1, 2. (a) Ko e heigoa ka fakatupu e taha vahega matapouli? (e) Ko e heigoa ha tautolu ne iloa ke he Kautu he Atua?

 LIGA mailoga e koe kua kehekehe e tau mena ne manatu he tau tagata hagaao ke he taha mena ne tupu. Pihia foki, liga uka he tagata ke manatu oti e tau fakatonuaga ne tala age he ekekafo ke he haana gagao. Po ke nakai kitia he tagata e tau kī po ke tioata haana, pete ni kua haia i mua haana. Ko e ha ne tutupu e tau mena nei? Talahau he tau tagata kumikumi kua pihia taha vahega matapouli ka lali a tautolu ke loga e gahua ne taute he taha e magaaho. Kua maeke ni e uhoniu ha tautolu ke hagaaki katoatoa ke he taha e mena he magaaho.

² Tokologa e tagata he vahā nei kua matapouli pihia ke he tau mena tutupu he lalolagi. Liga talahau e lautolu kua hiki lahi e lalolagi tali mai he 1914, ka e nakai maama ia lautolu e kakano he mena nei. Ha ko e tau tagata fakaako he Tohi Tapu, kua iloa e tautolu ne hoko mai e Kautu he Atua he 1914 he magaaho ne Patuiki a Iesu i luga he lagi. Ka ko e liogi “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi” kua nakaila tali katoatoa ia. (Mata. 6:10) To tali katoatoa e liogi nei ka utakehe e lalolagi kelea nei. To hoko la e mena ia ato fakamooli e finagalo he Atua ke he lalolagi tuga ne eke ke he lagi.

3. Ko e heigoa he fakaako ha tautolu ke he Tohi Tapu kua lagomatai a tautolu ke kitia?

 ³ Ha kua fakaako tumau a tautolu ke he Kupu he Atua, kua maeke ia tautolu ke kitia hane fakamooli e tau perofetaaga he magaaho tonu nei. Kehe lahi mooli mai he tau tagata tokologa! Lavelave lahi a lautolu mo e tau momoui ha lautolu ti nakai kitia e lautolu e tau fakamooliaga maaliali kua fitā e pule he Keriso tali mai he 1914 ti nakai leva to moumou e ia e lalolagi kelea nei. Hūhū hifo ki a koe e hūhū nei: ‘Talitonu agaia nakai au kua tata lahi mai e fakaotiaga he lalolagi nei ti ko e tau mena tutupu he lalolagi kua fakamooli e mena nei?’ Pete foki ka nakaila leva ia he Fakamoli a koe, ko e mena fe kua hagaaki a koe ki ai? Pete ni e tali haau, kia fakatutala a tautolu ke he tolu e kakano aoga ne iloa e tautolu to nakai leva ti eke e finagalo he Atua ke he lalolagi.

4, 5. (a) Ko e heigoa ha Iesu hane taute tali mai he 1914? (Kikite fakatino he kamataaga.) (e) Ko e heigoa ne hukui he tau tagata heke solofanua tokotolu ne mumui i tua ha Iesu? Kua fakamooli fēfē e perofetaaga nei?

⁴ He 1914, ne moua e Iesu Keriso e foufou he lagi, ko e kakano, kua eke a ia mo Patuiki he Kautu he Atua. Ko e perofetaaga ne fakamau he Fakakiteaga veveheaga 6 ne fakamaama mai ki a Iesu ne heke he solofanua hina. He mole e eke mo Patuiki, ne kamata agataha a ia ke heke ai ke maeke ke fakaotioti e lalolagi kelea ha Satani. (Totou Fakakiteaga 6:1, 2.) Ne talahau tuai he perofetaaga ka mole e kamata he Kautu he Atua ke pule, to mafiti e lalolagi ke au atu e kelea. To tupu lahi mahaki e felakutaki, kūkū e tau mena kai, tatalu, mo e falu mena foki ne fakatupu e mate. Ko e tau mena matematekelea nei kua fakakite he perofetaaga ke he tau tagata heke solofanua tokotolu ne mumui tata he tua ha Iesu Keriso.​—Fakakite. 6:3-8.

⁵ Tuga ni ne talahau tuai he perofetaaga, kua utakehe he felakutaki e “mafola mai he lalolagi.” Tupu e mena pete kua loga e motu ne mavehe ke gahua fakalataha mo e tumau e mafola. Ko e Felakutaki I he Lalolagi ko e kamataaga ni a ia he tau felakutaki moumou ne loga ka utakehe e mafola mai he lalolagi. Pete ni e holo ki mua fakatupe mo e fakasaiene tali mai he 1914, kua fakahagahaga kelea agaia e lalolagi ha ko e kūkū he tau mena kai. Nakai maeke ha tagata ke fakatikai ko e tau gagao, tau matematekelea tutupu pauaki, mo e falu matematekelea kua tamate e tau miliona he tau tau takitaha. Kua mua atu e hagahaga kelea he tau mena tutupu nei, tutupu tumau, mo e loga atu e tagata kua mamate ka fakatatai ke he fakamauaga tala he tagata. Mailoga nakai e koe e kakano he mena ia?

6. Ko hai ne hagaaki lahi ke he fakamooliaga he perofetaaga he Tohi Tapu, ti ko e heigoa ha lautolu ne taute he magaaho ne fakamooli e perofetaaga?

⁶ Tokologa e tagata ne tupetupe ha ko e kamataaga he Felakutaki I he Lalolagi mo e fulū Sepania. Ka e, amaamanaki lahi e tau Kerisiano fakauku ke he “vaha he tau motu kehe,” ke fakaoti he 1914. (Luka 21:24) Nakai iloa tonu e lautolu ne fakauku to fakamooli fēfē e perofetaaga he Tohi Tapu, ka e iloa e lautolu he 1914 to hoko taha mena ne mua e aoga he Kautu he Atua. He iloa e lautolu e puhala kua fakamooli e perofetaaga, ne fakailoa fakamalolō e lautolu ke he falu kua kamata tuai e pule he Atua. Tokologa ne fakamatala e fekau he Kautu ne favale fakakelea ki ai. Ko e favaleaga nei ko e fakamooliaga foki he perofetaaga he Tohi Tapu. Loga e tau tau he mole e mena ia, ne fakaaoga he tau fī he Kautu e tau fakatufono, vale, fakahala he tuku he tau fale puipui, po ke tamate he lali ke taofi e gahua fakamatala.​—Sala. 94:20; Fakakite. 12:15.

7. Ko e ha kua nakai kitia he laulahi he tau tagata e aoga he tau mena hane tutupu he lalolagi he vahā nei?

 ⁷ Ka loga pihia e fakamooliaga ke fakakite kua fitā e pule e Kautu he Atua he lagi, ti ko e ha ne nakai kitia he tau tagata tokologa? Ko e ha ne nakai kitia e lautolu ko e tau mena tutupu he lalolagi hane fakamooli e perofetaaga he Tohi Tapu ko e mena tonu ia ni kua talahau he tau tagata he Atua ke he loga e tau tau? Kitia ni kia e lautolu e tau mena kua manako a lautolu ke kitia? (2 Kori. 5:7) Lavelave lahi kia a lautolu mo e tau momoui ni ha lautolu ti nakai kitia ko e heigoa he Atua kua taute? (Mata. 24:37-39) Kua fakatauhele kia falu ha lautolu ha ko e tau manatu mo e tau foliaga he lalolagi ha Satani? (2 Kori. 4:4) Kua lata ke moua e tautolu e tua ti maeke ke kitia muatua atu ki mua ke maama e mena kua taute he Kautu he Atua. Ko e fiafia ha ia ha tautolu ke kitia e tau mena hane tutupu!

8-10. (a) Kua fakamooli fēfē e 2 Timoteo 3:1-5? (e) Ko e ha kua talahau e tautolu kua mua atu e tupu ki mua he mahani kelea?

⁸ Kua ha ha i ai foki e kakano ke uaaki ne lata ia tautolu ke iloa to nakai leva ti pule e Kautu he Atua ke he lalolagi: Kua mua atu e kelea he lalolagi mogonei tali mai, ti kua au atu e kelea. Teitei taha tuai e teau tau, kua kitia e tautolu e fakamooliaga he perofetaaga he 2 Timoteo 3:1-5. Ko e tau mahani ne fakamaama he tau kupu tohi ia kua holofa ke he tau faahi oti he lalolagi. Kitia foki nakai e koe e mena ia? O mai la ke fakatutala ke he falu fakataiaga.​—Totou 2 Timoteo 3:1, 13.

⁹ Fakatatai la e tau mena ne ofo ai e tau tagata he tau atu tau 1940 po ke 1950 mo e tau mena kua tutupu he vahā nei he tau gahuaaga, tau mena fakafiafia, tau sipote, mo e tau fasone. Kua lahi mahaki e mahani vale mo e mahani feuaki ne kitia he tau mena oti. Lali e tau tagata ke fakamatakutaku e falu aki e mahani vale, feuaki, mo e taute fakakelea ha lautolu. Ko e tau fakaholoaga televisoni ne manatu e tokologa kua kelea he atu tau 1950 kua onoono ki ai he mogonei ko e tau fakafiafiaaga mitaki ma e magafaoa. Tokologa ne mailoga kua malolō e fakaohoohoaga he tau tagata mahani fakasotoma ke he tau fakafiafiaaga mo e tau fasone mo e puhala ne fakatātā e lautolu e puhala moui ha lautolu ke he  tau tagata. Fakaaue ai kua iloa e tautolu e logonaaga he Atua ke he tau mena nei!​—Totou Iuta 14, 15.

¹⁰ Fakatatai foki la e mahani totoko he tau fanau he vahā fakamua mo e tau fanau he vahā nei. Ma e fakatai, he atu tau 1950, ne tupetupe e tau matua neke ula tapaka, inu kava, po ke koli kiva e tau fanau ha lautolu. Ka e he vahā nei logona tumau e tautolu e tau tala ofoofogia tuga anei: Ko e tama aoga ne 15 e tau ne fana e tau tama he poko aoga haana, ti mamate e tokoua mo e pākia e toko 13. Ko e matakau he tau fanau fuata mui ne konahia ti tamate fakakelea e tama fifine hiva e tau ti keli e matua taane mo e kasini haana. Fai tala foki ne hokotaki mai he taha he tau motu Asia, ne fakalago ke he tau fanau e hafa he tau matahavala oti ne taute ke he hogofulu e tau tau. Maeke nakai ha tagata ke fakatikai kua mua atu e kelea he tau mena he vahā nei?

11. Ko e ha ne nakai mailoga he tau tagata tokologa kua holo ki mua e kelea he tau mena?

¹¹ Ne talahau fakatonu he aposetolo ko Peteru: “To o mai ke he tau aho fakamui e tau tagata va, kua mahani fakalata ke he tau manako lahi ha lautolu; Kua pehe mai foki a lautolu, Ko fe e kupu talahaua ai ke haele mai a ia? ha ko e mena tali mai he momohe e tau matua, kua tumau agaia e tau mena oti tali mai he fakatoka eke.” (2 Pete. 3:3, 4) Ko e ha ne tali atu pihia e falu tagata? Tuga ka kitia tumau e tautolu taha mena, ti nakai hagaaki tumau a tautolu ki ai. Ka amanaki ni e mahani he kapitiga tata ti hiki, liga ofo a tautolu he mena nei. Kaeke kua hiki fakatekiteki e tau aga mo e tau mahani he tau tagata he magaaho loa, liga nakai mailoga ai e tautolu. Ko e hiki nei kua hagahaga kelea lahi.

12, 13. (a) Ko e ha kua nakai lata ia tautolu ke fakalolelole ha ko e tau mena tutupu he lalolagi? (e) Ko e heigoa ka lagomatai a tautolu ke fakauka he tau aho fakamui nei ne “uka”?

¹² Ne hataki he aposetolo ko Paulo a tautolu to hoko mai e tau aho fakamui ko e “tau aho uka.” (2 Timo. 3:1) Ka e nakai lata ia tautolu ke fakamumuli mai he lalolagi. Maeke ia tautolu ke kautū ke he ha nakai fiafia po ke tau fakamatakutaku ne liga ha ha ia tautolu. Mo e lagomatai ha Iehova, haana agaaga, mo e fakapotopotoaga Kerisiano, maeke ia tautolu ke fakatumau e fakamooli ki a ia. To foaki mai he Atua ki a tautolu e “lahi ue atu he malolo.”​—2 Kori. 4:7-10.

¹³ Ne kamata e Paulo e perofetaaga ke he tau aho fakamui aki e tau kupu “ka kia iloa . . . e mena nei.” Mavehe mai e tau kupu ia to fakamooli e perofetaaga nei. Iloa e tautolu to matutaki ni e lalolagi nei ke holo ki mua e kelea ato moumou ai e Iehova. Kua iloa e tautolu mai he fakamauaga tala tuai ko e magaaho ka tū tokolalo lahi e tau tuaga ke he mena hako mo e hepe, to nakai kautū e tau matakau po ke motu katoa. Nakaila tokolalo lahi pihia ia tali mai e tau tuaga he mena hako mo e hepe he lalolagi katoa. Tokologa e tagata ne liga fakaheu e kakano he mena nei, ka kua lata e tau mena tutupu tali mai he 1914 ke talitonu a tautolu ki ai to nakai leva ti fakaotioti he Kautu he Atua e tau mena kelea oti kana.

14-16. Ko e heigoa e kakano ke toluaki ne talitonu a tautolu to nakai leva ti “hoko mai” e Kautu he Atua?

¹⁴ Ko e fakamauaga tala tuai he tau tagata he Atua kua foaki ki a tautolu e kakano ke toluaki ke mauokafua kua tata mai e fakaotiaga. Ma e fakatai, ato kamata e Kautu he Atua ke pule i luga he lagi, kua fitā e matakau ha lautolu kua fakauku ti tua fakamooli he fekafekau ke he Atua. He nakai fakamooli e perofetaaga ke he puhala ne amanaki a lautolu he 1914, ko e heigoa ha lautolu ne taute? Tokologa ia lautolu ne fakatumau ke fekafekau fakamooli ki a Iehova  mo e fakauka ke he tau kamatamata mo e favale. He tau tau kua mole, laulahi, po ke nakai ko lautolu oti, ne fakauku ne fakatumau e mahani fakamooli ato hohoko ke he mate.

¹⁵ He perofetaaga ha Iesu ke he tau aho fakamui he lalolagi ha Satani, ne pehē a ia: “Nakai mole atu e hau nai, ato hohoko mai e tau mena oti ia.” (Totou Mataio 24:33-35.) He mogo ne totoku e Iesu e “hau nai,” ne maama e tautolu kua tutala a ia ke he ua e matakau he tau Kerisiano fakauku. Ko e matakau fakamua ne ha ha i ai he 1914 mo e maama kua kamata e pule he Keriso ko e Patuiki he tau ia. Ko lautolu he matakau nei ne nakai ni momoui he 1914, ka kua fakauku foki a lautolu he agaaga tapu he tau ia po ke ato hoko ke he tau ia.​—Roma 8:14-17.

¹⁶ Ko lautolu oti he matakau ke uaaki ne putoia foki he “hau nai” ne nakai ni momoui a lautolu ka kua fakauku foki he agaaga tapu he magahala ne momoui agaia e falu he matakau fakamua ke he lalolagi. Ti kua nakai putoia oti a lautolu ne fakauku he vahā nei he “hau nai” ne tutala a Iesu hagaao ki ai. Mogonei, ko lautolu he vahega ke uaaki kua momotua ai. Ka kua mauokafua a tautolu he tau kupu ha Iesu ia Mataio 24:34 to fai ia lautolu ka “nakai mole atu e hau nai” ka kitia e kamataaga he matematekelea lahi. Kua mauokafua lahi foki a tautolu he mena nei to nakai leva ti moumou he Patuiki he Kautu he Atua e tau tagata mahani kelea mo e tamai e lalolagi tututonu foou.​—2 Pete. 3:13.

17. Ko e heigoa he tau fakamooliaga ne fakatutala a tautolu ki ai kua lagomatai a tautolu ke maama?

¹⁷ Maeke nakai a koe ke kitia e puhala kua fakamooli mogonei e tau perofetaaga he Tohi Tapu ne fakaako e tautolu ki ai? He hataki e Iesu a tautolu, nakai iloa tonu e tautolu e aho po ke magaaho ia he fakaotiaga. (Mata. 24:36; 25:13) Ka e talahau e Paulo kua iloa e tautolu e “vaha,” ko e tau aho fakamui a ia. (Totou Roma 13:11.) Hane nonofo he vaha tonu ia mogonei. Kaeke kua hagaaki a tautolu ke he perofetaaga he Tohi Tapu mo e tau mena hane taute e Iehova ko e Atua mo Iesu Keriso, to kitia e tautolu e tau fakamooliaga maaliali kua tata mai e fakaotiaga he lalolagi kelea nei.

18. Ko e heigoa ka tupu ki a lautolu ne fakaheu ke talia a Iesu Keriso ko e Patuiki ha lautolu?

¹⁸ Nakai leva, ko lautolu ne fakaheu ke talia e pule ha Iesu Keriso ne Heke he solofanua hina, to talahau ai kua hepe a lautolu. To nakai maeke ia lautolu ke hao he fakafiliaga hane hoko mai ki a lautolu. Ka tupu e mena ia, to tokologa ka talahau he matakutaku, pehē: “Ko hai foki kua maeke ke tu atu?” (Fakakite. 6:15-17) Moua e tautolu e tali i loto he Fakakiteaga veveheaga 7 ke he hūhū ia. Ko lautolu ne fakauku ne ha ha agaia he lalolagi mo e “moto tagata tokologa” to “tu atu” ha kua talia he Atua. Ti ko e “moto tagata tokologa” mogoia to hao he matematekelea lahi mo e huhū atu ke he lalolagi foou he Atua.​—Fakakite. 7:9, 13-15.

19. He mauokafua kua tata mai e fakaotiaga, ko e heigoa haau hane amaamanaki atu ki ai?

¹⁹ Ka fakatumau a tautolu ke hagaaki ke he tau perofetaaga he Tohi Tapu ne fitā he fakamooli he vahā ha tautolu, to nakai fakatauhele he lalolagi ha Satani a tautolu. To nakai matapouli a tautolu ke he kakano mooli he tau mena tutupu he lalolagi. To nakai leva ti fakakatoatoa he Keriso e kautūaga haana mo e moumou e lalolagi kelea nei he magahala he tauaga tututonu i Amaketo. (Fakakite. 19:11, 19-21) Manamanatu la ke he fiafia ha tautolu ka mole e tau mena ia!​—Fakakite. 20:1-3, 6; 21:3, 4.