1, 2. Ko e heigoa e tauaga mooli kua puna ke he mapualagi, ti ko e heigoa he tau fekafekau he Atua kua nakai lata ke taute he tauaga nei?

 IA Oketopa 30, 1938, totou miliona he tau tagata he tau Faahi Kaufakalataha ne fanogonogo ke he polokalama letiō mahuiga ne fakakite he puhala taute tala. Ko e taute tala he afiafi ia he fufuta he tala nakai mooli fakasaiene he tohi The War of the Worlds. Ko e tau tagata ne taute e tala ne fakailoa e tau vala tala ne fakamaama ko e matakau ne feoho mai he Mars kua fakatupu e moumouaga lahi he Lalolagi. Pete kua fakailoa ai ko e polokalama letiō ko e taute tala, tokologa e tau tagata fanogonogo kua manatu na mooli e keliaga ti matakutaku ai. Falu ne taute foki e tau lakaaga pauaki ke puipui a lautolu mai he tau tagata kehe nakai mooli.

² He vahā nei ha ha i ai e felakutaki mooli ne puna hake he mapualagi. Ka e, ko e tau tagata kua kaumahala ke tali ke he mena ne tupu. Ne talahau tuai e tauaga nei, nakai he tohi fakavai fakasaiene, ka e he Kupu omoomoi he Atua, ko e Tohi Tapu. Ko e tauaga ha Amaketo​​—ko e tauaga he Atua ne totoko ke he fakatokaaga kelea nei. (Fakakite. 16:14-16) He tauaga nei, ko e tau fekafekau he Atua he lalolagi to nakai lata ke totoko a lautolu ke he tau tagata kehe mai he taha lalolagi. Ka kua ofoofogia a lautolu he tau mena tutupu matakehe lahi mo e matakutakuina ofoofogia ne fakatātā he malolō he Atua.

3. Ko e heigoa e perofetaaga ka fakatutala e tautolu, ti ko e ha kua lata ke onoono fakalahi a tautolu ki ai?

³ Ko e perofetaaga he Tohi Tapu ne fakamau ia Sakaria veveheaga 14 ne matutaki fakahako ke he tauaga ha Amaketo. Pete he fakamau ke he 2,500 tau kua mole, kua aamotia e perofetaaga nei ke he tau momoui ha tautolu. (Roma 15:4) Lahi he tau mena kua talahau i ai ne matutaki ke he tau tuaga ne lauia e tau tagata  he Atua tali mai he fakatū e Kautu faka-Mesia he lagi ke he 1914 mo e ke he tau mena tutupu fakalagalaga ka fakatoka mai he vahā tata i mua. Ko e tau vala ne mailoga lahi he perofetaaga kua putoia e fakatokaaga he “pahua lahi mahaki” mo e tafe mai he “vai moui.” (Saka. 14:4, 8) Ko e pahua nei kua lahi e mena ne taute he foaki e puipuiaga ma e tau tagata tapuaki ha Iehova. Ti ka maama e tautolu e kakano he tau vai moui ma tautolu, to kitia e tautolu e lata ke uta ai ti pihia foki mo e manako ke inu ai. Ko e manako ha tautolu mogoia ke manamanatu fakalahi ke he perofetaaga nei.​​—2 Pete. 1:19, 20.

4. (a) Magaaho fe ne kamata e “aho a Iehova”? (e) Totou hogofulu tau ato hoko e 1914, ko e heigoa ne fakapuloa he tau tagata tapuaki ha Iehova, ti tali fēfē e tau takitaki he lalolagi?

⁴ Ia Sakaria veveheaga 14 ne hafagi aki e talahauaga ‘ko e aho a Iehova.’ (Totou Sakaria 14:1, 2.) Ko e heigoa e aho nei? Ko e “aho he Iki” anei, he magaaho ne kamata e “kautu he lalolagi” kua eke mo “kautu . . . ma e Iki ha tautolu mo e hana Keriso.” (Fakakite. 1:10; 11:15) Ko e aho ia ne kamata he 1914 mo e fanauaga he Kautu faka-Mesia he lagi. He tau hogofulu tau ato hoko e 1914, ne fakailoa he tau tagata fakapuloa a Iehova ke he tau motu e fakaotiaga he “tau vaha he tau motu kehe” to loga e tau lekua he lalolagi ka hoko he tau ia. (Luka 21:24) Tali fēfē e tau motu? He nakai fanogonogo ke he hatakiaga magaaho tonu ia, ko e tau takitaki fakapolitika mo e fakalotu ne vihiatia mo e favale ke he tau tagata fakamatala fakauku fakamakai ia. He taute pihia, ko e tau takitaki nei he lalolagi ne vaiga e Atua Malolō Ue Atu, ko lautolu ia ne fakauku ne hukui e Kautu ha “Ierusalema ha he lagi”​​—ko e vala haia he Kautu faka-Mesia.​​—Hepe. 12:22, 28.

5, 6. (a) Ko e heigoa ne talahau tuai ke taute he tau motu ke totoko “e maga” mo e haana “māga moli”? (e) Ko hai e “tau tagata ne toe he motu”?

⁵ Ne talahau tuai e Sakaria e mena ka taute he tau motu, he pehē: “To eke ai ma lautolu e maga [Ierusalema].” Ne fakatai “e maga” ke he Kautu faka-Mesia he Atua. Kua hukui ai ke he lalolagi he “māga moli,” he tau Kerisiano fakauku ne toe. (Filipi 3:20) He Felakutaki I he Lalolagi, ko e tau tagata ne lahi e matagahua he vala he fakatokatokaaga ha Iehova he lalolagi ne “kaiha,” po ke tapaki, ti fakafano atu ke he fale puipui i Atlanta, Georgia i U.S.A. ‘Ne fofō e tau fale’ he tau nakai fakafili tonu mo e keli fakakelea ne tapeehi ki a lautolu mo e falu he tau tagata mahani fakamooli nakai agahala. Ko e tau tagata totoko ne omoomoi e loga he tau fakaohoohoaga ki a lautolu ne toe ne fakagahua ai he pā e tau tohi ha lautolu mo e taofi e tau gahua ha lautolu ko e tau tagata fakapuloa he Kautu.

⁶ Pete ne nakai tokologa e tau tagata he Atua, hepe e iloaaga ki ai, totoko, mo e fakamamahi ke he tau lima he tau tagata favale, ne nakai maeke e tapuakiaga fakamooli ke utakehe katoatoa. Ha ha i ai e “tau tagata ne toe he motu,” ko lautolu ne fakauku ne toe kua fakaheu katoatoa ke ‘vevehe kehe he maga.’

7. Ko e puhala he Tau Fakamoli fakauku ha Iehova ne fakatoka e fifitakiaga fe ma e tau tagata tapuaki fakamooli oti he vahā nei?

⁷ Fakamooli katoatoa kia e perofetaaga nei he fakaotiaga he Felakutaki I he Lalolagi? Nakai. Loga e totokoaga he tau motu ne tau atu ki a lautolu ne fakauku ne toe mo e tau hoa fakamooli ha lautolu ne ha ha i ai e amaamanakiaga he lalolagi. (Fakakite. 12:17) Ko e Felakutaki II he Lalolagi ko e fakamooliaga he mena ia. Ko e puhala mauokafua he Tau Fakamoli fakauku ne omoomoi e tau fekafekau he Atua he vahā nei ke fakauka ke he tau kamatamata ka o mai he puhala ha lautolu, putoia e  totokoaga mai he tau magafaoa nakai tua, tau kapitiga gahua, po ke tau kapitiga aoga ne vaiga ai ha ko e tua ha lautolu. (1 Pete. 1:6, 7) Pete ne tau mena ne nonofo a lautolu, ko e tau tagata tapuaki fakamooli ne eketaha fakalahi ke ‘tumau mo e loto fakalataha,’ he nakai ‘matakutaku ki a lautolu kua totoko mai.’ (Filipi 1:27, 28) To moua i fe he tau tagata ha Iehova e haohao mitaki he lalolagi ne vihiatia ki a lautolu?​​—Ioane 15:17-19.

8. (a) Ko e heigoa ne fakatai e tau mouga he Tohi Tapu? (e) Ko e heigoa ne hukui he ‘mouga he tau akau olive’?

⁸ Tali mai Ierusalema​​—‘ko e maga’​​—​he fakataiaga ha Ierusalema ha he lagi ko e “mouga [he tau akau] Olive ne fehagai mo Ierusalema,” kua eke foki mo fakataiaga. Ko e heigoa ne hukui he mouga ia? To maeke fēfē e mouga ke “ihi ua ai foki ke he lotoga” ti ua e mouga? Ko e ha ne hagaao a Iehova ki ai ko e “haku a tau mouga”? (Totou Sakaria 14:3-5.) He Tohi Tapu, ko e tau mouga ne maeke ke hukui aki e tau kautu, po ke tau fakatufono. Pihia foki, ko e tau monuina mo e puipuiaga kua matutaki mo e mouga he Atua. (Sala. 72:3; Isaia 25:6, 7) Ti ko e mouga he tau akau olive ne tū ai e Atua ke he faahi uta ha Ierusalema he lalolagi ne hukui e pule he lagi mo e lalolagi katoatoa ha Iehova, ko e haana pule tokoluga ue atu.

9. Ke he puhala fe kua veveheua e “mouga ko Olive”?

⁹ Puhala fe kua fakakite e veveheaga he mouga he tau akau olive? Ko e mouga ke he faahi uta ha Ierusalema ne veveheua, kakano kua fakatū e Iehova e taha pule foki, ko e pule ke uaaki. Ko e pule nei ke uaaki ko e Kautu faka-Mesia i lalo ha Iesu Keriso. Ko e kakano haia ne vagahau a Iehova ke he ua e mouga ne fua mai he veveheua e “mouga ko Olive” he eke mo “haku a tau mouga.” (Saka. 14:4) Ko e haana ua a ia.

10. Ko e heigoa ne hukui he “pahua lahi mahaki” he vahāloto he tau mouga ne ua?

¹⁰ He veveheua e mouga fakatai, hafa ke he faahi tokelau mo e hafa ke he faahi toga, ne fakatū e Iehova e tuaga hui haana ke he tau mouga ua ia. Ati kitia ai e “pahua lahi mahaki” i lalo he tuaga hui ha Iehova. Ko e pahua fakatai nei ne hukui e puipuiaga faka-Atua, ne kua moua he tau fekafekau ha Iehova e haohao mitaki i lalo he haana pule he lagi mo e lalolagi katoatoa mo e Kautu faka-Mesia he Tama haana. To mauokafua a Iehova to tumau tukulagi e tapuakiaga meā. Magaaho fe ne veveheua e mouga he tau akau olive? Ne hoko ai he mogo ne fakatū e Kautu faka-Mesia he matahiku he Vahā he Tau Motu Kehe he 1914. Magaaho fe ne kamata e fehola he tau tagata tapuaki fakamooli ke he pahua fakatai?

11, 12. (a) Magaaho fe ne kamata e fehola ke he pahua fakatai? (e) Ko e heigoa ne fakamooli ko e lima malolō ha Iehova kua fakalataha mo e tau tagata haana?

¹¹ Ne hataki e Iesu e tau tutaki haana: “To vihiatia foki a mutolu he tau motu oti ha ko e haku a higoa.” (Mata. 24:9) He tau aho fakamui he fakatokaaga nei, tali mai he 1914, ne malolō lahi e vihiatia ia. Pete ne ekefakakelea lahi mahaki ne fakahoko he tau fī ki a lautolu ne fakauku ne toe he Felakutaki I he Lalolagi, ko lautolu he matakau tua fakamooli nei ne nakai tamate. He 1919 ne fakatokanoa a lautolu mai he tau matematekelea mamahi ha Papelonia Lahi​​—ko e pule malolō he lalolagi he lotu fakavai. (Fakakite. 11:11, 12) a Ko e magaaho haia ne kamata e fehola ke he pahua ha Iehova he tau mouga.

 ¹² Tali mai he 1919 ko e pahua he puipuiaga faka-Atua kua matutaki ke puipui e tau tagata tapuaki fakamooli he lalolagi katoa. Ke he tau tau loga, he tau kalakala he lalolagi, ne pā mo e taofi e gahua he fonua mo e tau tohi faka-Tohi Tapu he Tau Fakamoli a Iehova. Ko e tau taofiaga pihia kua kitia agaia ke he falu motu. Ka ko e lali he tau motu, to nakai kautū a lautolu he utakehe e tapuakiaga mooli! Ko e lima malolō ha Iehova to fakamooli ke fakalataha mo e tau tagata haana.​​—Teu. 11:2.

13. Fakatumau fēfē a tautolu ke he pahua puipui ha Iehova, ti ko e ha mogonei kua mua atu e aoga ke taute pihia?

¹³ Ka pipiki a tautolu ki a Iehova mo e mauokafua ke he kupu mooli, ko ia mo e Tama haana ko Iesu Keriso, to taute e vala ha laua, mo e to nakai fakaatā he Atua ha tagata po ke ha mena ke ‘fofo a tautolu mai he lima Haana.’ (Ioane 10:28, 29) Kua mautali a Iehova ke foaki e lagomatai kua lata ke maeke ia tautolu ke omaoma ki a ia ko e Pule he Lagi mo e Lalolagi Katoatoa mo e fakatumau ko e tau tagata fakamooli he Kautu faka-Mesia. Kua lata mooli a tautolu ke fakatumau ke he pahua he puipuiaga ha ko e pahua ia to lahi mahaki e kakano ke he tau tagata tapuaki fakamooli he matematekelea lahi hane gutu mai.

14, 15. He “aho ne tau ai [e Atua]” ne totoko ke he tau fī haana, ko e heigoa e tuaga ha lautolu i fafo he pahua?

¹⁴ He tata lahi mai e fakaotiaga he fakatokaaga nei, to fakalahi e Satani e tau totokoaga haana ke he tau fekafekau ha Iehova. To hoko mai mogoia e “aho ne tau ai [e Atua]” ke totoko e tau fī haana. To mailoga mooli e Iehova ko e taha he tau totokoaga ha Satani ko e haana totokoaga fakahiku. He aho ia, ko e Pule Katoatoa he lagi mo e lalolagi to kitia maaliali a ia ko e Toa ne mua atu e lilifu ke he “aho tau” he mogo fakamua.​​—Saka. 14:3.

¹⁵ He aho he tauaga he Atua, ko e heigoa e tuaga ha lautolu i fafo he puipuiaga he “pahua lahi mahaki”? To ‘nakai ha i ai e maama uho’ faka-Atua kua kikila atu ki a lautolu. He aho tau ia hane hoko mai ko e “tau solofanua, mo e tau falata, mo e tau kamela, mo e tau asini, katoa mo e tau manu oti”​​—ko e tau fakamailoga he tau koloa tau he tau motu​​—​to lauia ai. Ko e tau koloa ia to “pouli,” ti nakai fakaaoga ke tuga kua nakai fai aoga po ke gahuahua. To fakaaoga foki e Iehova e tau gagao mo e “malaia.” He fakatino po ke nakai, ko e malaia to fakamate e tau fakamatakutakuina. He aho ia, ‘to tomo ai ha lautolu a tau mata mo e tau alelo’ ti ko e mena ia to maeke he tau tagata ne totoko ke tā pouli ni a lautolu mo e to fakanono e tau vagahau kelea ha lautolu. (Saka. 14:6, 7, 12, 15) Nakai fai vala he lalolagi ka hao mai he moumouaga. Ko e tau kautau ne fakalaini he faahi ha Satani he malētau to tokologa lahi. (Fakakite. 19:19-21) “To ha i ai ke he aho ia a lautolu kua keli e Iehova ke kamata mai he taha potu he lalolagi ke hoko atu ke he taha potu he lalolagi.”​​—Iere. 25:32, 33.

16. He mailoga e hoko maiaga he aho he tauaga he Atua, ko e heigoa e tau hūhū kua lata ke manamanatu a tautolu ki ai, ti ko e heigoa kua lata ia tautolu ke taute?

¹⁶ Ko e tau felakutaki kua tamai tumau e matematekelea, ti pihia foki ki a lautolu ne kautū. Liga kū e tau mena kai. Galo e tau koloa. Liga tō hifo lahi e puhala moui. Temotemoai e tau tokanoaaga fakatagata. Kaeke ko e tau mena uka ia ne lauia a tautolu, to tali atu fēfē a tautolu? To hopoate kia a tautolu? To fakahui kia e tautolu e tua ha tautolu i lalo he peehiaga? To galo kia e tautolu e amaamanakiaga ti mahala ke he momoko? Ko e aoga ha ia ke fakatumau e tua ha tautolu he matematekelea lahi ke he malolō fakahao ha Iehova mo e fakatumau ke he pahua he puipuiaga ha Iehova!​​—Totou Hapakuka 3:17, 18.

17, 18. (a) Ko e heigoa e “vai moui”? (e) Ko e heigoa ne hukui he “tahi ke he fahi uta” mo e “tahi ke he fahi lalo”? (i) He ono atu a koe ki mua ke he vahā anoiha, ko e heigoa e fifiliaga haau?

¹⁷ Mui mai mogoia a Amaketo, to tafe tumau mai e “vai moui” mai he nofoa he Kautu faka-Mesia. Ko e tau foakiaga nei ha Iehova ko e “vai moui” ke lata mo e tau momoui. Ko e “tahi ke he fahi uta” kua hagaao ke he Tahi Mate, mo e “tahi ke he fahi lalo” ke he Tahi Metiteraneani. Ne fakaaoga ua ai ke he tau tagata. Ko e Tahi Mate to fakakite a lautolu kua haia he tukuaga he tau tagata oti. Kua puke e Tahi Metiteraneani ke he moui, to fakatino fakahako ke he “moto tagata tokologa” ne hao i Amaketo. (Totou Sakaria 14:8, 9; Fakakite. 7:9-15) Ti ko e tau vahega ua ia to aoga he fakatoka maiaga he tupaaga he mate faka-Atamu he fakatumau a lautolu ke fakatō e fia inu ha lautolu he vai moui fakatai, po ke “vailele tavana ko e vai he moui.”​​—Fakakite. 22:1, 2.

¹⁸ I lalo he puipuiaga ha Iehova, to momoui a tautolu he fakaotiaga he fakatokaaga kelea nei mo e to huhū atu ke he lalolagi foou tututonu he Atua. Pete ni kua fakavihia he tau motu a tautolu, kia fifili a tautolu ke fakatumau ke eke mo tau tagata fakamooli he Kautu he Atua, he eketaha ke nonofo tumau he pahua he puipuiaga ha Iehova.