KO E matakau tote ia he lauga haaku he 1957 kua nakai fakatupetupe ki a au. Kitia e mutolu, fa mā lahi mahaki tumau au. He magaaho ne tote au, fa mahani au ke fakamumuli ka o mai e tau tagata ahiahi ke he kaina ha mautolu, pete ni ka iloa e au a lautolu.

Maama ai, liga ofo a koe ke iloa ko e laulahi he tau kotofaaga haaku he fakatokatokaaga ha Iehova kua omoomoi au ke fakalataha mo e tau tagata tokologa​—tau kapitiga mo e tau tagata kehe. Ka e, matutaki au ke taufetului mo e mahani mā mo e nakai lahi e mauokafua, ti kua nakai maeke ia au ke matalahi ke he ha kautūaga ne moua he tau kotofaaga ia. Ka kua kitia e au e mooli he maveheaga ha Iehova: “Kua fakamalolo e au a koe; ko e moli, kua lagomatai au kia koe; ko e moli, kua taofi e au a koe ke he haku a lima matau ne ha i ai e mahani tututonu.” (Isaia 41:10) Taha he tau puhala ne mua atu kua lagomatai e Iehova au ko e lalagoaga mai he tau matakainaga Kerisiano. To tala atu e au hagaao ke he falu ia lautolu, kamata mai he mogo ne tote au.

He pogipogi laā he Aho Tapu he tau atu tau 1940, ne ahiahi mai a Elsie Huntingford ke he faama he magafaoa ha mautolu he faahi toga ki lalo ha Ontario.  Hafagi he matua fifine haaku e gutuhala ka ko e matua taane haaku​—ne mā tuga au​—kua nofo mo au i fale mo e fanogonogo. He manatu ko e fifine fakafua koloa e Matakainaga Fifine ko Huntingford ti to fakatau e Mami e taha mena ne nakai lata mo mautolu, ne fina atu a Tete ke he gutuhala ke tala age kua nakai manako a mautolu. “Nakai kia manako a mutolu ke fakaako e Tohi Tapu?” he hūhū he Matakainaga Fifine ko Huntingford. “Ē manako a mautolu ke he mena ia,” he tali e tete haaku.

Ko e Matakainaga Fifine ko Huntingford kua ahiahi mai ki a mautolu he magaaho ne latatonu. Ko e tau matua haaku ko e tau tagata malolō lahi he United Church of Canada ka e kua fifili tuai ke toka ai. Ko e ha? Ha ko e haia i loto he fale tapu, kua tohi fakapapahi he akoako e tau higoa he tau tagata ne tuku e tau tupe mo e numera tupe ne tuku. Ko e tau matua haaku ne nakai lahi e mena ne moua ne fa haia he matahiku, ti peehi he tau takitaki he tapu a laua ke foaki fakalahi. Ha kua manako a ia ke tumau haana gahua, ne talahau he taha akoako kua nakai fakaako e ia e tau mena ne talitonu mooli a ia ki ai. Ko e mena ia, ne toka e mautolu e tapu ka e matutaki ke kumi puhala ke lata mo e manako fakaagaaga ha mautolu.

Ha kua pā e gahua he Tau Fakamoli a Iehova i Kanatā, ko e Matakainaga Fifine ko Huntingford ne fakaako mo e magafaoa haaku he fakaaoga ni e Tohi Tapu mo e falu manatu ne toka i loto he tohi uli tote haana. He mogo fakamui ne mailoga e ia to nakai tuku age e mautolu a ia ke he tau pule, ne fakakite e ia ki a mautolu e tau tohi faka-Tohi Tapu. Ne tuku fakamitaki e mautolu he mena galo e tau tohi he oti e tau fakaako takitaha. a

Pete e totokoaga mo e falu lekua, ne fakamatala fakamakutu he Matakainaga Fifine ko Huntingford e tala mitaki. Ne nava lahi au ke he haana a makutu mo e omoomoi au ke eke e kupu mooli ma haaku. Taha e tau he mole e papatiso he tau matua haaku mo Tau Fakamoli a Iehova, ne tukulele au ke he Atua. Ne papatiso au ia Fepuari 27 he 1949, he pa lapatoa ne fakaaoga he tau tagata gahua fonua ke fakainu aki e tau manu. Kua 17 e tau haaku he moui. Mole ia, ne fakamakamaka au ke hū atu ke he fekafekauaga mau.

Ne fakauaua au ke paionia he mogoia ni. Fai magaaho, ne gahua au he pege mo e he ofisa ha kua talitonu au kua lata ia au ke fai tupe ke lalago e gahua paionia haaku. Ha ko e fuata nakai lotomatala, ne mafiti au ke fakaaoga e tupe ne moua e au. Ti ko e matakainaga ko Ted Sargent ne tomatoma ki a au ke fakamalolō mo e tua ki a Iehova. (1 Nofo. 28:10) He fakalagalaga totonu ia ne kamata au ke paionia ia Novema 1951. Ne 40 ni e talā haaku, pasikala kua fitā e heke, mo e kato foou. Ka e kitia tumau e Iehova kua moua e au e tau mena kua lata mo au. Fakaaue ha ia haaku ki a Ted he fakamafana au ke taute e gahua paionia! Takitaki e mena ia ke he loga atu foki e monuina.

He taha afiafi ia Aokuso 1952, ne moua e au e hea telefoni mai Toronto. Ko e la ofisa i Kanatā he Tau Fakamoli a Iehova ne uiina au ke kamata gahua he Peteli ia Sepetema. Pete ne mā au mo e nakaila ahiahi ke he la, ne fiafia au ha kua talahau he falu paionia ki a au e tau mena homo atu hagaao ke he Peteli. Ne logona hifo e au e mafanatia.

Ua e tau he hoko au ke he Peteli, ne hukui e au a Bill Yacos ko e fekafekau he fakapotopotoaga (ne fakahigoa mogonei ko e leveki he kau he tau motua) he taha he tau fakapotopotoaga i Toronto. He 23 e tau he moui, ne logona hifo e au tuga e tama gahua faama noa ni. Ka e fakakite fakatokolalo mo e fakaalofa e Matakainaga ko Yacos ki a au e mena ke taute. Ti lagomatai mooli e Iehova au.

Ko e Matakainaga ko Yacos, ko e matakainaga taane malolō ne mamali tumau ne fiafia ke he tau tagata. Ne fakaalofa a ia ke he tau matakainaga, ti fakaalofa foki a lautolu ki a ia. Ahiahi atu tumau a ia ke he tau kaina ha lautolu ka e nakai ni he tau mogo ka fai lekua a lautolu. Ne fakamafana e Bill Yacos au ke taute pihia mo e gahua auloa mo e tau matakainaga he fonua. Pehē a ia, “Ken, fakakite ke he tau matakainaga na fakaalofa a koe ki a lautolu. To ufiufi he mena ia e tau kūkū loga.”

Kua lagomatai e Iehova au ke he puhala pauaki tali mai he Ianuari 1957. He mahina ia ne mau e au a Evelyn ne paase mai he vahega ke 14 aki he Aoga Kiliata. Ato mau a maua, na fekafekau a ia he magamotu vagahau Falani i Quebec. He magahala ia ne malolō lahi e Lotu Katolika Roma i Quebec. Ti uka lahi e kotofaaga ha Evelyn, ka e pipiki fakamooli a ia ki ai mo e ki a Iehova.

Ne pipiki fakamooli foki a Evelyn ki a au. (Efeso 5:31) Ka e, na kamatamata e mahani fakamooli haana he mole e mau ha maua! Ne pulega a maua ke fenoga atu ki Florida i U.S.A., ka e taha e aho he mole e mau ha maua, ne ole e la ki a au ke fina atu ke he fono ne taha e faahi tapu he Peteli i Kanatā. Mooli, ne fakatauhele he fono nei e tau pulega ha maua, ka e manako a Evelyn mo au ke taute ha mena ne ole a Iehova ki a maua ke taute. Ti nakai fakahoko e honeymoon ha maua. He faahi tapu ia, ne gahua a ia he fonua ne tata mai ke he  la. Pete ne kehekehe lahi e matakavi mai Quebec, ne fakauka a ia.

Matahiku he faahi tapu ia, ne fai mena fakaofo au ne moua​—kua kotofa au ko e leveki takaiaga he faahi tokelau i Ontario. Kua mau laia au, ti 25 e tau he moui mo e nakai lotomatala lahi, ka e ō ni a maua mo e mauokafua ki a Iehova. He uhouho e vahā makalili i Kanatā, ne heke a maua he tuleni he pō mo e falu he tau leveki faifano lotomatala ne liliu ke he tau kotofaaga ha lautolu. Ne fakamafana lahi mahaki e lautolu a maua! Taha e matakainaga ne fakamakamaka ke fakaaoga e maua e poko ke momohe ai, na toka e ia ma haana, ka e nakai nonofo fakatutuna a maua he pō katoa he fenoga. He pogipogi hake, he 15 laia e aho he mole e mau ha maua, ne ahiahi a maua ke he matakau tote i Hornepayne, tuga he talahau e au he kamataaga.

Loga atu foki e tau hikihikiaga i mua ma Evelyn mo au. He fekafekau a maua he gahua faahimotu he matahiku he 1960 ne moua e au e uiina ke fano ke he vahega ke 36 aki he Aoga Kiliata, ko e fakaakoaga ne hogofulu e mahina ka kamata he mataulu ha Fepuari he 1961 i Brooklyn i New York. Mooli, ne fiafia lahi au ka kua ahumate e fiafia haaku ha kua nakai fakalataha a Evelyn he uiina ia. Ka e tuga e falu hoana he tuaga pihia, ne tala age ki a Evelyn ke tohi e tohi ne fakakite kua makai a ia ke nonofo kehekehe a maua kavi ke hogofulu e mahina. Ne tagi a Evelyn, ka e talia a maua kua lata au ke fano he aoga, ti fiafia a ia to moua e au e fakamahaniaga aoga lahi i Kiliata.

Ne gahua fakakū foki a Evelyn he la i Kanatā. Moua e ia e lilifu lahi ke nonofo tokoua he poko mo e matakainaga fifine fakahele ne fakauku ko Margaret Lovell. Mooli, ne misi lahi e au a Evelyn ti misi lahi e ia au. Ka ko e lagomatai ha Iehova, kua mahani a maua ke he tau kotofaaga fakakū ha maua. Ko e makai haana ke foaki noa e magaaho ha maua tokoua ke maeke a maua ke aoga lahi ki a Iehova mo e fakatokatokaaga haana ne aamotia lahi ki a au.

He mole he haia au i Kiliata ke tolu e mahina, ko e Matakainaga ko Nathan Knorr ne takitaki e gahua he lalolagi katoa he magahala ia ne mai ki a au e uiina ofoofogia lahi. Ne hūhū a ia ki a au maeke nakai au ke toka e Aoga Kiliata he mogo tonu ia ti liu ki Kanatā ke fekafekau fakakū ko e faiaoga he Aoga Fekafekau he Kautu he la. Pehē e Matakainaga ko Knorr kua nakai lata au ke talia e uiina. Maeke au ke fakakatoatoa e fakaakoaga he Aoga Kiliata ka manako au ti liga mogoia ke kotofa ke he gahua misionare. Talahau foki e ia ka fifili au ke liu ki Kanatā, liga to nakai liu foki au ke uiina ki Kiliata, tuga to liu au ke kotofa ke he fonua i Kanatā. Toka e ia ke fifili ne au ka oti e tutala mo e hoana haaku hagaao ki ai.

Ha kua fitā he talahau e Evelyn ki a au e onoonoaga haana ke he tau kotofaaga fakateokarasi, ne tala age mafiti e au ke he Matakainaga ko Knorr, “Ha mena ne manako e fakatokatokaaga ha Iehova ke taute e maua, fiafia a maua ke taute.” Ne logona tumau e maua pete ne tau manako ha maua, kua  lata a maua ke ō ke he mena ne kotofa he fakatokatokaaga ha Iehova a maua ke ō ki ai.

Ia Aperila 1961, ne toka e au a Brooklyn ti liu ki Kanatā ke fakaako he Aoga Fekafekau he Kautu. Fakamui, ne kamata a maua ke fekafekau he magafaoa Peteli. Ti, ofo au he moua e uiina ke fano ke he vahega ke 40 aki i Kiliata, ka kamata he 1965. Liu foki mogoia a Evelyn ke tohi e tohi kua talia ke nonofo kehekehe a maua. Ka e gahoa e faahi tapu he mole, he fiafia tokoua ha maua, ne moua e ia e uiina ni haana ke fano he aoga mo au.

He hohoko a maua ke he Aoga Kiliata, pehē e Matakainaga ko Knorr ki a maua ko e tau tagata fakaako ne huhū he tau vahega vagahau Falani tuga a maua, to fakafano ki Aferika. He fakaholoaga he kautūaga ha maua, ne liu a maua kotofa ki Kanatā! Ne kotofa au ko e leveki foou he la (mogonei ko e takitaki he La Komiti). Ko e 34 laia e tau he moui, ne fakamanatu e au ke he Matakainaga ko Knorr, “Ai la motua ia au.” Ka e fakamafana e ia au. Tali mai he kamataaga, lali au ke fakakia ke he tau matakainaga taane momotua ne lotomatala lahi he Peteli ato taute e tau fifiliaga mamafa.

Kua foaki mai he fekafekauaga he Peteli ki a au e tau magaaho mitaki lahi mahaki ke fakaako mai he falu. Ne fakalilifu mo e nava lahi e au e falu matakainaga he La Komiti. Kua omoomoi foki au ke he tau puhala mitaki mai he tokologa he tau Kerisiano mitaki​—fuata mo e motua​—ne feleveia e maua he la mo e tau fakapotopotoaga kehekehe ne fekafekau ai a maua.

Ko e fekafekauaga he Peteli kua fakaatā foki au ke fakaako e falu mo e fakamalolō e tua ha lautolu. Tala age he aposetolo ko Paulo ki a Timoteo: “Kia tumau a koe ke he tau mena kua ako ai e koe.” Pehē foki a ia: “Ko e tau mena foki ne fanogonogo mai a koe kia au mo e tau talahau tokologa, kia tuku age e koe ke he tau tagata fakamoli, kua maeke ni ke fakaako atu ke he falu.” (2 Timo. 2:2; 3:14) Falu mogo ne hūhū e tau matakainaga Kerisiano ke he tau mena ne fakaako e au he 57 e tau he gahua he Peteli. Tali mukamuka haaku ko e, “Fakamakai mo e mafiti ke taute e mena ne manako e fakatokatokaaga ha Iehova ke taute e koe, ti falanaki ki a Iehova ke lagomatai a koe.”

Tuga ko e neafi ne hoko mai laia au ke he Peteli ko e fuata mā ne nakai lotomatala. He tau tau oti nei, ko Iehova kua ‘taofi haku a lima matau.’ Mua atu ke he lagomatai totonu mo e magaaho tonu he tau matakainaga fakahele, ne matutaki a ia ke fakamafana au: “Ua matakutaku a koe ko au ni kua lagomatai kia koe.”​—Isaia 41:13.