1. Ha kua tufuga a tautolu ke he fakatai he Atua, ko e heigoa kua lotomatala a tautolu ke taute?

 “TATAI ni e tama ke he matua,” ko e taha talahauaga ne fa talahau he tau tagata hagaao ke he tau fanau ne tatai ni ke he tau matua ha lautolu. Ha kua moua mai he tau tama takitaha e tau aga he matua taane mo e matua fifine haana. Ko Iehova, ko e Matua ha tautolu he lagi, ko e Foaki he moui. (Sala. 36:9) Ha ko tautolu ko e tau fanau haana, kua tatai a tautolu mo ia ke he loga e tau puhala. Ha kua tufuga a tautolu ke he “fakatai” haana, kua moua e tautolu e lotomatala ke manamanatu, ke taute e tau fifiliaga, mo e taute e tau fakafetuiaga kapitiga tata.​—Kene. 1:26.

2. Ko e ha kua maeke a Iehova ke eke mo Kapitiga uho ha tautolu?

² Maeke a tautolu ke eke a Iehova mo Kapitiga uho ha tautolu. Ko e fakafetuiaga kapitiga pihia kua maeke ha ko e fakaalofa he Atua ki a tautolu mo e tua ha tautolu ki a ia mo e Tama haana. Pehē a Iesu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Tokologa e tau tagata ne kapitiga tata mo Iehova. Kia fakaako a tautolu mai he tokoua ia lautolu.

3, 4. Ko e heigoa ne kehekehe e kapitiga ha Aperahamo mo Iehova mai he fakafetuiaga ha Isaraela mo Ia?

³ Ne fakamaama e Iehova e matua he tau Isaraela ko “Aperahamo haku a kapitiga.” (Isaia 41:8) Ne fakahigoa foki he tohi Ua Nofoaga he Tau Patuiki 20:7 a Aperahamo ko e kapitiga he Atua. Ko e heigoa ati maeke a Aperahamo ke kapitiga tata pihia mo e Tufuga haana? Ko e tua malolō ha Aperahamo.​—Kene. 15:6; totou Iakopo 2:21-23.

⁴ Ko e tau fanau ha Aperahamo ne eke mo motu ha Isaraela i tuai ne eke foki e lautolu a Iehova mo Matua mo e Kapitiga ha lautolu. Momoko ai, fai magaaho he mole ne galo e kapitiga ha lautolu mo e Atua. Ko e ha? Ha kua galo e lautolu e tua ke he tau maveheaga ha Iehova.

5, 6. (a) Puhala fe kua eke a Iehova mo Kapitiga haau? (e) Ko e heigoa e tau hūhū kua lata ia tautolu ke hūhū hifo ki a tautolu ni?

⁵ Ka lahi e iloa haau hagaao ki a Iehova, to malolō foki e tua haau, ti hokulo foki e fakaalofa haau ki a ia. Liu la ke manamanatu ke he magaaho ne iloa mua e koe na moolioli e Atua ti maeke a koe ke kapitiga tata mo ia. Ne fakaako a koe kua agahala a tautolu oti ha kua nakai omaoma a Atamu. Ne maama foki ia koe kua nakai mafola e tau tagata mo e Atua. (Kolo. 1:21) Ti mailoga mogoia e koe ko e ha tautolu a Matua fakaalofa he lagi kua nakai mamao ligo mo e nakai fakateaga ki a tautolu. Magaaho ne iloa e tautolu na poa e Iehova e Tama haana ti kamata a tautolu ke tua ke he poa lukutoto, ne kamata a tautolu ke atihake e kapitiga mo e Atua.

⁶ Ka manamanatu a tautolu ke he puhala ne iloa e tautolu a Iehova, kua lata ia tautolu ke hūhū hifo: ‘Kua holo ki mua nakai e fakafetuiaga kapitiga haaku mo e Atua? Kua malolō nakai e tua haaku ki a Iehova, mo e tupu nakai e fakaalofa haaku ki a ia he tau aho takitaha?’ Taha kapitiga tata foki he Atua ko Kiteona. O mai la ke fakaako hagaao ki a ia ke maeke ia tautolu ke mumuitua ke he fakafifitakiaga haana.

7-9. (a) Ko e heigoa e mena ofoofogia ne tupu ki a Kiteona, ti ko e heigoa ne fua mai ai? (Kikite fakatino he kamataaga.) (e) Maeke fēfē a tautolu ke eke mo kapitiga he Atua?

⁷ Ne fekafekau e Fakafili ko Kiteona ki a Iehova he magahala uka lahi he mole e huhū atu e tau Isaraela ke he Motu he Maveheaga. Ne fakahagahaga kelea he tau Mitiana e tau Isaraela ti kua lagaloga e totoko atu ke he fonua ha lautolu. Ha ko e mena ia, ne haha saito ai a Kiteona i loto he holiaga vine ka e nakai i fafo he fonua ka mafiti a ia ke fufū e tau saito ne uho. Talahau mai he Tau Fakafili veveheaga 6 ne aahi atu e agelu ha Iehova ki a Kiteona i Orefa. Ne ofo a Kiteona ha kua tu atu e agelu mo e ui a Kiteona ko e “toa malolo.” Pete he fakahao e Iehova e tau Isaraela mai i Aikupito, ne fakauaua a Kiteona to lagomatai nakai e Ia a lautolu he mogonei. He vagahau ma Iehova, ne mavehe e agelu to lagomatai he Atua a Kiteona.

⁸ Ne manamanatu a Kiteona to maeke fēfē a ia ke “laveaki mai . . . a Isaraela he lima a Mitiana.” Ne foaki e Iehova ki a ia e tali maaliali: “To fakalataha ni a taua mo koe,” ti pehē a Iehova, “to kelipopo ai e koe a Mitiana ke tuga ne tagata tokotaha.” (Fakafili 6:11-16) He liga manamanatu ke he puhala ka tupu e mena nei, ne ole a Kiteona ke he taha fakamailoga mai he Atua. Mailoga ai he fakatutalaaga nei ne nakai fakauaua a Kiteona na mooli a Iehova.

⁹ Ko e mena foki ne tupu ne fakamalolō e tua ha Kiteona ti fakatata lahi a ia ke he Atua. Ne tauteute e Kiteona e mena kai mo e ta age ai ke he agelu. Ne huhunu fakamana he agelu e tau mena kai he fakapiki aki e tokotoko haana. He magaaho ne mailoga e Kiteona ko e agelu nei kua fakafano mai mooli he Atua, ne matakutaku lahi a ia. Ne pehē a Kiteona: “Oi te, ko e Iki na e, ko Iehova, ha kua kitia e au e agelu a Iehova, kua fehagaoaki  ni a maua mo ia.” (Fakafili 6:17-22) Fakalavelave kia he mena ia e fakafetuiaga kapitiga ha Kiteona mo e Atua haana? Nakai! Ne logona e Kiteona e mafola mo e Atua. Iloa e tautolu e mena nei ha kua ati e Kiteona e fatapoa i ai ne fakahigoa “Iehova-saloma” ne kakano Iehova ko e Mafola. (Totou Tau Fakafili 6:23, 24.) Ka manamanatu fakahokulo a tautolu ke he tau mena kua taute e Iehova ma tautolu he tau aho takitaha, to mailoga e tautolu ko e Kapitiga mooli a Iehova. Ka liogi tumau a tautolu ki a Iehova, to lahi foki e mafola ha tautolu mo ia ti malolō lahi e kapitiga ha tautolu mo ia.

10. Hagaao ke he Salamo 15:3, 5, ko e heigoa ne manako a Iehova mai ia lautolu kua manako ke eke mo tau kapitiga haana?

¹⁰ Ha ha ia Iehova e tau tutūaga pauaki ma e ha tagata kua manako ke kapitiga mo ia. He Salamo 15, ne lologo a Tavita hagaao ke he mena kua lata ia tautolu ke taute ka nofo he fale uta fano ha Iehova, kakano, ke eke mo kapitiga he Atua. (Sala. 15:1) Kia hagaaki a tautolu mogonei ke he ua he puhala nei: kalo mai he vagahau ekefakakelea mo e ke mahani fakamooli. Ne pehē a Tavita hagaao ke he ha tagata ne talia e Iehova ke eke mo kapitiga haana: “Ko ia kua nakai eke fakakelea atu ke he hana alelo.” Ne lafi e Tavita: “Nakai talia e ia e mena fakaalofa ke fakahala ai e tagata kua nakai holifono.”​—Sala. 15:3, 5.

11. Ko e ha kua lata ia tautolu ke kalo kehe mai he vagahau fakakelea?

¹¹ He taha salamo foki, ne hataki e Tavita: “Kia leveki hau a alelo neke kelea.” (Sala. 34:13) Ka fakaheu e tautolu e fakatonuaga nei, to hukia e fakafetuiaga kapitiga ha tautolu mo e ha tautolu a Matua he lagi. Mooli ai, ko e vagahau fakakelea ko e fakamailoga he matapatu fī ha Iehova, ko Satani ko e Tiapolo. Ko e kupu “Tiapolo” ne moua mai he kupu Heleni ne kakano “vagahau fakakelea.” Ka fakaeneene a tautolu ke he tau mena ka talahau e tautolu ke he falu mo e tau mena ka talahau e tautolu hagaao ki a lautolu, to lagomatai he mena ia a tautolu ke nonofo fakatata ki a Iehova. Kua lata ia tautolu ke fakaeneene, mua atu ke he aga ha tautolu ke he tau matakainaga ne kotofa he Atua ke takitaki e fakapotopotoaga.​—Totou Heperu 13:17; Iuta 8.

12, 13. (a) Ko e ha kua lata ia tautolu ke mahani fakamooli ke he tau mena oti? (e) Ka mahani fakamooli a tautolu, ko e heigoa ne fua mai?

¹² Kua talahaua e tau fekafekau ha Iehova ko e tau tagata mahani fakamooli. Ne tohia he aposetolo ko Paulo: “Kia liogi a mutolu ma mautolu; ha kua taofi e mautolu ha ha ia mautolu e loto manamanatu hifo mitaki, kua loto a mautolu ke mahani mitaki ke he tau mena oti kana.” (Hepe. 13:18) Ha kua eketaha a tautolu ke “mahani mitaki ke he tau mena oti kana,” to kalo kehe a tautolu he nakai mahani fakamooli ke he tau matakainaga Kerisiano ha tautolu. Ma e fakatai, ka gahua a lautolu ma tautolu, kia eketaha ke taute fakamitaki mo e totogi a lautolu ke lata mo e tupe kua talia ki ai. Ha ko e tau Kerisiano, kua mahani fakamooli a tautolu ke he tau tagata ne gahua ma tautolu mo e tau tagata oti. Ti kaeke kua gahua a tautolu ma e matakainaga Kerisiano, kua lata a tautolu ke mahani mitaki mo e nakai amanaki ke moua e levekiaga pauaki.

¹³ Kua fa nava he tau tagata he lalolagi e Tau Fakamoli a Iehova ha ko e mahani fakamooli ha lautolu. Ma e fakatai, ko e takitaki he taha kamupanī lahi ne mailoga kua fakamooli he Tau Fakamoli a Iehova e tau maveheaga ha lautolu. Pehē a ia, “Ne fakamooli tumau a mutolu ke he tau maveheaga ne fakatoka.” (Sala. 15:4) Ko e mahani fakamooli nei kua lagomatai a tautolu ke toka mau a Iehova mo Kapitiga ha tautolu ti kua fakaheke foki ke he ha tautolu a Matua he lagi.

14, 15. He fekafekauaga ha tautolu, lagomatai fēfē e tautolu falu ke eke mo tau kapitiga ha Iehova?

¹⁴ Pete ko e tau tagata kua feleveia mo tautolu he gahua he fonua kua talitonu na fai  Atua, kua tokologa ne nakai onoono ke he Atua ko e Kapitiga uho ha lautolu. Lagomatai fēfē e tautolu a lautolu ia? Mailoga la e tau hatakiaga ne tala age e Iesu ke he tau tutaki 70 haana he magaaho ne fakafano atu e ia a lautolu ke fakamatala: “Ko e fale ke huhu atu a mutolu ki ai, kia pehe atu fakamua a mutolu, Kia monuina e faoa nai. Kaeke ko e tagata he monuina ha i ai, to hoko kia ia ha mutolu a fakamonuina; ka nakai, ti liuaki mai ai kia mutolu.” (Luka 10:5, 6) Liga manako e tau tagata ke iloa atu foki hagaao ke he kupu mooli kaeke kua aga kapitiga a tautolu ki a lautolu. Ka totonu a tautolu ki a lautolu ne totoko vale ki a tautolu, liga lagomatai he mena nei a lautolu ke fakatotoka ti liga makai a lautolu ke fanogonogo ke he kupu mooli he taha magaaho foki.

¹⁵ Ka feleveia a tautolu mo e tau tagata lotu po ke muitua ke he tau aga fakalotu tuai, kua matutaki a tautolu ke aga kapitiga mo e fakamafola. Kua fakafeleveia mafanatia e tautolu e tau tagata oti ke he tau feleveiaaga ha tautolu, mua atu e tau tagata kua fakaatukehe ha ko e lalolagi he vahā nei mo e manako ke iloa fakalahi hagaao ke he Atua kua tapuaki a tautolu ki ai. Ko e tau vala tala “Hiki he Tohi Tapu e Tau Momoui” kua foaki mai ki a tautolu e tau fakafifitakiaga loga he tau tagata pehēnei.

16. Maeke fēfē ia tautolu ke eke mo tau kapitiga ha Iehova mo e “tau ekegahua” foki haana?

¹⁶ Ko e tau tagata ne gahua auloa kua fa mahani ko e tau kapitiga tata. Ko lautolu oti ne tukulele e tau momoui ki a Iehova ko e tau kapitiga haana mo e “tau ekegahua” foki. (Totou 1 Korinito 3:9.) He fakamatala mo e taute tutaki a tautolu, kua fakaako foki a tautolu ke he tau aga mitaki ue atu he ha tautolu a Matua he lagi. Kitia e tautolu e puhala kua lagomatai he agaaga tapu a tautolu ke fakamatala e tala mitaki.

17. Fakakite mai fēfē he tau toloaga mo e tau fonoaga ki a tautolu ko Iehova e Kapitiga ha tautolu?

¹⁷ Ka lahi e magaaho ha tautolu he taute e gahua fakamatala, to tata lahi foki a tautolu ki a Iehova. Kitia e tautolu e puhala kua taofi e Iehova e tau tagata totoko neke fakalavelave e gahua fakamatala. Maaliali ai kua takitaki e ia a tautolu, ti kua nava lahi a tautolu he puhala kua fakatumau a ia ke fakaako mai he tau feleveiaaga mo e tau tohi ha tautolu. He tau fonoaga mo e tau toloaga, kua kitia ai e tautolu e fakaalofa ha Iehova he maama e tau lekua mo e tau manako ha tautolu. He oti e taha he tau fonoaga ha tautolu, taha e magafaoa ne tohi: “Hokotia mooli e fakaholoaga ke he tau loto ha mautolu. Logona e mautolu kua lahi e fakaalofa ha Iehova ki a mautolu takitokotaha ti manako a ia ke kautū a mautolu.” He mole e o atu ke he fonoaga pauaki i Ailani, ne loto fakaaue lahi e hoa mau i Sihamani ke he fakafeleveia mafanatia mo e leveki atu ki a laua. Pehē foki a laua: “Ka kua fakaaue lahi mahaki a maua ki a Iehova mo e Patuiki ko Iesu Keriso. Ne uiina e lautolu a maua  ke eke mo vala he motu kaufakalataha mooli nei. Nakai ko e tutala noa ni ke he kaufakalataha ka kua olioli ai ke he tau aho oti. Ko e tau mena ne moua e maua mai he fonoaga pauaki i Dublin, to fakamanatu tumau ki a maua e kotofaaga uho ha maua ke fekafekau ke he Atua mua ue atu katoa mo mutolu oti.”

18. Ko e heigoa kua lata ia tautolu ke hūhū hifo hagaao ke he matutaki ha tautolu ki a Iehova?

¹⁸ Kua tata lahi e tau kapitiga ka tutala fakamitaki. He vahā nei, kua fakaaoga tumau he tau tagata e Initanete mo e tohitohi he selafoni. Ka e fakatatai fēfē ai ke he matutakiaga mo e Kapitiga uho ha tautolu ko Iehova? Ko ia ko e “fanogonogo liogi.” (Sala. 65:2) Lagafiha e tutala ha tautolu ki a ia?

19. Ka uka a tautolu ke talahau e tau logonaaga ha tautolu he liogi ki a Iehova, ko e heigoa ka lagomatai?

¹⁹ Ma e falu fekafekau he Atua, kua nakai mukamuka ke talahau e tau logonaaga hokulo. Ka ko e mena ia kua manako a Iehova ki a tautolu ke taute ka liogi a tautolu. (Sala. 119:145; Aue 3:41) Ka uka a tautolu ke fakamaama e tau logonaaga ha tautolu, kua fai mena foki ka lagomatai. Ne tohi e Paulo ke he tau Kerisiano i Roma: “Ha kua nakai iloa e tautolu e tau mena kua lata ke ole atu ai e tautolu; ka ko e Agaga ni, kua ole a ia ma tautolu ke he tau oi kua nakai maeke ke fakamatala atu. Ka ko ia kua kumi e tau loto, kua fioia e ia po ke heigoa e finagalo he Agaga; ha kua ole a ia mo e tau tagata tapu kua lata mo e finagalo he Atua.” (Roma 8:26, 27) He totou a tautolu ke he tau tohi he Tohi Tapu tuga e Iopu, Tau Salamo, mo e Tau Fakatai, kua maeke ia tautolu ke iloa e tau puhala ke talahau e tau logonaaga ha tautolu ki a Iehova.

20, 21. Ko e heigoa e mafanatia kua foaki mai he tau kupu ha Paulo ia Filipi 4:6, 7 ki a tautolu?

²⁰ Ka fehagai a tautolu mo e tau lekua uka, kia manatu e tautolu e tau kupu ha Paulo ke he tau Filipi: “Aua neke fakaatukehe a mutolu ke he taha mena taha; ka kia fakailoa atu ke he Atua.” Ka liogi pihia a tautolu ki a Iehova, to maeke ia tautolu ke moua e mafanatia mooli. Ne tohi e Paulo: “Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) Kua lata ia tautolu ke loto fakaaue tumau ke he “monuina foki mai he Atua” kua puipui mooli e loto mo e manamanatuaga ha tautolu.

²¹ Lagomatai he liogi a tautolu ke feaki e tuaga kapitiga ha tautolu mo Iehova. Kia eketaha a tautolu ke “liogi nakai noa.” (1 Tesa. 5:17) Kua lata ia tautolu ke fakatumau ke fakamalolō e tuaga kapitiga ha tautolu mo e Atua ti taute e tau mena kua manako a ia mai ia tautolu. Kia fakaaoga e taha magaaho ke manamanatu ke he tau monuina ka moua e tautolu ha ko Iehova ko e Matua mooli ha tautolu, ko e Atua ha tautolu, mo e Kapitiga ha tautolu.