Feaki e Tau Mahani ka Lagomatai a Koe ke Taute Tutaki
Feaki e Tau Mahani ka Lagomatai a Koe ke Taute Tutaki
“Hanei, kia o atu a a mutolu ke eke e tau motu oti kana mo tutaki.”—MATAIO 28:19.
1. Ko e heigoa e tau makaka mo e tau aga ne lata ma e tau fekafekau he Atua he vahā kua mole?
KUA lata e tau fekafekau ha Iehova he falu magaaho ke feaki e tau makaka mo e tau aga ke lagomatai a lautolu ni ke taute e finagalo haana. Ke tuga anei, ha ko e poaki he Atua, ne toka e Aperahamo mo Sara e maaga mahuiga ko Uro ti he magaaho fakamui kua lata a laua ke feaki e tau mahani mo e lotomatala ne latatonu ma e tau tagata nonofo fale ie. (Heperu 11:8, 9, 15) He takitaki e tau Isaraela ke he Motu he Maveheaga kua lata ke moua e Iosua e malolō, mauokafua ki a Iehova, mo e iloilo ke he Fakatufono haana. (Iosua 1:7-9) Ti ko e heigoa ne tau makaka ne liga fitā he moua e Pesaleli mo Aliavu, nukua fakalaulahi po ke fakatupu mooli ni ki mua he agaaga he Atua ke maeke he tau tagata taane nei ke kautū he leveki e atihakeaga he faituga utafano mo e tau gahua pihia.—Esoto 31:1-11.
2. Ko e heigoa e tau hūhū ka fakatutala e tautolu hagaao ke he gahua taute tutaki?
2 He tau senetenari fakamui, ne foaki e Iesu Keriso ke he tau tutaki haana e poakiaga nei: “Kia o atu a a mutolu ke eke e tau motu oti kana mo tutaki, . . . ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Ne nakaila foaki ke he tau tagata ha kotofaaga ke taute taha mena pehēnei. Ko e heigoa e tau mahani kua lata ma e gahua taute tutaki? Maeke fēfē a tautolu ke feaki e tau aga pihia?
Fakakite e Fakaalofa Hokulo ma e Atua
3. Ko e heigoa e fifiliaga ne poaki mai ki a tautolu ke taute tutaki?
3 He tutala atu ke he tau tagata mo e lali ke omoomoi a lautolu ke tapuaki ke he Atua mooli nukua lata ke moua e tautolu e fakaalofa hokulo ma Iehova. Ne maeke e tau Isaraela ke fakakite mooli e fakaalofa ha lautolu ma e Atua he omaoma mo e loto katoa ke he tau poakiaga haana, foaki e tau poa kua tonu, mo e fakaheke a ia ke he tau lologo. (Teutaronome 10:12, 13; 30:19, 20; Salamo 21:13; 96:1, 2; 138:5) He eke mo tau tagata taute tutaki, kua kuku foki e tautolu e tau fakatufono he Atua, ka e fakakite foki e tautolu e fakaalofa ma Iehova he tala ke he falu hagaao ki a ia mo e tau finagalo haana. Lata ia tautolu ke vagahau mo e mauokafua, he fifili e tau kupu kua hako ke fakakite aki e tau logonaaga mai he loto hagaao ke he amaamanakiaga ne foaki he Atua ha tautolu.—1 Tesalonia 1:5; 1 Peteru 3:15.
4. Ko e ha ne olioli a Iesu ke fakaako e tau tagata hagaao ki a Iehova?
4 Ha kua hokulo e fakaalofa haana ma Iehova, ne fiafia lahi a Iesu he tutala hagaao ke he tau finagalo he Atua, ko e Kautu, mo e tapuakiaga mooli. (Luka 8:1; Ioane 4:23, 24, 31) Ne talahau mooli e Iesu: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34) Ne hagaao e tau kupu nei he salamo ki a Iesu: “Haku Atua na e, kua fiafia au ke eke hāu a finagalo; ha i loto ia au hau a fakatufono. Kua fakamatala e au e tututonu ke he fakapotopotoaga lahi; kitiala, kua nakai taofi e au haku tau laugutu, Iehova na e, kua fioia ni e koe.”—Salamo 40:8, 9; Heperu 10:7-10.
5, 6. Ko e heigoa e matapatu mahani kua latatonu ma e tau tagata taute tutaki?
5 Ha kua fakaohooho he fakaalofa ma e Atua, ko lautolu ne foou ne ako laia e kupu mooli he Tohi Tapu kua fa tutala mo e mauokafua hagaao ki a Iehova mo e Kautu, ti fa lauia mitaki a lautolu he omoomoi e falu ke kumikumi ke he tau Tohiaga Tapu. (Ioane 1:41) Ko e fakaalofa ma e Atua ko e matapatu mahani ne fakaohooho aki a tautolu ke fakalataha ke he gahua taute tutaki. Ati matutaki ā a tautolu ke fakalagalaga e fakaalofa ia he totou tumau mo e he manamanatu hokulo ke he Kupu haana.—1 Timoteo 4:6, 15; Fakakiteaga 2:4.
6 Ko e fakaalofa ma Iehova ne lagomatai mooli a Iesu Keriso ke eke mo faiaoga makutu. Ka e nakai kuenaia e kakano ne lauia mitaki e fakapuloa haana he Kautu. Ti ko e heigoa foki taha puhala ne kautū a Iesu he eke mo tagata taute tutaki?
Fakakite e Manamanatu Fakaalofa ma e Tau Tagata
7, 8. Fēfē e onoonoaga ha Iesu ke he tau tagata?
7 Ne kapaletū a Iesu hagaao ke he tau tagata mo e manamanatu fakalahi ki a lautolu. Pihia foki he eke ko e “iki gahua” he Atua he magaaho ne nakaila tino tagata, ne fiafia a ia ke he tau mena hagaao ke he tau tagata. (Tau Fakatai 8:30, 31) He eke ko e tagata he lalolagi, ne fakaalofa hohofi a Iesu ke he tau tagata, he foaki e okioki ki a lautolu ne o mai ki a ia. (Mataio 11:28-30) Ne fakaata e Iesu e fakaalofa mo e fakaalofa hofihofi ha Iehova, ti futia he mena nei e tau tagata ke he tapuakiaga he Atua mooli tokotaha. Ne fanogonogo a lautolu oti ne o mai he tau vahega tagata kehekehe ki a Iesu ha kua manamanatu fakaalofa a ia ki a lautolu mo e tau tutūaga ha lautolu.—Luka 7:36-50; 18:15-17; 19:1-10.
8 He magaaho ne hūhū taha tagata ko e heigoa kua lata ia ia ke taute ke moua e moui tukulagi, ne “kitekite atu a Iesu kia ia, kua fakaalofa kia ia.” (Mareko 10:17-21) Hagaao ke he falu tagata ne fakaako e Iesu i Petania, ne totou e tautolu: “Ne fakaalofa ni a Iesu, kia Mareta, mo e hana matakainaga, katoa mo Lasalo.” (Ioane 11:1, 5) Ne hofihofi lahi e fakaalofa ha Iesu ma e tau tagata ati fakatō e ia e magaaho okioki haana ke fakaako a lautolu. (Mareko 6:30-34) Ko e kapaletū mo e fakaalofa hokulo pihia ma e tau katofia tagata ati mahomo hake e lauia mitaki ha Iesu ke he ha tagata foki, he tamai e tau tagata takitokotaha ke he tapuakiaga mooli.
9. Ko e heigoa e aga ne ha ha ia Paulo ko e tagata taute tutaki?
9 Ne hokulo foki e kapaletū he aposetolo ko Paulo ke he tau tagata ne fakamatala a ia ki ai. Ke tuga anei, ne tala age a ia ki a lautolu ne eke mo tau Kerisiano i Tesalonia: “Ne hofihofi pihia ha mautolu a fakaalofa kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu, ha kua ofania e mautolu a mutolu.” Ko e fua he tau laliaga ha Paulo, ko e falu i Tesalonia ‘ne hagaao kehe mai he tau tupua ke fekafekau ke he Atua moui.’ (1 Tesalonia 1:9; 2:8) Kaeke ke kapaletū mooli a tautolu ma e tau tagata, tuga a Iesu mo Paulo, to iloa foki e tautolu e fiafia he kitia e tala mitaki hane hokotia ke he tau loto ha lautolu “ne kotofa ke he moui tukulagi.”—Gahua 13:48.
Fakatātā e Agaaga Foaki Noa
10, 11. Ko e ha kua lata ke moua e agaaga foaki noa he magaaho ka lali a tautolu ke taute tutaki?
10 Haia he tau tagata taute tutaki ne kautū e agaaga foaki noa. Kua nakai eke e lautolu e mouaaga he tau koloa mo mena kua mua e aoga. Ka kua pehē a Iesu ke he tau tutaki haana: “Ko e mena uka ke hu atu e tau tagata muhu koloa ke he kautu he Atua.” Ne ofomate e tau tutaki he logona e mena nei, ka e lafi e Iesu: “Ma fanau na e, ko e mena uka ke huhu a lautolu kua tua ke he koloa ke he kautu he Atua. Mena maeke vave ke hu atu e kamela ke he pu he nila, ka e uka ke hu atu e tagata muhu koloa ke he kautu he Atua.” (Mareko 10:23-25) Ne tomatoma age e Iesu e puhala moui mukamuka ke he tau tutaki haana ke maeke a lautolu ke manamanatu hokulo ke he gahua taute tutaki. (Mataio 6:22-24, 33) Ko e ha kua lagomatai he agaaga foaki noa a tautolu ke taute tutaki?
11 He fakaako e tau mena oti ne poaki e Iesu kua lata ni ke lali fakamakamaka. Ne fa fakamakamaka e tagata taute tutaki ke takitaki e fakaakoaga Tohi Tapu he tau faahi tapu oti mo e tagata fiafia. Ke fakatolomaki ki mua e tau puhala ke moua e tau tagata loto fakamooli, kua hiki mai e gahua tupe tumau he falu tagata fakapuloa he Kautu ke gahua vala magaaho. Kua totou afe e tau Kerisiano ne ako e taha vagahau foki ke maeke ke fakamatala ke he matakau vagahau kehe he matakavi ha lautolu. Ko e falu tagata taute tutaki ne toka e tau kaina ti o atu ke he taha matakavi po ke motu kehe ke putoia katoatoa ke he heleheleaga. (Mataio 9:37, 38) Ko e tau mena oti nei kua lata ni mo e agaaga foaki noa. Ka kua fai mena foki kua lata ke moua ke kautū he eke mo tagata taute tutaki.
Kia Fakauka ka e Nakai Moumou Magaaho
12, 13. Ko e ha kua aoga lahi e fakauka he taute tutaki?
12 Ko e fakauka e taha mahani ka lagomatai a tautolu ke taute tutaki. Ko e fekau faka-Kerisiano ha tautolu kua lata ke fakamafiti, ka kua fa mahani ke lahi e magaaho ke taute tutaki ti lata ni ke fakauka. (1 Korinito 7:29) Ne fakauka a Iesu ke he matakainaga haana ko Iakopo. Pete he iloa lahi e Iakopo e tau gahua fakamatala ha Iesu, ne fai vahā ne mataofi a ia he eke mo tutaki. (Ioane 7:5) Ka e he magaaho kū he vahāloto he matulei he Keriso mo e Penetekoso 33 V.N., ne eke mooli a Iakopo mo tutaki, ha kua talahau he tau Tohiaga Tapu ne fano a ia ke liogi auloa mo e matua fifine haana, tau matakainaga haana, mo e tau aposetolo. (Gahua 1:13, 14) Ne holo ki mua fakaagaaga a Iakopo, ti fakamui ne fua e ia e tau matagahua mamafa i loto he fakapotopotoaga.—Gahua 15:13; 1 Korinito 15:7.
13 Tuga e tau tagata gahua fonua, hane feaki he tau Kerisiano e tau mena ne fa tutupu fakatekiteki—ko e maama e Kupu he Atua, fakaalofa ma Iehova, mo e agaaga tuga he Keriso. Ti kua latatonu ni ke fakauka. Ne tohia e Iakopo: “Ko e tau matakainaga na e, kia fakauka a mutolu ato hohoko ke he [“ha ha hinei,” NW] he Iki; kitiala, kua tatali atu e tagata gahua fonua ke he tau fua mitaki he kelekele, mo e fakauka ki ai, ato moua e ia e uha fakamua mo e fakamui. Kia fakauka foki a mutolu, kia fakamau ha mutolu a tau loto, ha kua tata e [“ha ha hinei he,” NW] Iki.” (Iakopo 5:7, 8) Ne fakamafana e Iakopo e tau matakainaga talitonu ke ‘fakauka ato hohoko ke he ha ha hinei he Iki.’ Kaeke kua fai mena ne nakai maama he tau tutaki, ne fakauka a Iesu ke fakamahino po ke talahau e fakataiaga hagaao ki ai. (Mataio 13:10-23; Luka 19:11; 21:7; Gahua 1:6-8) Mogonei kua hoko mai tuai e Iki, kua lata foki ke moua e fakauka he fakamakamaka a tautolu ke taute tutaki. Ko lautolu ne eke mo tau tutaki ha Iesu he vahā ha tautolu kua lata ke fakauka he fakaako ai.—Ioane 14:9.
14. Pete he fakauka a tautolu, kua maeke fēfē ia tautolu ke fakaaoga fakapulotu e tau magaaho ko e tau tagata taute tutaki?
14 Pete he fakauka a tautolu, kua nakai moui e kupu ke he laulahi he tau tagata ne kamata e fakaakoaga Tohi Tapu mo tautolu. (Mataio 13:18-23) He mole mogoia e taute e tau laliaga kua lata ke lagomatai a lautolu, kua pulotu ni a tautolu ke nakai fakamole e tau magaaho ke he tau tagata pihia mo e kumi ke moua a lautolu ka liga tokiofa e kupu mooli he Tohi Tapu. (Fakamatalaaga 3:1, 6) Mooli, kua lata foki ke fai lagomatai e tau tagata loto fakaaue ke hiki e tau onoonoaga, tau aga, mo e tau mena ka tuku fakamua he moui. Ti kua fakauka a tautolu, tuga na Iesu ne fakauka ke he tau tutaki haana ne uka lahi ke moua e aga kua hako.—Mareko 9:33-37; 10:35-45.
Feaki e Puhala Fakaako
15, 16. Ko e ha kua aoga e fakamukamuka mo e tauteute fakamitaki he magaaho ka taute tutaki a tautolu?
15 Ko e fakaalofa ma e Atua, kapaletū ke he tau tagata, ko e agaaga foaki noa, mo e fakauka ko e tau mahani aoga lahi ke kautū he taute tutaki. Kua lata foki e tau puhala fakaako ke feaki, ha kua taute a tautolu ke fakamaama e tau matakupu ke he puhala maaliali, mo e mukamuka. Ke fakatai ki ai, kua mua e malolō he tau talahauaga loga he Faiaoga ne Mua, ko Iesu Keriso, ha kua fakamukamuka. Kua liga manatu e koe e tau talahauaga pihia ha Iesu ne tuga anei: “Kia tanaki e mutolu e tau koloa ma mutolu ke he lagi.” “Aua neke age e mutolu e mena tapu ke he tau kuli.” “Ti talahaua tututonu e pulotu he tau fanau hana.” “Ko e tau mena a Kaisara, kia uta a e mutolu kia Kaisara; ka ko e tau mena he Atua, kia uta a ke he Atua.” (Mataio 6:20; 7:6; 11:19; 22:21) Mooli, ne nakai ni kūkū e tau talahauaga a Iesu. Ne maaliali e fakaakoaga haana mo e fakamaama e ia e tau mena he magaaho kua lata. Maeke fēfē a koe ke fifitaki e puhala fakaako ha Iesu?
16 Ko e tauteute fakamitaki ko e kei ke fakamukamuka mo e fakamaaliali. Ko e fekafekau ne nakai tauteute tuai kua hihiga ke tala tumau. Ti liga kua fakalavelave e ia e tau matapatu manatu he lahi e tala, ti talahau e tau mena oti ne iloa e ia ke he matakupu. Ke he taha faahi, ko e fekafekau ne tauteute fakamitaki kua manamanatu ke he tagata ne fakaako e ia, manamanatu fakahokulo ke he mataulu, ti fakamahino ne tau mena kua lata. (Tau Fakatai 15:28; 1 Korinito 2:1, 2) Ne mauloto e ia e tau mena kua fitā he iloa he tagata fakaako mo e tau manatu kua lata ke peehi he fakaakoaga. Liga iloa he fekafekau e tau talahauaga matafeiga loga hagaao ke he matakupu, ka e maaliali ni e fakaakoaga ka tiaki e tau vala tala ne nakai lata.
17. Lagomatai fēfē e tautolu e tau tagata ke manamanatu ke he tau Tohiaga Tapu?
17 Ne lagomatai foki e Iesu e tau tagata ke manamanatu, he nakai tala age hokoia ni he tau tali ki a lautolu. Ke he taha magaaho, ke fakatai ki ai, ne hūhū e ia: “Simona na e, kua manatu a koe ke ha? kua talia telu mo e poa mai ia hai kia he tau patuiki he lalolagi? ko e fanau ha lautolu kia, po ke tau tagata kehe?” (Mataio 17:25) Kua liga fiafia lahi a tautolu ke fakamahino e Tohi Tapu ti kua lata ni ke fakagahuahua e fakauka ke toka e tagata fakaako ke tala po ke fakamaama e matakupu hane fakatutala he fakaakoaga Tohi Tapu he kaina. Mahani ai, kua nakai lata a tautolu ke taupuō aki e tau hūhū e tau tagata. Ka kia fakailoilo, mo e tau fakataiaga mitaki, mo e tau hūhū manamanatu, kua maeke ia tautolu ke lagomatai a lautolu ke loto fakaaue ke he tau manatu faka-Tohiaga Tapu ne fakakite i loto he ha tautolu a tau tohi fakavē ke he Tohi Tapu.
18. Ko e heigoa ne putoia he feaki e ‘puhala fakaako atu’?
18 Ne tala e tau Tohiaga Tapu ke he ‘puhala fakaako atu.’ (2 Timoteo 4:2; Tito 1:9) Ko e makutu ke fakaako pihia kua lahi atu e mena ne putoia ki ai mai he lagomatai e tagata ke tali manatu e tau matakupu hako. Lata a tautolu ke lagomatai e tagata fakaako Tohi Tapu ke maama e kehekehe he vahāloto he kupu mooli mo e fakavai, mitaki mo e kelea, pulotu mo e goagoa. He taute e tautolu e mena nei mo e lali ke feaki e fakaalofa ma Iehova mai he loto he tagata, liga to mailoga e ia e kakano ne kua lata ke omaoma ki a Ia.
Kia Fakamakutu ke Taute Tutaki
19. Limalima auloa fēfē e tau Kerisiano oti ke taute tutaki?
19 Ko e fakapotopotoaga Kerisiano ko e fakatokatokaaga taute tutaki. He magaaho ne eke taha tagata foou mo tutaki ne nakai ni ko e Fakamoli hokoia ha Iehova ne moua a ia mo e lagomatai ki a ia ke iloa e tau mena ne fakaako he Tohi Tapu ka fai kakano ke olioli. He magaaho ka taute he tau tagata e matakau ke ō ke kumi e tama ne galo, ko e taha ne tagata he matakau ka moua e tama. Ka e he magaaho ne liu fakalataha e tama mo e tau matua haana, ne olioli oti a lautolu ne ō ke kumi. (Luka 15:6, 7) Pihia foki, ko e gahua fakamatakau e taute tutaki. Kua kauauloa e tau Kerisiano oti ke kumi a lautolu ka liga eke mo tau tutaki ha Iesu. Ti he magaaho ka kamata e tagata foou ke finatu ke he tau feleveiaaga he Fale he Kautu, ne limalima auloa e tau Kerisiano ne ha ha ai ke atihake e loto fakaaue haana ma e tapuakiaga mooli. (1 Korinito 14:24, 25) Ko e mena ia, kua lata e tau Kerisiano oti ke olioli ha kua totou teau afe e tau tutaki foou ne taute he tau tau takitaha.
20. Ko e heigoa haau kua lata ke taute kaeke ke manako a koe ke fakaako e kupu mooli he Tohi Tapu ke he falu?
20 To fiafia lahi e tau Kerisiano tua fakamooli ke fai tagata ka fakaako hagaao ki a Iehova mo e tapuakiaga mooli. Ka e pete ko e tau laliaga mitaki lahi ha lautolu, liga nakai maeke ia lautolu ke taute pihia. Kaeke kua pihia e tuaga haau, kia fakatumau ke atihake e fakaalofa haau ma Iehova, kia kapaletū hagaao ke he tau tagata, kia foaki noa, fakagahuahua e fakauka, mo e lali ke fakatolomaki e tau puhala fakaako haau. Mua atu, kia liogi hagaao ke he manako haau ke fakaako e kupu mooli. (Fakamatalaaga 11:1) Kia mafanatia he iloa kua fakaheke e koe e Atua he taute e tau mena oti he fekafekauaga ha Iehova ke limalima auloa ke he gahua taute tutaki.
Maeke Nakai a Koe ke Fakamaama?
• Ko e ha ne kamatamata he taute tutaki e fakaalofa ha tautolu ma e Atua?
• Ko e heigoa e tau mahani kua latatonu ma e tau tagata taute tutaki?
• Ko e heigoa ne putoia ke he ‘puhala fakaako atu’?
[Tau Hūhū he Fakaakoaga]
[Fakatino he lau 15]
He taute tutaki, ne fakatātā he tau Kerisiano e fakaalofa hokulo ha lautolu ma e Atua
[Fakatino he lau 17]
Ko e ha kua lata e tau tagata taute tutaki ke manamanatu ke he falu?
[Fakatino he lau 18]
Ko e heigoa falu he tau mahani ne kua lata ma e tau tagata taute tutaki?
[Fakatino he lau 19]
Kua fiafia lahi e tau Kerisiano oti ke kitia e tau fua mitaki he taute tutaki