KUA kuku mai he fifine takape nofogati e tama taane haana, ko e tama ni a ia haana. Ne ofo lahi mahaki a ia. He nakai la leva ia, ne lukuluku mo e fakaalofa hofihofi e ia e tino mate he tama haana. Kua fiafia lahi a ia mogonei he onoono ke he tama haana kua moui mai mo e mamali haana. “Kikite mai la,” he talahau he tagata ahiahi he kaina haana, “kua moui hau a tama.”

Ko e fakaliu tu mai ofoofogia ia ne tupu teitei ke 3,000 tau kua mole. Maeke a koe ke totou ai he 1 Tau Patuiki veveheaga 17. Ko e tagata ahiahi ko e perofeta he Atua ko Elia. Ko hai e matua fifine? Nakai tohia e higoa he fifine takape nei ne nofo he maaga ko Sarefata. Ka ko e liu tu mai he tama haana ko e taha mena omoomoi lahi he moui haana ne fakamalolō e tua haana. He hagaaki a tautolu ki a ia, to fakaako a tautolu ke he falu fakaakoaga uho.

Ne fifili e Iehova to leva e nakai fai uha ke he atu motu ha Ahapo, ko e patuiki kelea ha Isaraela. He oti e fakailoa e Elia to nakai fai uha, ne fufū he Atua a ia mai ia Ahapo mo e fagai fakamana he Atua e perofeta aki e areto mo e tau maga kakano manu ne tamai he tau oreva. Ti tala age a Iehova ki a Elia: “Matike a, mo e fano a koe ki Sarefata ko e [maaga] a Saitonu, mo e nofo ai a koe; kitiala, kua poaki atu e au ke he fifine takape ke he mena ia ke fagai ai a koe.”​—1 Patu. 17:1-9.

He hoko a Elia ki Sarefata, ne kitia e ia e fifine takape nofogati ne fai gaafi. Ko e fifine ia kia ka foaki e tau mena kai ke he perofeta? Maeke fēfē a ia ke taute pihia, ha kua nofogati lahi foki a ia? Pete ni e tau fakauaua ka liga ha ha ia Elia, ne kamata a ia ke tutala ke he fifine. “Ta mai la,” he ui e ia, “e maga vai tote ke he kapiniu, kou inu.” He fano a ia ke tamai e maga vai, ne lafi e Elia: “Ta mai e koe ke he lima hāu e maga areto tote maku.” (1 Patu. 17:10, 11) Nakai uka ma e fifine takape ke foaki e mena inu ke he tagata kehe, ka ko e lekua ke foaki e areto.

“Kua moui a Iehova hāu a Atua,” he tali he fifine, “nakai fai areto pukupuku au; ka ko e  puke aloalolima he falaoa ke he paelo, mo e maga puke lolo tote ke he lupo; kitiala, kua oko e au ua e gaafi, ke fano ai au, mo e tunu ai ma maua mo e haku a tama tane, ke kai ai e maua, ti mamate ni a maua.” (1 Patu. 17:12) Manamanatu la tautolu ke he mena ne fakakite mai he fakatutalaaga nei.

Ne mailoga he fifine takape a Elia ko e tagata Isaraela ne matakutaku ke he Atua. Kua fakamooli ai he tau kupu haana “kua moui a Iehova hāu a Atua.” Pete ni kua iloa e ia hagaao ke he Atua a Isaraela, ne nakai la mauokafua a ia ke talahau “haaku Atua” he magaaho ne hagaao ai ki a Iehova. Ne nofo a ia i Sarefata, ko e maaga ne ‘ha ha i ai,’ po ke liga he taone lahi a Saitonu he faahimotu ko Foinike. Liga foki, ko e tau tagata tapuaki ki a Paala ne nonofo i Sarefata. Pete ia, ne kitia e Iehova e taha mena uho he fifine takape nei.

Pete ne nofo e fifine takape nofogati i Sarefata mo e tau tagata tapuaki tupua, ne fakagahuahua e ia e tua. Ne fakafano e Iehova a Elia ke he fifine ke aoga ai e fifine mo e perofeta. Ha i ai e fakaakoaga uho ma tautolu mai he mena nei.

Nakai mahani kolokolovao oti a lautolu ne nonofo i Sarefata ko e matakavi he tapuakiaga a Paala. He fakafano atu e Iehova a Elia ke he fifine takape nei, ne fakakite e Iehova kua mailoga e ia a lautolu takitokotaha kua loto mitaki ka e nakai la fekafekau ki a Ia. Mooli ai, “ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”​—Gahua 10:35.

Tokofiha e tagata kua nonofo he matakavi haau kua tuga e fifine takape i Sarefata? Pete kua agaagai a lautolu he tau tagata he lotu fakavai, liga manako lahi a lautolu ma e taha mena kua mua e mitaki. Liga tote po ke nakai iloa e lautolu a Iehova ti lata ke lagomatai ke iloa mo e talia e tapuakiaga mea. Kua kumi nakai a koe mo e lagomatai e tau tagata pihia?

Manamanatu fakamitaki ke he mena ne ole e Elia ke taute he fifine takape. Ne talahau laia e ia ki a Elia kua taha ni e fua kai ne toe ma haana mo e tama haana, ti to kai ai e laua ti mamate. Ka ko e heigoa ne talahau e Elia? “Ua matakutaku a koe; fano a, ti eke e koe e mena ne tala mai ai e koe; ka e taute ai fakamua e koe taha areto pukupuku tote maku, mo e ta mai ai e koe kia au; ka mole ia ti taute ai e koe ma mua mo e hau a tama tane. Ha kua talahau mai pehe a Iehova ko e Atua a Isaraela, Nakai oti e paelo falaoa, to nakai fakatote ai e puke lolo ke he lupo, ato hoko ke he aho ke foaki mai ai e Iehova e uha ke he kelekele.”​—1 Patu. 17:11-14.

‘Ke age e mena kai fakahiku ha maua? Kua vaiga a koe,’ he liga talahau he falu. Ka e nakai tali pihia e fifine takape nei. Pete ni kua tote e iloaga haana ki a Iehova, ne talitonu a ia ki a Elia mo e taute e mena ne ole e Elia. Ko e kamatamata lahi mooli he tua​—mo e ko e fifiliaga pulotu lahi ne taute e ia!

Ne nakai tiaki he Atua e fifine takape nofogati. Tuga ni ne mavehe e Elia, ne fakalahi e Iehova e mena kai tote he fifine ke leveki aki a Elia, fifine takape, mo e tama taane haana ato fai uha. Mooli ai, “nakai oti e falaoa ke he paelo, ti nakai fakatote ai e puke lolo ke he lupo, ke lata mo e kupu a Iehova ne talahau mai ai e Elia.” (1 Patu. 17:16; 18:1) Ane mai nakai taute pihia he fifine, ko e areto ne taute e ia mai he falaoa mo e puke lolo tote ne liga ko e fua kai fakahiku mooli haana a ia. Ka e tua fakamooli a ia mo e falanaki ki a Iehova, ti fagai mua a Elia.

 Ko e fakaakoaga kua maeke ia tautolu ke ako mai he mena nei kua fakamonuina e Iehova a lautolu ne tua ki a ia. Ka fehagai a koe mo e tau kamatamata he loto fakamooli ti fakagahuahua ai e tua, to lagomatai e Iehova a koe. To eke a ia mo Leveki, Puipui, mo e Kapitiga ke lagomatai a koe ke fahia mo e kamatamata haau.​—Esoto 3:13-15.

He 1898, ne moua mai he Zion’s Watch Tower e fakaakoaga nei he tala ke he fifine takape: “Ka moua he fifine takape e tua ke maeke ke omaoma, ti kua aoga a ia ke lagomatai he Iki puhala mai he Perofeta; ka nakai tua a ia, liga to moua he taha takape foki e lagomatai ia. Ti pihia foki mo tautolu​—he tau lakaaga kehekehe he moui ne tamai he Iki a tautolu ke he tuaga ke kamatamata e ia e tua ha tautolu. Ka tua a tautolu to moua e tautolu e monuina; ka nakai tua, to nakai moua ai e tautolu.”

Ka fehagai a tautolu mo e tau kamatamata, kua lata ia tautolu ke kumi e takitakiaga he Atua mai he Tohi Tapu mo e mai he tau tohi ne fakavē ke he Tohi Tapu. Ti lata ia tautolu ke gahua fakatatau ke he takitakiaga ha Iehova pete he uka ke talia ai. To fakamonuina mooli a tautolu ka gahua fakatatau a tautolu mo e fakatai pulotu nei: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.”​—Fakatai 3:5, 6.

Kua teitei foki e tua he fifine takape ke liu kamatamata. “Kua mole atu e tau mena ia,” he talahau he tala he Tohi Tapu, “ti gagao ai e tama tane he fifine, ko e patu fifine he kaina; kua lahi mahaki ni hana gagao, ti fakahiku ai hana fafagu.” He manamanatu ke he kakano ne tupu e matematekelea fakaofo nei, ne talahau e matua fifine kua maanu ki a Elia: “Ko e tagata he Atua na e, ko e heigoa kia hāu kia au? Kua haele mai kia a koe ke fakamanatu mai kia au haku a mahani kelea, mo e tamate ai haku tama?” (1 Patu. 17:17, 18) Ko e heigoa e kakano he tau kupu mamahi nei?

Kua manatu kia he fifine nei e agahala ne fakatupetupe e loto manamanatu haana? Manatu kia a ia ko e mate he tama taane haana ko e fakahala he Atua ti ko Elia e utafekau he Atua ke taute pihia? Nakai talahau he Tohi Tapu ki a tautolu, ka e taha e manatu kua maaliali: Ne nakai tukupau he fifine takape kua nakai tututonu e Atua.

Ne liga ofo lahi a Elia he mate e tama taane he fifine takape pihia mo e manatu he fifine takape ko e fina atu he perofeta ati fakatupu e loto malipilipi maanu haana. He mole e ta atu e tino mate he tama taane ne kua talofe ke he poko i luga, ne ui atu a Elia: “Iehova na e, haku Atua na e, kua fakahoko kia e koe e kelea ke he fifine takape kua api ai au, he tamate ai e koe hana tama?” Ne tupetupe lahi mahaki e perofeta neke ekefakakelea e higoa he Atua ka fakaatā e Ia e fifine fakamokoi nei ke matematekelea foki. Ti olelalo a Elia: “Iehova na e, haku Atua na e, kia liu aki mai e koe e agaga he tama nai ki loto ia ia.”​—1 Patu. 17:20, 21.

Kua logona ai e Iehova. Ne leveki he fifine takape e perofeta ti fakagahuahua foki e tua. Ti fakaatā he Atua e gagao he tama taane ke hoko pihia, he iloa to ha ha e fakaliu tu mai​—ko e liu tu mai fakamua ne fakamau he Tohi Tapu​—ka hoko mo e moua ai he tau atuhau a mui e amaamanakiaga. He magaaho ne olelalo a Elia ki a Ia, ne fakamoui e Iehova e tama. Manamanatu la ke he fiafia he fifine takape he magaaho ne pehē a Elia: “Kikite mai la, kua moui hau a tama”! Ti tala age e fifine takape ki a Elia: “Hanai, kua iloa e au e mena nai ko e tagata he Atua a koe; ko e kupu a Iehova foki kua to mai ai he fofoga hau ko e moli haia.”​—1 Patu. 17:22-24.

Ne nakai liu fai tala foki he 1 Tau Patuiki veveheaga 17 hagaao ke he fifine nei. Pete ia, ko e tau tala mitaki ha Iesu hagaao ki a ia kua fakakite ne liga matutaki a ia ke moui ko e fekafekau tua fakamooli ha Iehova. (Luka 4:25, 26) Ko e tala he fifine nei kua fakaako mai ki a tautolu kua fakamonuina e Iehova a lautolu ne leveki e tau fekafekau haana. (Mata. 25:34-40) Kua fakakite ai kua leveki he Atua a lautolu ne tua fakamooli ki a ia, pihia foki he tau tutūaga matematekelea lahi. (Mata. 6:25-34) Kua fakakite foki he tala nei e manako lahi mo e malolō ha Iehova ke fakaliliu tutū mai a lautolu kua mamate. (Gahua 24:15) Ko e tau kakano mitaki lahi anei ke manatu tumau e fifine takape i Sarefata.