Fakaatā e Kehekeheaga ke Lagomatai a Koe

TĀ

To talia nakai e koe ko Iesu e Faiaoga mua ue atu ke moui he lalolagi? Liga lali a koe ke fifitaki falu he tau puhala ne fakaako e ia, tuga he fakaaoga e ia e tau hūhū mo e tau fakataiaga. Kua manamanatu nakai a koe na fa fakaaoga e ia e kehekeheaga he fakaako atu haana?

Tokologa e tagata ne fakaaoga e kehekeheaga ka tutala a lautolu. Liga taute foki e koe e mena ia, mo e nakai fa manamanatu ki ai. Liga fa pehē a koe, “Pehē a lautolu kua momoho oti e tau fua lakau; ka e, maō lahi agaia e tau fua lakau ē. Po ke, “Ko e tama fifine mā a ia fakamua, ka ko e mogonei kua hakahakau a ia.”

He tau tuaga tuga anei, kua fakakite mua e koe e mena ne tupu po ke manatu; ti fakamaama mogoia e koe e kehekeheaga he fakaaoga e tau talahauaga tuga ka e, pete ia, po ke he taha faahi. Po ke taute e koe e kehekeheaga he lafi e vala tala po ke fakalaulahi e manatu. Ka vagahau pihia a koe, kua hako e logonaaga mo e maeke ke lagomatai e falu ke moua e manatu haau.

Pete foki ka nakai ko e aga mau e tau kehekeheaga ke he falu vagahau po ke aga fakamotu, kua mitaki ke mailoga ai e tautolu e aoga. Ko e ha? Ha kua loga ai ne moua e tautolu he Kupu omoomoi he Atua. Na fakaaoga tumau e Iesu e tau kehekeheaga. Manatu e tau mena nei: “Nakai tugi foki e lautolu e lamepa ti toka ai i lalo he kumete, ka e toka ki luga he tokaaga lamepa.” “Nakai hau au ke fakahui [e Fakatufono], ka kia fakamoli ai.” “Kua fanogonogo a mutolu, ne tala mai kia lautolu ke he vaha i tuai, Aua neke faivao a koe. Ka e tala atu e au kia mutolu, ka kikite atu taha ke he fifine . . . ” “Kua talahau mai, Ke totogi e mata ke he mata, ka e totogi e nifo ke he nifo. Ka e tala atu e au kia mutolu, aua neke taui atu e mutolu e kelea; ka ko e tagata ne poki mai hau a pakagutu matau, kia haga atu taha kia ia.”—Mata. 5:15, 17, 27, 28, 38, 39.

Ha ha i ai e tau kehekeheaga tatai he falu tohi he Tohi Tapu. Maeke ai ke lagomatai a koe ke moua e manatu po ke fakamaama e puhala mua atu e mitaki he taute taha mena. Kaeke ko e matua a koe, manamanatu ke he kehekeheaga nei: “Ko mutolu foki, ko e tau matua tane, aua neke fakahogohogomanava ke he fanau ha mutolu, ka kia leveki ai ke he tau kupu akonaki mo e tau kupu fakamafana [ha Iehova].” (Efeso 6:4) Ane mai tohi ni he aposetolo ko Paulo kua lata he matua taane (po ke matua fifine) ke feaki e tama ke he akonakiaga he Atua, to pulotu mo e hako e mena ia. Kua maama mitaki agaia e manatu mo e kehekeheaga ke ‘aua neke fakahogohogomanava a lautolu ka kia leveki ai ke he tau kupu fakamafana ha Iehova.’

Fakamui he veveheaga ia, ne tohi e Paulo: “Ko e mena nakai tau a tautolu ke he tau tagata, ka ko e . . . tau agaga kelea ke he tau mena ha he lagi.” (Efeso 6:12) Ko e kehekeheaga ia kua tuga ke lagomatai a koe ke maama kua ha ha ia koe e tau hagahaga kelea lahi. Nakai ko e tau ke he tau tagata; ka ke he tau agaaga kelea.

AOGA MAI HE TAU KEHEKEHEAGA

He tohi taha nei he Tohi Tapu ia Efeso, to moua e koe loga e kupu tohi ne fakakite e Paulo e tau kehekeheaga. He manamanatu ke he tau mena nei ka lagomatai a tautolu ke maama e manatu ha Paulo mo e liga ke maama mitaki e mena kua lata ia tautolu ke taute.

Liga moua e koe e fiafia mo e kakano lahi ke fakatutala ke he fakafonua kua fakatoka mai e tau kehekeheaga kua moua e koe ia Efeso veveheaga 4 mo e 5. He totou e koe e tau kehekeheaga takitaha, manamanatu ke he moui ni haau. Hūhū ki a koe: ‘Ko e heigoa moolioli e aga haaku? Fēfē e tali atu haaku ke he mena nei po ke tuaga tuga anei? Faahi fe he kehekeheaga ka manatu e falu kua fakakite aki au?’ Ka manamanatu a koe ke he kehekeheaga kua fakakite mua e puhala kua lata ia koe ke gahua ki ai, lali ke taute e mena ia. Fakaatā e kehekeheaga ia ke lagomatai a koe.

Po ke liga fakaaoga e koe e fakafonua mo vala he tapuakiaga magafaoa haau. Fakamua, ko e tau tagata oti he magafaoa haau ka totou ai e tau kehekeheaga. Ti taha ia mutolu ka talahau e vala fakamua he kehekeheaga, he fakaatā e falu he magafaoa ke lali ke manatu e vala ne fakamaama he vala ke uaaki. Takitaki he mena ia ke he fakatutalaaga he magafaoa kua fiafia ke he puhala ka fakagahua katoatoa e koe e vala ke uaaki. Ē, ko e kumikumi e tau kehekeheaga tuga ia kua liga lagomatai a lautolu ne ikiiki mo e momotua ke foli ke he mahani Kerisiano he magafaoa mo e falu matakavi.

Maeke nakai a koe ke manatu e vala ke uaaki he kehekeheaga?

He mahani lahi a koe ke he aoga he tau kehekeheaga, liga mailoga mitaki ai e koe he Tohi Tapu, ti liga moua e koe kua lagomatai lahi ke he haau a gahua faka-Kerisiano. Ma e fakatai, maeke ia koe ke pehē ke he tagata he kaina: “Tokologa e tagata ne pehē na ha ha he tau tagata oti e agaaga nakai mate, ka e mailoga la e mena ne talahau he Kupu he Atua.” Po ke he fakaako Tohi Tapu, maeke a koe ke hūhū: “Laulahi he tau tagata he matakavi nei ne talitonu ko e Atua mo Iesu ko e taha e tagata; pete ia, ko e heigoa ne moua e taua he talahauaga he Tohi Tapu? Ti ko e heigoa haau ne talitonu?”

Ē, kua fakakite he tau Tohiaga Tapu ki a tautolu loga e tau kehekeheaga aoga lahi, ka lagomatai a tautolu ke ō he puhala he Atua. Ti maeke a tautolu ke fakaaoga e tau kehekeheaga ke lagomatai e falu ke iloa e kupu mooli he Tohi Tapu.

Falu Kehekeheaga ia Efeso Veveheaga 4 mo e 5

Lali ke fakaaoga e fakafonua nei he tapuakiaga magafaoa haau!

“Kia nakai tuai eke a tautolu . . . kua hikihikifano . . . ko e pikopiko he tau tagata ke he tau lagatau kelea kua taute ke fakahehe ai.”—4:14.

“Ka kia vagahau fakamoli mo e fakaalofa, kia tutupu ai a tautolu ke he tau mena oti kana kia ia, ko e ulu ni, ko Keriso haia.”—4:15.

“Kua pouligia ha lautolu [tau motu] a tau loto manamanatu, . . . ha ko e goagoa ha lautolu, ha kua mao ha lautolu a tau loto.”—4:18, 19.

“Ka ko mutolu, nakai ako pihia e mutolu e tau kupu a Keriso; Kaeke ko e moli ne fanogonogo a mutolu kia ia, mo e fakaako ai e mutolu.”—4:20, 21.

“Kia tuku kehe e mutolu e tagata tuai ke he tau mena ne mahani ai a mutolu i tuai.”—4:22.

“Ka kia fakafou a mutolu ke he manako he tau loto ha mutolu. Mo e tapulu a mutolu ke he tagata fou.”—4:23, 24.

“Ko e tagata kaiha aua neke liu kaiha foki.”—4:28.

“Ka e mitaki ke fakamalolo a ia ke gahua ke he tau lima hana ke he mena mitaki.”—4:28.

“Aua neke hopo mai ha kupu kelea he tau gutu ha mutolu.”—4:29.

“Ka ko e tau kupu mitaki ke ati hake ke he mena ke aoga ai.”—4:29.

“Kia tiaki e mutolu e fakafiu oti mo e vale, mo e ita, mo e miha, mo e kupu kelea, katoa mo e tau loto kelea oti kana.”—4:31.

“Ka kia eke a mutolu mo tau tagata totonu ko e taha ke he taha, kia hofihofi ha mutolu a fakaalofa, mo e fefakamagaloaki a mutolu.”—4:32.

“Ko e feuaki, mo e tau mena kelea oti, mo e velevelemena, aua neke talahau e tau mena ia ki mua ha mutolu.”—5:3.

“Ka ko e fakaaue kua mitaki ni.”—5:4.

“Ha ko e mena ne pouli a mutolu i tuai.”—5:8.

“Ka ko e ainei kua maama a mutolu ke he Iki.”—5:8.

“Aua foki neke fakafetui fakalataha a mutolu mo e tau gahua he pouli kua nakai aoga.”—5:11.

“Ka e mitaki ke akonaki ai e mutolu.”—5:11.

“Hanai, a mutolu kia o fakalaulau a mutoIu; nakai tuga ne tau tagata goagoa.”—5:15.

“Ka kia tuga e tau tagata iloilo. Kia fakaaoga e mutolu e tau aho he mouiaga nai.”—5:15, 16.

“Hanai, aua neke goagoa a mutolu.”—5:17.

“Ka kia iloa e mutolu e finagalo he Iki.”—5:17.

“Aua foki neke konahia a mutolu ke he uaina, ko e mena matahavala haia.”—5:18.

“Ka kia puke a mutolu ke he Agaga.”—5:18.

“Kia tuku atu ai e [Keriso] kia ia ni e ekalesia fulufuluola, nakai fai ila, po ke mafigofigo, po ke taha mena pihia.”—5:27.

“Ka ko e ekalesia tapu mo e nakai fai mena kelea.”—5:27.

“Ha kua nakai fakai taha ke fakavihia hana a tino.”—5:29.

“Ka kua fagai mo e leveki ai e ia, pihia foki e [Keriso] mo e ekalesia.”—5:29.

KO E KOLO TOKO—FUFUTA FAKAAKO