1, 2. Ko e ha e fakahehē kua fa mahani lahi, ti ko e heigoa e fakahehē ne kitia e tautolu he vahā nei? (Kikite fakatino he kamataaga.)

 KO E tau lagatau kelea mo e tau pikopiko kua aga mau ke he lalolagi ne nonofo ai a tautolu. Nakai lata ia tautolu ke ofo he mena nei. Talahau fakamaaliali he Tohi Tapu ko Satani ko e Tiapolo ko e takitaki he fakahehē e tau tagata ti ko ia e pule he lalolagi nei. (1 Timo. 2:14; 1 Ioa. 5:19) Ko e tata lahi ha tautolu ke he fakatokaaga kelea nei, ko Satani ne ita lahi ai ha kua “tote hana vaha.” (Fakakite. 12:12) Ti amanaki a tautolu ko lautolu ne fakaohooho he Tiapolo to mahomo atu e mahani nakai fakamooli. To lali pauaki a lautolu ke fakahehē e tau tagata ne fekafekau ki a Iehova.

² He talahau he tau uta tala hagaao ke he tau fekafekau ha Iehova mo e ha lautolu a tau taofiaga, ne hokotaki e lautolu he falu magaaho e vala he tala mooli po ke tau pikopiko foki. Ko e tau vala mataulu tala he nusipepa, tau ata televisoni, mo e tau Faahi Initanete ne fakaaoga ke fakaholofa e tau tala fakavai. Ne hogohogo manava po ke ita foki e falu tagata ha kua talitonu a lautolu ke he tau pikopiko nei ka e nakai fakakia fakamua e tau tala mooli.

3. Ko e heigoa ka lagomatai a tautolu ke nakai fakahehē?

³ Fakaaue ai, maeke a tautolu ke lalago mai he tau pikopiko ha Satani. Ke lagomatai a tautolu ke kalo kehe he fakahehē, ha ha ia tautolu e Tohi Tapu kua “aoga ni . . . ke akonaki ai.” (2 Timo. 3:16) Ko e mena ne tohi he aposetolo ko Paulo ne fakakite ki a tautolu ko e falu Kerisiano i Tesalonia ne fakahehē ha ko e tau pikopiko. Ne tohi a ia ki a lautolu: “Ole atu a mautolu kia mutolu . . . neke fagahuatia vave ha mutolu a tau loto.” (2 Tesa. 2:1, 2) Ko e heigoa e tau fakaakoaga ka ako e tautolu mai he hatakiaga fakaalofa ha Paulo, ti maeke fēfē a tautolu ke fakagahua ai?

4. Hataki fēfē e tau Kerisiano i Tesalonia hagaao ke he hauaga he ‘aho ha Iehova,’ ti kua hataki mai fēfē ki a tautolu?

⁴ He tohi fakamua haana ke he tau Kerisiano i Tesalonia, ne hataki e Paulo a lautolu ke he hauaga he “aho he Iki [Iehova].” Nakai manako a ia ke he tau matakainaga haana ke fakagoagoa po ke nakai mautauteute. Ne tala age a ia ki a lautolu ko lautolu ko e “tau tagata he aho,” ti lafi e ia: “Kia mataala a tautolu mo e nonofo fakalatalata.” (Totou 1 Tesalonia 5:1-6.) He vahā nei, kua fakatali a tautolu ke he moumouaga ha Papelonia Lahi, ko e tau lotu fakavai oti a ia. Ko e moumouaga nei ko e kamataaga he aho lahi ha Iehova. Maama e tautolu e puhala ka fakamooli e Iehova e finagalo haana. He fakapotopotoaga, kua moua tumau e tautolu e tau fakamanatuaga mitaki ka lagomatai a tautolu ke mautauteute ma e aho ha Iehova. Ka fanogonogo fakamitaki a tautolu ke he tau hatakiaga fatiaki nei, maeke a tautolu ke fakamalolō e fifiliaga ha tautolu ke fekafekau ke he Atua mo e ‘lata ke eke ai.’​​—Roma 12:1.

5, 6. (a) Ko e heigoa ne tohia e Paulo hagaao ke he tohi ke uaaki haana ke he tau tagata Tesalonia? (e) Ko e heigoa ha Iesu ka nakai leva ti taute, mo e ko e heigoa ha tautolu kua lata ke hūhū hifo ki a tautolu?

⁵ Ne tohia e Paulo e tohi ke uaaki ke he tau tagata Tesalonia. He tohi ia, ne tohia e ia hagaao ke he matematekelea lahi ka fakahoko e Iesu e fakafiliaga ki a “lautolu kua nakai iloa e Atua, mo lautolu kua nakai omaoma ke he vagahau mitaki.” (2 Tesa. 1:6-8) He veveheaga 2 he tohi ia, ne tohia e Paulo ko e falu he fakapotopotoaga ne “fakaatukehe” hagaao ke he aho ha Iehova ne kua talitonu a lautolu kua tata lahi mai. (Totou 2 Tesalonia 2:1, 2.) Ne nakai maama katoatoa he tau Kerisiano fakamua atu e puhala ka fakamooli e finagalo ha Iehova. Talahau e Paulo e mena nei he mogo fakamui he tohi e ia hagaao ke he perofetaaga: “Ko e mena kua iloa e tautolu ka e nakai katoatoa, kua perofeta foki a tautolu ka e nakai katoatoa; ka hoko mai e mena katoatoa, ti fakaoti ai e tau mena nakai katoatoa.” (1 Kori. 13:9, 10) Ka e maeke a lautolu ke fakatumau e mahani fakamooli he fanogonogo ke he tau hatakiaga ne tala age e Iehova ki a Paulo, aposetolo ko Peteru, mo e falu matakainaga fakauku tua fakamooli he magahala ia ke tohi hifo.

⁶ Ke fakahako e tau manatu ha lautolu, ne fakalagalaga he Atua a Paulo ke fakamaama e mena ia ato hoko e aho ha Iehova, to ha ha i ai e lahi he tiaki taofiaga mo e to hau e “tagata  he hala.” a Mole ia, he magaaho fifili he Atua, to “fakaotioti,” po ke moumou katoatoa ai e Iesu a lautolu oti ne kua fakahehē. Ne fakamaama e Paulo ko e kakano ma e fakafiliaga nei ha kua “nakai talia e lautolu e kupu moli.” (2 Tesa. 2:3, 8-10) Lata ia tautolu ke hūhū hifo: ‘Lahi fēfē e manako haaku ke he kupu mooli? Fakaako nakai e au e mekasini nei mo e tau tohi ne foaki he tau tagata he Atua he lalolagi katoa ke maeke au ke iloa e maamaaga he tau fakaakoaga ha tautolu mogonei he Tohi Tapu?’

7, 8. (a) Ko e heigoa falu hagahaga kelea ma e tau Kerisiano fakamua atu? (e) Ko e heigoa ka hagahaga kelea pauaki ma e tau Kerisiano he vahā nei?

⁷ Ko e tau fakaakoaga he tau tagata tiaki taofiaga to nakai ni hagahaga kelea ke he tau Kerisiano. Ne tohi e Paulo ki a Timoteo “ko e loto lahi ke he tau tupe, ko [e] vaka haia he tau mena kelea oti kana.” Ne pehē foki a ia “ko e falu foki kua manako lahi ki ai, ti hehe ai a lautolu mai he tua, kua hoka e lautolu a lautolu ti ati ni ke he tau mena matematekelea loga.” (1 Timo. 6:10) Ko e “tau gahua he tino” to fakahagahaga kelea tumau.​​—Kala. 5:19-21.

⁸ Ne hataki malolō e Paulo e tau tagata Tesalonia hagaao ki a lautolu ne fakahigoa e ia ko e “tau aposetolo pikopiko.” Falu ia lautolu ne vagahau “ke he tau mena fakakeukeu, to futiaki ai e tau tutaki kia mumui atu kia lautolu.” (2 Kori. 11:4, 13; Gahua 20:30) Ne nava a Iesu ke he fakapotopotoaga i Efeso ha kua nakai talia e lautolu a “lautolu kua mahani kelea” ke he fakapotopotoaga. Mailoga e lautolu ko e tau tagata taane nei ko e tau aposetolo fakavai mo e tau tagata pikopiko. (Fakakite. 2:2) He tohi ke uaaki ha Paulo ke he tau tagata Tesalonia, ne foaki e ia e fakatonuaga nei: “Kua tala atu e mautolu kia mutolu, ko e tau matakainaga na e, ke he higoa he Iki ha tautolu ko Iesu Keriso, ke vevehe kehe a mutolu mo e tau matakainaga oti kua mahani hemu.” Ti totoku mogoia e ia e tau Kerisiano ne “nakai fia gahua.” (2 Tesa. 3:6, 10) Ti ka kalo kehe a lautolu he taha kua teva mo e nakai fia gahua, to aoga lahi foki ke kalo kehe he tagata kua kamata ke mahani tuga e tagata tiaki taofiaga. Ko e fifili ke fakaaoga e magaaho mo e tagata pihia he magahala ia kua hagahaga kelea pauaki mo e lata ke kalo kehe. Ti mooli foki e mena ia he vahā nei.​​—Fakatai 13:20.

9. Ko e ha kua lata ia tautolu ke fakaeneene ka fai ne kamata ke tali manatu hagaao ke he tau mena ne nakai fakamaama he Tohi Tapu po ke tuhituhi e fakatokatokaaga ha Iehova?

⁹ Kua tata lahi atu a tautolu ke he matematekelea lahi mo e fakaotiaga he lalolagi kelea nei. Ko e tau hatakiaga mai ia Iehova ne foaki he senetenari fakamua kua mua atu foki e aoga he vahā nei. Kua nakai manako mooli a tautolu ke “talia teao . . . e fakaalofa noa he Atua.” Ka tupu e mena ia, to nakai moua e tautolu e magaaho ke moui tukulagi. (2 Kori. 6:1) Lata ia tautolu ke fakaeneene fakalahi ka lali taha kua hau ke he tau feleveiaaga ha tautolu ke kamatamata a tautolu ke tali manatu hagaao ke he tau mena ne nakai fakamaama he Tohi Tapu po ke tuhituhi e tau motua mo e falu ne fekafekau ke he Atua.​​—2 Tesa. 3:13-15.

10. Ko e heigoa e tau kupu toka tuai ne tala age ke he tau Kerisiano i Tesalonia ke mumui ki ai?

¹⁰ Ne fakatonu e Paulo e tau matakainaga haana i Tesalonia “kia tumau” mo e matutaki ke taute e tau mena ne fakaako e lautolu. (Totou 2 Tesalonia 2:15.) Ko e heigoa e “tau kupu toka tuai” ne fakaako e lautolu? Ko e tau fakaakoaga ha Iesu a ia ti ko e tau  mena ne fakalagalaga he Atua a Paulo mo e falu ke tohi hifo. Nakai hagaao a ia ke he tau kupu toka tuai ne fakaako he tau lotu fakavai. Ne nava e Paulo e tau matakainaga haana he fakapotopotoaga i Korinito ha kua tohi e ia, “ha kua manatu mai a mutolu kia au ke he tau mena oti, mo e taofi e mutolu e tau poakiaga, tuga ne tuku atu ai e au kia mutolu.” (1 Kori. 11:2) Ko e tau fakaakoaga nei ne moua he punaaga mooli ti kua lata ke falanaki ki ai.

11. Ke he tau puhala fe kua lauia e falu tagata ka fakahehē a lautolu?

¹¹ He tohi a Paulo ke he tau Heperu, ne talahau e ia ua e puhala kua maeke he Kerisiano ke galo e tua mo e nakai fakatumau e mahani fakamooli ki a Iehova. (Totou Heperu 2:1; 3:12.) Ne tohia e ia hagaao ke he tafea kehe mai ia Iehova mo e o kehe mai ia ia. Liga uka ke mailoga kua tafea atu e vaka ki tutavaha. Maeke ke tafe mamao atu fakaeneene. Ka e, maeke foki he tagata ke fifili ke omoi kehe mai e vaka haana he mataafaga. Ko e tau fakataiaga ua ne fakakite e mena ka tupu kaeke ke fakaatā he tagata a ia ke fakahehē mo e fakaatā e mauokafua haana he kupu mooli ke lolelole fakahaga.

12. Ko e heigoa ka fakahagahaga kelea e fakafetuiaga ha tautolu mo Iehova?

¹² Falu he tau tagata Tesalonia ne liga fakaatā a lautolu ke fakahehē. Maeke nakai e mena nei ke tupu he vahā nei? Loga e matagahua ka fofō e tau magaaho ha tautolu. Manamanatu ke he tau tulā loga kua fakamole ke he tau matafeua, he fakaaoga e tau fakatū kapitiga he Initanete, totou mo e tali e tau fekau hila, po ke fakakia e tau vala tala sipote foou. Ko e taha he tau matafeua nei ka futiaki kehe e Kerisiano mo e fakalolelole e fakamakutu haana ki a Iehova. Ko e heigoa mogoia e fua? Liga oti e liogi haana mai he loto. Liga tote foki e magaaho haana ke fakaako e Tohi Tapu, ke fano he tau feleveiaaga, mo e ke fakamatala e tala mitaki. Ko e heigoa ha tautolu ka taute ke kalo kehe neke fagahuatia vave ha tautolu a tau loto?

13. He talahau tuai he Tohi Tapu, ko e heigoa e aga ne ha ha he tau tagata tokologa, ti ko e heigoa ka puipui e tua ha tautolu?

¹³ Lata ia tautolu ke manatu kua tata mai e fakaotiaga he lalolagi ha Satani ti ko e fifili ke fakaaoga e magaaho mo e tau tagata ne nakai talahau kua nonofo a tautolu he “tau aho fakamui” ka hagahaga kelea lahi. Ne tohi he aposetolo ko Peteru hagaao ke he magahala ha tautolu: “To o mai ke he tau aho fakamui e tau tagata va, kua mahani fakalata ke he tau manako lahi ha lautolu; kua pehe mai foki a lautolu, Ko fe e kupu talahaua ai ke haele mai a ia? ha ko e mena tali mai he momohe e tau matua, kua tumau agaia e tau mena oti tali mai he fakatoka eke.” (2 Pete. 3:3, 4) Ko e totou e Tohi Tapu he tau aho takitaha mo e fakaako tumau ai ka lagomatai a tautolu ke manatu kua nonofo a tautolu he “tau aho fakamui.” Kua leva lahi mahaki e talahau tuai he Tohi Tapu e kamata he tiaki taofiaga, ti matutaki ai ke he vahā nei. Kua ha ha i ai agaia e “tagata he hala” ti totoko ke he tau fekafekau he Atua. Ma e tau kakano oti nei, kua lata ia tautolu ke nakai nimo kua tata mai e aho ha Iehova.​​—Sefa. 1:7.

14. Puipui fēfē a tautolu kaeke ke fakatumau a tautolu ke lavelave ke he fekafekauaga he Atua?

¹⁴ Taha puhala ke kalo neke fagahuatia vave ha tautolu a tau loto ko e fakamatala tumau e tala mitaki. He magaaho ne poaki a Iesu Keriso ke he tau tutaki haana ke taute tutaki he tau motu oti kana mo e fakaako a lautolu ke omaoma e tau mena oti ne fakaako e ia, ne foaki e ia e fakatonuaga ka puipui e tau tutaki haana. (Mata. 28:19, 20) Ke omaoma e poakiaga nei, kua lata ia tautolu ke fakamakutu he gahua fakamatala. Manamanatu nakai a koe ke he tau matakainaga i Tesalonia ne fiafia ke fakamatala mo e fakaako atu ha ko e manako ni ha lautolu?  Manatu e mena ne tohi e Paulo ki a lautolu: “Ua tamate e mutolu e Agaga. Aua neke fakateaga ke he tau perofetaaga.” (1 Tesa. 5:19, 20) Ko e tau perofetaaga kua fakaako e tautolu mo e tala age ke he falu kua fakalagalaga mooli!

15. Ko e heigoa falu mena ne lata ia tautolu ke manamanatu ki ai he magaaho tapuakiaga magafaoa?

¹⁵ Manako a tautolu ke lagomatai e tau magafaoa ha tautolu ke holo ki mua ko e tau tagata fakamatala he tala mitaki. Ke taute e mena nei, tokologa e matakainaga ne fakaaoga e vala he tapuakiaga magafaoa ha lautolu ke fakamahani ke lata mo e gahua he fonua. Liga maeke a koe ke tauteute ke fina atu ke he tau liu aahi atu. Ko e heigoa haau kua fakatoka ke tutala ki ai? Ko e heigoa haau ka talahau ke taute e tagata he kaina ke manako ke iloa atu foki? Ko e magaaho fe kua mitaki lahi mahaki ke liu aahi atu? Tokologa foki ne fakaaoga e vala he tapuakiaga magafaoa ha lautolu ke tauteute ma e tau feleveiaaga. Maeke nakai e magafaoa haau ke taute pihia? Ka fakalataha a koe ke he tau feleveiaaga, to fakamalolō e koe e tua haau, ti lagomatai he mena nei a koe ke aua neke fagahuatia vave e loto haau. (Sala. 35:18) To puipui he tapuakiaga magafaoa a tautolu ke nakai tali manatu e tau mena ne nakai fakamaama he Tohi Tapu mo e fakauaua ai.

16. Ko e heigoa kua omoomoi e tau Kerisiano fakauku ke aua neke fagahuatia ha lautolu a tau loto?

¹⁶ Ne fakamonuina e Iehova e tau tagata haana ke he tau tau loga mo e lahi e maamaaga ke he perofetaaga he Tohi Tapu. Kua taute he mena nei a tautolu ke mauokafua to moua e tautolu e palepale homo ue atu he vahā i mua. Kua amaamanaki a lautolu ne fakauku ke fakalataha mo e Keriso he lagi. Mooli ko e amaamanakiaga nei kua omoomoi a lautolu ke aua neke fagahuatia ha lautolu a tau loto! Ko e mena ne tohi e Paulo ke he tau tagata Tesalonia kua hagaao ki a lautolu ne fakauku he vahā nei: “Ko e mena lata kia mautolu ke fakaaue ke he Atua nakai noa ha ko mutolu, ko e tau matakainaga na e, kua ofania he Iki, ha kua fifili he Atua a mutolu . . . he fakatapu he Agaga, mo e talia fakatonu e kupu moli.”​​—2 Tesa. 2:13.

17. Fakamalolō fēfē a koe ke he mena ne tohi ia 2 Tesalonia 3:1-5?

¹⁷ Ko lautolu ne amaamanaki atu ke he moui tukulagi he lalolagi kua lata ke taute e tau mena oti kana kua maeke ia lautolu ke aua neke fagahuatia vave ha lautolu a tau loto, tuga ne taute e lautolu ne fakauku. Ka amaamanaki a koe ke moui tukulagi he lalolagi, kia omaoma tumau e fakamalolōaga totonu ha Paulo ke he tau Kerisiano i Tesalonia. (Totou 2 Tesalonia 3:1-5.) Kua lata ia tautolu ke loto fakaaue ke he tau kupu totonu ia. Ko e tau tohi ke he tau tagata Tesalonia ne hataki a tautolu ke nakai tali manatu e tau mena ne nakai fakamaama he Tohi Tapu mo e talitonu e tau manatu tuahā. Ha kua nonofo a tautolu tata lahi ke he fakaotiaga, kua loto fakaaue a tautolu ma e tau hatakiaga nei.