1. Ko e heigoa ka taute a tautolu ke fakatepetepe?

 KO E tau aho fakamui he fakatokaaga ha Satani ne kamata he 1914 he mogo ne Patuiki ai e Keriso. He tau ia, ne kamata e tau he lagi, ti fai magaaho ti liti hifo e Iesu e Tiapolo mo e tau temoni haana ke he lalolagi. (Totou Fakakiteaga 12:7-9.) Iloa e Satani kua “tote hana vaha.” (Fakakite. 12:12) Ka ko e ‘tote he vaha’ nei kua leva lahi, nakai tuga he amanaki e falu ia tautolu. Kua fakatepetepe kia a tautolu he fakatali ki a Iehova ke fakaoti e fakatokaaga ha Satani?

2. Ko e heigoa e tau hūhū ka tali he vala tala nei?

² Maeke ai ke hagahaga kelea ka fakatepetepe. Ko e ha? Ka fakatepetepe a tautolu, to liga taute fakamua e tautolu e tau mena mo e nakai manamanatu fakamitaki. Ti ko e heigoa ka lagomatai a tautolu ke moua e aga fakatali? To lagomatai he vala tala nei a tautolu ke tali e tau hūhū nā. (1) Ko e heigoa ka fakaako e tautolu hagaao ke he mahani fakauka mai he fifitakiaga he perofeta ko Mika? (2) Ko e heigoa e tau mena tutupu ka fakamailoga kua tata mai e fakaotiaga? (3) Maeke fēfē a tautolu ke fakakite kua loto fakaaue a tautolu ke he mahani fakauka ha Iehova?

3. Ko e heigoa e tuaga i Isaraela he vahā ha Mika?

³ Totou Mika 7:2-6. Ne kitia he perofeta ha Iehova ko Mika e tau Isaraela ne tote fakahaga e mahani fakamooli ki a Iehova, ti ko e magahala ne pule e Patuiki ko Ahasa, ne to lahi e nakai mahani fakamooli ha lautolu. Ne fakatatai e Mika e tau Isaraela nakai fakamooli ke he akau talatala ne maeke ke fakapākia e tagata. Ko e tau Isaraela ia ne tuga e akau ia ha kua eke fakakelea e lautolu e falu mo e fakamamahi a lautolu. Ko e tuaga kua kelea lahi ti nakai fefakaalofaaki e tau tagata he magafaoa. Maama e Mika kua nakai maeke ia ia ke hiki e tuaga, ti liogi a ia ki a Iehova mo e haana loto katoa. Ti  fakatali mo e fakauka a ia ke gahuahua e Atua. Ne iloa tonu e Mika to fakahako e Iehova e tuaga ke he Haana ni a magaaho.

4. Ko e heigoa e tau mena uka ne ha ha ia tautolu?

⁴ Tuga a Mika, to nonofo fakalataha foki a tautolu mo e tau tagata lotokai. Tokologa ne ‘nakai fakaaue, mahani kelea, nakai fai fakaalofa.’ (2 Timo. 3:2, 3) Liga fakaatukehe lahi e tau momoui ha tautolu ka fakakite he tau kapitiga gahua, tau kapitiga aoga, mo e tau katofia e aga lotokai. Ka ko e falu ia tautolu ne lahi atu e paleko. Ne pehē a Iesu to totoko mai ke he haana tau tutaki e tau magafaoa ha lautolu. Kua teitei tatai e tau kupu haana tuga ne totou e tautolu ia Mika 7:6. Pehē a Iesu: “Kua hau tuai au ke fakafaitaua e tagata mo e hana matua tane, ko e tama fifine foki mo e hana matua fifine, ko e figona fifine foki mo e matua fugavai fifine hana. Ke eke foki e tagata mo fi he faoa hana.” (Mata. 10:35, 36) Liga uka lahi ka vaiga he tau tagata he magafaoa ne nakai fekafekau ki a Iehova a tautolu mo e totoko a tautolu. Kaeke ko e tuaga ha tautolu anei, kua nakai lata ia tautolu ke mahala ke he peehiaga nei. Ka kua lata ia tautolu ke fakatumau ke mahani fakamooli ki a Iehova ti fakatali mo e fakauka ki a ia ke fakahako e tuaga. Ka matutaki a tautolu ke liogi ma e lagomatai haana, to foaki e ia ki a tautolu e malolō mo e pulotu kua lata mo tautolu ke fakatumau e mahani fakamooli ki a ia.

5, 6. Fakamonuina fēfē e Iehova a Mika? Ko e heigoa e mena ne tupu ne nakai kitia e Mika?

⁵ Kua palepale e Iehova e mahani fakauka ha Mika. Ne kitia e Mika e fakaotiaga he patuiki kelea ko Ahasa mo e haana pule. Ne kitia e ia a Hesekia, ko e tama ha Ahasa ne eke mo patuiki mo e lagomatai e tau Isaraela ke liliu ke he tapuakiaga meā. Ne kitia foki e Mika e fakamooliaga ke he perofetaaga ne tohia e ia hagaao ki a Samaria he magaaho ne fofō he tau Asuria e kautu ha Isaraela he faahi tokelau.​​—Mika 1:6.

⁶ Ka e mate a Mika ato kitia e ia e fakamooliaga he tau perofetaaga oti ne omoomoi e Iehova a ia ke tohi. Ma e fakatai, ne tohi e Mika: “To hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga he tau mouga, to fakatokoluga ai foki ki luga he tau matiketike, ti tafe atu ki ai e tau motu oti kana. To o mai foki e tau motu kehe loga, mo e pehe age a lautolu, O mai a, kia o hake a tautolu ke he mouga a Iehova.” (Mika 4:1, 2) Ne fifili a Mika ke fakatumau e mahani fakamooli ki a Iehova ato hoko ke he mate, pete ne tau mena ne taute he tau tagata ne takatakai ia ia. Ne tohi e ia: “Ha ko e tau motu oti kua takitaha mo e fano ke he higoa he atua ha lautolu, ko tautolu foki, to o a tautolu ke he higoa a Iehova ha tautolu a Atua tukulagi tukumuitea.” (Mika 4:5) Ne fakatali fakatekiteki a Mika he tau magaaho uka ha kua iloa e ia to fakamooli e Iehova e tau maveheaga oti Haana. Ne falanaki e perofeta fakamooli ki a Iehova.

7, 8. (a) Ko e heigoa e kakano ati falanaki a tautolu ki a Iehova? (e) Ko e heigoa kua liga taute e magaaho ke mafiti lahi?

⁷ Falanaki nakai a tautolu ki a Iehova tuga a Mika? Fai kakano mitaki ke taute pihia e tautolu. Kitia e tautolu e fakamooliaga he perofetaaga ha Mika. He tau aho fakamui nei, totou miliona e tau tagata mai he tau motu mo e tau magafaoa mo e tau vagahau ne o mai ke he “mouga ha i ai e fale a Iehova.” Pete ni ko lautolu mai he tau motu ne fa felatauaki, ko e tau tagata tapuaki nei ne tukituki e “tau pelu ha lautolu ke eke mo tau koho,” ti fakaheu a lautolu ke “nakai liu ako tau foki.” (Mika 4:3) Ko e lilifu mooli ke eke mo taha he tau tagata mafola ha Iehova!

⁸ Manako oti a tautolu ki a Iehova ke tamai mafiti e fakaotiaga ke he fakatokaaga kelea nei. Ka e ma tautolu ke fakatali fakaeneene, kua lata ia tautolu ke manamanatu ke he puhala ne manamanatu a Iehova. Kua fifili e ia a Keriso Iesu ke fakafili e tau tagata,  ti fitā he fakatoka e Ia e aho ke taute e mena nei. (Gahua 17:31) Ato hoko mai e aho ia, ne tuku age he Atua ke he tau tagata oti e magaaho ke ‘hokotia he maama ke he kupu moli,’ ke fakagahua e mena ne fakaako e lautolu, ti fakamomoui ai. Lata ia tautolu ke manatu kua hagahaga kelea e tau momoui. (Totou 1 Timoteo 2:3, 4.) Nakai leva, to hoko mai e fakaotiaga. Ka lavelave a tautolu he lagomatai e tau tagata ke iloa a Iehova, to tuga kua mafiti e mole he tau magaaho ne toe. Ti ka hoko mai e fakaotiaga, to fiafia a tautolu ha kua lavelave tumau ke he gahua fakamatala!

9-11. Kua fakamooli kia e 1 Tesalonia 5:3? Fakamaama.

⁹ Totou 1 Tesalonia 5:1-3. Nakai leva, to pehē e tau motu “Kua mafola, kua nakai haofia.” Ka nakai manako a tautolu ke fakahehē he mena nei, kua lata mogoia ke “mataala a tautolu mo e nonofo fakalatalata.” (1 Tesa. 5:6) To fakatutala a tautolu mogonei ke he falu mena tutupu ne tauteute e puhala ma e fakailoaaga aoga nei.

¹⁰ He mole e tau felakutaki ua he lalolagi, ko e tau motu ne manako lahi mahaki ke he mafola. He mole e felakutaki fakamua he lalolagi, ko e Kautaha he Tau Motu ne fakatū ke tamai e mafola. Fakamui, he mole e felakutaki ke uaaki he lalolagi, ne amaamanaki e tau tagata to tamai he Tau Motu Kaufakalataha e mafola. Ko e tau takitaki he fakatufono mo e lotu ne falanaki ke he tau fakatokatokaaga ua ia. Ma e fakatai, ko e Tau Motu Kaufakalataha ne fakailoa ko e 1986 ko e Tau he Mafola he Lalolagi Katoa. Ko e tau ia, loga e takitaki politika mo e lotu ne feleveia mo e takitaki he Lotu Katolika ke liogi ma e mafola.

¹¹ Ka ko e fakailoaaga ia mo e falu foki ne tatai ki ai kua nakai fakamooli e perofetaaga ia 1 Tesalonia 5:3 hagaao ke he “mafola, kua nakai haofia.” Nakai pihia he ha? Ha kua nakaila hoko ‘fakalutukia e mahaikava.’

12. Ko e heigoa ha tautolu kua iloa hagaao ke he fakailoaaga he ‘mafola mo e nakai haofia’?

¹² Ko hai ka taute e fakailoaaga uho nei  anoiha he “mafola, kua nakai haofia”? Ko e heigoa e matagahua he tau takitaki ha Kerisitenitome mo e falu lotu ne ha ha he mena nei? To putoia fēfē e tau fakatufono? Nakai talahau he Tohi Tapu ki a tautolu. Ko e mena ne iloa e tautolu pete ne puhala kua taute e fakailoaaga nei mo e kua talitonu ai, to nakai ha ha i ai e ‘mafola mo e nakai haofia’ mooli. To pule agaia a Satani ke he fakatokaaga nei. Kua kelea lahi mahaki ai mo e to nakai hiki. To momoko lahi ai ka talitonu a tautolu ke he fakaakoaga fakasatani nei ti nakai tuuho tumau!

13. Ko e ha ne taofi he tau agelu e tau matagi he moumouaga?

¹³ Totou Fakakiteaga 7:1-4. He fakatali a tautolu ke fakamooli e 1 Tesalonia 5:3, kua taofi he tau agelu malolō e tau matagi he matematekelea lahi. Ko e heigoa ne fakatali a lautolu ki ai? Ne tohi he aposetolo ko Ioane ko e “tau fekafekau [fakauku] he Atua” kua lata ke moua e fakamau fakamailoga fakahiku ha lautolu. a Ka oti e mena tupu aoga nei, to fakatoka mai he tau agelu e tau matagi he moumouaga. Ti ko e heigoa ka tupu mogoia?

14. Ko e heigoa kua fakakite ki a tautolu to nakai leva ti moumou a Papelonia Lahi?

¹⁴ Ko Papelonia Lahi ko e kautu he lotu fakavai he lalolagi, to moumou ha kua latatonu ai. Ka tupu e mena ia, to nakai fai tagata kua maeke ke lagomatai a ia. Maeke ia tautolu ke kitia e tata he fakaotiaga haana. (Fakakite. 16:12; 17:15-18; 18:7, 8, 21) Ko e nakai fai lalagoaga ka kitia mogonei he tuhituhi he tau hokotaki tala e tau lotu mo e tau takitaki ha lautolu. Pete ne mena nei, kua nakai logona he tau takitaki lotu kua hagahaga kelea mooli a lautolu. Kua hepe lahi a lautolu! He mole e fakailoaaga he ‘mafola mo e nakai haofia’ to totoko agataha he tau fakatufono e lotu fakavai mo e moumou katoatoa ai. To galo tukulagi a Papelonia Lahi! Kua uho lahi mooli ke fakatali fakaeneene ma e tau mena tutupu he fakamauaga tala nei.​​—Fakakite. 18:8, 10.

15. Ko e ha ne leva e fakatali fakaeneene ha Iehova?

¹⁵ Pete ne nakai fakalilifu he tau tagata e higoa ha Iehova, ne fakatali fakaeneene a ia ke he magaaho hako ke taute taha mena. Nakai manako a Iehova ke he ha tagata loto fakamooli ke mate. (2 Pete. 3:9, 10) Pihia nakai e logonaaga ha tautolu? Ato hoko mai e fakaotiaga, ha ha i ai e tau puhala kehekehe ke fakakite ki a Iehova kua loto fakaaue a tautolu ke he mahani fakauka haana.

16, 17. (a) Ko e ha kua lata ia tautolu ke lagomatai a lautolu ne oti e fekafekau ki a Iehova? (e) Ko e ha kua mafiti ki a lautolu kua oti e fekafekau ki a Iehova ke liliu mai ki a ia mogonei?

¹⁶ Lagomatai a lautolu ne lolelole fakaagaaga. Pehē a Iesu ha ha i ai e fiafia he lagi ka moua ai e taha mamoe ne galo. (Mata. 18:14; Luka 15:3-7) Leveki fakalahi e Iehova a lautolu kua fakakite e fakaalofa ki a ia, pete ka nakai fekafekau a lautolu ki a ia he mogo tonu nei. Kua fakafiafia ai ki a Iehova mo e tau agelu ka lagomatai e tautolu e tau tagata ke liliu ki a Iehova.

¹⁷ Ko koe kia taha ne nakai fekafekau ke he Atua he mogo tonu nei? Liga oti e fano haau he tau feleveiaaga ha kua fai tagata he fakapotopotoaga ne fakamamahi e tau logonaaga haau. Liga fai magaaho tuai he mole e mena ia. Ti hūhū hifo ki a koe: ‘Mitaki nakai e moui haaku mogonei, ti fiafia lahi nakai au? Fakaita kia e Iehova au, po ke fakaita he tagata nakai mitaki katoatoa a au? Kua fai mena kia ne taute e Iehova ko e Atua ke fakamamahi au?’ Kua taute fakamitaki tumau e Iehova a tautolu. Pete kua nakai taofi a tautolu ke he maveheaga  ha tautolu mogonei ke fekafekau ki a ia, ne fakaatā agaia e ia a tautolu ke fiafia ke he tau mena mitaki oti ne foaki mai e ia. (Iako. 1:16, 17) Pete ia, nakai leva to hoko mai e aho ha Iehova. Ko e magaaho anei ke liliu mai ke he ha tautolu a Matua fakaalofa ko Iehova, mo e ke he fakapotopotoaga. Ko e huaga haohao mitaki ni anei he tau aho fakamui nai.​​—Teu. 33:27; Hepe. 10:24, 25.

18. Ko e ha kua lalago e tautolu a lautolu ne takitaki?

¹⁸ Lalago fakamooli a lautolu kua takitaki. Ha ko e Leveki Mamoe totonu, kua takitaki mo e puipui e Iehova a tautolu. Kua kotofa e ia e Tama haana ke eke mo Leveki Mamoe ne Mua he fuifui mamoe. (1 Pete. 5:4) Ko e tau motua he tau fakapotopotoaga ne molea e 100,000 ne fakatoka e magaaho ke leveki e tau mamoe takitaha he Atua. (Gahua 20:28) Ka lalago fakamooli e tautolu a lautolu ne takitaki, kua fakakite e tautolu ki a Iehova mo Iesu kua loto fakaaue a tautolu ke he tau mena oti kua taute e laua ma tautolu.

19. Maeke fēfē a tautolu ke fetataaki lahi?

¹⁹ Fakatata atu ke he tau matakainaga haau. Ko e heigoa e kakano he mena ia? Ka totoko he fī e kautau ne fakaako, kua o mai fakatata lahi e tau kautau ne fetataaki ke nakai fai kaava he malētau. He puhala ia kua taute e lautolu e totokoaga kua nakai maeke ke mavehevehe. Kua tupu lahi e totoko ha Satani ke he tau tagata he Atua. Nakai ko e magaaho anei ke tau atu ke he tau matakainaga ha tautolu. Ko e magaaho anei ke fakatata atu ke he taha mo e taha, ke fakanimo e tau nakai mitaki katoatoa he tau matakainaga ha tautolu, mo e ke falanaki ki a Iehova.

20. Ko e heigoa ha tautolu kua lata ke taute mogonei?

²⁰ Kia fakatumau e fakafetuiaga ha tautolu mo Iehova ke malolō ti fakakite e aga fakatali. Kia fakatali fakaeneene a tautolu ke he fakailoaaga he ‘mafola mo e nakai haofia’ mo e fakamau fakamailoga ha lautolu ne fakauku. Mole ia, ko e tau agelu ne fā to fakatoka mai e tau matagi moumou, mo e to moumou a Papelonia Lahi. He fakatali a tautolu ke he tau mena tutupu he fakamauaga tala nei, kia muitua a tautolu ke he takitakiaga mai ia lautolu kua kotofa ke takitaki e fakatokatokaaga ha Iehova. Kia fetataaki lahi ke totoko e Tiapolo mo e tau temoni! Ko e magaaho anei ke muitua ke he fakatonuaga he salamo: “Kia fakamalolo a mutolu ko mutolu oti kana kua amaananaki [“fakatali,” NW] kia Iehova; to fakamalolo e ia ha mutolu a tau loto.”​​—Sala. 31:24.