1. Talahau e fakataiaga kua fakakite e puhala ne fakahehē he falu he tau tagata he Atua a lautolu ni. (Kikite fakatino he kamataaga.)

 KO E matakau he tau tagata taane ne tutū i mua he faituga, mautali ai ke foaki e tau mena manogi ki a Iehova. He taha faahi ko Arona, ko e ekepoa ne mua ha Isaraela, mo e ke he taha faahi ko Koru mo e 250 e tagata taane. (Nume. 16:16-18) Tuga kua mahani fakamooli oti a lautolu ke he Atua. Ka ko Koru mo e tau tagata haana ne fakatokoluga, totoko, mo e lotokai, mo e lali ke fofō e tuaga ekepoa mai ia Arona. (Nume. 16:1-11) Ne fakahehē ne lautolu a lautolu he manamanatu kua talia e Iehova e tapuakiaga ha lautolu. Ka ko e mena mooli, kua ekefakakelea e lautolu a Iehova ne kua fioia e tau loto ha lautolu. Maeke a ia ke kitia ko e tau tagata fakatupua a lautolu ti manako a lautolu ke moua e lilifu ma lautolu ni.​—Iere. 17:10.

2. Ko e heigoa ne talahau e Mose ka tupu, ti fakamooli fēfē e tau kupu haana?

² Pehē a Mose: “To fakailoa mai ai e Iehova . . . po ko hai hana tau tagata.” (Nume. 16:5) Fakakite fēfē e Iehova kua iloa e ia e tau tagata tapuaki mooli haana mo lautolu ne fakatupua? Ne fakafano e Iehova e afi mai he lagi mo e tamate a Koru mo e tau tagata taane 250. (Nume. 16:35; 26:10) Ko Arona hokoia ni ne tū.  Ne fakamahino e Iehova ko Arona e ekepoa mooli mo e ko e tagata tapuaki mooli he Atua.​—Totou 1 Korinito 8:3.

3. (a) Ko e heigoa e mena ne tupu ke he fakapotopotoaga Kerisiano he vahā ha Paulo? (e) Ko e heigoa ne fakaako e tautolu mai he mena ne taute e Iehova ke he tau tagata totoko he vahā ha Mose?

³ He vahā ha Paulo, molea e 1,500 tau fakamui, fai mena pihia foki ne tupu ke he fakapotopotoaga Kerisiano. Ne fakamaama e Paulo mena fai ne talahau ke eke mo tau Kerisiano kua kamata ke fakalagalaga e tau fakaakoaga fakavai. Ka e ha ha i ai agaia a lautolu he fakapotopotoaga. Ko e tau tagata tiaki taofiaga nei ne liga tuga ko e tau tagata tapuaki mooli ha Iehova. Ka ko lautolu kua tuga e tau luko hagahaga kelea, ti kamata foki a lautolu ke moumou e “falu mai he tua.” (2 Timo. 2:16-18) Onoono kia a Iehova? Ē. Ne iloa e Paulo e mena ne taute he Atua ke he tau tagata totoko, ko Koru mo e tau tagata haana, ti mauokafua a ia kua kitia katoatoa foki e Iehova e tuaga nei. Maeke foki a tautolu ke mauokafua pihia ki a Iehova. Kia fakaako a tautolu mai he tau kupu aoga ne tohi e Paulo ki a Timoteo.

4. Ko e heigoa ne iloa tonu e Paulo to taute e Iehova? Ko e heigoa ne tala age e Paulo ki a Timoteo?

⁴ Ne iloa e Paulo to mailoga e Iehova e tapuakiaga fakatupua. Ne mailoga foki e ia na iloa e Iehova a lautolu ne tapuaki fakamooli ki a Ia. Ko e mauokafua ha Paulo ne fakakite he tau kupu ne omoomoi a ia ke tohi ki a Timoteo. He mole e fakamaama e Paulo e hagahaga kelea ne fakatupu he tau tagata tiaki taofiaga ke he tua he falu, ne pehē a ia: “Ka e pete ia kua tu e fakaveaga mau he Atua, ha ha i ai e fakamailoga nai, Kua fioia he Iki hana tau tagata; katoa mo ē, Kia o kehe mo e mahani kelea a lautolu oti kua totoku e higoa a [“Iehova,” NW].”​—2 Timo. 2:19.

5, 6. Ko e heigoa e mena fuluola he fakaaoga e Paulo e talahauaga “fakaveaga mau he Atua”? To lauia fēfē a Timoteo he mena ia?

⁵ Ne fakaaoga he Tohi Tapu e kupu “fakaveaga” ke fakamaama e tau mena kehekehe. Putoia he tau mena nei a Ierusalema, ko e maaga lahi ha Isaraela i tuai ti pihia mo e matagahua ha Iesu he finagalo he Atua. (Sala. 87:1, 2; 1 Kori. 3:11; 1 Pete. 2:6) Ka ko e talahauaga “fakaveaga mau he Atua” ne lagataha ni e fakaaoga he Tohi Tapu. Ko e heigoa e mena ne tupu ne hagaao a Paulo ki ai he magaaho ne fakaaoga e ia e talahauaga nā?

⁶ He fakaaoga e Paulo e talahauaga “fakaveaga mau he Atua,” ne taute foki e ia he kupu ia he fatiaki ai e tau kupu ha Mose hagaao ki a Koru mo e tau tagata haana. (Kikite Numera 16:5.) He puhala nei, ne fakamanatu e Paulo ki a Timoteo kua iloa e Iehova e mena ne tupu he fakapotopotoaga. To taofi he Atua e tau tagata tiaki taofiaga mai he fakatupu ha hagahaga kelea. Ne nakai hiki e Koru e finagalo ha Iehova, ti nakai hiki he tau tagata tiaki taofiaga i loto he fakapotopotoaga e finagalo he Atua. Nakai maeke a Paulo ke fakamaama katoatoa e kakano he talahauaga ke he “fakaveaga mau he Atua.” Ka ko e mena ne talahau e Paulo ne lagomatai a Timoteo ke mauokafua mo e falanaki ki a Iehova.

7. Ko e ha kua iloa tonu e tautolu to tututonu mo e fakamooli tumau a Iehova?

⁷ Nakai hiki e tau matapatu fakaakoaga ha Iehova. “Ti tumau e pule a Iehova tukulagi, ko e tau fatuakiloto he hana finagalo ke hahau mo hahau ia,” he talahau he Salamo 33:11. Ko Iehova e Patuiki, ti fakakite e ia e fakaalofa fakamooli, ti ko ia kua tututonu mo e hakohako. Fakakite he Tohi Tapu kua nakai hiki foki e tau vala tala nei. (Esoto 15:18; Sala. 106:1; 111:3; 117:2) Pehē e Malaki 3:6: “Ko au ko Iehova nakai ni hiki e au haku mahani.” Pihia foki, talahau he Iakopo 1:17 ko Iehova kua “nakai ha i ai ha mena hikihikifano, po ke mafoki fakatote.”

8, 9. Ko e heigoa e fakaakoaga ka iloa e tautolu mai he mena ne talai ke he “fakaveaga mau he Atua”?

⁸ He vahā i tuai, ko e aga ke tohi po ke talai e manatu he fakaveaga he fale. Fa taute e mena nei ke fakakite e tagata ne talaga po ke pule ke he fale. Ko Paulo e tagata tohia Tohi Tapu fakamua ne hagaao ke he aga nei. a Ko e “fakaveaga mau he Atua” ne fakamaama e Paulo ia 2 Timoteo 2:19 ne ua e talahauaga ne talai ki ai: (1) “Kua fioia he Iki hana tau tagata” mo e, (2) “Kia o kehe mo e mahani kelea a lautolu oti kua totoku e higoa a [Iehova].” Fakamanatu he mena nei ki a tautolu e talahauaga ne totou e tautolu ia Numera 16:5.​—Totou.

⁹ Ko e heigoa e fakaakoaga ha lautolu kua ha ha i ai a Iehova ne moua mai he mena ne talai ke he “fakaveaga mau he Atua”? Ko e tau aga mo e tau matapatu fakaakoaga ha Iehova kua fakavē ke he ua e kupu mooli aoga. Hanei e (1) Ofania e Iehova a lautolu kua fakamooli ki a ia, mo e (2) Vihiatia e Iehova e tau mahani hepehepe. Hagaao fēfē e fakaakoaga nei ke he tiaki taofiaga he fakapotopotoaga?

10. Lauia fēfē e mahani he tau tagata tiaki taofiaga ki a lautolu ne mahani fakamooli he vahā ha Paulo?

¹⁰ Ne tupetupe lahi a Timoteo mo e falu ne mahani fakamooli ha ko e mahani he tau tagata tiaki taofiaga. Falu Kerisiano ne liga hūhū ke he kakano ne fakaatā e tau tagata tiaki taofiaga ke matutaki ke he fakapotopotoaga. Liga manamanatu foki a lautolu ne fakamooli ko e mena kitia nakai e Iehova e kehekehe he fakamooli mauokafua ha lautolu mo e tapuakiaga fakatupua he tau tagata tiaki taofiaga.​—Gahua 20:29, 30.

11, 12. Fakamalolō mooli fēfē he tohi ha Paulo e tua ha Timoteo?

¹¹ Liga fakamalolō he tohi ha Paulo e tua ha Timoteo. Ne fakamanatu e ia ki a Timoteo kua fakamahino e Iehova he mogo fakamua ki a Koru mo e tau tagata haana ko e tau tagata fakatupua a lautolu. Ne tiaki mo e tamate e Iehova a lautolu ka e fakakite e taliaaga haana ki a Arona. He puhala pihia, pete ne ha ha i ai e tau tagata ne fakatupua ke eke mo tau Kerisiano he vahā ha Paulo, ne fakakite fakamaali e Iehova e tau tagata haana.

¹² Nakai hiki a Iehova, ti falanaki tumau a tautolu ki a ia. Ne vihiatia e ia e mahani kelea mo e to fakahala a lautolu kua taute e  mahani hepehepe ne nakai fakatokihala. Ne fakamanatu ki a Timoteo kua lata a ia ke tiaki e fakaohoohoaga kelea ha lautolu ne fakatupua ke eke mo tau Kerisiano ha ko ‘lautolu oti kua totoku e higoa a Iehova’ kua lata ke tiaki e mahani kelea. b

13. Ko e heigoa ka mauokafua a tautolu ki ai?

¹³ Ko e tau kupu ha Paulo ki a Timoteo ka fakamalolō foki a tautolu. He puhala fe? Iloa mitaki e Iehova kua mahani fakamooli a tautolu ki a ia. Ka e fai mena foki ne taute e ia he iloa noa ni a lautolu kua fakamooli ki a ia. Ne fakakite e Iehova e fiafia lahi mahaki ki a lautolu. Pehē e Tohi Tapu: “Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.” (2 Nofo. 16:9) Maeke ia tautolu ke mauokafua to nakai nimo e Iehova e tau laliaga fakamooli ha tautolu ke tapuaki ki a ia.​—1 Kori. 15:58; 1 Timo. 1:5.

14. Ko e vahega tapuaki fe ne tiaki e Iehova?

¹⁴ Vihiatia mo e tiaki e Iehova e tapuakiaga fakatupua. Maeke a ia ke fioia e tau loto he tau tagata oti ti maeke ke kitia e tau loto ha lautolu kua nakai “katoatoa ha lautolu a tau loto kia ia.” Ko e mena fakalialia ki a Iehova ka fakatupua e tagata ke omaoma ka e taute fufū e agahala. (Fakatai 3:32) Liga hehē e tau tagata ha ko e tagata pihia, ka e nakai pihia a Iehova. Talahau he Tohi Tapu: “Ko ia kua ufiufi hana tau holifono, nakai monuina a ia.” Kakano he mena nei ha kua malolo ue atu a Iehova mo e ha ko ia ko e Atua tututonu.​—Fakatai 28:13; totou 1 Timoteo 5:24; Heperu 4:13.

15. Ko e heigoa ha tautolu kua lata ke kalo kehe, ti ko e ha?

¹⁵ Laulahi he tau tagata ha Iehova ne fakaalofa ki a ia mo e tau loto katoa ha lautolu. Kua lavea ke he tagata ke lali ke fakahehē a Iehova aki e tapuakiaga fakatupua. Kaeke kua tupu e mena nei he vahā a Mose mo e he magaaho he tau Kerisiano fakamua atu, maeke foki ke tupu he vahā nei. (2 Timo. 3:1, 5) Kakano kia e mena nei kua lata ia tautolu ke tuahā ke he tau matakainaga ha tautolu mo e fakauaua ke he mahani fakamooli ha lautolu ki a Iehova? Nakai, to hepe ke tuahā ke he tau matakainaga ha tautolu ka e nakai fai fakamooliaga. (Totou Roma 14:10-12; 1 Korinito 13:7.) Ti ko e fakauaua ke he tau matakainaga ha tautolu to fakalekua ni e fakafetuiaga ha tautolu mo Iehova.

16. (a) Maeke fēfē a koe ke iloa tonu kua nakai fakatupua e loto haau? (e) Ko e heigoa kua fakaako e tautolu mai he puha “ Kia Kamatamata . . . Kia Kumikumi Hifo . . .”?

¹⁶ Igatia e Kerisiano mo e lata ke “fakamoli hana ni a gahua.” (Kala. 6:4) Ha kua nakai mitaki katoatoa, liga kamata a tautolu ke tapuaki ki a Iehova ma e tau kakano hepe ka e nakai mailoga ai. (Hepe. 3:12, 13) He tau mena ikiiki ko e fekafekauaga ha tautolu ki a ia kua liga fakatupua. Ti kua lata ia tautolu ke hūhū hifo: ‘Ko e ha kua tapuaki au ki a Iehova? Tapuaki kia a au ki a ia ha kua fakaalofa au ki a ia mo e manako au ki a ia ke eke mo Pule haaku? Po ke manamanatu lahi au ke he moui mitaki kua amanaki au ke olioli he Parataiso?’ (Fakakite. 4:11) He hūhū e tau hūhū pihia, maeke ia tautolu ke iloa tonu kua nakai fai fakatupua he tau loto ha tautolu.

17, 18. Ko e ha kua lata ia tautolu ke fakamooli ke he tapuakiaga ha tautolu ki a Iehova?

¹⁷ To palepale mitaki a tautolu ka eketaha fakalahi a tautolu ke utakehe e tau fakatupua oti mai he tau loto ha tautolu. “Uhoaki e tagata kua nakai talahaua e Iehova kua  hala, nakai fakai foki ha fakavai ke he hana loto,” he talahau he salamo. (Sala. 32:2) Ka fakamooli a tautolu ke he ha tautolu a tapuakiaga, to fiafia a tautolu mogonei mo e to fiafia katoatoa anoiha.

¹⁸ Nakai leva ti to fakatapakupaku e Iehova e tau tagata mahani kelea ne fakaheu ke fakatokihala po ke taute fufū e agahala. To fakakite e ia e kehekehe he “tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.” (Mala. 3:18) Ato hoko e magaaho ia, “kua hagao e na fofoga he Iki [Iehova] ke he tau tagata tututonu, kua fanogonogo mai foki hana tau teliga ke he tau liogi ha lautolu.”​—1 Pete. 3:12.