1. Ko e heigoa e tau foakiaga ne taute he tau tagata tokologa, ti ko e ha?

 KUA fakamakai e tau tagata ke taute e tau foakiaga ma e tau mena kua mua e aoga ki a lautolu. Foaki he tau matua ha lautolu a tau magaaho, tau tupe, mo e tau malolō ke maeke e tau tama ha lautolu ke aoga mai ai. Ko e tau tagata sipote kua fakaako ke fetoko he Olimipiki ne fakaaoga e tau tulā loga he tau aho takitaha ke fakamahani mo e fakaako fakamalolō ka e fefeua mo e pelē e tau kapitiga ha lautolu. Ne taute foki e Iesu e tau foakiaga ne mua e aoga ki a ia. Nakai ko e foliaga haana ke moui monuina po ke fai tama. Ka e manako a ia ke fakaaoga e malolō katoa haana ke lalago e Kautu he Atua. (Mata. 4:17; Luka 9:58) Loga foki e tau foakiaga ne taute he tau tutaki haana. Ko e Kautu he Atua ko e mena aoga lahi ke he tau momoui ha lautolu, ti taute e lautolu e tau foakiaga ke lata mo e Kautu. (Mata. 4:18-22; 19:27) Lata ia tautolu ke hūhū hifo, ‘Ko e heigoa kua mua e aoga he moui haaku?’

2. (a) Ko e heigoa e tau foakiaga kua latatonu ke taute he tau Kerisiano mooli oti? (e) Ko e heigoa e tau foakiaga lafi ki luga kua taute he falu?

² Falu foakiaga kua lata ma e tau Kerisiano mooli oti. Kua lata ai ka manako a tautolu ke tata tumau e kapitiga mo e Atua. Ko e magaaho mo e malolō fakatagata ne fakaaoga e tautolu ke liogi, ke totou e Tohi Tapu, ke taute e tapuakiaga magafaoa, ke o atu ke he tau feleveiaaga, mo e ke fakamatala ko e tau foakiaga kua latatonu ia tautolu ke taute. a (Iosua 1:8; Mata. 28:19, 20; Hepe. 10:24, 25) Ti ko e fua he tau laliaga ha tautolu mo e fakamonuina ha Iehova kua mafiti e gahua fakamatala, tokologa fakahaga e tau tagata kua kamata ke tapuaki ke he Atua he o atu ke he “mouga ha i ai e fale a Iehova.” (Isaia  2:2) Ke lalago e Kautu, tokologa ne taute e tau foakiaga ke fekafekau he Peteli, ke lagomatai he talaga e tau Fale he Kautu mo e tau Fale he Toloaga, ke fakatokatoka e tau fonoaga, po ke lagomatai a lautolu ne matematekelea he tau mena tutupu pauaki. Pete ia, nakai manako a Iehova ki a tautolu ke taute e tau foakiaga nei ne lafi ki luga ke moua e moui tukulagi, ka kua latatonu ai ke lalago e Kautu he Atua.

3. (a) Aoga fēfē ki a tautolu ka taute e tautolu e tau foakiaga ma e Kautu? (e) Ko e heigoa e tau hūhū kua lata ia tautolu ke tali?

³ Nakaila pihia ia tuga fakamua, kua aoga ke taute fakalahi e tau mena kua maeke ia tautolu ma e Kautu. Fiafia mooli a tautolu ha kua tokologa lahi e tagata kua makai ke taute e tau foakiaga ma Iehova! (Totou Salamo 54:6.) Ka taute foki e tautolu e mena nei, to fiafia a tautolu he fakatali ke hoko mai e Kautu he Atua. (Teu. 16:15; Gahua 20:35) Kua aoga ma tautolu oti ke kumikumi hifo muatua ki a tautolu mo e hūhū e tau hūhū nei: Fai puhala foki nakai ke taute e tautolu ke lata mo e Kautu? Fakaaoga fēfē ha tautolu a tau magaaho, tau tupe, tau malolō, mo e tau lotomatala? Ko e heigoa kua nakai lata ia tautolu ke fakaheu ka taute e tautolu e tau foakiaga? Kia fakatutala a tautolu ke he tau mena ka fakaako e tautolu mai he tau fakataiaga he tau foakiaga foaki noa. To lagomatai he mena nei a tautolu ke lahi atu foki e fiafia.

4. Aoga fēfē e tau Isaraela mai he taute e tau poa?

⁴ Ko e tau tagata i Isaraela i tuai ne taute e tau poa ma e tau agahala ha lautolu ke fakamagalo. Kua latatonu e tau poa ke moua e taliaaga ha Iehova. Falu he tau poa nei kua manako ki ai, ka e foaki noa e falu. (Levi. 23:37, 38) Ko e tau poa huhunu katoa ka taute ke eke mo tau poa foaki noa, po ke tau mena fakaalofa, ki a Iehova. Taha fakataiaga he tau poa foaki ki a Iehova he magaaho ne fakatapu e faituga ha Solomona.​​—2 Nofo. 7:4-6.

5. Taute fēfē e Iehova ke maeke foki e tau tagata nonofogati ke foaki e tau poa?

⁵ Maama totonu e Iehova na nakai maeke he tau tagata oti ke tatai e foakiaga. Ole a ia ke he tau Isaraela ke foaki e tau mena kua maeke ia lautolu. Ne poaki he fakatufono ha Iehova ke taute e tau poa manu ti liligi kehe ai e toto he tau manu. Ko e tau poa nei ko e “ata he tau mena mitaki ne tatali” puhala ia Iesu. (Hepe. 10:1-4) Pete ia, ne hagaao a Iehova ke he fakatufono nei ke he puhala aoga lahi. Ma e fakatai, to talia he Atua e poa he tau kulukulu ka nakai maeke e taha tagata ke foaki e poa lahi, tuga e mamoe taane po ke koti. Ti maeke foki he tau tagata nonofogati  ke foaki e tau poa ki a Iehova mo e fiafia. (Levi. 1:3, 10, 14; 5:7) Pete to talia e Iehova e tau manu kehekehe mo poa, ne ua e mena ne manako a ia mai ia lautolu ne foaki e tau poa foaki noa.

6. Ko e heigoa e tau mena ua kua lata ke taute e poa? Aoga lahi fēfē ke omaoma e tau poakiaga nei?

⁶ Fakamua, ko e tagata ne taute e poa kua lata ke foaki e mena ne mua atu e mitaki. Ka gagao po ke fai ila e manu, to nakai talia e Iehova e poa. (Levi. 22:18-20) Uaaki, ko e tagata ne foaki e poa kua lata ke meā tuga ne fakamaama he Fakatufono. Ka nakai meā a ia, lata ia ia fakamua ke taute e poa agahala po ke poa hehē ke maeke a ia ke liu moua e taliaaga ha Iehova. Ko e mogoia laia ka talia e Iehova e poa foaki noa haana. (Levi. 5:5, 6, 15) Nakai ko e mena fakateaga anei. Poaki e Iehova ka fai tagata ne kai e poa ka e nakaila meā a ia, kua lata a ia ke tamate. (Levi. 7:20, 21) Pete ia, ka meā e tagata ti nakai fai ila e poa haana, ko ia ne foaki to moua e loto manamanatu mitaki mo e fiafia lahi.​​—Totou  1 Nofoaga he Tau Patuiki 29:9.

7, 8. (a) Ko e heigoa e fiafia ka moua e lautolu kua taute e tau foakiaga ma e Kautu? (e) Ko e heigoa ha tautolu kua maeke ke foaki ma Iehova?

⁷ He vahā nei, tokologa e tau matakainaga ha tautolu kua makai ke gahua malolō he fekafekauaga ha Iehova. Kua mitaki e mena nei ki a Iehova. Ko e gahua malolō ke lagomatai e tau matakainaga ha tautolu kua foaki foki e fiafia ki a tautolu. Taha e matakainaga taane ne lagomatai ke tā e tau Fale he Kautu mo e lagomatai a lautolu ne lauia he tau mena tutupu pauaki ne talahau kua uka ke fakamaama e mitaki he logona hifo e ia he mogo ne lagomatai e ia e tau matakainaga haana. Pehē a ia, “He kitia e fiafia mo e loto fakaaue he tau matakainaga he matakavi he mogo ne tutū a lautolu he Fale he Kautu ne mau laia po ke moua ai e lagomataiaga he mole e tau mena tutupu pauaki ne uho lahi mahaki e tau gahua mo e tau laliaga oti.”

⁸ Ko e fakatokatokaaga ha Iehova he vahā foou nei ne kumi puhala tumau ke lalago e Kautu. He 1904, ko e Matakainaga ko C. T. Russell ne fakamaama kua lata ia tautolu oti ke taute katoatoa e tau mena oti kua lata, ke fakaaoga ha tautolu a tau magaaho, fakaohoohoaga, tau tupe, mo e falu mena foki ke fakaheke a Iehova. Pete he nakai mukamuka tumau ke taute e tau foakiaga ki a Iehova, ka e loga e tau monuina ka moua mai ai. (2 Samu. 24:21-24) Maeke nakai a tautolu ke fakaaoga fakamitaki e tau mena kua foaki e tautolu ki a Iehova?

9. Ko e heigoa kua fakaako e tautolu ia Luka 10:2-4 hagaao ke he puhala kua lata ke fakaaoga ha tautolu a tau magaaho?

⁹ Ha tautolu a tau magaaho. Lahi e magaaho mo e gahua kua lata ke fakaliliu mo e lolomi e tau tohi ha tautolu, ke tā e tau Fale he Kautu mo e tau Fale he Toloaga, ke fakatokatoka e tau fonoaga, ke foaki e tau lagomatai matematekelea, mo e taute falu gahua kua latatonu. Ko e 24 ni e tulā he tau aho takitaha, ka e tuku mai e Iesu ki a tautolu e matapatu fakaakoaga ka lagomatai a tautolu ke fakaaoga fakailoilo e tau magaaho ha tautolu. He mogo ne fakafano e Iesu e tau tutaki haana ke fakamatala, ne tala age a ia ki a lautolu ke “ua fakaalofa atu foki . . . kia taha ke he puhala.” (Luka 10:2-4) Ko e ha kua tala age e Iesu e tau fakatonuaga ia? He vahā ha Iesu ka feleveia e tau tagata, ne nakai ni fakafeilo po ke tautalofa lima a lautolu. Ka e fepekaaki a lautolu ke fai magaaho mo e fakafeilo lagaloga ke he kelekele. To lahi e magaaho he mena nei. Nakai tala age a Iesu ke he tau tutaki haana ke hemu. Lagomatai e ia a lautolu ke kitia kua nakai lahi e magaaho, ti kua lata ia lautolu ke fakaaoga fakamitaki e magaaho ha lautolu mo e taute e tau mena kua mua e aoga. (Efeso 5:16) Maeke nakai a tautolu ke fakagahua e matapatu fakaakoaga nei ke maeke ia tautolu ke lahi e magaaho ke lalago e gahua he Kautu?

10, 11. (a) Ko e heigoa falu puhala kua fakaaoga e tau foakiaga fakatupe ha tautolu he lalolagi katoa? (e) Ko e heigoa falu matapatu fakaakoaga ne tohi ia 1 Korinito 16:1, 2 ka lagomatai a tautolu?

¹⁰ Ha tautolu a tau tupe. Kua lata ke lahi e tupe ke lalago aki e gahua he lalolagi katoa. He tau tau takitaha, totou hogofulu e tau miliona talā kua fakaaoga ke lalago e gahua he tau leveki faifano, tau paionia pauaki, mo e tau misionare. Tali mai he 1999, molea e 24,500 e tau Fale he Kautu ne tā he tau motu ne nakai tokologa e tau matakainaga ha tautolu ne loga e tau koloa. Pete ia, kua lata agaia ke tā ke teitei 6,400 he tau Fale he Kautu. He tau mahina takitaha, 100 e miliona he tau lagaki he tau mekasini Kolo Toko mo e Awake! ne lolomi. Ko e tau gahua oti nei ne lalago he tau tupe foaki noa haau.

¹¹ Ne omoomoi e Iehova e aposetolo ko Paulo ke tohi hifo e matapatu fakaakoaga ka fakaaoga e tautolu ka taute e tau foakiaga fakatupe. (Totou 1 Korinito 16:1, 2.) Ne fakamalolō e ia e tau matakainaga haana i Korinito, ke ua fakatali ke hoko ke he matahiku he faahi tapu ke kitia e mena ne toe, ka e fifili he mataulu he faahi tapu ko e fiha e tupe ka foaki e lautolu. Tuga ni he senetenari fakamua, ko e tau matakainaga he vahā nei kua fakatoka tuai mo e foaki fakamokoi e mena kua maeke ia lautolu. (Luka 21:1-4; Gahua 4:32-35) Kua tokiofa e Iehova e aga foaki he tau tagata haana.

12, 13. Ko e heigoa ne liga fakatupu e falu ke nakai lahi e mena ne foaki ki a Iehova, ka e to lagomatai fēfē e Iehova a lautolu?

¹² Ha tautolu a tau malolō mo e tau lotomatala. Kua lalago e Iehova e tau laliaga ha tautolu ke fakaaoga e tau malolō mo e tau lotomatala ha tautolu ma e Kautu. Mavehe a ia ke lagomatai a tautolu ka logona e tautolu kua nakai fai malolō ne toe. (Isaia 40:29-31) Manatu kia a tautolu kua nakai fai pulotu a tautolu ke lata mo e lalagoaga he gahua he Kautu po ke mitaki atu e gahua ne taute he falu? Manatu, maeke a Iehova ke fakaholo ki mua e tau lotomatala ha tautolu, tuga ne taute e ia ma Pesaleli mo Aliavu.​​—Esoto 31:1-6; kikite fakatino he kamataaga.

¹³ Fakamalolō e Iehova a tautolu ke nakai fakaatā ha mena ke taofi a tautolu mai he foaki katoatoa ki a ia. (Fakatai 3:27) He liu e faituga ati hake, ne tala age a Iehova ke he tau tagata Iutaia i Ierusalema ke manamanatu fakahokulo ke he tau mena ne taute e lautolu ke lalago e gahua. (Hakai 1:2-5) Kua fakatauhele a lautolu ti nakai tuku fakamua e gahua ha Iehova ke he tau momoui ha lautolu. Lata ia tautolu ke hūhū hifo: Ko e taute kia he finagalo ha Iehova kua mua atu e aoga ke he tau mena oti? Maeke nakai a tautolu ke  manamanatu fakahokulo ke he tau momoui ha tautolu mo e fakatoka ke lahi atu e mena ka taute e tautolu ke lalago e Kautu he Atua he tau aho fakamui nei?

14, 15. (a) Fakamalolō fēfē he tau matakainaga ha tautolu ne nakai muhukoloa he tino a koe? (e) Ko e heigoa ha tautolu kua lata ke manako ke taute?

¹⁴ Tokologa e tagata ne nonofo he tau matakavi ne lahi e uka mo e lekua e moui tuga e mativa ne aga mau. Kua gahua e fakatokatokaaga ha tautolu ke lagomatai e tau matakainaga he tau motu nei. (2 Kori. 8:14) Pete ia, kua uho foki e aga foaki ke he tau matakainaga ha tautolu ne nakai loga e tau koloa tino. Kua fiafia a Iehova ka kitia e ia a lautolu ne foaki fiafia e tau mena ne maeke ia lautolu.​​—2 Kori. 9:7.

¹⁵ He taha he motu mativa lahi i Aferika, falu matakainaga ne toka kehe e taha faahi he tau katene ha lautolu ke tō e tau akau ke sela, ti foaki e lautolu e tau tupe kua moua e lautolu mai he katene ia ke he gahua he Kautu. He motu taha ia, ne manako e tau matakainaga ke lagomatai e talagaaga he Fale he Kautu. Ka ko e magahala lavelave ha lautolu a ia he tō akau. He eketaha agaia ke lagomatai, ne gahua a lautolu he Fale he Kautu he aho, ka e gahua he tau magaaho afiafi ke fakaoti e tō he tau fua he fonua ha lautolu. Ko e aga foaki mooli! Fakamanatu he mena nei ki a tautolu e tau matakainaga i Maketonia i tuai. Ne “nonofogati lahi” a lautolu, ka e olelalo agaia a lautolu ki a Paulo ke fakaatā a lautolu ke age e tau tupe ke he tau matakainaga ha lautolu. (2 Kori. 8:1-4) Kia foaki foki e tautolu e mena kua maeke a tautolu ke fakakite kua loto fakaaue a tautolu ki a Iehova ma e tau monuina ne foaki e ia ki a tautolu.​​—Totou  Teutaronome 16:17.

16. Maeke fēfē a tautolu ke mailoga kua talia e Iehova e tau foakiaga ha tautolu?

¹⁶ Ka taute e tautolu e tau foakiaga, kua lata ia tautolu ke fakaeneene kua nakai fakaheu e tautolu e mena ne mua atu e aoga, tuga e tau magafaoa ha tautolu. Tuga ni ne taute he tau Isaraela i tuai, kua lata ia tautolu ke mailoga mitaki kua talia he Atua e tau foakiaga foaki noa ha tautolu. Lata ia tautolu ke manatu ko e tapuakiaga magafaoa mo e tapuakiaga fakatagata ha tautolu ki a Iehova ko e ha tautolu a tau matagahua kua mua e aoga. Ka foaki e tautolu e tau magaaho mo e tau koloa ke he falu, kua lata ia tautolu ke mailoga kua nakai tiaki ha tautolu a tapuakiaga magafaoa ki a Iehova po ke tiaki e tau manako fakatino ha lautolu. Kua nakai maeke ke foaki ki a Iehova e magaaho, malolō, mo e tau koloa ne nakai fai a tautolu. (Totou 2 Korinito 8:12.) Kua lata foki a tautolu ke fakatumau ke fakamalolō e fakafetuiaga ni ha tautolu mo Iehova. (1 Kori. 9:26, 27) Maeke ia tautolu ke mailoga ka momoui fakatatau a tautolu ke he tau tutūaga he Tohi Tapu, to fakafiafia he tau foakiaga ha tautolu a tautolu mo e to “talia fakamitaki” e Iehova.

17, 18. Fēfē e logonaaga ha tautolu ki a lautolu kua taute e tau foakiaga ma e Kautu, ti ko e heigoa kua lata ia tautolu oti ke manamanatu ki ai?

¹⁷ Tokologa e tau matakainaga ha tautolu ne foaki fakamokoi e tau magaaho, tau malolō, mo e tau tupe ke lalago aki e gahua he Kautu. (Filipi 2:17) Lahi e loto fakaaue ha tautolu ki a lautolu kua fakakite e aga foaki. Kua nava foki a tautolu ke he tau hoana mo e tau fanau he tau matakainaga taane ne takitaki e gahua he Kautu ma e tau foakiaga fakamokoi ha lautolu.

¹⁸ Lata ke lahi e laliaga ke lalago e gahua he Kautu. Kia liogi mo e manamanatu fakahokulo a tautolu ke he mena kua maeke a tautolu ke foaki ki a Iehova. Ka taute pihia e tautolu, to loga e tau monuina ha tautolu mogonei mo e loga atu ke he “fahi atu.”​​—Mare. 10:28-30.