He lologo ne fakaheke e Tufuga, ne uhu he Patuiki ko Tavita i Isaraela i tuai: “Haku Atua na e, kua fiafia au ke eke hāu a finagalo; ha i loto ia au hau a fakatufono.” (Sala. 40:8) Pete ne tau mena uka mo e tau pehiaaga ne fehagai a Tavita he moui, ne fiafia mooli a ia he taute e finagalo faka-Atua. Mooli, nakai ko Tavita ni e tagata tapuaki ha Iehova ne fiafia he fekafekau ke he Atua mooli.

Hagaao e tau kupu ia Salamo 40:8 ke he Mesia, po ke Keriso, ne tohi he aposetolo ko Paulo: “Kua talahau mai ai e ia [Iesu] ke he hana haele mai ke he lalolagi, Ko e tau poa tamate mo e tau poa, kua nakai finagalo a koe ki ai, ka kua taute e koe e tino māku. Ko e tau poa huhunu, mo e tau poa mo e tau hala kua nakai fiafia a koe ki ai. Ti kua pehe age ai au, Ko e Atua na e, kitiala, kua fina atu au ke eke hau a finagalo, (kua tohia kia au ke he tohivakai.)”​—Hepe. 10:5-7.

He haia he lalolagi, ne olioli a Iesu he kitekite ke he tau tufugatia, fakalataha mo e tau kapitiga, mo e kai fakalataha mo e falu. (Mata. 6:26-29; Ioane 2:1, 2; 12:1, 2) Ka ko e haana matapatu manako mo e fiafia lahi ko e taute e finagalo he haana Matua he lagi. Ne pehē a Iesu: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34; 6:38) Mai he ha lautolu a Iki, ne iloa he tau tutaki ha Iesu e mena galo ke he fiafia mooli. Mo e olioli lahi, ne tala age fakamakai mo e fakamakutu e lautolu e fekau he Kautu ke he falu.​—Luka 10:1, 8, 9, 17.

Kua poaki e Iesu e tau tutaki haana: “Kia o atu a . . . ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; Ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mata. 28:19, 20) Ko e taute he poakiaga nei ne putoia e ahiahi atu ke he tau tagata he ha matakavi ni kua moua a lautolu, liu aahi atu ki a lautolu ne fakakite  e fiafia, mo e taute e tau fakaako Tohi Tapu mo lautolu takitokotaha ia. Ko e taute he gahua nei kua eke mo punaaga he fiafia lahi.

He fakakite he tau tagata e manako po ke nakai, ko e aga ha tautolu kua aoga lahi ke moua e tautolu e fiafia he gahua he fonua. Ko e ha kua matutaki a tautolu ke fakailoa e tala mitaki pete he liga fehagai a tautolu mo e falu ne fakateaga po ke nakai fanogonogo? Ha kua mailoga e tautolu ko e fai vala ke he gahua fakamatala he Kautu mo e taute tutaki ko e fakatātāaga he fakaalofa ha tautolu ma e Atua mo e katofia ha tautolu. Mooli, kua hagahaga kelea e tau momoui​—ha tautolu mo e tau katofia ha tautolu. (Eseki. 3:17-21; 1 Timo. 4:16) Kia onoono a tautolu ke he falu manatu ne kua lagomatai e tokologa he tau matakainaga ha tautolu ke fakatumau po ke fakafoou ha lautolu a fakamakutu he gahua he fonua he tau matakavi uka.

Ko e fakaaoga he tau hūhū kua lata he gahua he fonua ha tautolu ne fa takitaki ke he tau fua mitaki. He taha pogipogi, ne kitia e Amalia e tagata taane hane totou e nusipepa he paaka. Ne fina atu a ia ke he tagata taane ti hūhū kua fai tala mitaki nakai a ia kua totou. He mogo ne tali atu a ia nakai, ne pehē a Amalia, “Tamai e au ki a koe e tala mitaki hagaao ke he Kautu he Atua.” Kua fakalagalaga he mena nei e fiafia he tagata taane, ti talia e ia e fakaako Tohi Tapu. Ne maeke a Amalia ke kamata tolu e fakaako Tohi Tapu he paaka ia.

Ko Janice ne kua fakaaoga e gahuaaga haana mo matakavi fakamatala. He mogo ne fakakite he leoleo leveki mo e haana kapitiga gahua e fiafia ke he taha vala tala ne lolomi he Ko e Kolo Toko, ne ui a Janice to tamai tumau e ia e tau mekasini ma laua. Ne taute pihia foki e ia ma e taha tagata gahua, ne nava he kehekehe e tau vala tala ne fakatutala i loto he Ko e Kolo Toko mo e Awake! Kua takitaki he mena nei e taha tagata gahua foki ke ole ma e tau mekasini. “Ko e fakamonuinaaga mai ia Iehova!” he talahau e Janice. Fakahiku ai ne 11 e tagata he fakaholoaga mekasini haana he gahuaaga.

Ko e leveki faifano kua talahau ma e gahua he fonua he taha fale ke he taha fale, kua nakai lata he tau tagata fakailoa ke fakaoti ha lautolu a fakatutalaaga mo e tagata he kaina he pehē to liliu atu a lautolu he taha aho foki. Ka e, maeke ia lautolu ke hūhū ke he tagata: “Manako nakai a koe ke fakakite atu e au e puhala ke taute e fakaako Tohi Tapu?” po ke, “Aho fe mo e tulā fe ka manako a koe ke liu mai au ke matutaki e fakatutalaaga ha taua?” Ne fakailoa he leveki faifano ko e fakaaoga e puhala nei, kua maeke he tau matakainaga he taha fakapotopotoaga ne fekafekau ai a ia ke kamata 44 e fakaako Tohi Tapu he kaina he taha e faahi tapu.

He mafiti ke taute e tau liu aahi atu​—pete he gahoa ni e aho he mole e fina atu fakamua​—kua maeke ke lauia mitaki. Ko e ha? Ha kua fakakite e fiafia mooli ha tautolu ke lagomatai a lautolu takitokotaha  ne loto fakamooli ke maama e Tohi Tapu. He hūhū ke he taha fifine e kakano ne talia e ia e fakaako Tohi Tapu mo e Tau Fakamoli a Iehova, ne pehē a ia, “Ne kamata au ke fakaako ha kua fakakite e lautolu e fiafia mooli mo e fakaalofa ki a au.”

He magaaho kū he mole e fina atu ke he Aoga Fekafekau Paionia, ne taute e Madaí 15 e fakaako Tohi Tapu ti kua tuku age lima foki ke he falu tagata fakailoa. Falu he tau tagata fakaako Tohi Tapu haana ne kamata ke o atu tumau ke he tau feleveiaaga ha tautolu. Ko e heigoa ne lagomatai a Madaí ke loga lahi e fakaakoaga ne kamata? Kua omoomoi he aoga a ia ke liu atu tumau ato moua e ia a lautolu ne fakakite e fiafia he magaaho fakamua. Taha Fakamoli foki ne lagomatai e tokologa ke iloa e kupu mooli he Tohi Tapu ne pehē, “Kua fakaako e au ko e fakamakamaka ke taute e tau liu aahi atu ko e matapatu a ia ke lagomatai e tau tagata ne manako ke iloa a Iehova.”

Ko e taute he tau liu aahi atu mo e tau fakaako Tohi Tapu kua lata ma e laliaga fakamalolō. Ka kua lahi atu e palepale ne moua mai ai. He gahua fakamalolō a tautolu he fakamatala e Kautu, maeke ia tautolu ke lagomatai e falu ke “hokotia a lautolu he maama ke he kupu moli,” mo e kakano foki ko e fakamouiaga ma lautolu. (1 Timo. 2:3, 4) Ma tautolu, kua fua mai e fiafia mo e olioli lahi mahaki.