To Nakai Kautū ha Kanavaakau kua Taute ke Tau ki a Koe

“Ko e tau kanavaakau oti kua taute ke tau kia koe, to nakai monuina ia.”​—ISAIA 54:17.

1, 2. Fakakite fēfē he tau mena tutupu ke he Tau Fakamoli a Iehova i Alapania e moolioli he Isaia 54:17?

KE HE tau hogofulu tau kua mole, he motu tote he tau atu mouga he faahi toga ki uta ha Europa, ne ha ha ai e matakau Kerisiano ne nakai matakutaku. Ne lali fakamakamaka e fakatufono Komunisi ne nakai talia kua fai Atua ke moumou a lautolu. Pete ia, ne nakai maeke he tau fakakikiveka, tau kemu pagotā, mo e tau uta tala fatipiko ke fakaotioti a lautolu. Ko hai a lautolu ia? Ko e Tau Fakamoli a Iehova i Alapania. Pete kua uka lahi mahaki ke feleveia mo e ke fakamatala auloa, ko e fakauka ha lautolu ke he tau hogofulu tau nukua fakatokoluga mo e fakaheke e tuaga faka-Kerisiano ti tamai e lilifu ke he higoa a Iehova. He tau kua mole he fakaulu fale he lā foou ha lautolu, ne pehē e Matakainaga ne tua fakamooli ke he tau tau loga: “Pete ne uka fefeke e tau laliaga ha Satani, ne kaumahala tumau ni a ia mo e kautū tumau a Iehova!”

² Ko e tau mena oti nei ko e kitiaaga moolioli he maveheaga he Atua ke he tau tagata haana tuga ne fakamau ia Isaia 54:17: “Ko e tau kanavaakau oti kua taute ke tau kia koe, nakai monuina ia; ko e tau alelo oti ke taufetoko mo koe ke he fakafiliaga to fakahala ai e koe.” Kua fakamooli mai mogoia he fakamauaga tuai to nakai fai mena kua maeke he lalolagi ha Satani ke taute ke fakaoti e tapuaki he tau fekafekau tukulele ha Iehova ko e Atua.

Tau Laliaga Nakai Kautū ha Satani

3, 4. (a) Ko e heigoa ne putoia ke he tau kanavaakau ha Satani? (e) Ko e puhala fe ne nakai maeke mooli e tau kanavaakau he Tiapolo ke kautū?

³ Ko e tau kanavaakau ne fakaaoga ke totoko ke he tau tagata tapuaki mooli kua putoia e tau pā malu, favale fakamatakau, tuku he tau fale pouli, ti “eke [foki] e fakatufono ke fakamamahi.” (Salamo 94:20) Ka e he falu motu, pihia foki ke he magaaho tonu nei hane kumikumi e Tau Fakamoli a Iehova ke he vala tala nei foki, kua hane “kamatamata” e tau Kerisiano mooli ia ha ko e tututonu ha lautolu ke he Atua.​—Fakakiteaga 2:10.

⁴ Ke fakatai ki ai, ne taha e lā ofisa he Tau Fakamoli a Iehova ne hokotaki mai kua laga 32  e ekefakakelea fakatino ke he tau fekafekau he Atua he taha ni e tau ha kua gahua a lautolu he fekafekauaga. Lafi foki, ne laga 59 e tapaki he tau leoleo e Tau Fakamooli​—fuata mo e fuakau, taane mo e fifine—​he fakamatala a lautolu ke he tau tagata. Falu ne fakamailoga e tau pite matalima, poki e tau ata, ti tuku he fale pouli ke tuga ko e tau tagata holifono. Falu kua fakamatakutaku ke ekefakakelea fakatino. He taha motu, kua molea mogonei e laga 1,100 he tau hokotaki ne kua fakamau hagaao ke he Tau Fakamoli a Iehova ne kua tapaki, fakahala, po ke keli. Ne molea e laga 200 he tau mena nei ne tutupu he aho ne fakapotopoto a lautolu ke fakamanatu e matulei ha Iesu! Pete ia, ne fakamalolō he agaaga a Iehova e tau tagata haana ke hao mai pete ko e tau mena tutupu ofoofogia ke he tau motu nei mo e he falu motu foki. (Sakaria 4:6) Ko e velagia he ita he tau fī to nakai maeke ke fakanono e tau laugutu ha lautolu ne fakaheke a Iehova. E, kua mauokafua a tautolu to nakai fai kanavaakau kua maeke ke fakakaumahala e finagalo he Atua.

Fakahala e Tau Alelo Pikopiko

5. Ko e heigoa e tau alelo pikopiko ne totoko ke he tau fekafekau ha Iehova he senetenari fakamua?

⁵ Ne perofeta e Isaia to fakahala he tau tagata he Atua e tau alelo oti ka totoko ki a lautolu. He senetenari fakamua, ne fa mahani e tau Kerisiano ke eke mo tau foliaga he tau hokotaki pikopiko, he fakakite a lautolu ko e tau tagata kelea. Ko e tau kupu he Gahua 16:20, 21 kua tatai mo e tau tukupau pihia: “Kua fakalavelave lahi e tau tagata nai ke he māga ha tautolu. . . . Kua talahau mai foki e laua e tau mahani kua tapu he talia, mo e eke e tautolu e tau tagata Roma.” He taha magaaho ne lali e tau tagata lotu ne totoko ke fakalagalaga e tau pule he maaga ke totoko ke he tau tutaki he Keriso, he talahau: ‘Ko e tau tagata nai kua fakatupu e fakaagitau ke he lalolagi oti, ti kua hohoko mai foki a lautolu ki hinei, kua eke e lautolu e tau mena nakai lata mo e tau poaki a Kaisara.’ (Gahua 17:6, 7) Ne fakamailoga e aposetolo ko Paulo ‘ko e tagata fakahohā’ mo e ko e takitaki he matakau lotu ne fakatupu e fakafualoto ‘ke he lalolagi oti.’​—Gahua 24:2-5.

6, 7. Ko e heigoa taha puhala ne fakahala he tau Kerisiano mooli e tau tala totoko ki a lautolu?

⁶ Hagaao ki ai, kua nakai ofo a tautolu he fehagai e tau Kerisiano mooli he vahā nei ke he tau hokotaki fakavai muitui, tau fatipiko mo e tau matagahua ekefakakelea. Puhala fe ne kua maeke ia tautolu ke fakahala e tau tala totoko pihia?​—Isaia 54:17.

⁷ Ko e tau tukupau mo e tau tala pikopiko pihia kua fa fakakaumahala he tau mahani mitaki he Tau Fakamoli a Iehova. (1 Peteru 2:12) He magaaho ne fakamooli he tau Kerisiano ko lautolu ko e tau tagata omaoma ke he matafakatufono mo e ko e tau tagata fai mahani ne manamanatu mooli ke he tuaga he tau katofia ha lautolu, ko e tau tukupau ne tātolo aki a lautolu kua kitia maali ke pikopiko. Kua fakakite ai he mahani mitaki ha tautolu e ha tautolu a tututonu. He mailoga he tau tagata kitekite e fakauka ha tautolu ke he tau gahua mitaki, ne fa omoomoi a lautolu ke fakaheke ha tautolu a Matua he lagi mo e mailoga e puhala moui mitaki ue atu he tau fekafekau haana.​—Isaia 60:14; Mataio 5:14-16.

8. (a) Ko e heigoa kua lata ke taute he falu magaaho ke maeke ke lalago e tuaga faka-Tohiaga Tapu ha tautolu? (e) He fifitaki e Keriso, kua fakahala fēfē e tautolu e tau alelo ne totoko mai?

⁸ He lafi ke he mahani faka-Kerisiano ha tautolu, kua liga lata he falu magaaho ke lalago fakamauokafua e tuaga faka-Tohiaga Tapu ha tautolu. Ko e taha puhala he ole atu ke he tau fakatufono mo e tau hopo fakafili ma e puipuiaga. (Eseta 8:3; Gahua 22:25-29; 25:10-12) He nofo a Iesu he lalolagi, ne fai magaaho ne fakafetoko a ia ke he tau tagata tuhituhi haana, ti fakakaumahala e tau tukupau pikopiko ha lautolu. (Mataio 12:34-37; 15:1-11) He fifitaki a Iesu, ne fakafeleveia fiafia e tautolu e magaaho ke fakamaama fakamahino ke he falu e tau taofiaga loto mauokafua ha tautolu. (1 Peteru 3:15) Kia nakai fakaatā e tautolu e tau fakafiufiu mai he aoga, gahuaaga, po ke mai he magafaoa nakai talitonu ke fakaoti aki e fakamatala ha tautolu ke he mooli he Kupu he Atua.​—2 Peteru 3:3, 4.

 Ierusalema​—Ko e “Maka Mamafa”

9. Ko Ierusalema fe ne fakatai he “maka mamafa” ne talahau he Sakaria 12:3, ti ko hai ne hukui ai he lalolagi?

⁹ Ne fakamaama he perofetaaga ha Sakaria e kakano ne totoko e tau motu ke he tau Kerisiano mooli. Kia mailoga e mena ne talahau he Sakaria 12:3: “Ko e aho ia foki to eke e au a Ierusalema mo maka mamafa ke he tau motu oti.” Ko Ierusalema fe ne tuhi e perofetaaga nei ki ai? Ko e perofetaaga ha Sakaria ki a Ierusalema kua hagaao ke he “Ierusalema ha he lagi,” ko e Kautu he lagi ne ui e tau Kerisiano fakauku ke ō hake ki ai. (Heperu 12:22) Kua tokofiha ne tagata fakauku ne toe he tau hakega nei he Kautu faka-Mesia ne ha ha agaia he lalolagi. Fakalataha mo e tau kapitiga ha lautolu he ‘tau mamoe kehe,’ kua fakamalolō e lautolu e tau tagata ke hahaga atu ke he Kautu he Atua he fai magaaho agaia ne toe. (Ioane 10:16; Fakakiteaga 11:15) Kua tali atu fēfē e tau motu ke he uiina nei? Mo e ko e heigoa e lalagoaga ne foaki e Iehova ke he tau tagata tapuaki mooli he vahā nei? Kia o mai ā a tautolu ke kumikumi ki ai he filifilia fakalahi atu ke he kakano he Sakaria veveheaga 12. He taute pihia, kua maeke a tautolu ke moua e fakamafanaaga ‘to nakai monuina ha kanavaakau’ he totoko ke he tau tagata fakauku he Atua mo e tau kapitiga tukulele ha lautolu.

10. (a) Ko e ha ne totoko ke he tau tagata he Atua? (e) Ko e heigoa ne tupu ki a lautolu ne lali ke lagaki ke he mafoa e “maka mamafa”?

¹⁰ Ne fakakite he Sakaria 12:3 ne “kafokia” ai e tau motu. Kua tupu fēfē e mena nei? Ne poaki he Atua ko e tala mitaki he Kautu kua latatonu ke fakamatala. Kua taute mauokafua he Tau Fakamoli a Iehova e kotofaaga ke fakamatala. Pete ia, ha kua fakapuloa e Kautu mo amaamanakiaga hokoia ma e tagata ati eke ai mo “maka mamafa” ke he tau motu. Ti lali a lautolu ke lagaki ai ke he mafoa he kunuene ke he tau tagata fakamatala he Kautu. He taute pihia, ne moua he tau motu matahavala nei e “kafokia,” ti mahakuhaku lahi he tino. Ne hukia foki e aga talahaua ha lautolu he fehagaoaki a lautolu mo e tau kaumahala ne fakamā. Kua nakai maeke ia lautolu ke fakanono e tau tagata tapuaki mooli ne tokiofa e kotofaaga ke fakapuloa e “vagahau mitaki tukulagi” he Kautu faka-Mesia he Atua ato hoko e fakaotiaga he fakatokaaga nei. (Fakakiteaga 14:6) He kitia e favaleaga ne taute ke he tau fekafekau a Iehova, ne tuga kua pehē e taha leoleo he fale pouli i Aferika: ‘Kua moumou magaaho a mutolu he lali ke favale ke he tau tagata nei. To nakai fakaai a lautolu ke fakahui. To malikiti ni a lautolu.’

11. Fakamooli fēfē he Atua e maveheaga haana ia Sakaria 12:4?

¹¹ Totou e Sakaria 12:4. Ne taute e Iehova e maveheaga to fakapouli mo e to “fakaatukehe” e ia a lautolu ne tau ke he tau utafekau malolō haana he Kautu. Kua fakamooli ni a ia ke he kupu haana. Ke fakatai ki ai, he taha motu ne pā malu e tapuakiaga mooli, ne nakai maeke a lautolu ne totoko ke utakehe e tau mena kai fakaagaaga mai he tau tagata he Atua. Ti talahau foki he taha nusipepa ne fakaaoga he Tau Fakamoli a Iehova e tau fua paluni ke tamai aki e tau tohi faka-Tohi Tapu ke he motu! Kua  moolioli e maveheaga he Atua ke he tau fekafekau fakamooli haana: “To kitekite au kia lautolu; ko e tau solofanua oti he motu to ta ai e au ke matapouli ai a lautolu.” Kua matapouli he ita lahi, ne nakai iloa he tau fī he Kautu e hala ke ō ai. Ka kua iloa tonuhia e tautolu to puipui e Iehova e tau tagata haana ko e matakau ti leveki e tau momoui ha lautolu.​—2 Tau Patuiki 6:15-19.

12. (a) Ko e puhala fe ne tafu e Iesu e afi he nofo a ia he lalolagi? (e) Tafu fēfē he tau tagata fakauku ne toe e afi ke he puhala fakaagaaga, mo e ko e heigoa e tau fua?

¹² Totou e Sakaria 12:5, 6. Kua hagaao e “tau iki a Iuta” ki a lautolu ne leveki ke he tau tagata he Atua. Ti tuku e Iehova ia lautolu nei e fakamakutu velagia ke lata mo e tau mena he haana Kautu he lalolagi. He taha magaaho ne pehē a Iesu ke he tau tutaki haana: “Kua hau au ke liti e afi ke he lalolagi.” (Luka 12:49) Mooli, ne tafu e ia e afi. Puhala he gahua fakamatala makutu haana, ne eke e Iesu e Kautu he Atua mo matakupu uho ke he tau tagata. Ne fakatupu he mena nei e taufetoko velagia ke he motu Iutaia katoa. (Mataio 4:17, 25; 10:5-7, 17-20) Ti “tuga foki e hulu kua puho ke he tau fuhi saito,” ne tafu pihia he tau tutaki he Keriso he vahā nei e tau afi ke he puhala fakaagaaga. Ko e tohi he 1917 The Finished Mystery * ne fakatapakupaku katoatoa e fakatupua ha Kerisitenitome. Ne tamai he mena ia e tali kona he tau akoako. He tau magaaho foou nei, ko e Tau Tala he Kautu Nu. 37, “Kua Tata  e Fakaotiaga he Lotu Fakavai!” ne omoi e tau tagata tokologa ke kau po ke totoko ke he Kautu he Atua.

Ne Laveaki “e Tau Fale Ie a Iuta”

13. Ko e heigoa ne fakakite he talahauaga ko e “tau fale ie a Iuta,” ti ko e ha ne laveaki e Iehova a lautolu ne lauia?

¹³ Totou e Sakaria 12:7, 8. I Isaraela i tuai, kua fa kitia mau e tau fale ie, ti fakaaoga he tau leveki mamoe mo e tau tagata gahua fonua he falu magaaho. Ko e tau tagata ia ka lauia fakamua ti kua lata ke moua e puipui kaeke ke totoko mai e taha motu fī ke he maaga a Ierusalema. Ko e talahauaga ko e “tau fale ie a Iuta” kua fakakite e tau tagata fakauku ne toe he vahā ha tautolu ke tuga kua haia i fafo he fonua lahi, nakai i loto he tau maaga kua puipui. I ai ne lalago nakai matakutaku e lautolu e tau mena he Kautu faka-Mesia. Ko Iehova sapaota mogoia ka laveaki ‘fakamua e tau fale ie a Iuta’ ha ko lautolu nei ko e foliaga he totoko a Satani.

14. Lalago fēfē e Iehova a lautolu i loto he “tau fale ie a Iuta” mo e lagomatai fēfē a lautolu neke lolelole?

¹⁴ Mooli ni, kua fakakite he fakamauaga mai i tuai hane lalago e Iehova e tau tagata fakauku nei ne toe he Kautu ne nonofo he “tau fale ie” ha lautolu i fafo he fonua. * Ne lagomatai e ia a lautolu neke “lolelole” he fakamalolō mo e atihake a lautolu tuga a Tavita, ko e patuiki kautau.

15. Ko e ha ne “kumi e au [Iehova] ke fakaoti ai e tau motu oti,” ti to taute e ia a fe e mena nei?

¹⁵ Totou e Sakaria 12:9. Ko e ha ne “kumi e au [Iehova] ke fakaoti ai e tau motu oti”? Ha kua fakatumau a lautolu ke totoko ke he Kautu faka-Mesia. He kunuene mo e favale ke he tau tagata he Atua, ati haia ai a lautolu he tuaga ke moua e fakahala. Nakai leva ko e tau hukui ha Satani he lalolagi to fakahiku ke totoko atu ke he tau tagata tapuaki mooli he Atua, ka takitaki atu ke he tuaga he lalolagi ne talahau he Tohi Tapu ko Amaketo. (Fakakiteaga 16:13-16) He tali atu ke he totoko ia, ko e Fakafili Tokoluga Ue Atu ka lalago e tau fekafekau haana mo e fakatapu e higoa haana ke he tau motu oti.​—Esekielu 38:14-18, 22, 23.

16, 17. (a) Ko e heigoa e ‘tufaaga he tau fekafekau a Iehova’? (e) Ko e heigoa kua fakamooli ha ko e ha tautolu a fakauka ke he tau totokoaga a Satani?

¹⁶ Kua nakai fai kanavaakau a Satani ke fakalolelole aki e tua po ke tamate aki e makutu he tau tagata he Atua he lalolagi katoa. Ko e mafola fakaagaaga ha tautolu, ne fua mai he malolō fakahao ha Iehova, ko e ‘tufaaga haia he tau fekafekau a Iehova.’ (Isaia 54:17) Kua nakai fai tagata ke utakehe ia tautolu e mafola mo e monuina fakaagaaga. (Salamo 118:6) To matutaki a Satani ke iliili e totokoaga mo e lali ke fakalagalaga e matematekelea. Ha ko e fakauka fakamooli ha tautolu he fehagai ke he tau ekefakakelea ne fakamooli nukua nofo mau e agaaga he Atua ia tautolu. (1 Peteru 4:14) Ko e tala mitaki he Kautu ha Iehova ne fakatū hane fakapuloa ke he lalolagi katoa. Ke tuga e tau kanavaakau fakaligo, kua loga e “tau maka [fakatai he totokoaga] ne liti aki e filo” hane tolo aki e tau tagata he Atua. Ka e he malolō ha Iehova ne kautū e tau fekafekau haana ke he tau maka pihia, he nakai logona e mamahi ha lautolu. (Sakaria 9:15) Ko e tau tagata fakauku ne toe mo e tau kapitiga fakamooli ha lautolu to nakai ni maeke ke fakalolelole!

¹⁷ Kua onoono atu a tautolu ke laveaki katoatoa mai he tau totoko he Tiapolo. Ko e mauokafua ha ia ha tautolu ke he fakamooliaga ‘ko e tau kanavaakau kua taute ke tau kia tautolu to nakai monuina, mo e tau alelo oti ke taufetoko mo tautolu ke he fakafiliaga to fakahala ai e tautolu’!

[Tau Matahui Tala]

To Tali Fēfē e Koe?

• Ko e heigoa ne fakakite kua nakai fakaai e tau kanavaakau a Satani ke kautū?

• Eke fēfē a Ierusalema he lagi mo “maka mamafa”?

• Laveaki fēfē e Iehova e “tau fale ie a Iuta”?

• He tata atu a tautolu ki Amaketo, ko e heigoa ne mauokafua a koe ki ai?

[Tau Hūhū he Fakaakoaga]

[Tau Fakatino he lau 23]

Ne tumau e tau tagata ha Iehova i Alapania ke tua fakamooli pete ne tau totoko a Satani

[Fakatino he lau 25]

Ne fakakaumahala e Iesu e tau hokotaki pikopiko

[Tau Fakatino he lau 26]

Nakai kautū ha kanavaakau ka taute ke tau ki a lautolu ne fakapuloa e tala mitaki