1. Fēfē e logonaaga ha Paulo hagaao ki a lautolu ne gahua malolō ke fakamatala e tala mitaki?

 KUA uho ke he aposetolo ko Paulo e tau matakainaga haana ne gahua malolō ke fakamatala e tala mitaki. Ne tohi e ia: “Kua nakai noa ha mautolu a manatu ke he gahua ha mutolu ke he tua, mo e fakamalolo ke he fakaalofa, mo e fakauka ke he amaamanaki ke he Iki ha tautolu ko Iesu Keriso, ki mua he Atua, ko e Matua ha tautolu haia.” (1 Tesa. 1:3) Manatu mo e uho foki ki a Iehova e tau mena oti ne taute he tau tagata haana ke fekafekau ki a ia, ko e lahi po ke tote e mena ne taute e lautolu.​—Hepe. 6:10.

2. Ko e heigoa ka fakatutala a tautolu he vala nei?

² He vahā kua mole mo e mogonei, ne lahi e foakiaga ne taute he tau Kerisiano ke maeke ke lahi e fekafekauaga ki a Iehova. He vala tala nei, to fakatutala a tautolu ke he tau mena ne taute he falu he senetenari fakamua ke fekafekau ki a Iehova. To fakaako foki a tautolu ke he mena kua taute he tau fekafekau mau he vahā nei, mo e to kitia e tautolu e puhala ka lagomatai ki a lautolu.

3, 4. (a) Ko e heigoa falu puhala ne fekafekau e tau matakainaga he senetenari fakamua ki a Iehova? (e) Maeke fēfē e tau tagata fakamatala he Kautu he senetenari fakamua ke totogi e tau fakamoleaga ha lautolu?

³ Nakai leva he mole e papatiso ha Iesu, ne kamata a ia ke fakamatala  hagaao ke he Kautu, ti fakaako e ia e falu ke taute e gahua taha nei. (Luka 3:21-23; 4:14, 15, 43) He mole e mate ha Iesu, ne takitaki he tau aposetolo haana e gahua fakamatala ti kamata ai ke holofa. (Gahua 5:42; 6:7) Falu Kerisiano ne toka e tau kaina ha lautolu ke gahua ko e tau misionare. Ma e fakatai, ne fakamatala a Filipo he tau faahi kehekehe ha Palesitaina. (Gahua 8:5, 40; 21:8) Ko Paulo taha misionare ne fakamatala e tala mitaki he tau motu loga ne mamao mai he kaina haana. (Gahua 13:2-4; 14:26; 2 Kori. 1:19) Ko e falu ne putoia a Mareko, Luka, mo Siluano (Sila), ne tohia e tau tohi he Tohi Tapu po ke gahua ko e tau tohikupu ke he tau tagata tohia Tohi Tapu. (1 Pete. 5:12) Tokologa e matakainaga fifine ne gahua fakalataha mo e tau matakainaga taane ia. (Gahua 18:26; Roma 16:1, 2) He Tau Tohiaga Tapu Heleni Kerisiano, totou a tautolu ke he tau tala tutupu ofoofogia ke he tau matakainaga nei. Fakamanatu he tau tala nei ki a tautolu kua uho ki a Iehova e gahua he tau fekafekau haana ti leveki e ia e tau manako ha lautolu.

⁴ Maeke fēfē e tau tagata fakamatala he Kautu he senetenari fakamua ke totogi e tau fakamoleaga ha lautolu? Nakai poaki a lautolu ke he tau matakainaga ha lautolu ke lagomatai, ti ko e falu magaaho ne gahua vala magaaho a lautolu. (1 Kori. 9:11-15) Ka e talia e lautolu e lagomatai. Ne uiina ki a lautolu ke kai auloa, foaki e mena ke nonofo ai, po ke lagomatai ke he falu puhala foki. Manako e tau tagata takitokotaha mo e fakapotopotoaga katoa ke lagomatai a lautolu.​—Totou Gahua 16:14, 15; Filipi 4:15-18.

5. Ko e heigoa ne talahau he taha hoa mau hagaao ke he moui ha laua he fekafekauaga mau?

⁵ He vahā nei foki, tokologa ne gahua malolō ke fekafekau mau ki a Iehova he tau puhala kehekehe. (Kikite puha he “ Tau Vahega Kehekehe he Fekafekau Mau.”) Fēfē e logonaaga ha lautolu ke he puhala moui ne fifili e lautolu? To atihake a koe kaeke ke hūhū e koe e hūhū nei ke he falu matakainaga haau. Taha e matakainaga taane ne fekafekau ko e paionia tumau, paionia pauaki, misionare, mo e matakainaga he magafaoa Peteli he motu kehe. Pehē a ia: “Logona hifo e au ko e hū ke he fekafekauaga mau ko e taha he tau fifiliaga mitaki lahi mahaki ne taute e au. He 18 e tau he moui, ne taufetului au ke taute e fifiliaga ke fakaako he univesitī, gahua tupe tumau, mo e gahua paionia. Ko e iloaaga ne kua fakakite ki a au na nakai nimo e Iehova e tau foakiaga ne taute e koe ke fekafekau mau ki a ia. Maeke ia au ke fakaaoga e tau taleni po ke tau lotomatala kua tuku mai e Iehova ki a au he tau puhala ka nakai maeke ane mai fifili e au e gahua he lalolagi.” Pehē e hoana haana: “Ko e tau kotofaaga takitaha kua lagomatai au ke tupu. Logona e maua e puipuiaga mo e takitakiaga ha Iehova he tau magaaho oti mo e he tau puhala ka nakai tupu ai ane mai nonofo a maua he takatakaiaga tote ni ha maua. Ne fakaaue tumau au ki a Iehova he tau aho takitaha ma e tau momoui ha maua ke he fekafekauaga mau.” Manako nakai a koe ke logona pihia hagaao ke he moui haau?

6. Fēfē e logonaaga ha Iehova ke he fekafekauaga ha tautolu ki a Ia?

⁶ Mooli, nakai maeke e falu ke taute e fekafekauaga mau he magaaho nei ka e taute e tau mena oti kua maeke ia lautolu ma Iehova. Iloa e tautolu kua uho e fekafekauaga ha lautolu ki a Ia. Ma e fakatai, ia Filemoni 1-3, ne fakafano e Paulo e tau feleveiaaga ke he tau matakainaga oti he fakapotopotoaga i Kolose ti totoku e falu ke he tau higoa ha lautolu. (Totou.) Ne uho ki a Paulo e gahua lahi ha lautolu, ti pihia foki ki a Iehova. He puhala taha, uho ki a Iehova e tau mena ne taute e koe he fekafekauaga haana. Ka ko e heigoa ka taute e koe ke lalago e tau fekafekau gahua mau?

7, 8. Ko e heigoa ne putoia he gahua paionia, ti lagomatai fēfē he falu he fakapotopotoaga e tau paionia?

⁷ Tuga e tau tagata fakamatala he senetenari fakamua, kua fakamalolō lahi he tau paionia he vahā nei e fakapotopotoaga. Tokologa ne fakaaoga 70 e tulā he tau mahina takitaha ke fakamatala. Lagomatai fēfē e koe a lautolu?

 ⁸ Taha e matakainaga fifine paionia ko Shari ne pehē: “Malolō e tau paionia he ō ke he gahua he fonua he tau aho takitaha. Ka e lata agaia a lautolu mo e fakamalolōaga.” (Roma 1:11, 12) Taha matakainaga fifine ne paionia ke loga e tau tau ne talahau hagaao ke he tau paionia he fakapotopotoaga haana: “Gahua malolō mo e nakai okioki a lautolu. Ka ui falu ke ō he motokā ha lautolu he gahua he fonua, uiina a lautolu ke kai, age tupe mo utu e penisini po ke falu lagomatai fakatupe, kua loto fakaaue a lautolu. Fakakite ai he mena ia kua fakaalofa mooli a koe.”

9, 10. Ko e heigoa ne taute he falu ke lagomatai e tau paionia he fakapotopotoaga ha lautolu?

⁹ Taha puhala ke lagomatai e tautolu e tau paionia ko e gahua mo lautolu he fonua. Tokoua e matakainaga fifine paionia ne pehē manako a laua ke tokologa e tau matakainaga ke gahua auloa he faahi tapu mo e he tau mogo afiafi. Ne manatu he matakainaga fifine ne gahua mogonei he Peteli i Brooklyn e lagomatai ne moua e ia he mogo ne paionia a ia. Talahau e ia: “Pehē taha matakainaga fifine ne fai motokā, ‘Ka nakai fai hoa a koe he ha magaaho, hea mai ki a au, to fano au mo koe he fonua.’ Ne fakatumau a ia ke matutaki e gahua paionia haaku.” Pehē a Shari: “Ka oti e gahua he fonua, fa mahani e tau paionia nonofo takitokotaha ke ō na lautolu hoko lautolu. Maeke ia koe ke uiina he falu magaaho e tau matakainaga taane po ke fifine nonofo takitokotaha ke he tapuakiaga magafaoa haau. He putoia a lautolu ke he falu matafeua kua lagomatai foki a lautolu ke tumau e malolō fakaagaaga.”

¹⁰ Taha e matakainaga fifine ne haia he fekafekauaga mau ke teitei 50 e tau ne talahau hagaao ke he lagomatai ne foaki ki a ia mo e falu matakainaga fifine nonofo takitokotaha foki: “Ahiahi he tau motua ha mautolu e tau paionia he tau mahina ua oti. Hūhū a lautolu hagaao ke he ha mautolu a malolō tino mo e gahua tupe mo e fakakia kaeke kua fai tupetupe a mautolu. Ne manamanatu mooli a lautolu. Ahiahi e lautolu e tau nonofoaga ha mautolu ke kitia kua manako lagomatai nakai a mautolu.” Ko e tau motua nei mo e falu foki ne tuga a lautolu kua mumuitua e fakafifitakiaga ha Oneseforo. Ne leveki e ia e magafaoa haana, ka e foaki foki e ia e lagomatai kua lata ki a Paulo.​—2 Timo. 1:18.

11. Ko e heigoa ne putoia he gahua paionia pauaki?

¹¹ Ko e taha puhala he fekafekau mau ko e gahua paionia pauaki. Tokologa e paionia pauaki ne fakaaoga kavi ke he 130 e tulā he tau mahina takitaha he gahua ke he fonua. Lavelave foki a lautolu  ke he falu matagahua he fakapotopotoaga. Kua age he la ofisa ki a lautolu e tupe lagomatai kua latatonu he tau mahina takitaha ha kua tote po ke nakai fai magaaho a lautolu ke gahua tupe. Kua lagomatai he lalagoaga nei e tau paionia pauaki ke totogi e tau mena fakamole kua lata ha lautolu, ti fakaatā a lautolu ke fakaaoga e lahi he magaaho ha lautolu ma e gahua ke he fonua.

12. Maeke fēfē e tau motua mo e falu ke lagomatai e tau paionia pauaki?

¹² Ko e heigoa ka taute e tautolu ke lagomatai e tau paionia pauaki? Taha e motua ne gahua he la ofisa ti kua tutala ke he tokologa he tau paionia pauaki ne pehē: “Kua lata e tau motua ke tutala ki a lautolu, ke iloa e tau tutūaga ha lautolu, ti manamanatu ko e lagomatai fēfē e lautolu e tau paionia. Falu Fakamoli ne manamanatu kua leveki katoatoa tuai ke he tau paionia pauaki ha kua moua e lautolu e tupe lagomatai, ka e maeke he tau matakainaga he fakapotopotoaga ke lalago a lautolu ke he tau puhala loga.” Tuga ni e tau paionia tumau, kua loto fakaaue e tau paionia pauaki ka gahua auloa e tau matakainaga mo lautolu he fonua. Maeke nakai a koe ke gahua mo lautolu?

13, 14. (a) Ko e heigoa kua lata ke manatu e tautolu hagaao ke he tau leveki takaiaga mo e ha lautolu a tau hoana? (e) Ko e heigoa haau ka taute ke lagomatai a lautolu kua fekafekau he gahua faifano?

¹³ Ko e tau leveki takaiaga mo e ha lautolu a tau hoana ko e tau matakainaga lotomatala ne malolō e tua ti foaki ki a tautolu e fakamafanaaga. Ka e latatonu foki ia tautolu ke nakai nimo kua lata foki a lautolu ke fakamafana. Kua manako foki a lautolu ke he tau matakainaga ke gahua mo lautolu he fonua. Ti fakaaue foki a lautolu ka uiina he tau matakainaga a lautolu ke taute taha mena fakafiafia mo lautolu. Ka haia e tau leveki faifano po ke ha lautolu a tau hoana he fale gagao po ke malolō fakahaga he gagao ha lautolu, maeke ia tautolu ke lagomatai he ahiahi atu ki a lautolu mo e leveki ke he tau manako ha lautolu. Ko Luka “ko e ekekafo fakahele,” ne leveki e tau manako ha Paulo mo e falu ne fenoga ke ahiahi e tau fakapotopotoaga kehekehe.​—Kolo. 4:14; Gahua 20:5–21:18.

¹⁴ Ko e tau leveki faifano mo e ha lautolu a tau hoana kua lata ke moua e fakaalofa mo e fakamafanaaga he tau kapitiga tata. Taha e leveki takaiaga ne tohi: “Tuga na iloa he tau kapitiga haaku e magaaho kua lata ke fakamafana au. Hūhū e lautolu e tau hūhū fakailoilo, ti lagomatai he mena nei au ke tutala hagaao ke he tau mena ne tupetupe ai au. He eke mo tau tagata fanogonogo mitaki, kua lagomatai lahi a lautolu.” Kua loto fakaaue lahi e tau leveki takaiaga ka fiafia mooli e tau matakainaga ki a lautolu ti eke mo tau kapitiga mooli ha lautolu.

15, 16. Ko e ha e gahua ne taute e lautolu ne fekafekau he Peteli mo e tau Fale Toloaga kua aoga lahi, ti lagomatai fēfē e tautolu a lautolu?

¹⁵ Ko lautolu ne fekafekau he Peteli mo e tau Fale he Toloaga kua taute e gahua aoga lahi ne kua lalago e fakamatala he tala mitaki. Ka fai tagata he Peteli e fakapotopotoaga po ke takaiaga ha mutolu, to manatu fēfē a koe ki a lautolu?

¹⁶ He o mai laia a lautolu ke he Peteli, liga matimati a lautolu mo e misi ai e magafaoa mo e tau kapitiga i kaina. Kua fakaaue e tau tagata foou nei ke he Peteli ka iloa fakahaga he falu he Peteli mo e fakapotopotoaga ha lautolu a lautolu ti eke mo tau kapitiga ki a lautolu. (Mare. 10:29, 30) Ko e fakaholoaga gahua he Peteli kua fakaatā e tau tagata he Peteli ke o atu ke he tau feleveiaaga mo e gahua ke he fonua he tau faahi tapu takitaha. Ka e falu mogo liga fai matagahua lafi ki luga e tau tagata he Peteli. Kua mitaki ke maama he tau fakapotopotoaga e mena nei ti fakakite kua uho ki a lautolu e gahua ne taute he tau tagata he Peteli.​—Totou 1 Tesalonia 2:9.

17, 18. Ko e heigoa e tau kotofaaga ne moua he tau fekafekau mau he tau motu kehe?

¹⁷ Falu fekafekau mau ne talia e kotofaaga he taha motu kehe. Liga kai a lautolu he tau mena kai foou, fakaako e vagahau foou, ti hikihiki ke he tau  aga fakamotu foou mo e puhala foou he moui. Ko e heigoa e tau kotofaaga ne moua he tau fekafekau mau he tau motu kehe?

¹⁸ Falu ko e tau misionare ti laulahi he tau magaaho ha lautolu ne fakaaoga ke he gahua he fonua. Ko lautolu ko e tau tagata fakamatala mo e tau faiaoga lotomatala, ti tala age e lautolu e tau mena ne fakaako e lautolu ke he falu he fakapotopotoaga ha lautolu. Kua foaki age he la ofisa ke he tau misionare e kaina ke nonofo ai mo e tupe lagomatai tote ke lata mo e totogiaga he tau mena fakamole kua lata. Ko e falu ne kotofa ke he taha motu ke fekafekau he la ofisa po ke lagomatai ke talaga e tau la, tau ofisa fakaliliu matutaki mamao, tau Fale Toloaga, po ke tau Fale he Kautu. Ko e la ofisa po ke tau matakainaga he fakapotopotoaga ne foaki ma e tau manako ha lautolu, tuga e tau mena kai mo e mena ke nonofo ai. Tuga e magafaoa Peteli, ko lautolu nei ne gahua noa ke talaga e tau fale kua o atu tumau ke he tau feleveiaaga he fakapotopotoaga mo e ō ke he gahua he fonua. Kua aoga e tau fakapotopotoaga mai he tau iloaaga he tau matakainaga nei.

19. Lagomatai fēfē e mutolu e tau fekafekau mau ne o mai ke gahua he motu ha mutolu?

¹⁹ Lagomatai fēfē e koe e tau fekafekau mau ne o mai ke gahua he motu ha mutolu? Manatu he magaaho ne hohoko mai laia a lautolu, liga nakai mahani a lautolu ke he falu mena kai he motu. Ti ka uiina e koe a lautolu ke kai, maeke a koe ke hūhū ki ai ko e manako nakai a lautolu ke fakatai taha mena kai foou po ke fai mena ne nakai manako a lautolu ke kai. Ka lali a lautolu ke fakaako e vagahau ha mutolu mo e tau aga fakamotu he motu ha mutolu, to nakai iloa e lautolu he mogoia ni. Ti fakauka mo e lagomatai totonu ki a lautolu. Manako a lautolu ke fakaako!

20. Lagomatai fēfē e tautolu e tau fekafekau mau mo e tau matua ha lautolu?

²⁰ Fai magaaho, ko e tau fekafekau gahua mau ne nonofo mamao he kaina ne liga fifili ai e puhala ke lagomatai e tau matua momotua. Ka eke ko e Tau Fakamoli e tau matua, manako lahi a lautolu ke tumau e tau tama ha lautolu he tau kotofaaga. (3 Ioa. 4) Mooli, to taute he tau fekafekau mau e tau mena oti ke leveki e tau matua ha lautolu mo e ka maeke ti ahiahi tumau ki a lautolu. Ka ko lautolu kua nonofo tata ke he tau matua ka lagomatai foki ke he tau fekafekau mau. Maeke a lautolu ke foaki e leveki ke he tau matua ka lata ke lagomatai. Lata ia tautolu ke manatu na lavelave lahi e tau fekafekau mau he lalago e gahua fakamatala, ko e gahua ne mua atu e aoga he lalolagi mogonei. (Mata. 28:19, 20) Manatu nakai e koe e tau fekafekau mau he lagomatai e tau matua ha lautolu?

21. Fēfē e logonaaga ha lautolu kua fekafekau mau ke he lagomataiaga mo e fakamalolōaga ne foaki he falu ki a lautolu?

²¹ Tokologa e tagata ne gahua malolō ha kua manako ke monuina. Ka ko lautolu ne fifili ke taute e fekafekauaga mau ne gahua malolō he manako ke foaki katoatoa ki a Iehova mo e lagomatai e falu. Ti kua fakaaue a lautolu ke he ha lagomatai kua foaki he falu ki a lautolu. Taha e matakainaga fifine ne taute e fekafekau mau ti kua hiki ke gahua he taha motu ne pehē, “Ko e tohi kū foki ne talahau e loto fakaaue kua fakakite na manamanatu e falu ki a koe ti fiafia ai ke he mena kua taute e koe.”

22. Logona fēfē a koe ke he fekafekau mau?

²² Ko lautolu ne fekafekau mau ne fifili e puhala moui ne fiafia mo e makona mooli. Ko e puhala moui ne mua ue atu he mogonei. Maeke e tau fekafekau mau ke fakaako e tau mahani mo e tau aga kua lata mogonei mo e to aoga he lalolagi foou. Nakai leva to taute he tau fekafekau oti ha Iehova e gahua kua makona mooli he tau aho oti. Kia fakatumau a tautolu ke manatu e ‘gahua ke he tua,’ mo e “fakamalolo ke he fakaalofa” ha lautolu ne fekafekau mau.​—1 Tesa. 1:3.