KUA tagi lahi a Peteru he magaaho ne fakatikai e ia na iloa a Iesu. Pete to taufetului e aposetolo ke liu moua e lagotatai fakaagaaga haana, ne manako a Iesu ke fakaaoga a ia ke lagomatai e falu. Ti tala age a Iesu ki a ia: “Ka mafoki mai a koe, ti fakamalolo e koe hau a tau matakainaga.” (Luka 22:32, 54-62) Ne matutaki atu a Peteru ke eke mo taha he tau pou he fakapotopotoaga Kerisiano he senetenari fakamua. (Kala. 2:9) Pihia foki, ko e tagata ne fekafekau fakamua ko e motua kua liga liu taute e matagahua ia ti moua e olioli he fakamalolō fakaagaaga e tau matakainaga.

Falu ne fekafekau ko e tau leveki he taha magaaho kua utakehe ai, ti liga fua mai e logonaaga he kaumahala. Ko Julio, a ne fekafekau ko e motua i Amerika Toga ke molea 20 e tau, kua pehē: “He tauteute e tau lauga, ahiahi e tau matakainaga, mo e leveki e tau matakainaga he fakapotopotoaga ne kua fakapuke e vala lahi he moui haaku! Amanaki ni ti galo ai, ti nakai fai mena foki he moui haaku. Fakahiku ai, ko e magahala kelea lahi anei.” Mogonei, liu tuai a Julio fekafekau ko e motua.

Ne tohi he tutaki ko Iakopo: “Haku a tau matakainaga na e, kia manatu a mutolu ko e mena ke fiafia lahi ai ka moua a mutolu he tau kamatamata kehekehe.” (Iako. 1:2) Hagaao a Iakopo ke he tau kamatamata ne fua mai he favaleaga mo e mai he nakai mitaki katoatoa ha tautolu. Talahau e ia e tau manako lahi, fakamailoga tagata, mo e falu mena foki. (Iako. 1:14; 2:1; 4:1, 2, 11) Ka akonaki e Iehova a tautolu, to liga mamahi e fakahikuaga. (Hepe. 12:11) Ka e nakai lata e tau kamatamata ia ke fofō e olioli ha tautolu.

Pete ne utakehe a tautolu mai he tuaga kotofa he fakapotopotoaga, ha ha agaia ia tautolu e magaaho ke kumikumi e tuaga he tua ha tautolu mo e fakatātā  e fakaalofa ha tautolu ki a Iehova. Maeke foki ia tautolu ke manamanatu ke he kakano ne fekafekau ai a tautolu. Taute kia ma e aoga ni ha tautolu, po ke kua omoomoi a tautolu ke foli atu ke he kotofaaga pihia ha ko e fakaalofa ha tautolu ma e Atua mo e ha tautolu a fifiliaga ko e fakapotopotoaga Haana ti kua latatonu ke leveki fakamitaki? (Gahua 20:28-30) Ko e tau motua fakamua ne kua matutaki fiafia ke taute e fekafekauaga tapu kua mailoga he tokologa, ne putoia a Satani, kua mooli e fakaalofa ha lautolu ki a Iehova.

He akonaki e Patuiki ko Tavita he taute e tau agahala kelea lahi, ne talia e ia e fakatonuaga ti fakamagalo ai. Lologo a Tavita: “Uhoaki e tagata kua fakamagalo hana tau holifono, kua tanumia hana tau hala. Uhoaki e tagata kua nakai talahaua e Iehova kua hala, nakai fakai foki ha fakavai ke he hana loto.” (Sala. 32:1, 2) Ne hakahaka he akonakiaga a Tavita ti eke mooli a ia mo leveki mitaki he tau tagata he Atua.

Fa mahani, ko e tau matakainaga taane ne liu fekafekau ko e tau motua ne eke mo tau leveki mitaki lahi ne nakai pihia fakamua. “Maama mitaki e au mogonei e puhala ke leveki a lautolu ne taute e hehē,” ui ai he taha motua. Talahau he taha motua: “Mogonei kua uho lahi mahaki e kotofaaga haaku he fekafekau ke he tau matakainaga.”

“Nakai totoko mau e [Iehova],” he tohi he salamo. (Sala. 103:9) Ti nakai lata ia tautolu ke manatu to nakai liu e Atua ke falanaki ke he tagata ne taute e hepe kelea lahi mahaki. “Ita lahi mahaki au ke he kaumahala ni haaku,” ui e Ricardo, ne galo haana tau kotofaaga ko e motua he mole e fekafekau ke he tuaga ia he tau tau loga. “Leva lahi ai, ko e tau logonaaga fakateaga haaku ne taofi au he liu ke fekafekau ko e leveki ke he tau matakainaga. Tote e mauokafua haaku to liu au ke fakakite e falanaki mooli ki a au ni. Ka e tali mai he fiafia au ke lagomatai e falu, maeke ia au ke taute e tau fakaako Tohi Tapu, fakamafana e tau matakainaga he Fale he Kautu, mo e gahua mo lautolu he fonua. Lagomatai he mena ia au ke liu moua e mauokafua haaku, ti liu au mogonei fekafekau ko e motua.”

Ko e fakafualoto ka fakatauhele e matakainaga taane mai he fekafekau ko e motua. Ko e mitaki ha  ia ke tuga a Tavita ko e fekafekau a Iehova, ne hola he patuiki mahekeheke ko Saulo! Nakai taui e Tavita a Saulo, pete he fai magaaho ke taute pihia. (1 Samu. 24:4-7; 26:8-12) He mogo ne mate a Saulo he tauaga, ne maanu a Tavita he mate a ia, mo e hagaao ki a ia mo e tama haana ko Ionatana ko e tau tagata “fakahele mo e fulufuluola.” (2 Samu. 1:21-23) Nakai fakafualoto a Tavita.

Ka logona hifo a koe kua eke a koe mo tagata ne lauia noa he fekehekeheaki po ke nakai fakafili tonu, ua fakaatā e fakafualoto ke pule ke he tau manatu haau. Ma e fakatai, he mogo ne fakaokioki a William he tau matagahua haana ko e motua he mole e fekafekau kavi ke he 30 e tau he tuaga ia i Peritania, ne logona hifo e ia e fakafualoto ke he falu motua. Ko e heigoa ne lagomatai a William ke liu a ia ke lagotatai? “Ko e totou e tohi ha Iopu kua fakamafana ki a au,” ui e ia. “Ka lagomatai e Iehova a Iopu ke taute mafola mo e tau kapitiga tokotolu haana, to lahi atu foki e lagomatai e Ia au ke taute mafola mo e tau motua Kerisiano!”​—Iopu 42:7-9.

Ka fifili a koe ke tu ke he mafoa mai he leveki e fuifui he Atua, kua mitaki ke manamanatu e kakano ne taute pihia e koe. Tupetupe lahi kia a koe ha ko e tau lekua fakatagata? Fai mena foki kia kua mua e aoga he moui haau? Fakalolelole kia a koe ha ko e tau kūkū he falu? Ko e heigoa ni e mena ne tupu, manatu ko koe he tuaga ke lagomatai e falu ke he tau puhala loga kaeke kua fekafekau a koe mo motua. Kua fakamafana he tau lauga haau a lautolu, fakamalolō he fakafifitakiaga haau a lautolu, mo e lagomatai he tau ahiahi leveki haau a lautolu ke fakauka ke he tau kamatamata ha lautolu. Ko e gahua haau ko e motua fakamooli kua fakafiafia e loto ha Iehova, tuga ni he fakafiafia foki haau.​—Fakatai 27:11.

Kua lagomatai e Iehova e tau tagata taane ke liu moua ha lautolu a olioli mo e manako ke takitaki e fakapotopotoaga. Ka tu a koe ke he mafoa po ke utakehe mai he fekafekau ko e motua, maeke ia koe ke liu “foli . . . ke he feua he [“leveki,” NW].” (1 Timo. 3:1) Ne ‘nakai okioki a Paulo he liogi’ ke maeke he tau Kerisiano i Kolose ke puke ke he iloilo tonu he finagalo he Atua “kia mahani . . . ke lata mo e Iki [Iehova], kia fiafia mai a ia . . . ke he tau mena oti.” (Kolo. 1:9, 10) Ka liu a koe kotofa ke fekafekau ko e motua, ono ki a Iehova ma e malolō, fakauka, mo e olioli. Ke he tau aho fakamui nei kua lata e tau tagata he Atua mo e lalagoaga fakaagaaga he tau leveki. Maeke mo e makai nakai a koe ke fakamalolō e tau matakainaga haau?