Lalago Kia e koe e Pule Katoatoa a Iehova?
Lalago Kia e koe e Pule Katoatoa a Iehova?
“Kia tala atu e mutolu ke he tau motu kehe, Ko e patuiki a Iehova.”—SALAMO 96:10.
1, 2. (a) Ko e heigoa e tau mena tutupu ne uho lahi ne hoko kavi ia Oketopa 29 V.N.? (e) Ko e heigoa e kakano he mena ia ne tupu ma Iesu?
KOE magaaho uho lahi, ne nakai la kitia ia fakamua ke he lalolagi, ne hoko he kavi ia Oketopa 29 V.N. Ne talahau e Mataio ko e tagata ne tohi e Evagelia: “Kua papatiso a Iesu, ti hake mai agataha a ia he vai, kitiala, kua maihiua tuai e lagi kia ia, kua kitia foki e [Ioane ko e Papatiso] e [a]gaga he Atua kua hifo mai tuga ne lupe, kua hoko ki luga ia ia [Iesu]. Kitiala, ko e leo mai he lagi, kua pehe mai, Ko e haku a tama fakahele hanā, kua fiafia na au kia ia.” Ko e taha anei he tau mena tutupu gahoa ne fakamau oti he tau tagata tohia tokofā he Evagelia.—Mataio 3:16, 17; Mareko 1:9-11; Luka 3:21, 22; Ioane 1:32-34.
2 Ko e agaaga tapu ne liligi ki luga ha Iesu kua fakakite a ia ko Ia ne Fakauku, ne kakano ai Mesia, po ke Keriso. (Ioane 1:33) Fakahiku ai, ne hau e “tega” ne mavehe! He tū ki mua ha Ioane ko e Papatiso a ia ka fakaunoko e Satani e muihui ti ko ia ka fakaunoko e ulu he fī muikau ha Iehova mo e pule katoatoa Haana. (Kenese 3:15, NW) Tali mai he magaaho ia, ne mataala katoatoa a Iesu kua lata a ia ke lali ke fakamooli e finagalo a Iehova hagaao ke he pule katoatoa Haana mo e Kautu.
3. Mautauteute fēfē a Iesu ma e matagahua ka taute e ia he lalago e pule katoatoa a Iehova?
3 Ke mautauteute ma e matagahua haana mogonei, “kua liu hake tuai a Iesu mai Ioritana, kua puke ke he [a]gaga [t]apu, ati uta ai a ia he [a]gaga ke he tutakale.” (Luka 4:1; Mareko 1:12) I ai, ne 40 e aho ne manamanatu fakahokulo ke he matakupu he pule katoatoa ne fakatupu e Satani mo e he puhala ke lalago e Ia e pule katoatoa a Iehova. Kua putoia he matakupu ia e tau mena momoui lotomatala oti—he lagi mo e lalolagi. Ti kua latatonu a tautolu ke manamanatu ke he puhala tua fakamooli a Iesu mo e kitia e mena kua lata ia tautolu ke taute ke fakakite kua manako foki a tautolu ke lalago e pule katoatoa a Iehova.—Iopu 1:6-12; 2:2-6.
Fakatapakupaku e Matakupu he Pule Katoatoa
4. Ko e heigoa e mena ne taute e Satani ati fakatapakupaku e matakupu he pule katoatoa?
4 Mooli, nakai fai mena tupu ne totoku kua galo noa ia Satani. He nakai moumou magaaho, ne fakatupu e ia e vale ke he “tega” mua ue atu he “fifine” he Atua. (Kenese 3:15, NW) Ne lagatolu e kamatamata e Satani a Iesu, he tala age kua lata a Iesu ke taute e mena kua liga aoga lahi ki a ia ni ka e nakai ke he mena ne manako e Matua haana ke taute e ia. Mua atu ke he kamatamata ke toluaki ne fakatapakupaku e matakupu he pule katoatoa. He fakakite ki a Iesu “e tau kautu oti he lalolagi, mo e lilifu ha lautolu,” ne tala fakapakō a Satani ki a Iesu: “To ta atu e au e tau mena oti nai kia koe, kaeke ke fakaveli mo e hufeilo mai a koe kia au.” He mataala katoatoa kua ha ha mooli he Tiapolo e pule ke he “tau kautu oti he lalolagi,” ne fakakite e Iesu e faahi ne tū a Ia he matakupu he pule katoatoa he tali: “Ati fano kehe a a koe ma Satani; ha ko e mena kua tohi, kia hufeilo atu a koe ke he Iki hau a Atua, ko ia ni hokoia ke fekafekau atu a koe ki ai.”—Mataio 4:8-10.
5. Ko e heigoa e matagahua uka ne lata ke fakamooli e Iesu?
5 Ne fakatātā fakamaaliali he puhala moui ha Iesu, ko e lalago haana ke he pule katoatoa a Iehova e matapatu foliaga haana. Ne iloa mitaki e Iesu kua lata a ia ke tumau e tua fakamooli ke hoko ke he mate ke he lima a Satani—ne talahau tuai fakaperofeta ke he fakaunoko e muihui he “tega” he fifine—ke maeke ke fakamooli e tonuhia he pule katoatoa he Atua. (Mataio 16:21; 17:12) Kua lata foki a ia ke fakamatala e mooli ko e Kautu he Atua e halavaka ne foaki e Iehova e malolō ke kautū ke he totokoaga a Satani mo e liuaki mai e mafola mo e maopoopo ke he tau tufugatia oti. (Mataio 6:9, 10) Ko e heigoa ne taute e Iesu ke fakakatoatoa e matagahua uka nei?
“Kua Tata Mai Tuai e Kautu he Atua”
6. Fakailoa fēfē e Iesu ko e Kautu e puhala ka fakaaoga he Atua ke ‘moumou e tau gahua he Tiapolo’?
6 Ke kamata aki, ne “haele ai a Iesu ki Kalilaia, kua fakamatala ai e vagahau mitaki he kautu he Atua, kua pehe atu, Kua hoko mai e vaha, kua tata mai tuai e kautu he Atua.” (Mareko 1:14, 15) Mooli, ne pehē a ia: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.” (Luka 4:18-21, 43) Ne mamao mo e laulahi e tau fenoga a Iesu ke he tau maagamotu, ke “fakamatala e vagahau mitaki he kautu he Atua.” (Luka 8:1) Ne eke foki e Iesu e tau mana loga—he fagai e moto tagata, fakamilino e tau matagi, fakamaulu e tau gagao, mo e fakaliu tu mai a lautolu ne mamate. Puhala he tau mana nei, ne fakamooli e Iesu kua maeke he Atua ke vetevete e tau matematekelea mo e tau mamahi oti ne fua mai he totokoaga i Etena ti ‘moumou e tau gahua he Tiapolo.’—1 Ioane 3:8.
7. Ko e heigoa kua fakaako e Iesu ke taute he tau tutaki haana, ti ko e heigoa e fua?
7 Ke fakapuloa fakalaulahi atu e tala mitaki he Kautu, ne fakapotopoto e Iesu e matakau he tau tutaki tua fakamooli mo e fakamahani a lautolu ke he gahua ia. Fakamua, ne poaki atu a ia ke he tau aposetolo 12 haana mo e “fakafano atu e ia a lautolu, ke fakamatala atu e kautu he Atua.” (Luka 9:1, 2) Ti, fakafano atu e ia e toko 70 ke fakapuloa e fekau: “Kua tata kia mutolu e kautu he Atua.” (Luka 10:1, 8, 9) He magaaho ne liliu mai e tau tutaki mo e tala age ki a Iesu e kautūaga ne moua e lautolu he gahua fakamatala he Kautu, ne tali age a ia: “Ne kitia e au a Satani kua to mai he lagi tuga ne uhila.”—Luka 10:17, 18.
8. Ko e heigoa ne fakatātā maaliali he puhala moui a Iesu?
8 Ne lali katoatoa a Iesu mo e nakai fakatonoa e ia ha magaaho ke fakamatala hagaao ke he Kautu. Ne gahua nakai noa a ia, he aho mo e pō, he toka kehe e moui tokotoko mitaki. “Na fai ofaga e tau alope, ti fai mena foki ke momohe ai e tau manu lele; ka ko e Tama he tagata nakai fai mena a ia ke mohe ai,” he talahau e ia. (Luka 9:58; Mareko 6:31; Ioane 4:31-34) Nakai leva ato mate a ia, ne talahau fakamalolō e Iesu ki mua a Ponitio Pilato: “Ko e mena hanai ne . . . hau ai au ke he lalolagi, kia talahau e au e kupu moli.” (Ioane 18:37) Ne fakatātā e Iesu he puhala moui katoa haana kua hifo mai a ia, nakai ke eke mo faiaoga ne mua po ke tagata taute mana po ke Laveaki foaki noa ni, ka ke fakamatala e finagalo pule katoatoa a Iehova mo e ke fakamatala e iloaaga he Atua ke fakamooli e finagalo ia he puhala he Kautu.—Ioane 14:6.
“Kua Fakaoti Tuai”
9. Fakahiku fēfē a Satani ke kautū he fakaunoko e muihui he “tega” he fifine he Atua?
9 Ko e tau mena oti ne taute e Iesu hagaao ke he Kautu ne nakai fehagai mitaki a ia mo e Fī, ko Satani ko e Tiapolo. Ne fakatumau a Satani he puhala ke he “tega” haana he lalolagi—he fakapolitika mo e fakalotu—kua lali a ia ke tamate e “tega” he fifine he Atua. Tali mai he magaaho ne fanau a ia ke hoko ke he fakaotiaga he moui haana he lalolagi, ko Iesu e foliaga ha Satani mo e matakau haana. Fakahiku ai, he tau tupu he 33 V.N., ne hoko e magaaho ma e Tama he tagata ke tuku atu ke he tau lima he Fī ke fakaunoko e muihui haana. (Mataio 20:18, 19; Luka 18:31-33) Ko e tau tala he Evagelia ne fakakite fakamaali e puhala he tau tagata—mai ia Iuta Isakariota ke he tau ekepoa ne mua, tau tohikupu, tau Farasaio, mo e tau Roma—ne fakavaia e Satani ke favale atu ki a Iesu mo e takitaki atu a ia ke he mate mamahi he akau fakakikiveka.—Gahua 2:22, 23.
10. Ko e heigoa e matapatu kakano ne fakamooli e Iesu he mate haana ke he akau fakakikiveka?
10 Ko e heigoa ne tupu hake he loto haau ka manamanatu a koe ki a Iesu he akau fakakikiveka hane matematekelea fakatekiteki ti mate mamahi? Liga manatu e koe e poa lukutoto ne foaki nakai lotokai e Iesu ke lata mo e tau tagata agahala. (Mataio 20:28; Ioane 15:13) Liga ofoofogia a koe ke he fakaalofa lahi ne fakakite e Iehova he foaki e poa ia. (Ioane 3:16) Liga logona hifo a koe tuga e takitaki Roma he tokoteau ne omoomoi ke talahau: “Ko e moli, ko e Tama ni he Atua hanā.” (Mataio 27:54) Ko e tau mena oti nei ko e tau tali mooli. Ke he taha faahi, manatu e tau kupu fakahiku a Iesu he akau fakakikiveka: “Kua fakaoti tuai.” (Ioane 19:30) Ko e heigoa kua fakaoti tuai? He moua e Iesu e tau mena loga he moui mo e mate haana, nakai kia ko e matapatu ke fakamafola e matakupu he pule katoatoa a Iehova ne hau a Iesu ke he lalolagi? Ti nakai kia talahau tuai ko e “tega” to matematekelea a ia ke he kamatamata mamahi lahi he tau lima a Satani ke maeke ke fakameā e higoa a Iehova he tau ekefakakelea oti kana? (Isaia 53:3-7) Ko e tau matagahua mamafa anei, ka e fakamooli e Iesu e tau mena oti ia. Ko e kautūaga mooli!
11. Ko e heigoa ka taute e Iesu ke fakamooli katoatoa e perofetaaga i Etena?
11 Ma e tua fakamooli mo e mahani fakamooli haana, ne liu tu mai a Iesu, nakai ko e tagata, ka ko e “agaga haia ke fakamoui ai.” (1 Korinito 15:45; 1 Peteru 3:18) Ko e maveheaga a Iehova ke he Tama lilifu haana: “Kia nofo a koe ke he haku a lima matau, ato eke e au a lautolu kua fai fi kia koe mo fakatuaga hui hāu.” (Salamo 110:1) Ko e ‘tau fī’ kua putoia e pule totoko, ko Satani mo lautolu oti ne fakakatoa e “tega” haana. Ha ko e Patuiki faka-Mesia he Kautu a Iehova, ko Iesu Keriso ka takitaki ke utakehe e tau tagata totoko oti kana mai he lagi mo e he lalolagi. (Fakakiteaga 12:7-9; 19:11-16; 20:1-3, 10) To hokotia mogoia ke he fakamooliaga katoatoa he perofetaaga he Kenese 3:15 (NW) ti pihia mo e liogi ne fakaako e Iesu ke he tau tutaki haana: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:10; Filipi 2:8-11.
Ko e Fakafifitakiaga ke Muitua
12, 13. (a) Ko e heigoa e tali ke he tala mitaki he Kautu kua kitia he vahā nei? (e) Ko e heigoa kua lata ke manamanatu a tautolu he muitua ke he tau tuagahui he Keriso?
12 He vahā nei, nukua fakamatala e tala mitaki he Kautu ke he tau motu loga, tuga he perofeta e Iesu to hoko. (Mataio 24:14) Ti ko e fua, totou miliona e tau tagata ne tukulele e tau momoui ha lautolu ke he Atua. Kua fiafia a lautolu ke he tau monuina ka tamai he Kautu. Kua onoono atu a lautolu ke momoui tukulagi he lalolagi parataiso ne mafola mo e haohao mitaki, mo e olioli a lautolu he tala age ke he falu hagaao ke he amaamanakiaga ha lautolu. (Salamo 37:11; 2 Peteru 3:13) Ko koe nakai taha ia lautolu nei he tau tagata fakapuloa he Kautu? Kua nava atu ki a koe, kaeke ko koe taha. Ka e, ha ha i ai foki taha mena kua lata ia tautolu takitokotaha ke manamanatu ki ai.
13 Ne tohi he aposetolo ko Peteru: “Ha ko e mena ne mamahi a Keriso ni ma mutolu, ti toka ai e ia e fakafifitaki ma mutolu, kia mumui atu a mutolu ke he hana tau tuagahui.” (1 Peteru 2:21) Mailoga ke he mena nei, ne talahau e Peteru, nakai ko e makai ha Iesu he fakamatala po ke lotomatala haana he fakaako, ka ko e matematekelea haana. He kitia mata, ne mailoga mitaki e Peteru e lahi he fiafia ha Iesu ke matematekelea ke maeke ke muitua ke he pule katoatoa a Iehova mo e fakamooli ko Satani ko e pikopiko a ia. Ti ko e heigoa e tau puhala ka muitua e tautolu ke he tau tuagahui a Iesu? Kua lata ke hūhū hifo ki a tautolu ni: ‘Hoko atu ki fe e makai haaku ke matematekelea ke maeke ke lalago mo e fakalilifu e pule katoatoa a Iehova? Fakakite nakai e au he puhala ne moui ai au mo e taute e fekafekauaga haaku kua lalago e au e pule katoatoa a Iehova ko e matapatu manamanatu haaku?’—Kolose 3:17.
14, 15. (a) Tali atu fēfē a Iesu ke he tau manatu mo e tau foakiaga fakahehē, ti ko e ha? (e) Ko e heigoa e matakupu kua lata ia tautolu ke manatu tumau? (Putoia e talahauaga he puha “Kau mo Iehova.”)
14 He tau aho takitaha, kua fakafelau a tautolu mo e tau kamatamata mo e tau fifiliaga lalahi mo e ikiiki. Ko e heigoa e matapatu kakano he tali ha tautolu? Ma e fakatai, ka fehagai a tautolu mo e kamatamata ke taute e mena ka fakahui e tuaga faka-Kerisiano ha tautolu, fēfē e tali ha tautolu? He tala age a Peteru ki a Iesu ke totonu ki a ia ni, fēfē e tali a Iesu? “Ma Satani na e, kia fano a koe ki tua haku” he vagahau e Iesu. “Ha ko e mena nakai ko e tau mena he Atua kua manamanatu a koe ki ai, ka ko e tau mena he tau tagata.” (Mataio 16:21-23) Po ke ka foaki ki a tautolu e tau tuaga fakatupe po ke holo ki mua e gahua ne lauia kelea e tuaga fakaagaaga ha tautolu, tali atu nakai a tautolu tuga ne tali e Iesu? He magaaho ne fioia e Iesu a lautolu ne kitia e tau mana haana “ko e o mai ne fai a lautolu ke tapaki a ia, kia eke a ia mo patuiki,” ne fakamafiti a ia ke fano kehe mai ia lautolu.—Ioane 6:15.
15 Ko e ha kua tali malolō atu a Iesu ke he tau magaaho pehēnei mo e falu magaaho foki? Ha kua kitia maali e ia kua fai mena atu foki ne putoia ke he puipuiaga fakatagata po ke makaka haana. Ne manako a ia ke taute e finagalo he Matua haana mo e lalago e pule katoatoa a Iehova pete ne tau fua ka moua mai. (Mataio 26:50-54) Ti, kaeke ke nakai kitia mitaki e tautolu e matakupu mooli he tau magaaho oti, tuga ne kitia e Iesu, kua hagahagakelea tumau e fakahui po ke kaumahala. Ko e ha? Kakano kua mafiti a tautolu ke mokulu ke he tau lagatau a Satani, ko ia e iki ne taute e mena hepe ke tuga kua mitaki, tuga he taute e ia he magaaho ne kamatamata a Eva.—2 Korinito 11:14; 1 Timoteo 2:14.
16. Ko e heigoa kua lata mo foliaga mua ue atu ha tautolu he lagomatai e falu?
16 He fekafekauaga ha tautolu, kua lali a tautolu ke tutala ke he tau tagata hagaao ke he tau tupetupe ha lautolu mo e fakakite ki a lautolu e tau tali he Tohi Tapu. Ko e puhala lauia mitaki anei ke fakalagalaga e fiafia ha lautolu he fakaako e Tohi Tapu. Ka e, mua ue atu, ko e foliaga ha tautolu ke nakai ni lagomatai e tau tagata ke iloa e mena ne talahau he Tohi Tapu po ke tau monuina ka tamai he Kautu he Atua. Kua lata ia tautolu ke lagomatai a lautolu ke maama e matakupu mooli. To fiafia nakai a lautolu ke eke mo tau Kerisiano mooli mo e nikiti ha lautolu a [“akau fakakikiveka,” NW] mo e matematekelea ke lata mo e Kautu? (Mareko 8:34) Kua mautali nakai a lautolu ke fakalataha mo lautolu kua lalago e pule katoatoa a Iehova ti fakamooli ko Satani e pikopiko mo e fakavai? (Tau Fakatai 27:11) Ko e lilifu ha tautolu ke lagomatai a tautolu ni mo e falu ke taute pihia.—1 Timoteo 4:16.
Ka Eke e Atua mo ‘Tau Mena Oti Kana ke he Tau Tagata’
17, 18. Ko e magaaho homo ue atu fe kua amanaki atu a tautolu ki ai kaeke ke fakakite kua kau a tautolu ke he pule katoatoa a Iehova?
17 He taute katoatoa e tautolu he mogonei ke fakakite he puhala he tau mahani mo e fekafekauaga ha tautolu kua lalago e tautolu e pule katoatoa a Iehova, kua maeke ia tautolu ke onoono atu ki mua ke he magaaho ha Iesu Keriso ka “tuku atu e ia e kautu ke he Atua, ko e Matua haia.” A fe ka hoko e mena ia? Ne fakamaama he aposetolo ko Paulo: “Ka oti he fakaotioti e ia e tau iki ne mua oti kana, mo lautolu gotoa kua pule, mo lautolu kua malolo. Ha ko e mena to pule ni a ia ato tuku e ia hana tau fi oti ki lalo he na ve hana . . . ti tuku ai foki e Tama ki lalo ia ia ne tuku ai e tau mena oti ki lalo ia ia, kia pule okooko e Atua ke he tau mena oti kana.”—1 Korinito 15:24, 25, 28.
18 Ka eke e Atua mo ‘tau mena oti kana ke he tau tagata’—ko e magaaho homo ue atu mooli a ia! To fakaoti tuai e matagahua he Kautu. To utakehe oti e tau tagata totoko he pule katoatoa a Iehova. To liuaki mai e mafola mo e maopoopo he lagi mo e lalolagi katoatoa. He tau kupu he salamo, to lologo e tau tufugatia oti kana: “Kia ta atu kia Iehova e fakahekeaga he hana higoa . . . kia tala atu e mutolu ke [h]e tau motu kehe, Ko e patuiki a Iehova.”—Salamo 96:8, 10.
Maeke Nakai Ia Koe ke Tali?
• Fakamanatu tumau fēfē e Iesu e pule katoatoa he Atua?
• Ko e heigoa e matapatu fakamooliaga ha Iesu ha ko e haana a fekafekauaga mo e mate?
• Ke he tau puhala fe kua muitua ke he fakafifitakiaga ha Iesu he fakakite kua lalago a tautolu ke he pule katoatoa a Iehova?
[Tau Hūhū he Fakaakoaga]
[Puha/Tau Fakatino he lau 11]
KAU MO IEHOVA
Ne iloa he tokologa he tau matakainaga i Korea mo e falu matakavi foki, ka fehagai e tau Kerisiano mo e tau kamatamata mamahi, kua lagomatai ke iloa maaliali e kakano ne hoko e tau kamatamata ia ki a lautolu.
“Ko e mena ne lagomatai a mautolu ke fakauka,” ne talahau he taha he Tau Fakamoli a Iehova ne tuku he fale puipui he magahala he pule fakatufono Soviete, “ko e maamaaga maaliali he matakupu ne fakatū he kaina i Etena—ko e matakupu ke he tonuhia he Atua ke pule. . . . Ne iloa e mautolu kua ha ha ia mautolu e magaaho ke kau mo e pule a Iehova. . . . Kua taute he mena nei a mautolu ke malolō mo e fakamalolō ki a mautolu ke taofi mau e mahani fakamooli.”
Ne fakamaama he taha Fakamoli e mena ne lagomatai a ia mo e falu matakainaga Fakamoli i loto he kemuaga pagotā. “Ne lalago e Iehova a mautolu,” he talahau e ia. “Pete e tau tuaga uka, kua mataala fakaagaaga a mautolu. Kua fakafiafia tumau ni e mautolu a mautolu aki e tau manatu atihake nukua kau a mautolu mo Iehova ke he matakupu he pule katoatoa ke he lagi mo e lalolagi.”
[Fakatino he lau 8]
Lalago fēfē e Iesu e pule katoatoa a Iehova he magaaho ne kamatamata e Satani a ia?
[Fakatino he lau 10]
Ko e heigoa ne fakamooli he mate a Iesu