KUA fifili e matakau he tau Kerisiano fuata ke ō ke kitekite e ata kifaga. Logona e lautolu kua fiafia lahi e tokologa he atu ha lautolu he aoga ki ai. Mogo ne hohoko atu a lautolu ke he kifaga, onoono a lautolu ke he tau fakatino ti kitia e tau kanavaakau tau malolō mo e tau fifine ne nakai lilifu e tau mena tui. Ko e heigoa ha lautolu ka taute? To o atu agaia ni kia a lautolu ke he kifaga ke kitekite e ata?

Kua fakakite he tuaga nei na fehagai a tautolu mo e tau fifiliaga loga ka lauia mitaki po ke kelea e tuaga fakaagaaga mo e fakafetuiaga ha tautolu mo Iehova. He falu mogo, liga foli a koe ke taute e taha mena, ka e liu a koe manamanatu ke he tuaga ti hiki e manamanatuaga haau. Nakai kia ko e fakauaua a ia, po ke liga latatonu a ia?

Ko e fakaalofa ha tautolu ma Iehova ne omoomoi a tautolu ke tukulele e tau momoui ha tautolu ki a ia ti papatiso. Ko e manako mogoia he tau loto ha tautolu ke tumau e fakamooli ke he Atua. Ka ko e fī ha tautolu ko Satani ko e Tiapolo kua eketaha ke moumou e mahani fakamooli ha tautolu. (Fakakite. 12:17) Kua taute e tautolu e fifiliaga ke fekafekau ki a Iehova mo e omaoma ke he tau poaki haana. Hagaao ke he tukuleleaga ha tautolu ki a Iehova, ko e momoko ha ia ka hiki e tau manamanatuaga ha tautolu! To lauia kelea ai e tau momoui ha tautolu.

Molea 26 e senetenari kua mole, ne fakatū he patuiki a Papelonia ko Nepukanesa e tupua auro lahi ti poaki e tau tagata oti ke fakaveveli mo e hufeilo ki ai. Ko e ha tagata ne nakai taute pihia to liti ki loto he gutuumu kakā. Ko e tau tagata matakutaku Atua tokotolu ne tapuaki ki a Iehova​—ko Sataraka, Mesako, mo Apetiniko​—ne nakai omaoma. Ha kua nakai tukutukuhifo a lautolu ke he tupua ia, ne tolo a lautolu ke he gutuumu kakā. Ne fakahao fakamana e Iehova a lautolu, ka kua  makai a lautolu ke fakahagahaga kelea e tau momoui ha lautolu ka e nakai fakahui e fifiliaga ha lautolu ke fekafekau ke he Atua.​—Tani. 3:1-27

Fakamui, ne fakamakamaka e perofeta ko Tanielu ke he liogi pete he fakamatakutaku ke liti ki loto he ana leona. Ē, ne pipiki mau a ia ke he fakaholoaga haana he liogi lagatolu he aho ki a Iehova. Nakai hiki e fifiliaga ha Tanielu ke tapuaki ke he Atua mooli. Ti ko e fua, ne fakahao e perofeta mai he “tau lima he tau leona.”​—Tani. 6:1-27

Momoui fakatatau foki e tau fekafekau he Atua he vahā nei ke he tukuleleaga ha lautolu ki a Ia. He aoga i Aferika, ko e matakau he tau tama aoga ne ko e Tau Fakamoli a Iehova kua fakaheu ke fai vala he faiagahau ke tapuaki ke he fakamailoga he motu. Ne fakamatakutaku ki a lautolu ke fakaoti mai he aoga ka nakai fakalataha a lautolu mo e falu tama aoga. Nakai leva, ne ahiahi atu e ikipule he faahi fakaako ke he taone mo e tutala ke he falu he tau tama aoga Fakamoli. He totonu ka e mauokafua ne fakamaama he tau fuata Fakamoli nei e tuaga ha lautolu. Tali mai he mogoia, ne nakai liu e matakupu lagā mai foki. Kua maeke e tau matakainaga fuata ke ō he aoga ka e nakai peehi ke fakahui ha lautolu a fakafetuiaga mo Iehova.

Manamanatu foki ki a Joseph, ne mamahi e hoana he gagao kenesā ti mate fakaofo. Ne maama mo e fakalilifu he magafaoa ha Joseph e tau manako haana ke he tau fakatokaaga mauku. Ka e nakai haia he kupu mooli e magafaoa he hoana haana, ti manako a lautolu ke taute e tau aga fakamotu pauaki he tanuaga, putoia e tau faiagahau ne nakai fakafiafia e Atua. Ne talahau e Joseph: “Ka nakai fakahui au, ne eketaha a lautolu ke fakaohooho e fanau haaku; ka e fakatumau a lautolu oti ke mauokafua. Ne lali foki e magafaoa ke fakatoka e alaala he kaina haaku ko e aga fakamotu, ka e tala age au ka manako lahi a lautolu ke taute e alaala, to nakai taute he kaina haaku. Iloa e lautolu to nakai felauaki e alaala ke he tau taofiaga haaku po ke he hoana haaku, ti he mole e tau fakatutalaaga loga ne taute ai e lautolu he matakavi kehe.

“He mogo uka nei he maanu, ne olelalo au ki a Iehova ma e lagomatai ke nakai moumou he magafaoa ha mautolu e tau fakatufono Haana. Logona e ia e tau liogi haaku ti lagomatai a mautolu ke fakatumau e mauokafua pete e tau peehiaga.” Ma Joseph mo e fanau haana, ne nakai fifili a lautolu ke hiki e tau manamanatuaga hagaao ke he tapuakiaga ha lautolu.

Nakai leva he mole e Paseka he 32 V.N., ne fina atu e fifine Suria Foinike ki a Iesu Keriso he matakavi i Saitonu. Ne ole tumau a ia ki a Iesu ke vega e temoni mai he tama fifine haana. Mogo fakamua, ne nakai tali e Iesu e matua fifine. Tala age a ia ke he tau tutaki haana: “Nakai fakafano mai au ke he falu, ka ko e tau mamoe ni hokoia he faoa a Isaraela ne galo.” He fakamakamaka a ia, ne pehē a Iesu: “Nakai lata ke uta e mena kai he fanau mo e liti ke he tau kuli.” He fakatātā e lahi he tua, ne tali he fifine: “Ko e Iki na e, ko e moli a koe; ka ko e mena kai he tau kuli e tau valavala mena ne mokulu hifo he kaiagamena he tau tagata ha lautolu.” Ne talia e Iesu e ole he fifine ti fakamaulu e tama fifine haana.​—Mata. 15:21-28.

He taute pihia, kua fifitaki e Iesu a Iehova he fakakite e fakamakai ke hiki ka fakaatā he tuaga ma e mena ia. Ma e fakatai, ne manamanatu e Atua ke fakaotioti e tau Isaraela he mogo ne talaga e lautolu e punua povi auro, ka e fakaatā e Ia a Mose ke liu hiki Haana fifiliaga.​—Esoto 32:7-14.

Ne fifitaki he aposetolo ko Paulo a Iehova mo Iesu. Fai magaaho ne logona hifo e Paulo kua nakai lata ke uta a Ioane Mareko mo laua he tau fenoga misionare ha kua tiaki e ia a Paulo mo Panapa he fenoga misionare fakamua ha lautolu. Ka e fakamui, mailoga mooli e Paulo kua fakamakutu ai a Mareko ti kua uho lahi ki a ia. Ti pehē a Paulo ki a Timoteo:  “Kia o mai a mua mo Mareko; ha kua aoga a ia kia au ke he gahua.”​—2 Timo. 4:11.

Ka e kua a tautolu? He fifitaki ha tautolu a Matua he lagi ne fakaalofa hofihofi noa, fakauka, mo e fakahelehele, liga latatonu ia tautolu ke hiki e tau manamanatuaga. Ma e fakatai, maeke ia tautolu ke hikihiki e manatu ha tautolu hagaao ke he falu. He nakai tatai mo Iehova mo Iesu, ne nakai mitaki katoatoa a tautolu. Ka fakamakai a laua ke hiki, lata nakai ke manamanatu a tautolu ke he tau tuaga fakalolelole he falu ti liga hiki e tau manamanatuaga ha tautolu?

He hiki e tau manamanatuaga ha tautolu kua liga ko e fifiliaga mitaki ka manamanatu ke he tau foliaga fakateokarasi. Falu ne fakaako e Tohi Tapu ti kua fai magaaho he o atu ke he tau feleveiaaga he fakapotopotoaga kua liga fakatuai ke papatiso. Po ke falu matakainaga kua liga fakauaua ke hū he fekafekauaga paionia pete ni ko lautolu he tuaga ke fakalaulahi e fekafekauaga ha lautolu he puhala ia. Mo e falu matakainaga taane kua nakai makai ke foli atu ke he tau matagahua he fakapotopotoaga. (1 Timo. 3:1) Kitia nakai e koe a koe he taha he tau tuaga ia? Uiina e Iehova a koe ke fiafia e tau kotofaaga pihia. Ti ko e ha he nakai hiki e manamanatuaga haau mo e fakalataha ke he olioli he foaki e koe a koe ke he Atua mo e falu?

Talahau e Ella hagaao ke he fekafekauaga haana he la ofisa he Tau Fakamoli a Iehova i Aferika: “Mogo fakamua ne hau au ke he Peteli, nakai iloa e au to nofo loa au. Manako lahi au ke fekafekau loto katoa ki a Iehova, ka e pipiki lahi foki e logonaaga haaku ke he haaku a magafaoa. Mogo fakamua, ne misi lahi mahaki e au e magafaoa haaku! Ka e fakamafana he kapitiga he poko ne nofo mo au a au, ti fifili au ke nofo. Mole e hogofulu e tau he nofo he Peteli, manako au ke matutaki ke fekafekau ke he tau matakainaga haaku he fakatumau ke he kotofaaga haaku he Peteli.”

Manatu nakai e koe e mena ne tupu ki a Kaino he mahekeheke a ia ke he tehina haana ti ita lahi mahaki? Tala age e Atua ke he tagata ita nei to moua e ia e taliaaga kaeke ke liu a ia ke taute e mitaki. Fakatonu he Atua a Kaino ke kautū ke he agahala ‘kua takoto tuai ke he gutuhala.’ Maeke ia Kaino ke hiki e aga mo e manamanatuaga haana, ka e fifili na ia ke fakaheu e fakatonuaga he Atua. Momoko ai, kelipopo e Kaino e tehina haana ti eke mo tagata kelipopo tagata fakamua!​—Kene. 4:2-8.

Manamanatu foki ke he fakafifitakiaga he Patuiki ko Usia. Mogo fakamua, ne taute e ia e mena kua hako ke he fofoga ha Iehova ti matutaki ke kumi atu ke he Atua. Momoko ai, ne fakakelea e Usia e mahani mitaki haana he mahani fakatokoluga. Ne fina atu a ia ke he faituga ke huhunu e tau mena manogi pete he nakai ko e ekepoa a ia. He hataki he tau ekepoa a ia ke ua taute e aga fakaikaluga nei, hiki nakai e manamanatuaga haana? Nakai. Ne “ita” a Usia ti fakaheu e hatakiaga ha lautolu. Ti ko e fua, ne ta e Iehova a ia ke he lepela.​—2 Nofo. 26:3-5, 16-20.

Ē, ha ha i ai e tau magaaho kua lata pauaki a tautolu ke hiki e tau manamanatuaga ha tautolu. Hanei e fakafifitakiaga he vahā foou nei. Ne papatiso a Joachim he 1955, ka e tuku a ia ki tua he fakapotopotoaga he 1978. Molea 20 e tau he mole, ha ha ia ia e aga fakatokihala ti fakaatā mai a ia ke eke mo taha he Tau Fakamoli a Iehova. Nakaila leva ia ne hūhū e motua ki a ia ko e ha ne leva e fakatali haana ato ole ke liu fakaatā mai. Tali e Joachim: “Ne ita mo e fakatokoluga au. Tokihala au he leva lahi e fakatali haaku. He tuku au ki tua ne iloa e au na fakaako he Tau Fakamoli a Iehova e kupu mooli.” Lata a ia ke hiki e aga haana ti fakatokihala.

Liga ha ha a tautolu he tuaga ne kua lata ke hiki e tau manamanatuaga mo e puhala ha tautolu. Kia makai a tautolu ke taute pihia ke fakafiafia a Iehova.​—Sala. 34:8.