TALAHAU tuai e Iesu to moumou katoatoa e faituga ha Iehova. Ne tupu e mena nei he magaaho ne takitaki e Titus e kautau Roma mo e moumou a Ierusalema he tau 70. (Mata. 24:2) Mogo fakamui, ne pulega e Pule Atu Motu Roma ko Julian ke liu talaga e faituga.

Ne talahaua a Julian ko e pule atu motu pouliuli fakahiku ha Roma. Ko ia ko e nefiu ha Constantine the Great, ti fakaako a ia he tau Kerisiano fakavai he magahala haana. Ka ko e magaaho ne eke a ia mo pule atu motu he tau 361, ne tiaki e ia e tau mena ne fakaako age e lautolu ki a ia. Ne fakahigoa he tau tohi fakamau tala tuai a Julian ko e Tiaki Taofiaga ha kua tiaki e ia e lotu.

Ne vihiatia e Julian e tau tagata ne totoku ko e tau Kerisiano. Taha kakano liga he ono e tau haana he moui, ko e tau tagata ne totoku ko e tau Kerisiano ne tamate e matua taane haana mo e falu magafaoa. Ne talahau he tau tagata fakamau tala tuai he lotu, ko Julian ne fakamalolō e tau Iutaia ke liu talaga e faituga ha lautolu. Ne manatu a ia to fakamooli ai ko Iesu ko e perofeta pikopiko. a

Ne manako mooli a Julian ke liu talaga e faituga. Ka e nakai mahino ko ia kia ne kamata ke liu talaga ai. Ti kaeke kamata e ia e gahua, ne nakai iloa mitaki e kakano ne oti noa ai e gahua. Pete ia, ne tamate a Julian he nakaila katoa ia e ua e tau he pule, ti nakai liu talaga e faituga.