa ka fakahogohogo manava he falu a laua. Pehē a Cindy, “Ko e aga ha maua mo Russ ne fakatātā ke he fanau taane mo e ke he falu he magaaho ka tutupu e tau mena vihi kua aoga lahi ke he puhala ka fehagai e fanau taane ha maua ke he tau tuaga pihia.”

Pete ka taute e koe e mena hepe​—ti fai matua kia ne nakai hepe?—​kua maeke agaia ia koe ke fakaaoga e magaaho ia ke foaki e fakaakoaga aoga. “Ne fai magaaho au mo e hoana haaku ko Terry, ne fa ita ti akonaki e tau fanau tokotolu ha maua ka e nakai iloa e tala katoa,” he talahau e Stephen. “He tau magaaho pihia, ne fakamolemole age a maua.” Ne lafi e Terry: “Ne tala age e maua ke he tau fanau kua nakai mitaki katoatoa foki a maua ti hepe foki e tau mena taute. Manatu e maua kua nakai ni lafi e mena nei ke he mafola he magafaoa ha maua ka kua lagomatai foki e tau fanau ke ako e puhala ke taofi e mafola.”

Kua ako nakai he tau fanau haau ke aga mafola he kitia e puhala ne fehagai a koe ki a lautolu? Ne tomatoma e Iesu: “Ko e tau mena oti kua loto a mutolu ki ai, ke eke he tau tagata kia mutolu; ati eke ā e mutolu e tau mena ia kia lautolu.” (Mataio 7:12) Pete he tau kūkū haau, kia mafanatia ko e fakaalofa mo e hofihofi noa ne fakakite e koe ke he tau fanau haau to fai fua mitaki. To makai e tau fanau haau ke talia fiafia e fakatonuaga ka taute mo e fakaalofa.

 Kia Fakatuai ke he Ita

Pehē mai e Tau Fakatai 19:11: “Kua fakatuai e tagata ke ita, ha ko e hana loto manamanatu.” Maeke fēfē ia koe ke lagomatai e tau fanau haau ke feaki e loto manamanatu pihia? Ne fakamaama e David e puhala aoga ne moua e ia mo e hoana haana ko Mariann ke lagomatai aki e tama taane mo e tama fifine ha laua. Ne pehē a ia: “Ka ita a laua ke he taha tagata ne talahau po ke taute taha mena fakamamahi ki a laua, ne lagomatai e maua a laua ke moua e feofanaki. Ne hūhū e maua kia laua e tau hūhū mukamuka tuga: ‘Kua tupetupe kia e tagata he aho ia? Kua liga mahekeheke kia a ia? Kua fai tagata kia ne kua fakamamahi e tagata ia?’ ”? Ne lafi e Mariann, “Kua hihiga e mena nei ke fakatotoka e fanau ti nakai fakaatā a laua ke takele he tau manatu kelea po ke tau fetoko ko hai ne hako po ke hepe.”

Kua maeke e tau fakaakoaga pihia ke moua e tau fua mitaki lahi. Mailoga a Nicole, ne totoku he kamataaga he vala nei, ne lagomatai he matua fifine haana, ko Michelle, a ia ke he puhala kua mua e aoga ka e nakai ni ko e taute ke liu ke he kapitiga haana ko Gabrielle. “Ne totou e au mo Nicole e veveheaga 14 he tohi Learn From the Great Teacher,” he talahau e Michelle. * “Ti fakamaama e au e kakano ne pehē a Iesu kua lata ia tautolu ke fakamagalo e taha tagata ‘ke laga fitugofulu kua taki fitu.’ He mole e fanogonogo fakamitaki au ki a Nicole he talahau e tau logonaaga haana, ne lagomatai e au a ia ke logona hifo e momoko mo e tupetupe ha Gabrielle ha ko e hiki mamao fai e kapitiga uho haana.”​—Mataio 18:21, 22.

He maamaaga foou ha Nicole ke he kakano ne vale pihia a Gabrielle ne lagomatai a ia ke feaki e feofanaki ti omoi a ia ke vilo ki a Gabreille ke fakamolemole. “Tali mai he magaaho ia,” he talahau e Michelle, “ne fiafia a Nicole ke manamanatu ke he tau logonaaga he falu mo e taute e tau mena mitaki ke fakafiafia a lautolu.”​—Filipi 2:3, 4.

Lagomatai e tau fanau ha mutolu ke kalo mai he hogohogo manava ha ko e tau hehē mo e nakai femaamaaki. Liga to fiafia a koe ke kitia e tau fanau ikiiki haau he fakakite e totonu mooli mo e feofanaki ke he falu.​—Roma 12:10; 1 Korinito 12:25.

Fakamalolō ke Fakaheke e Fakamagaloaga

“Ko e hana fakahekeaga . . . ke nakai manatu a ia ke he mena ne holifono ai e tagata kia ia,” he talahau he Tau Fakatai 19:11. He magaaho mamahi lahi mahaki, ne fifitaki e Iesu e Matua haana mo e fakakite e aga fakamagalo. (Luka 23:34) Maeke e tau fanau haau ke ako e fakaheke ke he fakamagaloaga he magaaho ka logona fakatagata e lautolu e mafanatia he fakamagaloaga haau.

Ma e fakatai, ko Willy ne lima e tau he moui ne fiafia lahi ke vali fakatino mo e tupuna fifine haana. He taha magaaho, ne amanaki ni e tupuna fifine ti tuku e gahua, vale ki a Willy, ti fano. Ne momoko a Willy. Ne pehē e matua taane haana ko Sam: “Kua matematekelea e tupuna fifine ha Willy he gagao Alzheimer. Ti fakamaama e maua e mena nei ki a Willy ke he vagahau ne maeke ia ia ke maama.” He mole e fakamanatu  ki a Willy kua lagaloga e fakamagalo ki a ia ti kua lata ia ia ke taute pihia foki ke he falu, ne ofo lahi a Sam he tali ha Willy. “Maeke nakai ia koe ke manamanatu ke he logonaaga ha maua mo e hoana haaku,” he talahau e Sam, “he onoono atu ke he tama taane tote ha maua he fano ke he tupuna fifine haana ne 80 e tau tau he moui, tutala ki a ia ke he leo fakamolemole, ti totō e lima he liu luaki mai a ia ke he laulau?”

Ko e fakahekeaga mooli a ia ka ako he tau fanau ke “fefakaukaaki” ke he tau lolelole mo e hepe he falu ti fakamagalo ki a lautolu. (Kolose 3:13) Pete foki ka mahani fakahanoa e tau tagata, fakamafana ke he tama haau na mua e malolō he tali mafola, to “fiafia a Iehova ke he tau puhala he tagata; ti eke e ia ke mafola ai a lautolu mo e tau tagata ne fai fi kia ia.”​—Tau Fakatai 16:7.

Tumau ke Lagomatai e Tama Haau ke Aga Mafola

Ka fakaaoga he tau matua e Kupu he Atua ke fakaako e tau fanau ha lautolu he tau takatakai “mafola” mo e eke foki ke tuga a “lautolu kua fakatupu ai e mafola,” ko e punaaga monuina mooli ma e tau fanau ha lautolu. (Iakopo 3:18) Ko e tau matua pihia kua fakaako e tau hologa ha lautolu ke he tau puhala kua lata ke fakatotoka aki e tau fekehekeheaki mo e ke aga mafola. Kua lauia lahi e mena nei ke he fiafia mo e fakaaue ha lautolu he moui katoa.

Ko Dan mo Kathy ne tolu e fanau fuata mui ti kua mitaki e tupuaga fakaagaaga ha lautolu. “Pete kua ha ha e tau paleko he fakaako a lautolu he vahā ikiiki,” he talahau e Dan, “kua fiafia lahi a maua ke he fua mitaki he tau fanau. Kua mafola e tau fakafetuiaga ha lautolu mogonei mo e falu, ti fakamagalo fiafia e lautolu falu kaeke ke fakahagahaga kelea e mafola.” Pehē a Kathy, “Kua fakamalolō pauaki he mena nei a maua, ha ko e mafola e taha fua he agaaga he Atua.”​—Kalatia 5:22, 23.

Kua fai kakano aoga mogoia e tau matua Kerisiano ke nakai “fakalolelole” he fakaako e tau fanau ha mutolu ke nonofo mafola​—pete ni kua tuga ke fakatuai he magaaho fakamua. He taute pihia e koe, kia mafanatia kua “ha ha i ai ia mutolu e Atua hana e fakaalofa mo e [“mafola,” NW].”​—Kalatia 6:9; 2 Korinito 13:11.

[Tau Matahui Tala]

[Puha/Fakatino he lau 32]

KO E FAKAOHOOHOAGA MITAKI KIA?

Ko e esei ne tohi he Media Awareness Network ne mataulu “Favale he Fakafiafiaaga Uta Tala” ne talahau: “Ko e vale ko e puhala ke fakamitaki aki e tau lekua ne kua fakamalolō he fakafiafiaaga ti hokotia ke latau tumau e tau tagata kelea mo e tau toa.” Kua kavi ke 10 e pasene he tau polokalama televisoni, kifaga, mo e tau vitiō leo kofe ne hakahaka e hagahaga kelea he favale. Ne talahau he esei, kua “fakakite noa ni e favale ke tuga na hako, ko e mena aga mau ti kua latatonu​—ko e puhala maaliali lahi a ia ke taute aki e tau lekua.”

Kitia nakai e koe e lata ke taute e tau hikiaga ke he kitekite televisoni he kaina haau? Kia nakai fakaatā e fakafiafiaaga uta tala ke fakalolelole e tau laliaga haau ke fakaako e fanau haau ke aga mafola.

[Fakatino he lau 29]

Feaki ke he tau fanau haau e manako ke fakafiafia ‘e Atua he mafola’

[Fakatino he lau 30]

Lali ke fai magaaho ke fakahako e tau kupu vagahau mo e tau gahua fakahukia

[Fakatino he lau 31]

Lata e tau fanau haau ke ako ke fakamolemole mo e ke fakamagalo