Maeke he tau tutūaga matematekelea ke fai lauiaaga kelea lahi ki a tautolu. Maeke ai ke fakatupetupe lahi, fakalolelole, ti hikihiki e onoonoaga ha tautolu he moui. Ne lauia lahi a Tavita ko e Patuiki a Isaraela i tuai he loga e tau mena uka. Fehagai fēfē a ia ki ai? He taha salamo omoomoi, ne tali ai a Tavita: “Ne kalaga atu kia Iehova ke he haku a leo; ne ole atu au kia Iehova ke he haku a leo. Kua liligi atu e au haku a tagi ki mua hana; kua fakakite atu e au haku a matematekelea ki mua hana; Ka lolelole haku a loto ki loto ia au, ti fioia ai e koe haku a puhala.” Ē, ne liogi fakatokolalo a Tavita ke he Atua ma e lagomatai.​—Sala. 142:1-3.

He taha salamo foki, ne lologo a Tavita: “Taha mena ne ole au mai ia Iehova, ko e mena ia ni ke kumi atu e au ki ai; kia nofo au ke he fale a Iehova ke he tau aho oti he haku a moui, kia kitia ai e au e fulufuluola a Iehova, mo e kumikumi ke he hana faituga.” (Sala. 27:4) Nakai ko e tagata Levi a Tavita, ka e manamanatu la ki a ia hane tu i fafo he lotopā tapu ne tata ke he lotouho he tapuakiaga mooli. Ne pukeina e loto ha Tavita ke he fakaaue pihia ati manako a ia ke fakaaoga e moui katoa haana i ai ti ‘kitia ai e fulufuluola a Iehova.’

Ko e kupu “fulufuluola” kua putoia e tuaga po ke aga nukua “talia po ke mitaki ke he loto, tau logonaaga, po ke manamanatuaga.” Ne kumikumi tumau a Tavita ke he fakaholoaga he Atua ma e tapuakiaga. Liga mitaki ke hūhū hifo e tautolu, ‘Kua logona pihia nakai au tuga a Tavita?’

He vahā ha tautolu, ko e fakaholoaga ha Iehova ke o atu ki a ia kua nakai fakavē ke he fale. Ka e, putoia ai e faituga fakaagaaga lahi he Atua​—ko e fakaholoaga tapu he tapuakiaga mooli. a Kaeke “kumikumi” a tautolu ke he fakaholoaga nei, kua maeke ia tautolu foki ke ‘kitia ai e fulufuluola a Iehova.’

Kitekite la ke he fatapoa apa kula he tau poa huhunu ne tuku ki mua he tau gutuhala he fale uta fano. (Esoto 38:1, 2; 40:6) Ko e fatapoa ia ne fakakite e fakamakai ia he Atua ke talia e poa ha Iesu he moui haana. (Hepe. 10:5-10) Manamanatu la ke he kakano he mena nei ma tautolu! Ne tohia he aposetolo ko Paulo: “Kua fakafeilo a tautolu mo e Atua ke he matulei he Tama hana, ka ko e tau fi a tautolu.” (Roma 5:10) Ha kua fakagahuahua e tua ke he toto ha Iesu ne fakamaligi, kua maeke ia tautolu ke fiafia e tuaga mitaki mo e falanaki he eke mo tau kapitiga he Atua. Ha ko e mena ia, kua logona e tautolu “kua fakafetui a Iehova” mo tautolu.​—Sala. 25:14.

Ha kua “holoholo kehe ai [e] tau hala” ha tautolu ti maeke ia tautolu ke fiafia e “tau tau ke okioki ai mai mua he Iki,” ko Iehova. (Gahua 3:19) Ko e tuaga ha tautolu kua tuga ni e tagata he fale puipui nukua tokihala ke he tau gahua haana kua mole ti taute e tau hikiaga lalahi he tatali atu a ia ke he aho ka tamate a ia. He onoono ki ai, ko e iki fakafili totonu kua omoomoi ke utakehe e tau fakamauaga kelea he tagata ia​—ati nakai fakahala mate a ia. Kua fakatotoka mo e fiafia lahi mooli e tagata ne tuku he fale puipui! Tuga e iki fakafili ia, kua talia fiafia e Iehova e tau tagata ne tokihala ati utakehe e fakafiliaga he mate.

Kua ha ha he tapuakiaga mooli e falu mena ne maeke a Tavita ke kitia he fale ha Iehova ko e tau tagata tokologa he tau matakainaga Isaraela ne fakapotopoto, ko e totouaga mo e fakamaamaaga he  Fakatufono, ko e tugi he tau mena manogi, mo e fekafekauaga tapu he tau ekepoa mo e tau Levi. (Esoto 30:34-38; Nume. 3:5-8; Teu. 31:9-12) Ko e tau puhala nei he tapuakiaga mooli i Isaraela i tuai kua fai tataiaga mo e vahā foou nei.

He vahā ha tautolu tuga ni i tuai, “ko e mena mitaki lahi mo e fulufuluola, ke nonofo fakalataha e tau matakainaga.” (Sala. 133:1) Kua tupu lahi mahaki e “tau matakainaga” ha tautolu he lalolagi katoa. (1 Pete. 2:17) Kua totou mo e fakamaama e Kupu he Atua he tau feleveiaaga ha tautolu. Puhala he fakatokatokaaga haana, kua foaki e Iehova loga lahi e tau fakaakoaga aoga. Kua loga lahi foki e tau mena kai fakaagaaga ne lolomi ma tautolu ke fakaaoga he fakaakoaga fakatagata mo e fakamagafaoa. Taha e matakainaga he Kau Fakatufono ne talahau: “Ko e manamanatu fakahokulo ke he Kupu ha Iehova mo e kakano i ai, mo e kumikumi ke iloa mo e maama kua pukeina e manamanatuaga haaku ka ala, ke he tau koloa uho fakaagaaga mo e fiafia.” Ē, ‘kua mitaki foki e pulotu ki a tautolu.’​—Fakatai 2:10.

He vahā nei, ko e tau liogi kua talia ne taute he tau fekafekau he Atua kua foaki tumau ki a Iehova he tau aho oti. Ko e tau liogi pihia kua tuga ni e tau mena manogi ki a Iehova. (Sala. 141:2) Kua omoomoi ha ia ke he tau loto ha tautolu ke mailoga nukua fiafia lahi a Iehova ko e Atua ki a tautolu ka o atu a tautolu ki a ia he liogi fakatokolalo!

Ne liogi a Mose: “Kia ha ha i luga ia mautolu e fulufuluola a Iehova ha mautolu a Atua; kia fakamau e koe e gahua he tau lima ha mautolu.” (Sala. 90:17) He gahua fakamakutu tumau a tautolu he fekafekauaga, kua fakamonuina e Iehova e gahua ha tautolu. (Fakatai 10:22) Maeke ia tautolu ke lagomatai e falu ke iloa e kupu mooli. Liga kua leva e fakauka ha tautolu ke he gahua he fonua ke he loga e tau tau pete ne nakai fanogonogo, gagao, mamahi e logonaaga, po ke favale. (1 Tesa. 2:2) Pete ia, kua kitia nakai e tautolu e “fulufuluola a Iehova” mo e mailoga kua fiafia lahi ha tautolu a Matua he lagi ke he tau gahua ha tautolu?

“Ko Iehova, kua eke tuai a ia māku, ko e haku a kapiniu,” he lologo e Tavita. “Ko koe ni ke fakamau haku a tufaaga. Kua to e fafatiaga he fonua maku ke he mena mitaki.” (Sala. 16:5, 6) Ne loto fakaaue a Tavita ke he haana “fafatiaga,” ko e kakano kua moua e ia e fakafetuiaga mitaki mo Iehova ko e mena uho he fekafekau ki a ia. Tuga a Tavita, liga matematekelea foki a tautolu ha ko e tau mena uka, ka e ha ha ia tautolu loga e tau monuina fakaagaaga! Kia matutaki a tautolu ke fiafia lahi ke he tapuakiaga mooli mo e “kumikumi” fiafia ke he faituga fakaagaaga ha Iehova.