1, 2. Ko e heigoa e perofetaaga ke he tau aho fakamui kua liga manamanatu e tau tutaki ki ai, ti ko e ha?

 NAKAILA leva e tala age e Iesu ke he tau tutaki haana to moumou e faituga. Ne fakatupetupe he tau kupu haana a Peteru, Iakopo, Ioane, mo Aneterea. (Mare. 13:1-4) Ti ko e mogo ne ko lautolu ni mo Iesu, ne hūhū a lautolu ki a ia: “Kia talahau mai a e koe kia mautolu po ke hoko a fe e tau mena ia? po ke heigoa foki e fakamailoga he hāu a haele mai, mo e fakaotiaga he lalolagi?” (Mata. 24:1-3) He tali ha Iesu, ne nakai ni tala age e ia ki a lautolu e tau mena ka tupu ato hoko e moumouaga ha Ierusalema ka e pihia foki ke he tau mena ka tupu he tau aho fakamui he lalolagi ha Satani. Ne talahau tuai e Iesu e tau matematekelea, tuga e tau felakutaki, kū e tau mena kai, mo e lahi e mahani kelea. Ka e talahau tuai foki e Iesu e mena mitaki. Ne pehē a ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​​—Mata. 24:7-14.

² Ne fitā e tau tutaki he fakamatala e tala mitaki he Kautu mo Iesu. (Luka 8:1; 9:1, 2) Ti liga manatu e lautolu na pehē a Iesu: “Kua loga e tau saito ke helehele, ka ko e tau tagata gahua, kua tokogahoa a lautolu; kia olelalo a mutolu ke he Iki hana e tau saito ke helehele, kia fekau atu e ia e falu ke gahua ke he hana tau saito ke helehele.” (Luka 10:2) Ka e liga manatu a lautolu: ‘To fakamatala fēfē a mautolu ke he “lalolagi oti” mo e “talahau ke he tau atu motu oti”? To o mai i fe e tau tagata gahua?’ Nakai fakaai e tau tutaki ke manamanatu ke he puhala ofoofogia to fakamooli e tau kupu nei ia Mataio 24:14!

3. Ko e ha e tau kupu ha Iesu ne moua ia Luka 21:34 kua aoga pauaki ma tautolu he vahā nei? Ko e heigoa kua lata ke hūhū ki a tautolu ni?

³ Kua fakamooli e perofetaaga ha Iesu he vahā ha  tautolu. Totou miliona ne fakamatala e tala mitaki he Kautu he lalolagi katoa. (Isaia 60:22) Ka e fakakite foki e Iesu to uka e falu ke tuku fakamua tumau e gahua fakamatala he tau momoui ha lautolu. To lavelave lahi foki a lautolu he taute e falu mena mo e to “pehia” ai. (Totou Luka 21:34.) Kua aoga pauaki e tau kupu ha Iesu ma tautolu he vahā nei, ha ko e falu tagata he Atua kua nakai tuku fakamua e tau mena ne mua atu e aoga. Kitia e tautolu e mena nei he taute e lautolu e tau fifiliaga ke he ha lautolu a gahua, fakaakoaga tokoluga, po ke tau koloa fakatino. Falu ne lahi e magaaho ne fakaaoga ke he tau sipote po ke tau fakafiafiaaga. Falu ne nakai lahi e mena ne taute he fekafekauaga he Atua ha ko e tau tupetupe he moui he tau aho takitaha. Hūhū hifo ki a koe: ‘Fēfē e mena hane taute e au? Tuku fakamua nakai e au e finagalo he Atua ke he moui haaku?’

4. (a) Ko e heigoa ne liogi a Paulo hagaao ke he tau Kerisiano i Filipi? Ko e ha ne latatonu e liogi nei? (e) Ko e heigoa ka fakatutala a tautolu he vala tala nei mo e vala tala kahau? To lagomatai fēfē he tau vala tala nei a tautolu?

⁴ Ne lata e tau Kerisiano he senetenari fakamua ke gahua malolō ke tuku fakamua tumau e fekafekauaga he Atua he tau momoui ha lautolu. Ko e mena haia ne liogi e aposetolo ko Paulo ma lautolu i Filipi “kia mailoga e tau mena ne mua atu e aoga.” (Filipi 1:9-11) Tuga e aposetolo ko Paulo, laulahi he tau Kerisiano ne “kua au atu ai he fakamalolo ke talahau atu e kupu [he Atua] mo e nakai matakutaku.” (Filipi 1:12-14) He puhala pihia foki, laulahi ia tautolu he vahā nei kua fakamatala fakamalolō e Kupu he Atua. To atihake agaia ma tautolu ke fakatutala e vala tala nei he puhala ne fakaaoga e Iehova e fakatokatokaaga haana he vahā nei ke maeke ke fakamooli e tau kupu ia Mataio 24:14. To lagomatai he mena nei a tautolu ke lahi atu e fakamakutu ke he gahua fakamatala. Ko e heigoa hane taute he fakatokatokaaga ha Iehova, ti fakalagalaga fēfē he mena nei a tautolu mo e tau magafaoa ha tautolu? He vala tala kahau, to fakatutala a tautolu ke he puhala ka lagomatai a tautolu ke fakauka ke he fekafekauaga he Atua mo e ke muitua e takitakiaga he fakatokatokaaga ha Iehova.

5, 6. (a) Ko e ha ne foaki e Iehova ke he tau fekafekau haana e tau fakakiteaga hane tupu he lagi? (e) Ko e heigoa ne kitia e Esekielu he fakakiteaga?

⁵ Loga e mena kua nakai fifili a Iehova ke tuku he Tohi Tapu. Ma e fakatai, ne nakai foaki e ia ki a tautolu e tau vala tala matafeiga hagaao ke he uho ulu he tagata po ke lagi mo e lalolagi katoatoa. Ka e foaki mai e Iehova ki a tautolu e tau vala tala kua lata ia tautolu ke maeke ke maama e finagalo haana mo e omaoma ki a ia. (2 Timo. 3:16, 17) Kua fakalagalaga mooli ha kua fifili e Iehova ke tala mai ki a tautolu hagaao ke he vala nakai kitia he fakatokatokaaga haana. Ko e mena fiafia lahi ma tautolu ke totou e vala tala nei he tau tohi ha Isaia, Esekielu, Tanielu, mo e Fakakiteaga he Tohi Tapu! (Isaia 6:1-4; Eseki. 1:4-14, 22-24; Tani. 7:9-14; Fakakite. 4:1-11) Ko e ha ne fakaatā e Iehova a tautolu ke iloa hagaao ke he falu mena kua tupu he lagi?

⁶ Manako a Iehova ke manatu tumau e tautolu ko tautolu ko e vala he fakatokatokaaga he lagi mo e lalolagi katoatoa. Ko e vala nakai kitia he fakatokatokaaga a Iehova kua gahua malolō ke taute e finagalo ha Iehova. Ma e fakatai, ne kitia e Esekielu e fakakiteaga he vala nakai kitia he fakatokatokaaga ha Iehova ne hukui he kariota lahi mahaki. Kua mafiti lahi e kariota nei ti maeke ke hiki mafiti. (Eseki. 1:15-21) Ne kitia foki e Esekielu a Ia ne heke he kariota. Pehē a Esekielu: “Kitia foki e au tuga  ne tino mai he apa kikila, ne tino mai tuga e afi ne takai ai.” Ne lafi e ia: “Ko e hana tino mai ko e fakatai ia ke he lilifu a Iehova.” (Eseki. 1:25-28) Liga ofomate a Esekielu he fakakiteaga nei. Ne kitia e ia ko Iehova ne pule katoatoa ke he fakatokatokaaga haana ti fakaaoga e agaaga tapu haana ke takitaki ai. Ko e kariota ne holo he fakakiteaga ko e fakataiaga homo ue atu he vala nakai kitia he fakatokatokaaga ha Iehova hane gahuahua!

7. Foaki fēfē he fakakiteaga ha Tanielu e mauokafua ki a tautolu?

⁷ Ne kitia foki e Tanielu e fakakiteaga kua moua e tautolu e mauokafua. Ne kitia e ia a Iehova, “mai i tuai hana tau aho,” hane nofo he nofoaiki ne ha ha i ai e tau veli. (Tani. 7:9) Manako a Iehova ki a Tanielu ke kitia e fakatokatokaaga Haana hane holo, kua gahua ke taute e finagalo ha Iehova. Kitia foki e Tanielu e “Taha kua tuga e Tama he tagata” ko Iesu, ne moua e pule ke he vala kitia he fakatokatokaaga ha Iehova. Ko e pule ha Iesu ke he tau tagata ne nakai ni ke he tau tau gahoa. Ko e “pule tukulagi haia, nakai mole atu ia, ko e hana kautu foki nakai fakaoti ia.” (Tani. 7:13, 14) Kua fakalagalaga he fakakiteaga nei a tautolu ke falanaki ki a Iehova mo e lagomatai a tautolu ke maama e mena hane taute e ia. Ha kua moua e Iesu e pule haana mai ia Iehova, ko e fakakiteaga nei kua omoomoi foki a tautolu ke falanaki ki a Iesu ko e Takitaki ha tautolu.

8. Logona hifo fēfē a Esekielu mo Isaia ha ko e tau fakakiteaga he fakatokatokaaga ha Iehova? Lata ke fēfē e logonaaga ha tautolu ke he tau fakakiteaga nei?

⁸ Lata ke logona hifo fēfē a tautolu ke he tau fakakiteaga nei ke he fakatokatokaaga  ha Iehova? Tuga a Esekielu, kua nava lahi a tautolu ke he mena hane taute e Iehova. (Eseki. 1:28) Kitia foki he perofeta ko Isaia e fakakiteaga ke he mena hane tupu he lagi. He uiina a ia ke tala age ke he falu e mena hane taute e Iehova, ne talia agataha e ia e uiina. (Totou Isaia 6:5, 8.) Ha kua moua e Isaia e lagomatai ha Iehova, iloa e ia to nakai fakaai ha mena ke taofi a ia he taute e gahua haana ko e perofeta. Tuga a Isaia, kua fakalagalaga a tautolu ke lalago e fakatokatokaaga ha Iehova ke lahi e mena ka taute he fekafekauaga he Atua. Kua fakamalolō lahi ke iloa ko tautolu he vala he fakatokatokaaga hane lavelave tumau he taute e finagalo ha Iehova!

9, 10. Ko e ha kua lata ke fai vala kitia he fakatokatokaaga ha Iehova?

⁹ Puhala he Tama haana, ne fakatū e Iehova e vala he fakatokatokaaga haana he lalolagi ne gahua auloa mo e vala he lagi. Latatonu e mena nei ke maeke e gahua ne talahau tuai ia Mataio 24:14 ke taute. Ko e ha? Manamanatu ke he tolu e kakano.

¹⁰ Fakamua, ne pehē a Iesu ko e tau tutaki haana to fakamatala ke “hoko ni ke he fakaotiaga [tau kala oti] he lalolagi.” (Gahua 1:8) Uaaki, ko lautolu ka taute e gahua fakamatala to lata ke moua e fakatonuaga mo e fakamalolōaga he Tohi Tapu. (Ioane 21:15-17) Toluaki, to lata ia lautolu mo e tau feleveiaaga ke fakapotopoto a lautolu ke tapuaki a Iehova mo e ke fakaako ke iloa e puhala fakamatala. (Hepe. 10:24, 25) Ke maeke ke taute e tau mena oti nei, to lata e tau tutaki ha Iesu ke fakatokatoka fakamitaki.

11. Maeke fēfē a tautolu ke lalago e fakatokatokaaga ha Iehova?

¹¹ Maeke fēfē ia tautolu ke lalago e fakatokatokaaga ha Iehova? Taha puhala aoga ko e falanaki ke he tau matakainaga kua takitaki e gahua fakamatala. Ne falanaki a Iehova mo Iesu ke he tau matakainaga nei, ti kua lata foki a tautolu. Liga fakaaoga he tau matakainaga nei e tau magaaho mo e tau malolō ha lautolu he lali ke fakamafola e tau lekua he lalolagi nei. Ka e nakai taute e lautolu e mena ia. Kia fakatutala a tautolu ke he mena ne hagaaki tumau he vala kitia he fakatokatokaaga.

12, 13. Leveki fēfē he tau motua e tau matagahua ha lautolu? Ko e ha ne fakamalolō e mena ia ki a koe?

¹² Ko e tau motua lotomatala he lalolagi katoa kua foaki ki ai e matagahua ke fakatoka mo e ke takitaki e gahua fakamatala he tau motu ne fekafekau ai a lautolu. He taute e lautolu e tau fifiliaga, kua kumi e lautolu e puhala mai he Tohi Tapu. He puhala nei, ne taute e lautolu e Tohi Tapu ko e ‘hulu ia ke he ha lautolu a tau hui, mo e maama ke he ha lautolu a puhala.’ Ne liogi foki a lautolu ma e takitakiaga ha Iehova.​​—Sala. 119:105; Mata. 7:7, 8.

¹³ Tuga ni ne taute he tau motua he senetenari fakamua, ko e tau motua kua fakatoka e gahua fakamatala he vahā nei ne tuku fakamua e “tufatufaaga he kupu.” (Gahua 6:4) Kua taute a lautolu ke fiafia lahi ke kitia e holo ki mua he gahua fakamatala he tau motu ni ha lautolu mo e ke he lalolagi katoa. (Gahua 21:19, 20) He nakai taute e tau matafakatufono loga ma e tau tagata he Atua, ne hagaaki a lautolu ke taute e tau mena kua lata ke fakaholofa aki e tala mitaki mo e takitakiaga he Tohi Tapu mo e agaaga tapu. (Totou Gahua 15:28.) He puhala nei, kua fakatoka he tau matakainaga taane nei e fakafifitakiaga mitaki lahi mahaki ma e tau tagata oti he tau fakapotopotoaga.​​—Efeso 4:11, 12.

14, 15. (a) Ko e heigoa kua taute ke lagomatai a tautolu ke fakamatala ke he lalolagi katoa? (e) Fēfē e logonaaga haau ke he mena hane taute e koe ke lalago e gahua fakamatala?

 ¹⁴ Laulahi he tau matakainaga ha tautolu hane gahua he tau aho takitaha ke tauteute e tau tohi, tau feleveiaaga, mo e tau fonoaga. Ma e fakatai, totou afe e tau tagata gahua foaki noa ne eketaha ke fakaliliu e tau tohi ke molea 600 e vagahau. Ti ko e fua, tokologa e tagata kua maeke ke iloa e “tau mana he Atua” ke he vagahau ni ha lautolu. (Gahua 2:7-11) Ne gahua malolō e tau matakainaga fuata ke he tau matini ke lomi e tau tohi mo e tuku fakalataha ai. Ko e tau tohi nei ne fakafano atu ai ke he tau fakapotopotoaga ne mamao foki.

¹⁵ He tau matakavi foki ha tautolu, tokologa ne taute e tau gahua kua lagomatai a tautolu ke hagaaki ke fakamatala he tala mitaki. Ma e fakatai, totou afe e tau tagata gahua foaki noa kua talaga e tau Fale he Kautu mo e tau Fale he Toloaga. Lagomatai he falu e tau matakavi ne lauia he tau mena tutupu pauaki mo e tau mena fakaofo fakaekekafo. Falu ne fakatoka e tau toloaga mo e tau fonoaga ha tautolu, mo e falu ne fakaako e tau aoga Tohi Tapu. Ko e heigoa e kakano he tau gahua oti nei? Taute ai ke lagomatai a tautolu ke fakamatala e tala mitaki, holo ki mua he kupu mooli, mo e lagomatai foki e tau tagata ke eke mo tau tagata tapuaki ha Iehova. Ko e vala kitia he fakatokatokaaga ha Iehova ne tuku fakamua mooli e tau mena kua mua e aoga!

16. Ko e heigoa ka kumikumi e koe ma e tapuakiaga magafaoa po ke fakaakoaga fakatagata?

¹⁶ Fa fai magaaho nakai a tautolu ke manamanatu ke he mena hane taute he fakatokatokaaga ha Iehova? Maeke a koe ke kumikumi hagaao ke he fakatokatokaaga he tapuakiaga he magafaoa haau po ke fakaakoaga fakatagata ti manamanatu fakahokulo ke he mena kua fakaako e koe. Ma e fakatai, to fiafia ai ke fakaako e tau fakakiteaga ne foaki age ki a Isaia, Esekielu, Tanielu, mo Ioane. Ko e tohi Jehovah’s Witnesses​​—Proclaimers of God’s Kingdom mo e falu tohi po ke tau DVD kua fakaako ki a tautolu ke he loga e tau mena ofoofogia hagaao ke he fakatokatokaaga he Atua.

17, 18. (a) Lagomatai fēfē he vala tala nei a koe? (e) Ko e heigoa e tau hūhū kua lata ke hūhū hifo e koe?

¹⁷ Kua mitaki ma tautolu ke manamanatu fakahokulo ke he puhala hane fakaaoga e Iehova e fakatokatokaaga haana ke lalago e gahua fakamatala. Fakalataha mo e fakatokatokaaga homo ue atu nei, kia tuku fakamua e tautolu e tau mena ne mua atu e aoga. To logona hifo a tautolu tuga a Paulo, ne tohi: “Kua nakai fakalolelole ai a mautolu ha ha ia mautolu e feua nai, ha kua ofania a mautolu.” (2 Kori. 4:1) Ne fakamafana foki e ia e tau matakainaga haana: “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.”​​—Kala. 6:9.

¹⁸ Kua lata kia a koe po ke magafaoa haau ke taute e falu hikiaga ke maeke a koe ke tuku fakamua e tau mena kua mua atu e aoga he moui haau he tau aho takitaha? Maeke nakai a koe ke fakamukamuka e moui haau ke lahi e mena ka taute he gahua fakamatala? He vala tala ka mui mai, to fakatutala a tautolu ke he lima e mena ka lagomatai a tautolu ke muitua ke he fifitakiaga he fakatokatokaaga ha Iehova mo e fakatumau e makutu ha tautolu ke he fekafekauaga he Atua.