1, 2. (a) Ha hai e fakamauaga ka fakatupu e fiafia lahi he lagi? (e) Ko e heigoa e tau hūhū ka fakatutala ki ai a tautolu?

 KUA lahi tumau e magaaho ke tauteute ke lata mo e taonaga po ke, fakamauaga. Ka e to fakatutala a tautolu mogonei ke he fakamauaga he patuiki ne kua kavi ke he 2,000 tau ke taute ai! Nakai leva to hoko mai e magaaho ke fakalataha e kitofaihoana mo e haana hoana. To puke e fale he Patuiki ke he lologo fiafia, mo e to tauhea mai e tau leo he lagi: “Haleluia; ha kua eke mo patuiki e Iki ko e Atua hana e malolo oti kana. Kia fiafia a tautolu mo e kolikoli mo e tuku atu e fakahekeaga kia ia; ha kua hoko mai e taonaga he Punua mamoe, ko e hana hoana foki kua taute tuai e ia a ia.”​—Fakakite. 19:6, 7.

² Ko e “Punua mamoe” ne tutala e kupu tohi nei ki ai ko Iesu Keriso. (Ioane 1:29) To fakatupu he fakamauaga haana e fiafia lahi he lagi. Ko e heigoa haana ka tui ke lata mo e fakamauaga? Ko hai la e hoana haana? Kua tauteute fēfē a ia ma e fakamauaga? To fakahoko a fe e fakamauaga nei? To fakatupu he fakamauaga nei e fiafia he lagi, ka to fiafia foki nakai a lautolu kua amaamanaki ke momoui he lalolagi? Kua makai a tautolu ke iloa e tau tali ke he tau hūhū nei, ati matutaki a tautolu ke fakaako e Salamo 45.

3, 4. (a) Ko e heigoa ne talahau he salamo hagaao ke he tau mena ne tui he Kitofaihoana he fakamauaga? Ko e heigoa ne taute e Kitofaihoana ke fiafia lahi atu foki? (e) Ko hai e “tau tamafine he tau patuiki” mo e “patuiki fifine” ne fakalataha ke he fiafia he Kitofaihoana?

³ Totou Salamo 45:8, 9. Ne tui he Kitofaihoana ko Iesu Keriso e tau mena tui patuiki haana he taonaga. Ko e tau mena tui haana ne manogi lahi mahaki tuga e “tau mena manogi ne homo,” tuga e muro mo e kesia, ne eke foki mo lolo tapu ke fakauku kua fakaaoga i Isaraela.​—Esoto 30:23-25.

⁴ Ko e lologo fulufuluola he lagi he fale patuiki he Kitofaihoana ne taute a ia ke fiafia lahi ha kua tata mai e magaaho ke mau e hoana haana. Kua fiafia fakalataha a ia mo e “patuiki fifine,” ko e vala kitia he fakatokatokaaga he Atua, ne putoia e “tau tamafine he tau patuiki,” ko e tau agelu tapu. Ko e tau leo mai he lagi ne pehē: “Kia fiafia a tautolu mo e kolikoli . . . ha kua hoko mai e taonaga he Punua mamoe.”

5. Ko hai e hoana?

⁵ Totou Salamo 45:10, 11. Iloa e tautolu e Kitofaihoana, ka ko hai la e hoana? Nakai ko e tagata mooli a ia. Ka e hukui e ia e matakau katoa he 144,000 he tau Kerisiano fakauku. Ko Iesu e Ulu he fakapotopotoaga fakauku nei. (Totou Efeso 5:23, 24.) Ko lautolu nei ne fakauku to pule mo Keriso he Kautu faka-Mesia haana he lagi. (Luka 12:32) Maeke foki a lautolu ke “mumui atu ke he Punua mamoe ke he tau mena oti kua fano a ia ki ai.” (Fakakite. 14:1-4) Ne eke a lautolu mo ‘hoana he Punua mamoe,’ ti nonofo mo ia he kaina haana he lagi.​—Fakakite. 21:9; Ioane 14:2, 3.

6. Ko e ha a lautolu ne fakauku ne fakahigoa ko e “tamafine he Patuiki,” ti ko e ha ne tala age ki a lautolu ke fakanimonimo e tau tagata ha lautolu?

⁶ Ko e hoana ne fakahigoa ko e “tamafine” ti fakahigoa foki a ia ko e “tamafine he Patuiki.” (Sala. 45:13) Ko hai e “Patuiki” nei? Ko ia ko Iehova. Ne hiki e ia e tau Kerisiano fakauku mo “fanau” haana. (Roma 8:15-17) Ne tala age ki a lautolu ne fakauku: “Kia fakanimonimo foki e koe hāu a motu, mo e faoa he hāu a matua.” Ha ko e mena to eke a lautolu mo hoana he lagi, kua lata a lautolu ne fakauku ke hagaaki ke he “tau mena ha i luga, ka e nakai ko e tau mena ha he lalolagi.”​—Kolo. 3:1-4.

7. (a) Fēfē e puhala hane taute tuai he Keriso e haana hoana anoiha? (e) Fēfē e logonaaga he hoana ke he haana taane anoiha?

⁷ Ke he tau tau loga, ne taute tuai he Keriso e hoana haana anoiha ma e fakamauaga he lagi. Ne tohi he aposetolo ko Paulo ne “fakaalofa a Keriso ke he ekalesia, mo e foaki mai e ia a ia ke eke mo hukui māna; kia fakatapu ai e ia mo e fakamea ai ke he koukouaga he vai, katoa mo e kupu; kia tuku atu ai e ia kia ia ni e ekalesia fulufuluola, nakai fai ila, po ke mafigofigo, po ke taha mena pihia, ka ko e ekalesia tapu mo e nakai fai mena kelea.” (Efeso 5:25-27) Ne tala age a Paulo ke he tau Kerisiano fakauku i Korinito i tuai: “Ko e mena fakamakutu au kia mutolu mo e fakaeneene kua lata mo e Atua; ha kua fakatutane tuai e au a mutolu ke he tane ne tokotaha, kia tuku atu e au a mutolu, ko e tamafine tote fakamoli kia Keriso.” (2 Kori. 11:2) Ha ko e tapuakiaga haana kua meā mo e talia ke he Atua, ne onoono e Patuiki ko Iesu Keriso ke he hoana haana kua fulufuluola. Kua hufeilo e hoana ke he haana taane anoiha ti talia fakamakai ai ko e “Iki” haana.

8. Ko e ha e hoana ne fakamaama kua “fulufuluola lahi”?

⁸ Totou Salamo 45:13, 14a. Ko e hoana ‘kua taute ma e tane hana’ ti “fulufuluola lahi” ma e fakamauaga fakapatuiki. Ia Fakakiteaga 21:2, kua fakatatai e hoana ke he  maaga ko Ierusalema Foou. Ko e maaga nei he lagi ne kikila ai e “lilifu he Atua” ti “tuga ne maka uho lahi haia, tuga foki e maka iasepi hana tioata mai.” (Fakakite. 21:10, 11) Ko e foliga fulufuluola ha Ierusalema Foou kua fakamaama fakamitaki mai he tohi ha Fakakiteaga. (Fakakite. 21:18-21) Ko e hoana “fulufuluola lahi” mooli! Ko e mena anei ka amanaki a tautolu mai he fakamauaga fakapatuiki he lagi.

9. Takitaki mai ki a hai e hoana? Ko e heigoa ne tui e ia?

⁹ Ne tamai e hoana ke he haana Kitofaihoana, ko e Patuiki faka-Mesia. Ne tauteute mo e fakameā e ia e hoana haana puhala he “kupu.” Kua “tapu mo e nakai fai mena kelea” a ia. (Efeso 5:26, 27) Kua lata e hoana haana ke tui e tapulu kua latatonu mo e fakamauaga. Ti pihia mooli a ia! “Kua taute hana tapulu ke he auro,” ti “to takitaki a ia ke he Patuiki mo e hana tau tapulu kilakila kehe.” Ma e fakamauaga he Punua Mamoe, “kua tuku atu kia ia ke tapulu a ia ke he ie mitaki, kua mea mo e kikila; ha ko e ie mitaki ko e tututonu ia he tau tagata tapu.”​—Fakakite. 19:8.

10. Ko e heigoa ka tupu ato fakahoko e fakamauaga he Punua Mamoe?

¹⁰ Totou Fakakiteaga 19:7. A fe ka fakahoko e fakamauaga he Punua Mamoe? Pete he talahau he Fakakiteaga 19:7 “ko e hana hoana foki kua taute tuai e ia a ia” ke lata mo e fakamauaga, ko e tau kupu he magaaho fakamui ne nakai fakamaama e fakamauaga. Ka e, fakamaama fakamaaliali ai e vala fakahiku he matematekelea lahi. (Fakakite. 19:11-21) Kakano kia e mena nei to fakahoko mua e fakamauaga to moua he Patuiki haana kautūaga? Nakai. Ko e tau mena tutupu ne talahau tuai he Fakakiteaga kua nakai tohi fakapapahi ke hohoko ai. He Salamo 45, ne pipi he Patuiki ko Iesu Keriso e pelu haana ti fakakaumahala mua e tau fī haana, ato fakahoko ai e fakamauaga fakapatuiki.​—Sala. 45:3, 4.

11. Ko e heigoa ka taute mua he Keriso to fakahoko e fakamauaga?

¹¹ Ti fakaako e tautolu mai he Tohi Tapu ko e tau mena nei ka tutupu to hohoko ai he puhala nā: Fakamua, ko e “fifine fakataka lahi,” ko Papelonia Lahi, ko e tau lotu fakavai oti, to moumou ai. (Fakakite. 17:1, 5, 16, 17; 19:1, 2) Matutaki atu, to moumou he Keriso e vala ne toe he lalolagi kelea ha Satani i Amaketo, “tau ke he aho lahi he Atua mana.” (Fakakite. 16:14-16; 19:19-21) Fakahiku ai, to fakakatoatoa he Patuiki e kautūaga haana he liti hifo a Satani mo e tau temoni haana ke he pahua, ke nakai maeke a lautolu ke fakamamahi ha tagata. Ke tuga kua mamate a lautolu.​—Fakakite. 20:1-3.

12, 13. (a) A fe ka fakahoko e fakamauaga he Punua Mamoe? (e) He lagi, ko hai ka fiafia ha ko e fakamauaga he Punua Mamoe? (Kikite fakatino he kamataaga.)

¹² He tau aho fakamui, ko e tau Kerisiano fakauku ne fakatumau e mahani fakamooli ke hoko ke he mate kua fakaliu tu mai ke he moui he lagi. Fai magaaho he mole e moumou ha Papelonia Lahi, ka e fakamua to hoko a Amaketo, to oti e fakapotopoto he Keriso e tau Kerisiano fakauku toko 144,000 ke fakalataha mo ia he lagi. (1 Tesa. 4:16, 17) Ti mole a Amaketo, to fakahoko e fakamauaga he Punua Mamoe. Ko e magaaho fiafia mooli ma e fakamauaga ia! Pehē e Fakakiteaga 19:9: “Uhoaki a lautolu kua talahaua ke o mai ke he taonaga he Punua mamoe.” Ē, kua fiafia mooli e hoana. Mo e to fiafia e Patuiki ke fakalataha e tau hoa fakauku oti haana mo ia he lagi. (Luka 22:18, 28-30) Ka e nakai ni ko e hoana mo e Kitofaihoana ka fiafia.

¹³ He totou e tautolu he kamataaga, ko e tau leo he lagi to lologo: “Kia fiafia a tautolu mo e kolikoli mo e tuku atu e fakahekeaga kia ia; ha kua hoko mai e taonaga  he Punua mamoe, ko e hana hoana foki kua taute tuai e ia a ia.” (Fakakite. 19:6, 7) Ka e kua e tau fekafekau ha Iehova he lalolagi? To fakalataha foki nakai a lautolu ke he fakamauaga nei?

14. He totoku ia Salamo 45, ko hai e “tau kapitiga ko e tau tamafine” he hoana?

¹⁴ Totou Salamo 45:12, 14e, 15. Talahau tuai he perofeta ko Sakaria ke he tau aho fakamui, to fekafekau fiafia e tau tagata he lalolagi katoa ki a Iehova fakalataha mo lautolu ne toe ne fakauku. Ne tohi e ia: “Ko e tau aho ia to toto atu ai he tau tagata tokohogofulu he tau vagahau oti he tau motu kehe; to toto atu ai e lautolu e kala tapulu he tagata Iuta mo e pehe atu, To o a tautolu mo mutolu; ha kua logona e mautolu ha ha ia mutolu e Atua.” (Saka. 8:23) Ia Salamo 45:12, ko e “tau tagata tokohogofulu” kua hagaao ki ai ko e ‘tamafine ha Turo’ mo e “tau maukoloa he motu.” Ne foaki e lautolu e tau mena fakaalofa ke he tau fekafekau fakauku ne toe, ti gahua a lautolu ke moua e taliaaga mo e lagomatai ha lautolu ke fekafekau ki a Iehova. Tali mai he 1935, ne takitaki mai he tau fekafekau fakauku ne toe e tau miliona tagata ‘ke he mahani tututonu,’ ko e tau miliona tagata ne fakaako e kupu mooli hagaao ki a Iehova. (Tani. 12:3) Ko e tau miliona tagata, po ke “tau tagata tokohogofulu” nei, ko e tau hoa fakamooli ha lautolu kua fakauku ne fakameā e tau momoui ha lautolu he tau tapuakiaga fakavai oti kana. Kakano haia ne fakahigoa a lautolu ko e “tau kapitiga ko e tau tamafine.” Ne fakatapu ha lautolu a tau momoui ki a Iehova ti kua fakakite ai ko e tau fekafekau fakamooli a lautolu ke he Patuiki ko Iesu Keriso.

15. Maeke fēfē e “tau kapitiga ko e tau tamafine” ke gahua mo lautolu ne fakauku ne toe?

 ¹⁵ Ko lautolu ne fakauku ne toe kua fiafia lahi ke he “tau kapitiga ko e tau tamafine” nei ha kua lagomatai fakamakai a lautolu ke fakamatala e “tala mitaki nai he kautu” ke he lalolagi oti. (Mata. 24:14) Nakai ni ko e ‘Agaga mo e kitofaitane ne pehe atu, Ati hau ā; kia pehē atu foki a ia kua fanogonogo, Ati hau ā.’ (Fakakite. 22:17) Kakano e mena nei ko e ‘tau mamoe kehe’ ne logona a lautolu ne fakauku ne pehē “Ati hau ā” mo e fakalataha mo lautolu he talahau “Ati hau ā” ke he tau tagata he lalolagi katoa.​—Ioane 10:16.

16. Ko e heigoa e lilifu ne age e Iehova ke he tau mamoe kehe?

¹⁶ Ne ofania e lautolu ne fakauku ne toe e tau mamoe kehe. Kua fiafia a lautolu ne fakauku ha kua foaki foki e Iehova ke he tau mamoe kehe e lilifu ke fakalataha fiafia ke he fakamauaga. Ko e “tau kapitiga ko e tau tamafine” nei “to takitaki a lautolu mo e fiafia mo e olioli.” Ē, ko e tau mamoe kehe, ne amaamanaki ke momoui he lalolagi to fiafia auloa mo e lagi mo e lalolagi katoa ka fakahoko e fakamauaga he Punua Mamoe ke he lagi. Ko e tohi he Fakakiteaga ne fakamaama e “moto tagata tokologa,” ka tapuaki ki a Iehova he lalolagi, “kua tutu mai a lautolu ki mua he nofoaiki, ki mua foki he Punua mamoe.” Kua fekafekau a lautolu ki a Iehova he lotopā he lalolagi he faituga lahi fakaagaaga haana.​—Fakakite. 7:9, 15.

17, 18. Aoga fēfē a lautolu ka haia he lalolagi foou mai he fakamauaga he Punua Mamoe? Magahala he Taha e Afe Tau ka Pule, to eke e Keriso mo matua ki a hai?

¹⁷ Totou Salamo 45:16. Ko e “tau kapitiga ko e tau tamafine” he hoana he Keriso he lagi to ha ha i ai e kakano lahi ke fiafia ka kitia e lautolu e tau fua mitaki he lalolagi foou. Ko e Patuiki ko Iesu Keriso to fakaliu tu mai haana “tau matua” he lalolagi. Ha ko e mena fakaliu tū mai he Keriso a lautolu nei ke he moui, to eke e “tau matua” nei mo “tau aloalomanava” haana. (Ioane 5:25-29; Hepe. 11:35) To fifili he Keriso e falu he tau aloalomanava po ke, tau fanau nei ke eke mo “tau iki ke he lalolagi oti.” Amanaki foki a tautolu ke fifili e ia falu he tau motua fakamooli mogonei ke takitaki he lalolagi foou ko e “tau iki.”​—Isaia 32:1.

¹⁸ He Taha e Afe Tau ka Pule, to eke e Keriso mo matua ke he falu foki. He puhala fe? Ko lautolu ne fakagahua e tua he poa lukutoto ha Iesu to momoui tukulagi he lalolagi. (Ioane 3:16) To eke a Keriso mo “Matua tukulagi” ha lautolu.​—Isaia 9:6, 7.

19, 20. Lauia fēfē e tau Kerisiano mooli oti he vahā nei ha ko e tau mena tutupu ofoofogia ne fakamau ia Salamo 45?

¹⁹ Totou Salamo 45:1, 17. Kua lata he tau Kerisiano oti ke fiafia ke he tau mena tutupu ne fakamau ia Salamo 45. Ko lautolu ne fakauku ne haia agaia he lalolagi kua fiafia ke iloa to nakai leva ti fakalataha a lautolu ke he lagi mo e ha lautolu tau matakainaga mo e Kitofaihoana, ko Iesu Keriso. Ko e tau mamoe kehe kua fakalagalaga ke matutaki ke omaoma fakalahi ke he ha lautolu a Patuiki lilifu. Kua fakaaue foki a lautolu ke eke mo tau hoa he tau tagata ne toe he hoana ne haia he lalolagi. Ko e tau monuina ne moua he Keriso mo e hoana haana to foaki ke he tau tagata oti he mole e fakamauaga to homo ue atu ke he mena ne nakai manatu a tautolu ki ai.​—Fakakite. 7:17; 21:1-4.

²⁰ He onoono atu a tautolu ki mua ke he fakamooliaga he tau perofetaaga hagaao ke he Patuiki faka-Mesia, mooli to omoomoi a tautolu ke fakailoa e higoa haana. Kia fakaheke a tautolu ke he Patuiki “tukulagi tukumuitea.”