KUA tupu ai ia Aokuso 1936. Ko e matakavi ha Swaziland Royal Kraal. Mai he motokā fakailoa, ko Robert mo George Nisbet ne oti laia e tā he tau leo kofe fakatagi ne tapaki ti mui mai e tau lauga ne tapaki he Matakainaga ko J. F. Rutherford. Ne fiafia lahi e Patuiki ko Sobhuza II. “Ne mā lahi a maua,” he fakamaama e George, “kua manako a ia ke fakatau e matini tapaki leo, tau tapakiaga, mo e leo taogo he fekau he Kautu!”

Ne tala age fakamolemole e Robert kua nakai sela e tau koloa nei. Ko e ha? Ha ko e tau koloa he tagata kehe a ia. Manako e Patuiki ke iloa ko hai a ia.

Ko e tali ha Robert, “Ko e tau koloa he taha Patuiki foki.” Ti hūhū a Sobhuza ko hai e Patuiki nei. “Ko ia ko Iesu Keriso, ko e Patuiki he Kautu he Atua,” he ui e Robert.

“Ae, ko ia e Patuiki ne mua,” he talahau e Sobhuza mo e fakalilifu hokulo. “Ai manako au ke uta ha mena ne pule a ia ki ai.”

Ne tohi e Robert: ‘Ne ofoofogia lahi mahaki au he aga pauaki he Iki Lilifu, ko e Patuiki ko Sobhuza. Ne vagahau Palagi mitaki lahi a ia ka e nakai fia lahi po ke fakaikaluga ti fakamooli katoatoa mo e mukamuka ke tutala ki ai. Nofo au mo ia he ofisa haana kavi ke he 45 e minuti, ka e tā e George e leo kofe i fafo.

‘He matahiku he aho ia,’ he matutaki e Robert, ‘ne o atu a maua ke he The Swazi National School ne ha ha ai e mena fulufuluola lahi ne tupu. Ne fakamatala a maua ke he ulu faiaoga, ti fanogonogo fakamitaki a ia. He tutala a maua hagaao ke he matini ti tala age ke fanogonogo e aoga katoa ke he tau tapakiaga, ne fiafia lahi a ia ti tala age ke he tokologa he tau tama aoga ne teitei tokoteau ke nonofo he motie ke fanogonogo. Ne tala mai ki a maua ko e aoga tokoluga ne fakaako ke gahua fonua, katene, kamuta, talaga, vagahau Palagi, mo e fakanumera ke he tau tama taane; ko e tau tama fifine ne fakaako ke nosi, gahua kaina, mo e falu gahua aoga foki. Ko e matua fifine tupuna he Iki Lilifu ne fakatū e aoga. a

He mataulu he 1933, ne fanogonogo mo e fiafia e Patuiki ko Sobhuza ke he tau paionia ne o atu ke he Royal Kraal. He taha magaaho, ne fakapotopoto e ia e tau leoleo leveki haana ko e tau toa ne toko 100 ke logona e fekau he Kautu ne tapaki. Ne  ole a ia ke moua tumau e tau mekasini ha tautolu ti talia e tau tohi. Nakai leva lahi ti teitei moua oti he Patuiki e fatatohi fakateokarasi katoa! Mua atu, ne leveki fakamitaki e ia pete ne pā he fakatufono Peritania e tau tohi ha tautolu he magahala felakutaki ke uaaki he lalolagi.

Ne matutaki e Patuiki ko Sobhuza II ke fakafeleveia e Tau Fakamoli ke he Royal Kraal i Lobamba, mo e fakailoa atu foki ke he tau akoako ke o mai ke fanogonogo ke he tau lauga Tohi Tapu ha lautolu. Ko e Fakamoli ne higoa ko Helvie Mashazi hane fakatutala ke he Mataio veveheaga 23, ko e matakau he tau akoako ne ita he hohopo hake ti lali ke omoi a ia ke nofo ki lalo. Ka e fakalava mai e Patuiki, he ole ke he Matakainaga ko Mashazi ke matutaki. Lafi ki ai, ne tala age e Patuiki ke he toloaga ke tohi hifo e tau kupu Tohi Tapu oti ne totoku he lauga!

He mole e fanogonogo ke he lauga he matakainaga taane paionia he taha magaaho, tokofā e akoako ne haia i ai ne vivilo e tau kola tapulu ha lautolu mo e fakailoa: “Nakai ko e tau akoako a mautolu ka ko e Tau Fakamoli a Iehova a mautolu mogonei.” Ti ole a lautolu ke he paionia ko e fai tohi nakai a ia tuga ne moua he Iki Lilifu.

Tali mai he atu tau 1930 ato hoko e mate haana he 1982, ne fakalilifu he Iki Lilifu e Tau Fakamoli a Iehova ti nakai fakaatā e favaleaga ki a lautolu ha kua nakai fakamanatu e tau faiagahau Swazi. Ko e mena ia, ha ha he Tau Fakamoli a Iehova e kakano mitaki he loto fakaaue ki a ia, ti momoko mooli a lautolu he mate a ia.

He kamataaga he 2013, molea e 3,000 he tau tagata fakailoa he Kautu ki Suasilani. He molea ni e taha e miliona he tau tagata ne nonofo ai, ko e motu nei ne 1 e tagata fakailoa ke he 384 he puke tagata. Molea e 260 e paionia ne lavelave ke he 90 e fakapotopotoaga, ti 7,496 ne o atu ke he Fakamanatuaga he 2012. Maaliali ai, to ha ha i ai e tupuaga lahi foki. Ko e fakavēaga mauokafua ne fakatoka mooli e lautolu ne ahiahi atu fakamua ki Suasilani he atu tau 1930.​—Mai he tau tokaaga tuai i Aferika Toga.