1, 2. Ko e heigoa ne tala age e Iehova ki a Mose ke taute, ti ko e heigoa e maveheaga ne taute e Iehova?

 MANAMANATU kua lata a koe ke vagahau ke he pule malolō lahi he lalolagi mo hukui he tau tagata he Atua. To fēfē e logonaaga haau? Liga to logona e koe e tupetupe, matakutaku, mo e nakai maeke ke vagahau. To tauteute fēfē e koe e mena ke talahau? To maeke nakai a koe ke vagahau mo e pule he eke mo utafekau he Atua?

² Ko Mose he tuaga tonu ia. Ko e tagata mahani fakatokolalo lahi a ia. (Nume. 12:3) Ka e fakafano e Iehova a ia ke vagahau ki a Farao, ko e tagata hemu mo e fakaikaluga lahi. Ne tala age a Iehova ki a Mose ke foaki e poakiaga ki a Farao. Ko e poakiaga ke fakatokanoa e tau miliona he tau tagata he Atua mai he tupaaga. (Esoto 5:1, 2) Maeke ia tautolu ke maama e kakano ne hūhū a Mose ki a Iehova: “Ko hai kia au nai, kia fano ai au kia Farao, kia uta ai foki e au e fanau Isaraela mai Aikupito?” Liga logona hifo e Mose kua nakai lotomatala a ia ke vagahau ki a Farao. Ka e mavehe a Iehova ki a Mose to nakai tokotaha a ia. “To fakalataha au mo koe,” he ui e Iehova.​—Esoto 3:9-12.

3, 4. (a) Ko e ha ne matakutaku a Mose? (e) Ko e ha ne liga tatai e tau logonaaga haau mo e ha Mose?

³ Ko e ha ne matakutaku a Mose? Matakutaku a ia neke nakai  talia po ke fanogonogo a Farao ke he utafekau ha Iehova ko e Atua. Ne matakutaku foki a Mose neke fakauaua e tau Isaraela na fifili he Atua a ia ke takitaki kehe mai a lautolu i Aikupito. Pehē a ia ki a Iehova: “Kitiala, nakai talia e lautolu au ti nakai fanogonogo a lautolu ke he haku tau kupu, ha ko e mena to pehe mai a lautolu, Nakai fakakite a Iehova kia koe.”​—Esoto 3:15-18; 4:1.

⁴ Ka e kua a koe? Liga to nakai vagahau a koe ke he pule malolō lahi. Ka e kua ka uka ia koe ke tutala ke he tau tagata he fonua haau hagaao ki a Iehova mo e haana a Kautu? Ko e poakiaga ha Iehova ki a Mose mo e mena ne tupu he magaaho fakamui ka fakaako ki a tautolu e fakatonuaga uho lahi.

5. Ko e heigoa ne tuku e Iehova he lima ha Mose, ti lagomatai fēfē a ia ke mauokafua? (Kikite fakatino he kamataaga.)

⁵ Magaaho ne tala age a Mose ki a Iehova kua matakutaku a ia neke nakai talitonu e tau tagata ki a ia, ne tauteute he Atua a Mose ke maeke a ia ke kautū. Talahau he Tohi Tapu: “Pehe mai a Iehova kia [Mose], Ko heigoa e mena na ha he lima hau? Kua pehe atu a ia, Ko e tokotoko. Ti pehe mai a ia, Ati liti a ke he kelekele; ti liti ai e ia ke he kelekele, kua faliu mo gata; ti hola kehe ai a Mose. Ti pehe mai a Iehova kia Mose, Fakaolo a hau a lima, mo e toto hana hiku. Ati fakaolo ai e ia hana lima, kua tapaki ai e ia, ti faliu mo tokotoko ke he hana lima. Ko e mena ia ke talia ai e lautolu kua fakakite kia koe a Iehova.” (Esoto 4:2-5) He malolō he Atua, ne eke e tokotoko mo gata ke he lima ha Mose! To fakamooli he mana nei ko Mose e utafekau he Atua ti moua e pule mai ia Ia. Tala age a Iehova ki a ia: “Ko e tokotoko foki na, to uta ia ke he hau a lima ke eke aki e koe e tau fakamailoga.” (Esoto 4:17) Ti ko e fakamooliaga nei, ne maeke a Mose ke moua e mauokafua kua lata ke fano ke vagahau ki a Farao, pihia foki ke he tau tagata he Atua.​—Esoto 4:29-31; 7:8-13.

6. (a) Ko e heigoa kua lata ke ha ha he lima ha tautolu ka fakamatala a tautolu, ti ko e ha? (e) Fakamaama e puhala ko e “kupu he Atua kua moui ia” mo e puhala kua “gahua malolo.”

⁶ Ka tala age e tautolu e fekau he Atua ke he falu, ko e heigoa ha tautolu ne totō he lima? Ko e Tohi Tapu, ti makai a tautolu ke fakaaoga ai. Falu tagata ne manatu ko e tohi mitaki noa ni e Tohi Tapu. Ka e mahomo atu e Tohi Tapu. Ha ha i ai e fekau he Atua ki a tautolu. (2 Pete. 1:21) Ha ha i ai e tau maveheaga he Atua ti talahau ki a tautolu e mena ka taute he Kautu haana. Tohi e Paulo: “Ko e kupu he Atua kua moui ia, mo e gahua malolo.” (Totou Heperu 4:12.) Moui fēfē e kupu he Atua? Ko e tau maveheaga oti ha Iehova kua tolomaki ki mua e fakamooliaga, ti to kautū katoatoa ai. (Isaia 46:10; 55:11) Ka maama he tagata e tau mena nei hagaao ke he Kupu he Atua, ko e mena kua totou e ia he Tohi Tapu ka lauia malolō ke he moui haana.

7. Maeke fēfē a tautolu ke “fakatokatoka fakahako e kupu moli”?

⁷ Kua foaki e Iehova ki a tautolu haana a Kupu moui, ko e Tohi Tapu. Ko e koloa nei, maeke a tautolu ke fakamooli aki kua mauokafua e mena kua talahau e tautolu mo e mai he Atua. Kakano haia he fakamahani e Paulo a Timoteo, ne fakamalolō e ia a Timoteo ke “fakatokatoka fakahako e kupu moli.” (2 Timo. 2:15) Maeke fēfē a tautolu ke fakagahua e fakatonuaga ha Paulo? He fifili fakamitaki e tau kupu tohi ka totou e tautolu ke he falu. Ko e foliaga ha tautolu ke hokotia ke he tau loto ha lautolu kua fanogonogo ki a tautolu. Ko e tau tuleke ne moua e tautolu he 2013 ne talaga ke lagomatai a tautolu ke taute pihia.

8. Ko e heigoa ne talahau he taha leveki fekafekau hagaao ke he tau tuleke?

⁸ Tatai e fakatokaaga he tau tuleke foou oti. Ti ka iloa e tautolu ke fakaaoga e taha, iloa e tautolu ke fakaaoga e kau oti ne toe. Taha e leveki fekafekau i Hawaii i U.S.A., ne tohi: “Nakai mailoga e mautolu e aoga mooli he tau koloa foou nei ke he gahua he taha fale ke he taha fale mo e he fakamatala ke he tau tagata.” Ko e ha kua mukamuka lahi ke fakaaoga e tau tuleke? Logona hifo e ia ha ko e hūhū mo e tau tali fakamanamanatu ne tū i mua. Nakai tupetupe e tagata he kaina neke hepe e tali haana. Talahau he matakainaga taane ha ko e puhala ne tohi aki e tau tuleke, tokologa foki e tagata ne makai ke tutala, ti takitaki e mena nei ke he tau fakatutalaaga fuluola.

9, 10. (a) Talaga fēfē e tau tuleke ha tautolu ke lagomatai a tautolu ke fakaaoga e Tohi Tapu? (e) Ko e tau tuleke fe ne fakaaoga lahi e koe, ti koe ha?

⁹ Ha ha he tau tuleke takitaha e kupu tohi kua fifili fakamitaki ke maeke ia tautolu ke totou ke he tagata he kaina. Ma e fakatai ki ai, ko e tuleke To Fakaoti Nakai e Matematekelea? Talahau ke he tagata he kaina e hūhū he kili. Fifili e ia e tali “ē,” “nakai,” po ke “liga.” Ko e heigoa ni e tali haana, fuluhi ke he lau i loto mo e pehē, “Ha ē mena ne talahau he Tohi Tapu.” Ti totou Fakakiteaga 21:3, 4.

¹⁰ Ka fakaaoga e koe e tuleke Fēfē e Onoonoaga Haau ke he Tohi Tapu? ua tupetupe ke he fifiliaga he tagata ke he tau tali ne tolu. Kia veveu ke he lau i loto he tuleke ti pehē, “Talahau he Tohi Tapu ‘ko e tau Tohi Tapu oti kana mai he Agaga he Atua.’” Matutaki e koe, “Fai mena aoga foki ne talahau he manatu ia.” Ti hafagi e Tohi Tapu haau, mo e totou katoa e 2 Timoteo 3:16, 17.

11, 12. (a) Ke he puhala fe ka fakaaoga e koe e tau tuleke ke lahi e fiafia he gahua haau ke he fonua? (e) Maeke fēfē e tau tuleke ke lagomatai a koe ke tauteute ma e tau liu aahi atu?

¹¹ Liga fifili a koe ke lahi e mena ke totou mo e fakamaama mai he tuleke. To fakavē e mena nei ke he tali he tagata. Ka e pete ne tali he tau tagata, to moua e lautolu e fekau mai he tuleke, mo e to totou e koe falu he Kupu he Atua ki a lautolu. Pete foki ka totou ni e koe taha po ke ua e kupu he mogo fakamua ne ahiahi atu ki a lautolu, maeke a koe ke liu he mogo fakamui ti matutaki e fakatutalaaga.

 ¹² I tua he tau tuleke takitaha ha ha i ai e vala mataulu “Ke Manamanatu ki Ai.” I lalo he vala mataulu nei, ha ha i ai e tau kupu tohi mo e hūhū ka fakatutala ka liu aahi atu. He tuleke Fēfē e Onoonoaga Haau ke he Vahā Anoiha? ko e hūhū “To hiki fēfē he Atua e lalolagi ke he mitaki?” Kua tohi ai he Mataio 6:9, 10 mo e Tanielu 2:44. Ma e tuleke Maeke Mooli Kia a Lautolu ne Mamate ke Liu Momoui? ko e hūhū “Ko e ha ne fuakau a tautolu ti mamate?” Kua tohi ai he Kenese 3:17-19 mo e Roma 5:12.

13. Fakamaama e puhala ke fakaaoga e tau tuleke ke kamata e tau fakaako Tohi Tapu?

¹³ Kua talaga e tau tuleke nei ke lagomatai a tautolu ke kamata e tau fakaako Tohi Tapu. Maeke e tagata ke fakaaoga e QR Code i tua he tuleke, mo e to takitaki a ia ke he faahi Kupega Hila ha tautolu. I ai, to uiina a ia ke fakaako e Tohi Tapu. Kua fakakite foki he tau tuleke nei e porosua Tala Mitaki Mai he Atua! Igatia e tuleke mo e matutaki ke he fakaakoaga he porosua nei. Ma e fakatai, ko e tuleke Ko Hai Mooli kua Pule ke he Lalolagi? kua takitaki ke he fakaakoaga 5 he porosua ia. Ko e tuleke Ko e Heigoa e Kei ke he Moui Fiafia he Magafaoa? kua takitaki ke he fakaakoaga 9. Kua talaga e tau tuleke nei ke lagomatai a tautolu ke fakaaoga e Tohi Tapu he aahi atu fakamua mo e he tau liu aahi atu. To loga e fakaako Tohi Tapu ha tautolu ka kamata ke he puhala nei. Ko e heigoa foki haau ka taute ke fakaaoga e Kupu he Atua he puhala lauia mitaki?

14, 15. Maeke fēfē a koe ke muitua e fifitakiaga ha Paulo he haau a gahua he fonua?

¹⁴ Ne manako lahi a Paulo ke maama e manamanatuaga he “tau tagata oti, kia au atu ai he tokologa” he gahua haana he fonua. (Totou 1 Korinito 9:19-23.) Ko e ha? Manako a ia ke lagomatai e “tau tagata oti kana,” ko e tau Iutaia mo e falu, ke fakaako e kupu mooli ke maeke ia lautolu ke momoui. (Gahua 20:21) Maeke fēfē a tautolu ke muitua e fifitakiaga ha Paulo he tauteute a tautolu ma e gahua he fonua mo e fakamatala ke he “tau tagata oti kana”?​—1 Timo. 2:3, 4.

¹⁵ He tau mahina takitaha, haia he Ha Tautolu a Fekafekauaga he Kautu e tau manatu ke he puhala ke foaki e fekau ha tautolu. Lali ke fakaaoga ai. Ka e kua ka tupetupe e tau tagata he fonua ha mutolu ke he matakupu kehe? Mautauteute ke talahau taha mena kua fakalagalaga a lautolu. Ko e heigoa ne tupetupe e tau tagata ne takatakai ia koe? Fifili e kupu tohi kua felauaki mo e matakupu ia. Fakamaama he leveki takaiaga mo e hoana haana e puhala kua maeke a laua ke fakaaoga fakalahi e Tohi Tapu he ha laua a gahua he fonua: “To fakaatā he laulahi he tau tagata he kaina a maua ke totou taha e kupu tohi ka fakakū a maua ke he manatu. He oti e fakafeleveia mahani mau mo e Tohi Tapu ne hafagi he tau lima ha maua, ti totou e maua e kupu tohi.” He tau paratafa ne mui mai, to fakatutala a tautolu ke he falu mataulu, tau hūhū, mo e tau kupu tohi ne aoga mooli he gahua he fonua. Liga manako a koe ke fakaaoga falu he fonua ha mutolu.

16. Fakamaama e puhala ka fakaaoga e Isaia 14:7 he gahua ke he fonua.

¹⁶ Ka nofo a koe he matakavi matahavala mo e favale, maeke a koe ke hūhū ke he tagata: “Manamanatu nakai a koe ke he tala nei he lau fakamua he nusipepa: ‘Kua okioki e lalolagi oti, kua nonofo fakatekiteki ni; kua kalaga a lautolu mo e fiafia’? Ko e mena ia ne talahau he Tohi Tapu he Isaia 14:7. Mooli, ha ha he Tohi Tapu e tau maveheaga loga he Atua ke he tau magaaho mafola ka nakai leva ti hoko mai.” Ti foaki  ke totou taha he tau maveheaga ia mai he Tohi Tapu.

17. Maeke fēfē a tautolu ke fakaaoga e Mataio 5:6 ka tutala?

¹⁷ Uka kia ma e tokologa he tau tagata taane he matakavi haau ke leveki e tau magafaoa ha lautolu? Ka pihia, maeke a koe ke kamata e fakatutalaaga he hūhū: “Fiha e tupe he tagata taane ka moua ke fakafiafia e magafaoa haana?” He oti e tali he tagata, maeke a koe ke pehē: “Tokologa e tagata taane ne lahi atu e tupe kua moua, ka e nakaila fiafia e tau magafaoa ha lautolu. Ti ko e heigoa mogoia kua lata mooli?” Totou e Mataio 5:6 ti foaki e fakaako Tohi Tapu.

18. Ke fakamafana e falu, fakaaoga fēfē e tautolu e Ieremia 29:11?

¹⁸ Mamahi kia e tau tagata he matakavi haau ha ko e matematekelea foou nei? Maeke a koe ke kamata e fakatutala he pehē: “Hoko mai au ki a koe ke foaki atu e kupu fakamafana. (Totou Ieremia 29:11.) Mailoga nakai e koe ua e manako he Atua ma tautolu? Ko e ‘monuina’ mo e ‘amaamanaki.’ Ti homo ke iloa kua manako a ia ki a tautolu ke moua e moui mitaki. Ka e maeke fēfē e mena ia?” Ti fuluhi ke he fakaakoaga kua lata he porosua Tala Mitaki.

19. Fakamaama e puhala ka fakaaoga e Fakakiteaga 14:6, 7 ka tutala mo e tau tagata kua fiafia ke he lotu.

¹⁹ Nofo nakai a koe he matakavi ne fiafia e tau tagata ke he lotu? Ka pihia, maeke a koe ke kamata e fakatutala he hūhū: “Ka vagahau e agelu ki a koe, to fanogonogo nakai a koe ke he mena ka talahau e ia? (Totou Fakakiteaga 14:6, 7.) Pehē e agelu nei ‘kia matakutaku ke he Atua,’ ti ko e hagaao a ia ke he Atua fe? ‘Kia ia ne eke e lagi, mo e lalolagi.’ Ko hai a ia?” Ti totou e Salamo 124:8, ne pehē: “Ha tautolu a lagomatai ha he higoa a Iehova ia, ko ia ne eke e lagi katoa mo e lalolagi.” Ti tala age ke fakamaama fakalaulahi hagaao ki a Iehova ko e Atua.

20. (a) Maeke fēfē ke fakaaoga e Tau Fakatai 30:4 ke fakaako e tagata ke he higoa he Atua? (e) Ko e heigoa e kupu tohi kua fakaaoga e koe ne kua aoga lahi ke he gahua he fonua?

²⁰ Maeke a koe ke kamata e fakatutala mo e tagata fuata he pehē: “Manako au ke totou e kupu tohi kua talahau e hūhū aoga lahi. (Totou Tau Fakatai 30:4.) Nakai fai tagata ka taute e tau mena nei, ti liga hagaao e kupu tohi nei ke he Tufuga ha tautolu. a Iloa fēfē e tautolu e higoa haana? To fiafia au ke fakakite atu ki a koe he Tohi Tapu.”

21, 22. (a) Maeke fēfē e kupu tohi kua fifili fakamitaki ke hiki e moui he tagata? (e) Ko e heigoa kua eketaha a koe ke taute he haau a gahua he fonua?

²¹ Nakai iloa e koe to tali atu fēfē e tau tagata ke he kupu tohi kua fifili fakamitaki. Ma e fakatai, tokoua e Fakamoli i Ausetalia ne nokonoko e gutuhala he fifine fuata. Taha ia laua ne hūhū ki a ia, “Iloa nakai e koe e higoa he Atua?” ti totou e Salamo 83:18. “Ofomate lahi au!” he ui he fifine. “He momole a laua, ne fano au ke he fale toka tohi ne 56 e kilomita ke fakakia e falu fakaliliuaga he Tohi Tapu mo e kumi e higoa he tohi fakamaama kupu. He talitonu ki a au ni ko e higoa he Atua ko Iehova, ne manamanatu au, fai mena foki la nakai ne ai iloa e au.” Nakai leva ne kamata a ia mo e taane haana ke mau ki ai ke fakaako e Tohi Tapu, ti papatiso a laua he mogo fakamui.

²² Ha ha he Kupu he Atua e malolō ke hiki e tau momoui he tau tagata. Ka totou he tagata e Tohi Tapu, maeke a ia ke ati hake e tua malolō ke he tau mavehega ha Iehova. To fakalagalaga he tua nei a ia ke fakagahua e mena ne fakaako e ia. (Totou 1 Tesalonia 2:13.) Mua atu e malolō he fekau he Tohi Tapu ke he ha mena ka talahau e tautolu. Ti eketaha a tautolu ke fakaaoga tumau e Kupu he Atua he ha tautolu a gahua he fonua. Kua moui ia!