1, 2. Ko e heigoa e tau tutūaga kehekehe he tau magafaoa ha tautolu mo e tau puhala ne moua e tautolu e kupu mooli?

 KUA fakatū e Iehova e fakatokaaga he magafaoa. (Efeso 3:14, 15) Pete ko tautolu he magafaoa taha, kua kehekehe oti e tau aga mo e tau tutūaga ha tautolu. Falu ne lalahi hake ka e nonofo agaia mo e tau matua. Liga mamate e tau matua he falu ha ko e gagao, pākia, po ke matematekelea fakaofo ai he falu. Ka e liga nakai iloa he falu e tau matua mooli ha lautolu.

² Ko tautolu oti ko e tau tagata he magafaoa ha Iehova ne tapuaki ki a ia ti kehekehe e tau puhala ne iloa e tautolu e kupu mooli. Liga feaki hake a koe he tau matua ne fakaako a koe ke moui fakatatau ke he tau matapatu fakaakoaga he Tohi Tapu. (Teu. 6:6, 7) Po ko koe taha mai he tokoafe ne liga iloa e kupu mooli ha ko e gahua fakamatala he falu fekafekau ha Iehova.​—Roma 10:13-15; 1 Timo. 2:3, 4.

3. Ko e heigoa e mena ne tatai oti ai a tautolu?

³ Pete kua kehekehe e tau feakiaga ha tautolu, kua fai mena a tautolu oti ne tatai ai. He nakai omaoma a Atamu ke he Atua, ne moua e tautolu oti e nakai mitaki katoatoa, agahala, mo e mate. (Roma 5:12) Pete ia, ha ko e tau tagata tapuaki mooli, kua maeke ia tautolu ke fakahigoa a Iehova ko e ha “mautolu a Matua.” He vahā fakamua, ne maeke e motu fifili he Atua ke talahau e tau kupu ne fakamau ia  Isaia 64:8: “Iehova na e, ko koe ni ko e ha mautolu a Matua.” Kamata pihia foki e Iesu e liogi fakaako haana aki e tau kupu: “Ha mautolu a Matua na e, ha ha he lagi, kia tapu hau a higoa.”​—Mata. 6:9.

4, 5. Ke fakahokulo e fakaalofa ha tautolu ma e ha tautolu a Matua he lagi ko Iehova, ko e heigoa ha tautolu ka fakatutala ki ai?

⁴ Kua foaki he ha tautolu a Matua he lagi ke he magafaoa haana ko e tau tagata tapuaki mooli e levekiaga mo e puipuiaga kua lata ma lautolu. Hagaao ke he Salamo 91:14, ne pehē a Iehova: “Ha kua manako lahi mai a ia [tagata tapuaki mooli] kia au, ko e mena ia ke fakamoui ai e au a ia; to fakalilifu e au a ia ha kua iloa e ia haku a higoa.” Fakahao totonu e Iehova e tau tagata haana mai he tau fī ha lautolu mo e puipui a lautolu ke nakai mamate a lautolu.

⁵ Ke fakahokulo e fakaalofa ha tautolu ma e ha tautolu a Matua he lagi, ko Iehova, to fakatutala a tautolu ke he puhala kua eke a ia mo (1) Foaki ha tautolu, (2) Puipui ha tautolu, mo e (3) Kapitiga uho ha tautolu. He fakatutala a tautolu ke he tau matakupu tolu nei, kia manamanatu fakahokulo ke he ha tautolu ni a fakafetuiaga mo e Atua ti fakaako e puhala ka fakalilifu e tautolu a ia ko e ha tautolu a Matua. Lata ke manamanatu foki a tautolu ke he tau monuina ne mavehe mai e Iehova ke foaki ki a lautolu kua fakatata atu ki a ia.​—Iako. 4:8.

6. Ko e ha ati talahau e tautolu ko Iehova ko e Foaki he “tau mena fakaalofa oti kua katoatoa ai e mitaki”?

⁶ Ne tohia he tutaki ko Iakopo: “Ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia, kua hifo mai mai he Matua he maama.” (Iako. 1:17) Ko e moui ko e mena fakaalofa homo ue atu mai ia Iehova. (Sala. 36:9) Ka fakaaoga e tautolu e tau momoui ha tautolu ke taute e finagalo ha Iehova, to moua e tautolu loga e tau monuina mogonei mo e moui tukulagi he lalolagi foou. (Fakatai 10:22; 2 Pete. 3:13) Ka e maeke fēfē e mena nei, ha kua moua e tautolu e nakai mitaki katoatoa, agahala, mo e mate mai ia Atamu?

7. Puhala fe ne fakatoka he Atua ma tautolu ke maeke ke moua e fakafetuiaga tata mo ia?

⁷ Ko Iehova ko e Foaki Mua Ue Atu ke he falu puhala loga foki. Ko e mahani fakaalofa noa haana kua omoomoi a ia ke fakahao a tautolu. He fakaako e tautolu, kua agahala a tautolu oti mo e moua e hala toka tuai mai ia Atamu. (Roma 3:23) Pete ia, ha ko e fakaalofa ha Iehova, ne foaki e ia e puhala ma tautolu ke moua e fakafetuiaga tata mo ia. Ne tohia he aposetolo ko Ioane: “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia. Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu; ne fakafano mai foki e ia hana Tama ko e lukutoto mo e tau hala ha tautolu.”​—1 Ioa. 4:9, 10.

8, 9. Eke fēfē a Iehova mo Foaki Mua Ue Atu he vahā ha Aperahamo mo Isaako? (Kikite fakatino he kamataaga.)

⁸ Kavi ke he 1,900 tau ato fanau a Iesu, taha e mena ne tupu he moui ha Aperahamo ne fakakite e puhala ka foaki fakaalofa e Iehova e moui tukulagi ke he tau tagata oti kua omaoma. Fakamaama he Heperu 11:17-19: “Ko e tua ne eke ai e Aperahamo a Isaako mo poa, kua kamatamata mai a ia, ko ia foki ne talia e tau kupu ne talahaua ne ta atu e ia mo poa e tama fuataha hana, Ko ia ne tala atu ki ai, Mai ia Isaako hau a fanau. Kua manatu a ia kua maeke ni ke he Atua ke fakatu a ia mai ia lautolu kua mamate, ne moua mai ai foki a ia ke he fakatai.” Tuga ni he makai a Aperahamo ke poa haana tama ko Isaako, ne makai foki a Iehova ke foaki haana Tama ko Iesu Keriso, ke fakahao e tau tagata.​—Totou Ioane 3:16, 36.

⁹ Manamanatu la ke he fakatotoka ha Isaako he magaaho ne mailoga e ia to nakai tamate a ia? Nakai noa kua loto fakaaue lahi a  ia ki a Iehova he foaki e mena mo poa, ko e mamoe taane ne tata mai. (Kene. 22:10-13) Ne fakahigoa e Aperahamo e matakavi ia ko “Iehova-irae,” ne kakano To Foaki e Iehova.​—Kene. 22:14.

10, 11. Ko hai ne takitaki e “gahua he fakafeilo,” ti taute fēfē e lautolu e mena nei?

¹⁰ Ka manamanatu fakahokulo a tautolu ke he tau mena oti kana kua foaki e Iehova ma tautolu, kua mailoga e tautolu ane mai nakai mate a Iesu to nakai maeke ia tautolu ke eke mo kapitiga he Atua. Ne tohia e Paulo: “Kua manatu pehe a mautolu, kaeke kua mate tokotaha ke hukui aki e tau tagata oti kana, ti kua mamate tuai e tau tagata oti kana; Ne matulei foki a ia ke hukui aki e tau tagata oti, kia nakai omaoma a lautolu kua momoui kia lautolu ni, ka ko ia ne matulei, mo e liu tu mai foki ke hukui aki a lautolu.”​—2 Kori. 5:14, 15.

¹¹ Ha kua fakaalofa e tau Kerisiano he senetenari fakamua ke he Atua ti loto fakaaue he moua e lilifu ke fekafekau ki a ia, ne talia fiafia e lautolu e “gahua he fakafeilo.” Ko e gahua nei ko e gahua fakamatala ati maeke e tau tagata ke moua e mafola mo e Atua, fiafia he kapitiga mo ia, ti eke mo tau tama taane. He vahā nei, kua pihia foki e gahua ne taute he tau fekafekau fakauku ha Iehova. Ne eke a lautolu mo tau fekau he Atua mo Keriso. Ko e gahua fakamatala ha lautolu ati maeke ai e tau tagata loto fakamooli mo e fakatokolalo ke futiaki mai e Iehova ti eke mo tau fekafekau haana.​—Totou 2 Korinito 5:18-20; Ioane 6:44; Gahua 13:48.

12, 13. Fakakite fēfē e tautolu kua loto fakaaue a tautolu ke he tau mena oti kua foaki e Iehova ma tautolu?

¹² Ha kua loto fakaaue e tau mamoe kehe ki a Iehova ko e Foaki Mua Ue Atu, ne fakalataha atu a lautolu mo e tau fekafekau fakauku he fakamatala e tala mitaki. He gahua fakamatala nei, ne fakaaoga e tautolu e Tohi Tapu, ko e taha mena fakaalofa homo ue atu mai he Atua. (2 Timo. 3:16, 17) Ka fakaaoga fakamitaki e tautolu e Tohi Tapu he ha tautolu a gahua he fonua, kua foaki e tautolu e magaaho ke he falu ke moua e moui tukulagi. Foaki foki e Iehova e agaaga tapu haana ki a tautolu. Igatia a tautolu mo e falanaki ke he agaaga tapu ke lagomatai he gahua he fonua. (Saka. 4:6; Luka 11:13) Ko e tau fufuta takitaha he Yearbook of Jehovah’s Witnesses ne fakakite e tau fua mitaki lahi mahaki he gahua fakamatala. Ko e lilifu lahi mahaki ke eke mo vala he gahua nei he fakaheke ha tautolu a Matua mo e Foaki!

¹³ Ha kua lahi mahaki e tau mena ne foaki mai he Atua ma tautolu, kua lata ia tautolu ke hūhū hifo: ‘Kua taute oti nakai e au e tau mena kua maeke au he gahua he fonua ke fakakite ki a Iehova e loto fakaaue haaku ke he tau mena oti kana ne foaki e ia ki a au? Maeke fēfē au ke eke mo tagata fakamatala mitaki he tala mitaki?’ Ka loto fakaaue a tautolu ke he tau mena oti kana kua foaki he Atua ma tautolu, to tuku fakamua e tautolu e Kautu haana he tau momoui ha tautolu. Ka taute e tautolu e mena nei, to mataala a Iehova ke moua e tautolu e tau mena oti kua lata mo tautolu. (Mata. 6:25-33) Ha kua fakaalofa a Iehova ki a tautolu, kua manako a tautolu ke taute e tau mena oti kua maeke ia tautolu ke fakafiafia e loto haana.​—Fakatai 27:11.

14. Puhala fe ne eke a Iehova mo Fakahao he tau tagata haana?

¹⁴ Ne lologo he salamo ko Tavita: “Ka ko au nai, kua matematekelea mo e nofogati au; to manatu mai e Iki kia au; ko koe ni ko e haku a lagomatai mo e haku a fakamoui.” (Sala. 40:17) Lagaloga he eke a Iehova mo Fakahao ke he tau tagata haana ko e matakau, mua atu ka favale fakakelea mo e tatao he tau fī ha lautolu. Kua loto fakaaue lahi a tautolu ha kua foaki tumau mai e Iehova e tau mena kua lata ma tautolu ke fakatumau e tua ki a ia he tau mogo uka pihia.

15. Talahau e fakataiaga ke he matua taane loto fakaalofa ne puipui e tama haana.

¹⁵ Ko e matua taane loto fakaalofa ne foaki  ke he tau tama haana e tau mena kua lata mo lautolu ti puipui foki a lautolu. To lali fakamafiti a ia ke fakahao a lautolu kaeke kua hagahaga kelea a lautolu. Taha e matakainaga taane ne manatu e puhala ne puipui he matua taane haana a ia he mogo ne tote. Kua liliu a ia mo e matua taane haana ki kaina he oti e gahua he fonua ti lata a laua ke ō ke he taha faahi he vaitafe. Tō lahi e uha he pogipogi ia ti puke lahi e vaitafe. Ko e puhala ni ke hoko ke he taha faahi ko e hopo mai he taha maka lahi ke he taha maka lahi. Na fano mua a ia he matua taane haana, kua taututupe a ia ti tō ke he vaitafe ti lagaua e matomo hifo a ia ke he vai. Loto fakaaue lahi e tama taane ia ke he matua taane haana he totō hake fakaave a ia he tukeua ti fakahao a ia neke tomo. He puhala pihia, kua puipui he ha tautolu a Matua he lagi a tautolu mai he tau hagahaga kelea he lalolagi kelea nei mo e haana pule ko Satani. Ko Iehova ko ia e Puipui mitaki lahi mahaki ma e ha tagata.​—Mata. 6:13; 1 Ioa. 5:19.

16, 17. Lagomatai mo e puipui fēfē e Iehova e tau Isaraela he mogo ne tau a lautolu ke he tau Amaleka?

¹⁶ Ne puipui fakaalofa e Iehova e tau tagata haana he tau 1513 ato fai Keriso. Fitā he fakahao e ia e tau Isaraela mai he fakatupa ti puipui foki a lautolu he o atu ke he taha faahi he Tahi Kula. He mole e o atu he tutakale ke he Mouga ko Sinai, ne hohoko e tau Isaraela ki Refiti.

¹⁷ Ha kua nakaila fakamooli ia e perofetaaga he Kenese 3:15, liga manako lahi a Satani ke tau ke he tau Isaraela ne tuga kua nakai fai puipuiaga. Taha puhala ne taute e ia e mena nei, ne fakaaoga e ia e tau Amaleka, ko e tau fī he motu he Atua. (Nume. 24:20) Puipui fēfē e Iehova e tau tagata haana mai he tau fī nei he puhala ia Iosua, Mose, Arona, mo Huro? He tau a Iosua mo e tau tagata haana ke he tau Amaleka, he mouga tata mai ko Mose, Arona, mo Huro i ai. Ka fakatumau a Mose ke tuku hake e tau lima haana ki luga,  lagomatai e Iehova e tau Isaraela ke mua atu e malolō ke he tau fī ha lautolu. Ka nakai fahia a Mose ke tuku hake haana tau lima, ne lagomatai e Arona mo Huro a ia he lalago hake e tau lima haana. Fakahiku ai, ha ko e lagomatai mo e puipuiaga ha Iehova, “Kua tutuli foki e Iosua a Amaleka mo e hana tau tagata ke he pelu.” (Esoto 17:8-13) He mole e mena ia, ne ati e Mose e fatapoa i ai, ti fakahigoa ai “Iehova-nisi,” ne kakano Iehova ko e Haaku a Pou Fakamailoga.​—Totou Esoto 17:14, 15.

18, 19. Ko e heigoa e puipuiaga he tau tau foou nei kua foaki he Atua ma e tau fekafekau haana?

¹⁸ Puipui e Iehova a lautolu kua fakaalofa mo e omaoma ki a ia. Tuga e tau Isaraela i Refiti, kua falanaki a tautolu ke he Atua ma e puipuiaga mai he tau fī ha tautolu. Fa puipui e Iehova a tautolu ko e matakau, ti puipui tumau e ia a tautolu he tau totokoaga ha Satani. Ma e fakatai, ne lagaloga e puipui he Atua e tau matakainaga ha tautolu ne favale ki ai ha ko e tuuho faka-Kerisiano ha lautolu. Tupu e mena nei i Sihamani mo e falu motu he mogo ne pule e tau Nasi he tau atu tau 1930 mo e mataulu he tau atu tau 1940. Ka totou a tautolu ke he tau tala he tau momoui mo e tau mena tutupu he Yearbook hagaao ke he puipuiaga he Atua he tau mogo favale ki ai, to fakamalolō ai e falanaki ha tautolu ki a Iehova.​—Sala. 91:2.

¹⁹ Puipui foki e Iehova a tautolu he foaki ki a tautolu e tau fakamanatuaga fakamalolō puhala mai he fakatokatokaaga haana mo e tau tohi. Manamanatu ke he puhala ne puipui he tau fakamanatuaga nei a tautolu he tau tau kua mole. Kua matutaki e lalolagi ke manako lahi mahaki ke he mahani fakataane mo e fifine, kava, mo e tau fakatino telefua. Ka e foaki e Iehova ki a tautolu e tau fakamanatuaga mafiti mo e lagomataiaga ne felauaki tonu ke puipui a tautolu neke taute e tau mena ka fakamamahi e fakafetuiaga ha tautolu mo ia. Ma e fakatai, he foou nei, ne moua e tautolu e fakatonuaga mai he ha tautolu a Matua he lagi ke kalo mai he matahele he tau lafiaga kelea he tau faahi matutaki kapitiga. a ​—1 Kori. 15:33.

20. Ko e heigoa e puipuiaga mo e takitakiaga kua moua e tautolu he tau fakapotopotoaga ha tautolu?

²⁰ Fakakite fēfē e tautolu kua fanogonogo a tautolu ke he tau fakatonuaga totonu ia ti kua “fakaako e Iehova”? He omaoma fakamakutu ke he tau poakiaga haana. (Isaia 54:13) Ko e tau fakapotopotoaga ha tautolu ko e huaga haohao mitaki ke moua e tautolu e puipuiaga mo e takitakiaga. I ai, kua lagomatai mo e tomatoma he tau motua a tautolu mai he Tohi Tapu. (Kala. 6:1) Kua fakaaoga e Iehova a lautolu nei ko e “tau mena fakaalofa ke he tau tagata” ke leveki fakaalofa ki a tautolu. (Efeso 4:7, 8) Ti ko e heigoa kua lata ke taute e tautolu ka fakatonu he tau motua a tautolu? Lata ia tautolu ke omaoma fakamakai. Ka taute pihia e tautolu, to fakamonuina e Iehova a tautolu.​—Hepe. 13:17.

21. (a) Ko e heigoa ha tautolu ka eketaha ke taute? (e) Ko e heigoa ha tautolu ka fakatutala ki ai he vala tala ka mui mai?

²¹ Kia falanaki a tautolu ke he agaaga tapu ke lagomatai mo e talia e takitakiaga he ha tautolu a Matua he lagi. Lata foki ia tautolu ke manamanatu fakahokulo ke he moui ha Iesu mo e eketaha ke mumuitua ke he fakafifitakiaga mitaki lahi mahaki haana. Ne moua e ia e palepale lahi mahaki ha kua “oma e ia kua hoko ke he mate.” (Filipi 2:5-11) To fakamonuina foki a tautolu ka falanaki a tautolu ki a Iehova mo e ha tautolu a tau loto katoa. (Fakatai 3:5, 6) Kia falanaki tumau a tautolu ki a Iehova, ko ia kua mahomo atu e puhala mai he ha tagata ke foaki mo e puipui a tautolu. Ko e fekafekau ki a ia ko e lilifu ka tamai e fiafia mooli ki a tautolu. Ka kua eke fēfē a Iehova mo Kapitiga uho ha tautolu? Ko e fakaalofa ha tautolu ki a ia to tupu malolō lahi ka tali e tautolu e hūhū nei he vala tala ka mui mai.