KO GUY HOLLIS PIERCE, ko e matakainaga he Kau Fakatufono he Tau Fakamoli a Iehova, ne oti e fekafekauaga haana he lalolagi he Aho Ua ia Mati 18, 2014. Ne 79 e tau haana he moui he magaaho ne fakamooli e amaamanakiaga haana ke fakaliu tu mai ko e taha he tau matakainaga he Keriso.​—Hepe. 2:10-12; 1 Pete. 3:18.

Kua fanau a Guy Pierce i Auburn, California i U.S.A., ia Novema 6, 1934 ti papatiso he 1955. Mau e ia haana hoana fakahele ko Penny he 1977 ti fanafanau. Ko e mena ne tupu ki a ia ko e tagata fai magafaoa ne lafi ke he aga fakamatua haana. He 1982 ne lavelave a ia mo Penny he gahua paionia, ti he 1986 ne kamata e ia e fekafekauaga ne 11 e tau he eke mo leveki takaiaga i Amerika.

He 1997, ne kamata a Guy mo Penny Pierce ke fekafekau ko e tau matakainaga he magafaoa Peteli i Amerika. Ne gahua e Matakainaga ko Pierce he Faahi Gahua he Fekafekauaga, ti he 1998 ne kotofa a ia ko e lagomatai ke he Komiti Kau Gahua he Kau Fakatufono. Ko e kotofaaga he Matakainaga ko Pierce ko e taha he Kau Fakatufono ne fakailoa ia Oketopa 2, 1999 he fonoaga lagataha he tau he Watch Tower Bible and Tract Society of Pennsylvania. He tau tau kua mole, kua fekafekau a ia mo e tau komiti Kau Gahua, Tohia Tohi, Fakailoaaga, mo e Leveki.

Ko e tau tagata mai he tau feakiaga mo e tau aga fakamotu kua tata lahi ke he Matakainaga ko Pierce ha ko e mamali mafanatia mo e aga totonu haana. Ka ko e aga haana ne hofihofi pauaki ke he falu ko e haana fakaalofa, mahani fakatokolalo, fakalilifu ke he tau matafakatufono mo e tau matapatu fakaakoaga tututonu, mo e tua katoatoa ki a Iehova. Ki a Guy Pierce, kua maeke e laā ke nakai hake mai ka ko e tau maveheaga ha Iehova to fakamooli tumau, ti manako a ia ke tala age e tala mooli ia ke he lalolagi katoa.

Ne gahua malolō e Matakainaga ko Pierce he fekafekau ki a Iehova, he matike tuai he mogo pogipogi ti fa gahua mule he pō. Ko e tau fenoga haana ke fakamafana e tau matakainaga Kerisiano ne kua fano viko a ia ke he lalolagi katoa, ti nakai lavelave lahi a ia ke fai magaaho mo e tau matakainaga takitaha he magafaoa Peteli mo e falu ne manako ke he haana fakafetuiaga, fakatonuaga, mo e lagomataiaga. Pete ne loga e tau tau he mole, manatu he tau matakainaga e haana fakamokoi, kapitiga, mo e fakamalolōaga he Tohi Tapu.

Ko e matakainaga mo e kapitiga fakahele ha tautolu kua toka hifo e hoana mo e tokoono e tama, pihia foki mo e tau mokopuna mo e tau fanau he tau mokopuna. Tokologa foki e fanau fakaagaaga haana. Ko e lauga mauku ma e Matakainaga ko Pierce kua taute e Mark Sanderson, ko e matakainaga he Kau Fakatufono he Peteli i Brooklyn he Aho Faiumu ia Mati 22, 2014. He falu matakupu foki ne tutala a ia hagaao ke he amaamanakiaga he Matakainaga ko Pierce ke he lagi ti totou e tau kupu ha Iesu: “Ne loga e tau mena ke nonofo ai ke he fale he haku a Matua; . . . Kaeke foki ke fano au mo e taute taha mena ke nonofo ai a mutolu, to liu mai au, ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au. Kua iloa e mutolu e mena ke fano au ki ai, kua iloa foki e mutolu e puhala.”​—Ioane 14:2-4.

Mooli, to misi lahi e tautolu e Matakainaga ko Pierce. Ka e fiafia a tautolu he ‘iloa e ia e puhala’ ke he ‘mena ke nofo’ mau a ia.