1, 2. Ko e heigoa kua lata ia tautolu ke moua e taliaaga he Atua?

 LAULAHI he tau tagata ne fiafia ke he tau mena ne manamanatu e falu hagaao ki a lautolu. Ka ko e tau Kerisiano, ko e mena ne manatu a Iehova hagaao ki a tautolu kua mua atu e aoga. Pihia foki, ko Ia ne mua ue atu he lagi mo e lalolagi katoatoa, ti ha ha ia ia e “puna he moui.”​—Sala. 36:9.

² Ko e aposetolo ko Peteru ne fakamaama ke moua e taliaaga ha Iehova, kua lata ia tautolu ke “mahani ke lata ai ke he tau mahani mitaki mo e tau mahani Atua.” (Totou 2 Peteru 3:11.) Kua tapu ni e “tau mahani mitaki” ha tautolu ka momoui a tautolu ke he moui meā he tau puhala oti. Putoia he mena nei e puhala ha tautolu kua manamanatu, gahua, mo e tapuaki ke he Atua. Kua lata foki a tautolu ke ha ha ai e “tau mahani Atua” ne omoomoi he fakaalofa mo e fakalilifu hokulo ma e Atua. Ti nakai ni ko e tau mahani ha tautolu ka e pihia foki e tau logonaaga ha tautolu hagaao ke he Atua kua aoga ki a ia. Ko Iehova “kua kamatamata . . . e loto,” ti iloa e ia kua tapu e tau mahani ha tautolu mo e kua tapuaki a tautolu ki a ia tokotaha.​—1 Nofo. 29:17.

3. Ko e heigoa e tau hūhū kua lata ia tautolu ke hūhū hifo ki a tautolu?

³ Ko Satani ko e Tiapolo, ne nakai manako ki a tautolu ke moua e taliaaga he Atua. Ti taute e ia e tau mena oti kua maeke ia ia ke galo e tautolu e tuaga kapitiga ha tautolu mo Iehova. Kua fakaaoga tumau e Satani e tau pikopiko ke lali ke fakahehē a tautolu ke maeke a tautolu ke fakaoti e tapuakiaga ki a Iehova. (Ioane 8:44; 2 Kori. 11:13-15) Ti kua lata ia tautolu ke hūhū hifo: ‘Fakahehē fēfē e Satani e tau tagata? Ko e heigoa haaku ka taute ke puipui e tuaga kapitiga haaku mo Iehova?’

4. Ke moumou e tuaga kapitiga ha tautolu mo e Atua, ko e heigoa ha Satani ne lali ke taute? Ko e ha?

⁴ Ne tohia he tutaki ko Iakopo: “Takitokotaha mo e  kamatamata a ia ka toho mo e hele a ia he hana tau manako lahi; Ka fatu e manako lahi ti fanau mai ai e ia, ko e hala; ka motua foki e hala ti fanau mai ai, ko e mate.” (Iako. 1:14, 15) Ke moumou e tuaga kapitiga ha tautolu mo e Atua ne lali a Satani ke hokotia ke he tau loto ha tautolu, ne puna mai e tau manako ha tautolu.

5, 6. (a) Lali fēfē a Satani ke fakaohooho e tau loto ha tautolu? (e) Ko e heigoa e tau mena tolu kua fakaaoga e Satani ke fakatupu e tau manako hehē he tau loto ha tautolu? Iloa mitaki fēfē e ia ke fakaaoga e tau mena nei?

⁵ Lali fēfē a Satani ke fakaohooho e tau loto ha tautolu? Pehē e Tohi Tapu: “Ko e lalolagi oti ha he pule hana kua mahani kelea.” (1 Ioa. 5:19) Ko e tau lagatau kelea ha Satani ne putoia e “tau mena ha ha he lalolagi.” (Totou 1 Ioa. 2:15, 16.) Ke he tau afe tau, ne talaga fakamitaki he Tiapolo e lalolagi nei ke fakahehē e tau tagata. Ha kua nonofo a tautolu he lalolagi nei, kua lata ia tautolu ke puipui a tautolu mai he tau lagatau kelea haana.​—Ioane 17:15.

⁶ Ne lali a Satani ke fakatupu e tau manako hehē he tau loto ha tautolu. Ke taute e mena nei, ne fakaaoga e ia tolu e “mena ha ha he lalolagi” ne totoku he aposetolo ko Ioane: (1) “ko e manako lahi he tino,” (2) “manako lahi he tau mata,” mo e (3) “tau mena he mouiaga nai ke hula ki ai.” Fakaaoga e Satani e tau mena tolu oti ia ke kamatamata aki a Iesu he tutakale. Ha kua fakaaoga e Satani e tau lagatau nei ke he loga e tau tau, ne mitaki lahi a ia he fakaaoga ai, ti iloa e ia e tau lagatau ke fakaaoga ke he tau tagata takitaha. Ato fakaako e tautolu e puhala ke puipui a tautolu, kia kitekite la tautolu ke he puhala kua maeke e Tiapolo ke fakahehē a Eva ka e nakai maeke ke fakahehē e Tama he Atua.

7. Fakaaoga fēfē e Satani e “manako lahi he tino” ke kamatamata aki a Eva?

⁷ Latatonu e tau tagata oti ke kai ke tumau e moui. Na talaga he Tufuga e lalolagi ke tupu mai e tau mena kai loga. Liga lali a Satani ke fakaaoga e tau manako pauaki ha tautolu ma e tau mena kai ke kamatamata a tautolu ke taute e mena ne nakai fakafiafia e Atua. Kitekite la tautolu ke he puhala ne taute e ia e mena nei ki a Eva. (Totou Kenese 3:1-6.) Ne tala age a Satani ki a Eva to nakai mate a ia ka kai e ia e fua he “akau ke iloa ai e mitaki mo e kelea.” Pehē a ia ka kai ai e ia, to tuga e Atua a ia. (Kene. 2:9) Ne kakano e Tiapolo kua nakai lata a Eva ke omaoma ke he Atua ke fakatumau ke moui. Ko e pikopiko kelea lahi a ia! He mole e tuku he Tiapolo e manatu nei ke he loto ha Eva, ne ua e fifiliaga haana: Maeke a ia ke tiaki e manatu, po ke maeke a ia ke fakatumau ke manamanatu hagaao ki ai mo e fakaatā e manako haana ke tupu ke he fua he akau. Pete ne  liga kai a ia mai he ha akau foki, ne fifili a ia ke tumau e manamanatu ke he akau he vahāloto he kaina. Fakahiku ai, ne kai e ia e fua he akau. Ne feaki e Satani i loto ha Eva e manako ke he taha mena ne fakatapu he Tufuga haana.

8. Fakaaoga fēfē e Satani e “manako lahi he tino” ke kamatamata aki a Iesu? Ko e ha ne nakai kautū a Satani?

⁸ Ne lali a Satani ke fakaaoga e lagatau pihia foki mo Iesu. He haia a Iesu he tutakale ti nakai kai a ia ke 40 e aho mo e 40 e pō, ne lali a Satani ke kamatamata a ia he fakaaoga e manako ke he tau mena kai. Ne pehē a Satani: “Kaeke ko e Tama he Atua a koe, ati tala age a ke he maka nai kia faliu mo areto.” (Luka 4:1-3) Ua e fifiliaga ha Iesu: Maeke a ia ke fifili ke nakai fakaaoga e malolō haana ke fakamakona e manako ma e tau mena kai, po ke fifili a ia ke fakaaoga ai. Ne iloa e Iesu kua nakai lata a ia ke fakaaoga e malolō haana ke taute e mahani lotokai. Pete ni e hoge a ia, ko e tuaga kapitiga haana mo e Atua kua mua atu e aoga ki a ia ke he tau mena kai. Tali a Iesu: “Kua tohi, Nakai ko e tau mena kai hokoia ke moui ai e tagata, ka ko e tau kupu oti he Atua.”​—Luka 4:4.

9. Ko e heigoa e “manako lahi he tau mata”? Fakaaoga fēfē e Satani e lagatau nei ki a Eva?

⁹ Ko e taha foki he tau lagatau ha Satani ne totoku e Ioane ko e “manako lahi he tau mata.” Maeke e tagata ke manako ke he taha mena he ono ki ai. Ne fakaaoga e Satani e manako nei ke fakataki aki a Eva ti pehē: “Ti fakaala ai ha mua a tau mata.” Ko e tumau e ono ha Eva ke he fua he akau, kua lahi e manako haana ki ai. Ne kitia e Eva ko e akau kua “fulufuluola mai” ke kitekite ki ai.

10. Fakaaoga fēfē e Satani e “manako lahi he tau mata” ke kamatamata aki a Iesu? Tali fēfē a Iesu?

¹⁰ Fakaaoga fēfē e Satani e “manako lahi he tau mata” ke kamatamata aki a Iesu? Ko Satani “kua fakakite atu kia ia e tau kautu oti he lalolagi ke he magaaho kiliku. Ti pehe age e tiapolo kia ia, To ta atu oti e au kia koe e pule nai, mo e lilifu ha lautolu.” (Luka 4:5, 6) Ko e mena ne kitia e Iesu ne nakai ko e tau kautu oti mooli he lalolagi, ka ko e fakakiteaga he lilifu ha lautolu. Kua liga manatu a Satani to kamatamata a Iesu ha ko e tau mena ne kitia e ia. Tala age a ia ki a Iesu: “Kaeke ke hufeilo mai a koe kia au, to eke e tau mena oti na māu.” (Luka 4:7) Ne nakai manako katoatoa a Iesu ke eke mo tagata ne manako a Satani ki a ia. Ne tali mafiti a ia: “Nukua tohi, Kia hufeilo a koe ke he Iki hau a Atua, ko ia ni hokoia ke fekafekau a koe ki ai.”​—Luka 4:8.

11. Fakahehē fēfē e Satani a Eva?

¹¹ Fakahiku ai, ne totoku e Ioane e “tau mena he mouiaga nai ke hula ki ai.” He  mogo ko Atamu mo Eva ni e tau tagata he lalolagi, nakai fakatokoluga a laua he fia kitia ke he tau mena ne moua e laua ki mua he falu tagata. Ka e fakatokoluga a laua he mogo fakamui. Ne taute e Satani a Eva ke talitonu kua fai mena homo ue atu ne latatonu a Eva ke moua ka e nakai manako e Atua ke age ki a ia. Ne tala age e Tiapolo ki a ia ka kai mai a ia he “akau ke iloa ai e mitaki mo e kelea,” to ‘eke ai a ia ke tuga ne atua ke iloa ai e mitaki mo e kelea.’ (Kene. 2:17; 3:5) Manako a Satani ki a Eva ke manatu kua maeke a ia ke moui ka e nakai takitaki mai a Iehova. Liga ko e fakatokoluga e taha kakano ne talitonu a Eva ke he pikopiko ia. Kai e ia e akau ne fakatapu ti manatu to nakai mate a ia. Ne hepe mamao a ia.

12. Ko e heigoa falu puhala ne lali a Satani ke kamatamata a Iesu? Tali fēfē a Iesu?

¹² Kehe mamao mai ia Eva, ne fakatoka e Iesu e fakafifitakiaga homo ue atu he mahani fakatokolalo! Ne lali a Satani ke kamatamata a ia ke taute e mena ke nava he falu mo e ke kamatamata e Atua. Ka e totoko malolō e Iesu ke taute e mena ia ha ko e mahani fakatokoluga a ia! Ko e tali haana ne maaliali mo e lautonu: “Kua pehe e kupu, Aua neke kamatamata a koe ke he Iki hau a Atua.”​—Totou  Luka 4:9-12.

13, 14. Lali fēfē a Satani ke fakahehē a tautolu he vahā nei?

¹³ He vahā nei, ne fakaaoga e Satani e tau lagatau taha ia ne fakaaoga e ia ki a Eva mo Iesu. Ne fakaaoga e ia e “manako lahi he tino” ke kamatamata aki e tau tagata ke taute e mahani feuaki po ke kai mo e inu lahi ke he kava. Ne fakaaoga e ia e “manako lahi he tau mata” ke kamatamata aki e tau tagata ke onoono ke he tau ata telefua, mua atu he Initanete. Ti fakaaoga e ia e manako he “tau mena he mouiaga nai ke hula ki ai” ke lali ke fakatokoluga e tau tagata mo e manako ke he pule, talahaua, mo e loga lahi mahaki he tau koloa fakatino.

¹⁴ Ne fakaaoga e Satani e “tau mena ha ha he lalolagi” tuga ni e tagata takafaga ne fakaaoga e page. Mata mitaki e page ke he ika, ka e i loto he page ko e matau. He puhala taha, ne fakaaoga e Satani e tau mena ne liga mitaki mo e lata ke taute a tautolu ke totoko ke he tau matafakatufono he Atua. Manako a Satani ki a tautolu ke talitonu ko e leveki ha tautolu a tau manako fakatino mo e taute e tau momoui ha tautolu ke tokotoko mitaki kua mua e aoga ke he taute he finagalo he Atua. To fakahehē kia e Satani a koe?

15. Tuga a Iesu, maeke fēfē a tautolu ke kalo kehe he fakahehē e Satani?

 ¹⁵ Ne fakahehē e Satani a Eva, ka e nakai pihia a Iesu. He tau magaaho takitaha ne lali a Satani ke taute lagatau ki a Iesu, ne tali a Iesu mai he tau Tohiaga Tapu mo e pehē: “Kua tohi” po ke, “Kua pehe e kupu.” Kaeke ko e tau tagata fakaako mitaki a tautolu he Tohi Tapu, to iloa mitaki e tautolu e tau Tohiaga Tapu mo e maeke ke manatu e tau kupu tohi ke lagomatai a tautolu ka kamatamata a tautolu. (Sala. 1:1, 2) He manatu e tau fakafifitakiaga he tau fekafekau tua fakamooli he Atua ka lagomatai a tautolu ke mahani fakamooli tuga a lautolu. (Roma 15:4) He fakalilifu hokulo ki a Iehova, ko e fiafia ke he mena ne fiafia a ia ki ai mo e vihiatia ke he mena ne vihiatia a ia ki ai, to puipui a tautolu.​—Sala. 97:10.

16, 17. Maeke fēfē e malolō he manamanatuaga ha tautolu ke lauia ko e tagata fēfē a tautolu?

¹⁶ Ne fakamafana he aposetolo ko Paulo a tautolu ke lata ke manamanatu ke eke mo tagata kua fakahakohako he manamanatuaga he Atua, nakai he lalolagi. (Roma 12:1, 2) Fakamanatu e Paulo ki a tautolu kua lata ia tautolu ke fakaeneene he tautaofi e tau mena ne manamanatu a tautolu ki ai. Pehē a ia: “Kua ulu ki lalo e tau mahalohaloaga, mo e tau mena fakatokoluga oti kua hemu ke he maama ke he kupu he Atua, kia mahala e tau manatu oti ke omaoma kia Keriso.” (2 Kori. 10:5) Ko e manamanatuaga ha tautolu kua fakaohooho malolō lahi ko e tagata fēfē a tautolu, ti kua lata tumau a tautolu ke lali ke manamanatu hagaao ke he tau mena kua fakafiafia e Atua.​—Filipi 4:8.

¹⁷ Ka manako a tautolu ke tapu, lata ia tautolu ke totoko e tau manatu mo e tau manako hehē. Kua lata ia tautolu ke fakaalofa ki a Iehova “mai he loto mea.” (1 Timo. 1:5) Ka kua fakavai e loto, ti liga nakai mailoga e tautolu e lahi mahaki he “tau mena ha ha he lalolagi” kua lauia a tautolu. (Iere. 17:9) Kua aoga mogoia ke muitua e tautolu e fakatonuaga ha Paulo: “Kia kamatamata e mutolu a mutolu, po kua ha ha i ai a mutolu ke he tua; kia kumikumi hifo a mutolu kia mutolu.” He fakaako a tautolu ke he Tohi Tapu, kua lata ia tautolu ke hūhū hifo, ‘Fakafiafia kia he tau manatu mo e tau manako haaku e Atua?’​—2 Kori. 13:5.

18, 19. Ko e ha kua lata ia tautolu ke gahua fakamalolō ke eke mo tagata ne manako a Iehova ki ai?

¹⁸ Fai mena foki ka lagomatai a tautolu ke totoko e “tau mena ha ha he lalolagi” ko e manatu e tau kupu ha Ioane: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.” (1 Ioa. 2:17) Kua tuga ke tumau tukulagi e fakatokaaga ha Satani. Ka e he taha aho to moumou ai. Manatu ko e tau mena oti he lalolagi nei to nakai leva ti galo ka lagomatai a tautolu ke nakai fakahehē e Satani.

¹⁹ Ne tohi he aposetolo ko Peteru kua lata ia tautolu ke eke mo tagata ne talia he Atua he “fakatalitali mo e foli atu [a tautolu] kia hoko mai e aho he Atua, ke fakaotioti ai e lagi he vela, ke faliu puke vai foki e tau mena ke eke aki ha kua vela.” (2 Pete. 3:12) Nakai leva mogonei, to hoko mai e aho ia, mo e to moumou e Iehova e tau faahi oti he lalolagi ha Satani. Ato hoko mai e magaaho ia, to matutaki a Satani ke fakaaoga e “tau mena ha ha he lalolagi” ke kamatamata aki a tautolu tuga ne kamatamata e ia a Eva mo Iesu. Nakai lata a tautolu ke tuga a Eva mo e lali ke fakamakona e tau manako ni ha tautolu. Kua tatai e mena nei mo e taute a Satani mo atua ha tautolu. Kua lata ia tautolu ke tuga a Iesu mo e totoko e tau kamatamata nei, pete ne mitaki e tau mena ne taute e Satani. Kia igatia a tautolu mo e gahua fakamalolō ke eke mo tagata ne manako ki ai a Iehova.