Tau Aoga Fakateokarasi—Fakamooliaga he Fakaalofa ha Iehova
KO IEHOVA ko e ha tautolu a “Faiaoga Homo Ue Atu.” (Isaia 30:20, NW) Ko e fakaalofa kua omoomoi a ia ke fakaako mo e fakamahani e falu. Ma e fakatai, ne omoomoi a Iehova he fakaalofa hokulo ke fakakite ki a Iesu e “tau mena oti kana ne eke e ia.” (Ioane 5:20) Ko e fakaalofa ki a tautolu, ko e haana Tau Fakamoli ne omoomoi a Iehova ke foaki ki a tautolu e “alelo ha lautolu ne fakaako,” he eketaha fakalahi a tautolu ke fakalilifu a ia mo e lagomatai e falu.—Isaia 50:4.
Ke mumuitua e fakafifitakiaga he fakaalofa ha Iehova, ko e Komiti Fakaako he Kau Fakatufono kua fakaaoga ai hogofulu e aoga fakateokarasi ke fakaako a lautolu kua manako mo e ha ha he tau tuaga ke fakalataha atu ki ai. Onoono nakai a koe ke he tau aoga nei ko e fakamooliaga he fakaalofa ha Iehova?
Fiafia he totou e fakamaamaaga he tau aoga fakateokarasi hane taute mo e tau talahauaga mai he falu ne o atu ki ai. Ti hūhū hifo ki a koe, ‘Maeke fēfē ia au ke aoga mai he fakaakoaga faka-Atua nei?’
AOGA MAI HE FAKAAKOAGA FAKATEOKARASI
Ha ko Iehova ko e “Atua hana e fakaalofa,” kua foaki mai e fakaakoaga ne aoga lahi ke he tau momoui ha tautolu, ke mautali a tautolu ke kautū ke he tau mena vihi, mo e lagomatai a tautolu ke moua e fiafia lahi he ha tautolu a fekafekauaga. (2 Kori. 13:11) Ke tuga e tau tutaki he senetenari fakamua, kua moua e tautolu e lotomatala ke lagomatai e falu he “fakaako atu . . . kia lautolu kia omaoma ke he tau mena oti” ne tala mai ki a tautolu.—Mata. 28:20.
Pete kua nakai maeke ia tautolu ke fakalataha atu ke he tau aoga oti nei, kua maeke ia tautolu ke moua e lagomatai mai he taha po ke loga e tau aoga ia. Ti maeke ia tautolu ke fakagahua e tau fakatonuaga kua moua ne fakavē ke he Tohi Tapu. Maeke foki ia tautolu ke fakalahi e lauia mitaki ha tautolu he fekafekauaga he gahua fakalataha mo e tau fekafekau ha Iehova ne kua fakaako fakamitaki.
Hūhū hifo ki a koe ni, ‘Kua fakaatā nakai he tau tuaga haaku au ke foli ke fakalataha atu ke he ha aoga he tau aoga nei?’
Kua manamanatu e tau tagata tapuaki ha Iehova ko e lilifu ke lalago e tau aoga uho nei mo e ke fakaako i ai. Kia eke e fakaakoaga ka moua e koe ke fakatata lahi a koe ke he Atua mo e ke lagomatai ke taute haau a tau matagahua ki mua haana, mua atu ke he kotofaaga mafiti lahi ke fakamatala e tala mitaki.
