KO E tau 1923. Ne tokologa lahi he fale konesete he Drama and Music Conservatory i São Paulo! Logona nakai e koe e leo malolō ha George Young? Ke he tau matakupu takitaha, kua fakahokohoko e lauga haana ke he vagahau Portuguese. Kua fanogonogo fakamitaki a lautolu oti i ai ne 585. Ko e tau kupu Tohi Tapu he vagahau Portuguese kua fakakite he lapa. Ko e fakahikuaga homo ue atu, teau e tau lagaki he tohi Millions Now Living Will Never Die! ne tufa, fakalataha mo e falu vagahau Italia, Peritania, mo e Sihamani. Kua kautū e lauga! Holofa e kupu. Ua e afiafi he mole, ne tokologa e fale he taha lauga foki. Ka ko e heigoa ne takitaki atu ke he tau mena nei?

He 1867, ne hiki a Sarah Bellona Ferguson mo e magafaoa haana mai he United States ki Brazil. He 1899, ne iloa e Sarah kua moua e ia e kupu mooli he mole e totou he falu tohi faka-Tohi Tapu ne tamai he tugaane tote haana he United States ki Brazil. Ko e tagata totou fiafia, ne moua tumau e ia e tau Kolo Toko faka-Peritania. He fiafia ke he fekau he Tohi Tapu, ne tohi a ia ke he Matakainaga ko C. T. Russell he fakamaama a ia ko e “fakamooliaga kua nakai mamao lahi ke hoko ki ai.”

Ne eketaha a Sarah Ferguson ke tala age e kupu mooli he Tohi Tapu ke he falu, ka e fa manamanatu a ia ko hai ka lagomatai atu foki a ia mo e magafaoa haana, mo e tau tagata mitaki oti i Brazil. He 1912, ne tala age he Peteli i Brooklyn ki a ia to fai tagata ka hau ki São Paulo mo e tau tuleke loga ne mataulu Where Are the Dead? he vagahau Portuguese. He 1915 ne pehē a ia ne ofo tumau a ia ha kua tokologa e Tagata Fakaako he Tohi Tapu ka nakai leva ti tahake ke he lagi. He fakakite e manatu haana, ne tohi e ia: “Ka e kua a Brazil mo Amerika Toga katoa? . . .  He manamanatu a koe ke he vala lahi mahaki he lalolagi ha Amerika Toga, kua mukamuka ke kitia kua lahi atu e gahua helehele ke taute.” Ē, lahi atu e gahua helehele ke taute!

Kavi ke he 1920, valu e kauvaka fuata Brazil ne o atu ke he falu feleveiaaga i New York City ka e fakafoou e toga tau ha lautolu. He liliu a lautolu ki Rio de Janeiro, ne tala age e lautolu e amaamanakiaga foou ne fakaako e lautolu he Tohi Tapu ke he falu. Nakai leva, ia Mati 1923, ko George Young ko e tagata fenoga, po ke leveki faifano kua hoko atu ki Rio de Janeiro, ne moua e ia e tau tagata ne fiafia. Ne fakatoka e ia ke fakaliliu e falu tohi ke he vagahau Portuguese. Ko e Matakainaga ko Young ne fenoga ki São Paulo, ti hoko atu ke he taone ne 600,000 e tagata i ai. Ne lauga a ia i ai ti tufa e tau tohi tote Millions, ne talahau he kamataaga he vala tala nei. “He tokotaha,” ui e ia, “ne falanaki lahi au ke he mena ne fakatātā he nusipepa.” “Ko e tau lauga fakamua anei ke he toloaga tagata ne fakatātā ne taute i lalo he lalagoaga he I.B.S.A. i Brazil,” he lafi e ia. a

Ke he hokotaki ha Brazil, ko e Watch Tower ia Tesemo 15, 1923, ne pehē: “He manamanatu a mautolu ke he gahua i ai ne kamata ia Iuni 1 ti nakai fai tohi he magahala ia, kua ofoofogia e puhala kua fakamonuina he Iki e gahua.” Ne matutaki e hokotaki ke talahau ko e tau lauga he Matakainaga ko Young i São Paulo ne 2 mai he 21 ne taute ia Iuni 1 ki a Sepetema 30, ne 3,600 ne fakalataha. I Rio de Janeiro, ne tupu fakahaga e fekau he Kautu. He tau mahina gahoa, molea 7,000 he tau tohi Portuguese ha tautolu kua tufa! Lafi ki ai, he The Watch Tower Portuguese ne kamata aki e fufuta Novema-Tesemo, 1923.

Ne ahiahi atu a George Young ki a Sarah Ferguson, ti talahau he The Watch Tower: “Ne hau e matakainaga fifine ke he poko ti fai magaaho ne nonoiki. He totō e lima he Matakainaga ko Young, mo e onoono fakahokulo ke he fofoga haana, fakahiku ti vagahau a ia: ‘Ko koe kia ko e tagata fenoga mooli?’” Nakai leva ti papatiso a ia mo e falu he tau fanau haana. Kua 25 tuai e tau he fakatali a ia ke papatiso! Ko e Watch Tower ia Aokuso 1, 1924, ne talahau ko e 50 ne papatiso i Brazil, laulahi ki Rio de Janeiro.

Mogonei, kavi ke 90 e tau he mole, lata nakai a tautolu ke hūhū: “Ka e kua a Brazil mo Amerika Toga katoa?” Molea e 760,000 Fakamoli ha Iehova ne fakamatala e tala mitaki i Brazil. I Amerika Toga katoa kua logona mogonei e fekau he Kautu ke he tau vagahau Portuguese, Spanish, mo e loga foki e tau vagahau he motu. He 1915, ne hako a Sarah Ferguson, ‘Lahi atu e gahua helehele ke taute.’​—Mai he tau tokaaga tuai i Brazil.