“EUREKA!” Ko e kakano he kupu taha ia “Kua moua tuai e au!” He magahala ne hou ke keli auro he senetenari ke 19 aki i California i U.S.A., ko e kalaga nei kua maeke ke logona ka moua he tagata keli kolu e auro. Ko Charles Taze Russell mo e tau Tagata Fakaako Tohi Tapu, kua moua e mena ne mua atu e uho​—ko e kupu mooli he Tohi Tapu. Ti makai a lautolu ke fakailoa ke he falu.

He vahā mafana he 1914, totou miliona he tau taone lalahi ne o mai ke he “Photo-Drama of Creation,” ko e tala mahuiga ne valu e tulā ne taute he International Bible Students Association (I.B.S.A.). Ko e tau kifaga ofoofogia, tau lapa ata lanu kehekehe, talahauaga fulufuluola, mo e leo kofe tuai, ko e fakataitaiaga nei ne fakavē ke he Tohi Tapu kua uta e tau tagata kitekite mai he tufugatia ke he fakamauaga tuai he tagata ke he fakaotiaga he Pule Afe Tau ha Iesu Keriso.​—Fakakite. 20:4. a

Ka e kua a lautolu ne nonofo he tau taone ikiiki mo e tau faahi tua? Ke nakai tonoa a lautolu ne hoge fakaagaaga, ne fakatoka he I.B.S.A. e “Eureka Drama”​—ko e vala kū he “Photo-Drama” ia Aokuso 1914. Ne tolu e vahega ke fifili, ne igatia ke moua he tau vagahau loga: Ko e “Eureka X” ne ha ha ai oti e tau vala tala tapaki mo e leo kofe. Ko e “Eureka Y” ne ha ha ai e tau tapakiaga oti mo e tau lapa ata lanu fulufuluola. Ti ko e “Eureka Family Drama,” ne taute ke fakaaoga i kaina, kua fifili e tau vala tala mo e tau lologo tapu. Ko e tau lapakofe fakatagi mo e tau matini hulu tau mukamuka kua maeke foki ke moua.

He nakai fai fakaaogaaga e matini hulu po ke screen lahi, kua uta he tau Tagata Fakaako Tohi Tapu e fakataitaiaga nakai fai totogi nei ke he tau maaga tua, ti hokotia e fekau he Kautu ke he tau fonua foou. Ko e “Eureka X,” ko e leo kofe ni hokoia kua maeke ke tā he aho po ke pō. Ko e kifaga hulu he “Eureka Y” kua nakai gahua he hila ka e fakaaoga he molī carbide. “Maeke a mautolu ke fakakite e tau ata nei he ha matakavi,” talahau he hokotaki he Watch Tower he vagahau Finnish. Ko e mooli ha ia!

He nakai fakaaoga e tau fale fakafiafia lalahi, ko e tau Tagata Fakaako Tohi Tapu ne lotomatala kua fa moua e tau fale nakai totogi, tuga e tau poko aoga, tau fale fakafili, tau tuaga tuleni, mo e tau poko tali fenoga he tau kaina lalahi. Loga e fakatino ne fakakite i fafo he “screen” ne taute mai he ie tea lahi ne  tautau he faahi he fale manu. Tohi e Anthony Hambuch: “Taute he tau tagata gahua fonua e malē tote he tau ulu akau ha lautolu, ne fakatokatoka e tau akau ke nonofo e tau tagata mo e kitekite fiafia ke he fakaholoaga.” Ko e matakau “Eureka” nei ne fakaaoga e peleō ke lata mo e tau koloa, tau kato, mo e tau mena ke kemu ai mo e taute kai.

Ko e tau tagata kitekite he “Eureka” ne mai he tokogahoa ke he totou teau. He United States, toko 400 ne hohoko atu ke he fale aoga ne fakakite he taone ne 150 e tagata. Fai matakavi foki, ne o atu mo e liliu hui falu ke he valu e kilomita ke kitekite e “Eureka Drama.” I Sweden, ko e tau katofia ha Charlotte Ahlberg ne fakapotopoto ke he tama fale haana kua “aamotia mooli” he logona e tau tapakiaga. Kavi ke he 1,500 ne o mai ke kitekite ai he taone keli kolu mamao i Ausetalia. Talahau he Watch Tower, ke he tau aoga tokoluga mo e tau koliti kua “fiafia e tau porofesa mo e tau tama aoga ke he tau ata mo e tau lapakofe tagi ofoofogia ha tautolu.” Mahuiga foki e “Eureka Drama” ke he tau matakavi he tau fale kifaga.

Kua eke e “Eureka Drama” mo koloa aoga lahi he “Falu Gahua he Vahega,” ne kua fakafano atu e tau tagata lauga ke he tau vahega Fakaako Tohi Tapu ke kamata e tau vahega fakaako foou. Nakai iloa ko e tokofiha ne kitekite e “Eureka Drama.” Loga e tau “Drama” ia ne fakaaoga tumau. Ka e he 1915, ne 14 ni mai he 86 he tau matakau “Drama” ne hokotaki tumau. Hagaao ke he tau numera ne nakai katoatoa, ne fakakite he talahauaga he matahiku he tau kua molea taha e miliona ne kitekite e “Drama.” Kavi ke he 30,000 tagata ne ole ma e tau tohi faka-Tohi Tapu.

Liga nakai lahi e fakamauaga i tuai ke he “Eureka Drama,” ka e mai i Ausetalia ki Atenetina, mai Aferika Toga ke he British Isles, Initia, mo e Caribbean, totou miliona ne kua kitia e fakataitaiaga ofoofogia nei. Tokologa ia lautolu ne moua e kupu mooli he Tohi Tapu​—mua atu e uho ke he auro​—ti maeke ke fakapuloa “Eureka!”