Kua totou fakamitaki nakai e koe e tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:

Magaaho fe ne tamate e punua mamoe ma e Paseka he Nisana 14?

Falu liliuaga he Tohi Tapu ne pehē na tamate e punua mamoe he “magaaho afiafi,” kakano ai ko e magaaho ne to e laā​—he mole e toaga laā ka e nakaila pouli tatago. (Esoto 12:6)​—12/15, lau 18-19.

Ko e heigoa e tau matapatu fakaakoaga Tohi Tapu ka fakaaoga he tau fuata ke taute e tau fifiliaga iloilo?

Ko e tau mena tolu nei (1) Kumi fakamua e Kautu he Atua mo e haana tututonu. (Mata. 6:19-34) (2) Moua e fiafia he fekafekau atu ke he falu. (Gahua 20:35) (3) Fiafia he fekafekau ke he Atua he vahā fuata haau. (Fakama. 12:1)​—1/15, lau 19-20.

A fe ka fakahoko e “taonaga he Punua mamoe”? (Fakakite. 19:7)

To fakahoko e “taonaga he Punua mamoe” he magaaho ka fakakatoatoa he Patuiki, ko Iesu Keriso e kautūaga haana, he mole e moumouaga ha Papelonia Lahi mo e kua fakahoko e tauaga i Amaketo.​—2/15, lau 10.

Ko e ha ne “talifaki” e tau Iutaia he vahā ha Iesu ke he Mesia? (Luka 3:15)

Nakai maeke ia tautolu ke talahau katoatoa ko e tau Iutaia he senetenari fakamua kua maama e perofetaaga ha Tanielu ke he Mesia ke tuga a tautolu. (Tani. 9:24-27) Ka e liga logona e lautolu e fakailoaaga he agelu ke he falu leveki mamoe po ke mena ne talahau he perofeta fifine ko Ana he kitia e tama mukemuke ko Iesu he faituga. Ko e tau makoi foki ne kumi “a ia ne fanau mai ko e patuiki he tau tagata Iutaia.” (Mata. 2:1, 2) Fakamui, ne fakakite e Ioane ko e Papatiso to nakai leva ti kitia e Keriso.​—2/15, lau 26-27.

Ko e ha ne fakaatā he Atua a lautolu ne malolō ke ekefakakelea a lautolu ne lolelole?

Taha kakano ha kua nakai maeke e Atua ke pikopiko. (Tito 1:2) He kamataaga, ne hataki he Atua e tau tagata ko e totokoaga to takitaki ke he matematekelea lahi, tuga e favale ke he taha mo e taha. Kaeke kua taofi he Atua e tau pule oti ia, kua pikopiko kia a ia he tau kupu haana?​—3/1, lau 11.

Kalo kehe fēfē a tautolu he fakaatā e Ē ha tautolu ke Nakai? (2 Kori. 1:18)

Fai mena he falu magaaho ne nakai maeke ia tautolu ke taute ati uka ai ke fakamooli e tau kupu ha tautolu. Kaeke ke taute e tautolu e maveheaga, kua lata ia tautolu ke eketaha ke fakamooli ai.​—3/15, lau 32.

Ko e heigoa e tau fua ne nakai amanaki ki ai ka hoko kaeke ke toka he Kerisiano e magafaoa haana ka e fano ke gahua tupe he motu kehe?

Ka fifili e tau matua ke nakai nonofo auloa ko e magafaoa, to lauia ai e tau logonaaga mo e tau mahani he tau fanau. Liga to ita a lautolu ke he (tau) matua. Ti ko lautolu ne nonofo kehe mai he tau hoa ha lautolu ne liga fehagai mo e tau kamatamata ke mahani feuaki.​—4/15, lau 19-20.

Maeke fēfē ia tautolu ke totoko e kamatamata ke onoono ke he tau fakatino telefua?

Tolu la e puhala lagomatai (1) Ka kitia e tautolu e tau fakatino feuaki, fakamafiti ke ono kehe. (2) Puipui e tau manatu ha tautolu he hagaaki ke he tau mena mitaki mo e liogi ke he Atua. (3) Puipui e lakaaga ha tautolu he kalo kehe he tau ata po ke tau faahi Kupega Hila ne ha ha i ai e tau fakatino telefua.​—5/1, lau 12-14.

Fēfē e moui ma e tau tupa he tau Roma?

Tokologa e tau tupa ne gahua ke mamate he tau keliaga kolu, ka e laukauka e tau tupa ne gahua he tau faama mo e tau kaina. Ne fekau e tupa ke tau e kahoa lapatoa ne tu ai e tau matatohi po ke fakamailoga ne mavehe to fai palepale ka hola a ia ti moua mo e liuaki ke he leveki haana. Ko lautolu ne lagaloga e lali ke fehola ne liga fakapite ke he matalē ha lautolu e matatohi F ma e fugitivus (tagata hola fano).​—5/1, lau 15.

Ko e heigoa e tau hūhū ne fā kua lata ia tautolu ke tokaloto ka tutala ke he tau tagata he fonua ha tautolu?

Ko hai kua tutala au ki ai? Matakavi fe kua tutala au ke he tau tagata? Magaaho fe kua mitaki lahi ke tutala ke he tau tagata? Lata ke tutala fēfē au ke he tau tagata?​—5/15, lau 12-15.

Ko e heigoa ha Iehova ka taute he magaaho ka totoko ke he tau tagata haana?

To laveaki fakamafiti e ia e tau tagata Haana. To nakai fakaatā e ia a lautolu ke moumou. He mole e laveaki e Iehova e tau tagata haana, to kamata e ia e tauaga i Amaketo mo e to moumou katoatoa e lalolagi ha Satani. (Saka. 2:8)​—5/15, lau 27.