1, 2. Ko e heigoa ka fakamalolō e mauokafua ha tautolu ko e puhala he Kautu, to kautū e finagalo he Atua, mo e ko e ha? (Kikite fakatino he kamataaga.)

 HA KO E Tau Fakamoli a Iehova, kua fakamatala fakamakutu e tautolu ko e Kautu he Atua ni e tali ke he ha tautolu a tau lekua. Ka kua talitonu moolioli kia a tautolu kua mooli e Kautu mo e he puhala ia, to kautū e finagalo he Atua? Ko e ha kua ha ha ia tautolu e tua mauokafua he Kautu?​—Hepe. 11:1.

² Puhala he Kautu faka-Mesia, to fakamooli e finagalo ha Iehova ma e tau tagata. Ko e fakavēaga mauokafua he Kautu nei ko e tonuhia katoatoa ha Iehova ke pule. Ko hai e Patuiki he Kautu nei? Ko hai foki ke pule fakalataha mo e Patuiki nei? Ko hai mo e ko e heigoa i lalo hifo he pule ha lautolu? Ne fakatū tonuhia e Iehova e tau vala aoga nei he Kautu puhala he tau maveheaga. Ko e tau maveheaga nei ko e tau fakamauaga fakavē ne taute e Iehova po ke haana Tama ko Iesu Keriso. He kumikumi e tau maveheaga nei, to maama mitaki e tautolu e puhala ke kautū e finagalo ha Iehova mo e kakano ka mauokafua a tautolu kua nakai hikihiki e Kautu.​—Totou Efeso 2:12.

3. Ko e heigoa ka kumikumi a tautolu he vala tala nei mo e vala tala ka mui mai?

 ³ He Tohi Tapu, ono e matapatu maveheaga ne matutaki ke he Kautu faka-Mesia ne pule a Keriso Iesu. Ko e tau mena nei ko e (1) maveheaga faka-Aperahamo, (2) maveheaga he Fakatufono, (3) maveheaga faka-Tavita, (4) maveheaga ma e ekepoa tuga a Mekisateko, (5) maveheaga foou, mo e (6) maveheaga he Kautu. Kia kumikumi la tautolu ke he tau maveheaga takitaha kua matutaki ke he Kautu mo e gahuahuaaga he finagalo he Atua ma e lalolagi mo e tau tagata.​—Kikite manatu “ Puhala ke Fakakatoatoa he Atua e Finagalo Haana.”

4. He fakamau he tohi ha Kenese, ko e heigoa e tau fakavēaga ne taute e Iehova ne kua lauia e tau tagata?

⁴ Tauteute e Iehova e lalolagi ha tautolu ke maeke e tau tagata ke nonofo i ai. Ti taute e Iehova e tau fakavēaga nai: (1) To tufuga he Atua e tau tagata ke he fakatai haana. (2) To taute he tau tagata e lalolagi ke eke mo parataiso mo e fakapuke aki e tau tama tututonu ha lautolu. (3) Nakai lata e tau tagata ke kai mai he akau ke iloa e mitaki mo e kelea. (Kene. 1:26, 28; 2:16, 17) Ko e tau fakavēaga nei ne tolu ko e fakamaamaaga katoa he finagalo he Atua ma e tagata mo e lalolagi. Ti ko e ha ne taute he Atua e tau maveheaga?

5, 6. (a) Lali fēfē a Satani ke taofi e finagalo he Atua mai he fakamooli? (e) Taute fēfē e Iehova e totokoaga i Etena?

⁵ Kamata e Satani e totokoaga ke he Atua mo e haana finagalo. Ne hagaaki a ia ke he omaoma he tagata ke he Atua he kamatamata a Eva ke kai e fua lakau mai he akau ke iloa e mitaki mo e kelea. (Kene. 3:1-5; Fakakite. 12:9) He taute e mena nei, ne totoko e ia e tonuhia he Atua ke pule ke he Haana tufugatia. Fakamui, ne tukupau foki e Satani e tau tagata he tapuaki ke he Atua ma e tau kakano lotokai.​—Iopu 1:9-11; 2:4, 5.

⁶ Fēfē e puhala ne taute e Iehova e totokoaga nei? Maeke a ia ke tamate e tau tagata totoko. Ka e kakano e mena ia, to nakai kautū e finagalo he Atua ke fakapuke e lalolagi aki e tau fanau ha Atamu mo Eva. Ne fifili a Iehova ke nakai tamate e tau tagata totoko. Ka e foaki e ia e perofetaaga ne mua, ko e maveheaga faka-Etena. Ne mauokafua ai ko e tau vala tala takitaha he tau maveheaga he Atua ma e lalolagi mo e tau tagata to fakamooli ai.​—Totou Kenese 3:15.

7. Ko e heigoa ne fakakite he maveheaga faka-Etena hagaao ke he gata mo e fanau haana?

⁷ Puhala he maveheaga faka-Etena, ne fakahala mate he Atua e gata mo e haana fanau, ko Satani ko e Tiapolo haia mo lautolu ka kau mo ia ke totoko e tonuhia he Atua ke pule. Ne tuku age he Atua ke he fanau he fifine e pule ke tamate a lautolu nei ne totoko. Ti fakakite he maveheaga faka-Etena to utakehe a Satani mo e tau lauiaaga he totokoaga haana. Fakakite foki he maveheaga e puhala ka taute e mena nei.

8. Ko e heigoa ne fakaako e tautolu hagaao ke he kitiaaga ke he fifine mo e fanau haana?

⁸ Ko hai e tama he fifine? Ko e tama kua lata ke eke mo mena moui fakaagaaga. Ko e ha? Ha ko e tama nei ka “fakaoti ai” a Satani, ko e mena moui fakaagaaga nakai kitia. (Hepe. 2:14) Ti ko e fifine ne fanau e tama nei kua nakai kitia foki. He tupu tokologa e fanau he gata, ko e kitiaaga ke he fifine mo e fanau haana kua matutaki mo mena galo kavi  ke 4,000 tau he mole e maveheaga faka-Etena. He tau tau ia, loga e maveheaga ne taute e Iehova nukua kitia e fanau mo e puhala ka liu e Atua ke ati hake e malona ne fakatupu he totokoaga ha Satani.

9. Ko e heigoa e maveheaga faka-Aperahamo, ti ko e magaaho fe ne gahuahua ai?

⁹ Kavi ke he 2,000 tau he mole e fakatū he maveheaga faka-Etena, ne tala age a Iehova ki a Aperahamo ke toka e kaina haana he maaga ko Uro mo e fano ke he motu ko Kanana. (Gahua 7:2, 3) Tala age e Atua ki a ia: “Kia toka e koe hau a kelekele, mo e hau a motu ne fanau ai, mo e faoa he hau a matua tane, ti fano ke he motu ke fakakite atu e au kia koe. To eke foki e au a koe mo motu lahi, to fakamonuina e au a koe, to fakalilifu e au hau a higoa; to eke ni a koe mo monuina. To fakamonuina e au a lautolu kua fakamonuina a koe, ka e fakamalaia e au a lautolu kua kaialu kia koe; to monuina foki ia koe e tau faoa oti ni he lalolagi.” (Kene. 12:1-3) Ko e maveheaga he Atua ki a Aperahamo ne fakahigoa ko e maveheaga faka-Aperahamo. Nakai iloa tonu e tautolu e magaaho fakamua ne taute e Iehova e maveheaga haana mo Aperahamo. Ka e iloa e tautolu ne gahuahua e maveheaga he tau 1943 ato fai Keriso, he mogo ne 75 e tau he moui ha Aperahamo, ne toka e ia a Harana mo e fina atu ke he taha faahi he Vailele ko Eufirate.

10. (a) Fakamooli fēfē e Aperahamo kua tua malolō a ia ke he tau maveheaga he Atua? (e) Ko e heigoa e tau vala tala ne fakakite fakahaga e Iehova hagaao ke he tama he fifine?

¹⁰ Ne lagaloga e fatiaki e Iehova e maveheaga haana ki a Aperahamo, ti he tau magaaho takitaha ne fai vala foki ne lafi ki ai. (Kene. 13:15-17; 17:1-8, 16) Ko e  tua ha Aperahamo ke he tau maveheaga he Atua ne malolō lahi ti makai foki a ia ke poa e tama fakahele haana. Ti omoomoi a Iehova ke fakamalolō e maveheaga he fakamau to fakamooli ai e maveheaga haana. (Totou Kenese 22:15-18; Heperu 11:17, 18.) He gahuahua e maveheaga faka-Aperahamo, ne fakakite fakahaga e Iehova e tau vala tala aoga hagaao ke he fanau he fifine. To tupu mai e tama he magafaoa ha Aperahamo, to putoia e tau tagata tokologa, to fekafekau ko e tau patuiki, to moumou e tau fī oti he Atua, ti eke mo fakamonuina ma e tau tagata tokologa.

11, 12. Fakakite fēfē he tau Tohiaga Tapu ko e tau fakamauaga he maveheaga faka-Aperahamo to fakamooli he puhala lahi ke uaaki, ti ko e heigoa e kakano he mena ia ma tautolu?

¹¹ Ko e tau fakamauaga he maveheaga faka-Aperahamo ne fakamooli mua he mogo ne moua he tau ohi ha Aperahamo e Motu he Maveheaga. Ka e fakakite he Tohi Tapu to tamai he maveheaga nei e tau mena ne mua atu e aoga. (Kala. 4:22-25) Ne fakamaama he aposetolo ko Paulo ko e matapatu vala he fanau ha Aperahamo ko Iesu Keriso. Ko e vala ke uaaki kua hagaao ke he 144,000 he tau Kerisiano fakauku. (Kala. 3:16, 29; Fakakite. 5:9, 10; 14:1, 4) Ko e fifine he maveheaga faka-Etena ko e vala he lagi he fakatokatokaaga he Atua. Ko e fifine nei kua fakahigoa ko “Ierusalema i luga” nukua moua mai he tau mena momoui fakaagaaga fakamooli. (Kala. 4:26, 31) Ne fakamau mai he maveheaga faka-Aperahamo, to tamai he tama he fifine e tau aoga tukulagi ke he tau tagata.

¹² Kua foaki he maveheaga faka-Aperahamo e fakamooliaga fakavē ma e Kautu he lagi ti hafagi e puhala ma e Patuiki mo e haana tau kau gahua ke moua e Kautu ia. (Hepe. 6:13-18) Fiha e leva he maveheaga nei? Talahau he Kenese 17:7 ko e “maveheaga tukulagi” a ia. To gahuahua ai ato moumou he Kautu e tau fī he Atua mo e ato fakamonuina e tau magafaoa oti he lalolagi. (1 Kori. 15:23-26) Ka ko e tau aoga he maveheaga nei kua tukulagi. Fakakite he maveheaga he Atua mo Aperahamo ko e finagalo ha Iehova ma e tau tagata tututonu ke “fakapuke foki e lalolagi” to fakamooli.​—Kene. 1:28.

13, 14. Ko e heigoa ne fakamooli he maveheaga faka-Tavita?

¹³ Ko e maveheaga faka-Etena mo e maveheaga faka-Aperahamo ne fakaako ki a tautolu kua fakavē tumau e pule ha Iehova ke he tau tuaga tututonu haana. Ti ko e Kautu faka-Mesia ne fakatū he Atua kua fakavē foki ke he tau tuaga tututonu ia. (Sala. 89:14) To fakahehē nakai e Kautu faka-Mesia? To lata nakai e fakatufono nei he Kautu ke fakafoou? Fakamooli he taha maveheaga ne fakavē to nakai tupu e mena nei.

¹⁴ Ne taute e Iehova e maveheaga ke he Patuiki ko Tavita ha Isaraela i tuai. Ko e maveheaga ia ne fakahigoa ko e maveheaga faka-Tavita. (Totou 2 Samuela 7:12, 16.) Mavehe e Iehova, ko e Mesia to taha he tau ohi ha Tavita. (Luka 1:30-33) He puhala nei, ne foaki e Iehova lahi e vala tala pauaki hagaao ke he laini he magafaoa he Mesia. Pehē a Iehova ko e tama nei ha Tavita to “ha ha i ai e [“tonuhia,” NW]” ke eke mo Patuiki he Kautu faka-Mesia. (Eseki. 21:25-27) To pule tukulagi e tuaga patuiki ha Tavita ha ko Iesu ko e tama ha Tavita, “to tumau tukulagi . . . ko e hana nofoaiki  foki ke tuga e la ia.” (Sala. 89:34-37) Maeke ia tautolu ke mauokafua to nakai fakahehē e pule he Mesia mo e tau aoga kua moua mai he pule nei to tumau tukulagi!

15-17. Hagaao ke he maveheaga ma e ekepoa tuga a Mekisateko, ko e heigoa foki e kotofaaga ka moua he tama, mo e ko e ha?

¹⁵ Ko e maveheaga faka-Aperahamo mo e maveheaga faka-Tavita ne fakamooli ko e tama he fifine to pule ko e patuiki. Ke maeke he tau tagata ke aoga katoatoa i ai, to nakai ni ko e patuiki hokoia e tama. To eke foki e tama mo ekepoa. Ko e ekepoa ni ka foaki e poa kua lata ke maeke he tau tagata ke tokanoa mai he agahala ti eke mo vala he magafaoa ha Iehova he tau fekafekau fakamooli he lagi mo e he lalolagi. Ke kitia to eke e tama mo ekepoa, ne taute foki e Iehova taha maveheaga fakavē, ko e maveheaga ma e ekepoa tuga a Mekisateko.

¹⁶ Ne fakakite he Atua puhala he Patuiki ko Tavita to taute e Ia e maveheaga mo Iesu. Ko e fakavēaga ia ne putoia ua e mena: fakamua, ko Iesu to ‘nofo ke he lima matau he Atua’ mo e moua e pule ke kautū ke he tau fī oti haana; mo e uaaki, ko Iesu to ekepoa tukulagi ke tuga a Mekisateko. (Totou Salamo 110:1, 2, 4.) Ko e ha kua eke a Iesu mo ekepoa ‘ke tuga a Mekisateko’? Ato kautū e tama ha Aperahamo ke he Motu he Maveheaga, ko Mekisateko ko e patuiki he maaga i Salema mo e ko e “ekepoa he Atua mua ue atu.” (Hepe. 7:1-3) Ne kotofa fakahako e Iehova a ia mo patuiki mo e ekepoa, ti ko Mekisateko ni e tagata ne fakamua ia Iesu ne moua ua e kotofaaga. Ti nakai fai fakamauaga kua fai tagata ne moua e tuaga nei ne fakamua po ke fakamui ia Mekisateko, ke tuga “kua tumau tukulagi a ia ko e ekepoa.”

¹⁷ Puhala he maveheaga nei, ne kotofa fakahako he Atua a Iesu ke eke mo ekepoa. To matutaki a Iesu mo ‘ekepoa ke tuga a Mekisateko.’ (Hepe. 5:4-6) Kua fakakite fakamaali he maveheaga nei kua fakamau e Iehova to fakaaoga e ia e Kautu faka-Mesia ke fakamooli e finagalo haana ma e tau tagata mo e lalolagi.

18, 19. (a) Ko e tau maveheaga kua fakatutala a tautolu ki ai ne matutaki fēfē ke he Kautu? (e) Ko e heigoa ha tautolu ka fakatutala ki ai he vala tala ka mui mai?

¹⁸ Kua fakaako tuai a tautolu ke he tau puhala kua matutaki e tau maveheaga takitaha ke he Kautu faka-Mesia mo e puhala kua fakatū mauokafua e Kautu ke he tau fakamauaga fakavē. Kua fakamooli he maveheaga faka-Etena to fakaaoga e Iehova e tama he fifine ke taute e finagalo haana ma e lalolagi mo e tau tagata ke kautū. Kua fakamaama he maveheaga faka-Aperahamo ko hai e tama nei ti ko e heigoa e matagahua he tama ia.

¹⁹ Ko e maveheaga faka-Tavita kua foaki foki e tau vala tala hagaao ke he laini he magafaoa he Mesia. Ko e maveheaga ia foki kua foaki ki a Iesu e tonuhia ke pule tukulagi ke he lalolagi. Ko e maveheaga ma e ekepoa tuga a Mekisateko kua fakamooli to eke e tama mo ekepoa. Ka e nakai ni ko Iesu tokotaha ka lagomatai e tau tagata ke mitaki katoatoa. Ha ha i ai e falu ne kotofa ke fekafekau ko e tau patuiki mo e tau ekepoa. O mai a lautolu i fe? To fakatutala e mena ia he vala tala ka mui mai.