1-3. Ko e heigoa e tau paleko ne lauia ai e tau hoa mau? (Kikite fakatino he kamataaga.)

“KAEKE ke eketaha mooli mo e fakakite e koe kua manako a koe ke he fakamauaga haau ke kautū, maeke ia koe ke moua e monuina ha Iehova,” he ui he taane ne fiafia he mau ke 38 e tau. Ē, kua maeke he tau taane mo e tau hoana ke fiafia tokoua mo e felalagoaki he tau magaaho uka.​—Tau Fakatai 18:22.

² Ko e mena fa mahani ma e tau hoa mau ke lauia he falu mena uka. Fa talahau he Tohi Tapu e mena nei ko e “matematekelea ke he tino.” (1 Korinito 7:28) Ko e ha? He tau aho takitaha, maeke he tau lekua ke fakatupu e tupetupe he fakamauaga. Ha kua nakai mitaki katoatoa a laua, ko e tau taane mo e tau hoana he falu mogo kua fefakamamahiaki e tau logonaaga ha laua ti kaumahala ke fematutakiaki mitaki. (Iakopo 3:2, 5, 8) Tokologa e hoa ne lahi mahaki e gahua tupe ti feaki tama foki. Ko e tupetupe lahi mo e mategūgū kua paleko ke moua e magaaho ke fakamalolō e fakamauaga ha laua. Tau lekua fakatupe, gagao, po ke falu  mena uka foki ne liga fakalolelole fakahaga ha laua a fefakaalofaaki mo e fefakalilifuaki. Ti ko e fakamauaga ne tuga kua mauokafua ka hagahaga kelea ha ko e “tau gahua he tino,” tuga e mahani feuaki, matahavala fakalialia, feitaaki, taufetoko, ita tafuā, vale, lagalagahou.​—Kalatia 5:19-21.

³ Ke au atu e kelea, ko e tau tagata he “tau aho fakamui” nei ne fa lotokai mo e nakai fakalilifu ke he Atua, ko e tau aga ka fakakona e fakamauaga. (2 Timoteo 3:1-4) Lafi ki ai, ko e fī vale lahi kua eketaha ke moumou e tau fakamauaga. Kua hataki he aposetolo ko Peteru a tautolu: “Ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia.”​—1 Peteru 5:8; Fakakiteaga 12:12.

4. Maeke fēfē ke moua e fakamauaga malolō mo e fiafia?

⁴ Ko e taane i Sapanī ne pehē: “Ne lahi mahaki e tupetupe haaku he tuaga fakatupe. Ti nakai fetutalaaki lahi a au mo e hoana haaku, ne lauia lahi mahaki foki a ia he pehiaaga. Lafi ki ai, ne nakai la leva e lauia a ia he tau lekua malolō tino hagahaga kelea. He falu mogo, ne fakatupu he tupetupe nei a maua ke feoka.” To fai paleko he fakamauaga, ka e maeke a tautolu ke kautū mai ai. Mo e lagomatai ha Iehova, maeke he tau hoa ke moua e fakafetuiaga malolō mo e fiafia. (Totou Salamo 127:1.) Kia fakatutala a tautolu ke he lima e puhala ke ati e fakamauaga malolō mo e tumau. To kumikumi foki a tautolu ke he kakano kua lata e fakaalofa ke fakamalolō tumau e fakamauaga.

5, 6. Ko e heigoa ka taute he tau taane mo e tau hoana ke fakalataha a Iehova ke he fakamauaga ha laua?

⁵ Ka mahani fakamooli mo e omaoma e hoa ki a Iehova, to mauokafua e fakavēaga  he fakamauaga ha laua. (Totou Fakamatalaaga 4:12.) He muitua e takitakiaga fakaalofa he Atua, kua fakalataha he tau taane mo e tau hoana e Atua he fakamauaga ha laua. Pehē e Tohi Tapu: “To logona foki he tau teliga ha mutolu e kupu ki tua ha mutolu, ka afe age a mutolu ke he fahi matau po ke afe age a mutolu ke he fahi hema, kua pehe mai, Ko e puhala hanai ke o ai a mutolu.” (Isaia 30:20, 21) He vahā nei “logona” he tau hoa e kupu ha Iehova ka totou tokoua e laua e Tohi Tapu. (Salamo 1:1-3) Kua fakamalolō fakalahi foki e fakamauaga ha laua he taute tumau e tapuakiaga magafaoa ne fiafia mo e ati hake. Ti ka liogi tokoua e tau hoa mau he tau aho takitaha, kua ati hake e laua e fakamauaga ka totoko e tau pehiaaga he lalolagi ha Satani.

⁶ Ko Gerhard mai i Sihamani ne pehē: “Ka ataata e olioli ha maua ha ko e tau mena vihi fakatagata po ke nakai maama mitaki, ko e fakatonuaga mai he Kupu he Atua kua lagomatai a maua ke feaki e fakauka mo e mahani fakamagalo.” Lafi e ia ko e tau mahani nei kua latatonu ke lata mo e fakamauaga kua kautū. Ka fakamakamaka e tau taane mo e tau hoana ke eketaha ke tumau e Atua he fakamauaga ha laua he fekafekau tokoua ki a Ia, kua fakatata lahi a laua ki a Iehova ti fakamalolō e fakafetuiaga ha laua.

7. Kua lata ke taute fēfē he taane e hoana haana?

⁷ Ko e puhala ke takitaki he taane e magafaoa haana ka lagomatai ke ati hake e fakamauaga malolō mo e fiafia. Pehē e Tohi Tapu: “Ko e ulu he tau tane oti ko Keriso haia, ko e ulu he hoana ko e tane haia.” (1 Korinito 11:3) Ko e heigoa e kakano he mena ia? Kua lata he tau taane ke taute e tau hoana ha lautolu ke he puhala ne taute e Iesu e tau tutaki haana. Nakai fakamamahi po ke favale a ia. Ne tumau a Iesu ke fakaalofa, totonu, manamanatu, loto holoilalo, mo e fakatokolalo.​—Mataio 11:28-30.

8. Maeke fēfē he taane ke moua e fakaalofa mo e fakalilifu he hoana haana?

⁸ Ko e tau taane Kerisiano kua nakai lata ke poaki ke moua e fakalilifu mai he tau hoana ha lautolu. Ka kua lata ai ke “matutaki ke fakakite ki a lautolu e manamanatuaga” mo e “kia fakalilifu ke he hoana, ha ko e kapiniu a ia kua mua he lolelole.” (1 Peteru 3:7; matahui tala NW) He toloaga tagata mo e he ko laua ni, kua lata he tau taane ke vagahau fakalilifu mo e fakakite e fakaalofa hofihofi noa. He puhala kua taute mo e vagahau ke he tau hoana ha lautolu, kua fakakite he tau taane kua uho e tau hoana ha lautolu ki a lautolu. (Tau Fakatai 31:28) Ka fakaalofa e taane ke he hoana haana, to fakaalofa mo e fakalilifu e ia e taane haana mo e to fakamonuina e Iehova e fakamauaga ha laua.

9. Maeke fēfē he hoana ke fakakite kua omaoma a ia?

⁹ Ko e fakaalofa nakai lotokai ki a Iehova ne fakavē ke he tau matapatu fakaakoaga haana ka lagomatai a tautolu ke fakatokolalo “ki lalo he lima malolo he Atua.” (1 Peteru 5:6) Ko e puhala uho kua fakakite he hoana e fakalilifu ma e pule ha Iehova ko e kaufakalataha mo e taane haana. Pehē e Tohi Tapu: “Ko mutolu, e  tau fifine, kia omaoma a mutolu ke he ha mutolu a tau tane, tuga ne mena kua lata ha ha he Iki.” (Kolose 3:18) Mooli liga nakai manako e hoana ke he tau fifiliaga oti he taane haana. Kaeke ke nakai molea e tau fifiliaga he taane ke he tau matafakatufono he Atua, to manako e hoana omaoma ke kaufakalataha mo e taane haana.​—1 Peteru 3:1.

10. Ko e ha kua uho e omaoma totonu?

¹⁰ Kua tuku age e Iehova e matagahua lilifu he magafaoa ke he tau hoana. Ko e hoana ko e hoa, po ko ia ne nofo mo e taane. (Malaki 2:14) Ka taute he hoa e tau fifiliaga fakamagafaoa, talahau fakalilifu he hoana e mena kua manatu a ia mo e puhala kua logona hifo a ia, ka e fakatumau a ia ke omaoma. To fanogonogo fakamitaki e taane iloilo ke he mena ne talahau he hoana haana. (Tau Fakatai 31:10-31) Ko e omaoma totonu ka tamai e olioli, mafola, mo e lagotatai ke he magafaoa. Ti ko e fua, to logona hifo he tau taane mo e tau hoana e makona ha kua iloa e laua kua fakafiafia e laua e Atua.​—Efeso 5:22.

11. Ko e ha kua latatonu e fakamagalo?

¹¹ Ke ati hake e fakamauaga kua tumau, kua lata he tau taane mo e tau hoana ke fakaako ke fefakamagaloaki. Ka matutaki e tau hoa ke ‘fefakaukaaki mo e fefakamagaloaki,’ kua fakamalolō e laua e fakafetuiaga ha laua. (Kolose 3:13) Ka e lolelole e fakamauaga ka nakai talia he hoa ke fakanimo e tau hepehepe kua mole mo e fakaaoga ai ke felatauaki. Tuga ni e tau maihiihi ka fakamalolo e fale, taute he tau logonaaga mamahi mo e ita e hoa ke uka lahi mahaki ke fakamagalo mo e gahua tokoua. Ka e mauokafua lahi e fakamauaga ka fefakamagaloaki e taane mo e hoana, tuga ni he fakamagalo e Iehova a laua.​—Mika 7:18, 19.

12. Ufiufi fēfē he fakaalofa e “tau hala loga”?

¹² Ko e fakaalofa mooli kua “nakai talahaua e kelea.” Ka “ko e fakaalofa ke ufiufi ai e tau hala loga.” (1 Korinito 13:4, 5; totou 1 Peteru 4:8.) Ka fakaalofa a tautolu ke he falu, kua nakai fai fakakaupāaga ke he lagafiha e fakamagalo e tautolu e falu. Ne hūhū e aposetolo ko Peteru ko e lagafiha kua lata a ia ke fakamagalo taha tagata, ne tali a Iesu: “Laga fitugofulu kua taki fitu.” (Mataio 18:21, 22) Ko e heigoa e kakano ha Iesu? Kakano a ia kua nakai fai fakakaupāaga ke he lagafiha e lata he Kerisiano ke fakamagalo e falu.​—Tau Fakatai 10:12. * (Kikite matahui tala.)

13. Totoko fēfē e tautolu e aga ke nakai fia fakamagalo atu?

¹³ Pehē a Annette mai i Sihamani: “Ka nakai fefakamagaloaki e tau hoa to tupu e ita mo e nakai falanaki ke he taha, ti ko e mena kona a ia ke he fakamauaga. Ko e fefakamagaloaki ko e pipi malolō ke he fakamauaga ti futiaki fakatata ai a laua.” Kia fakaaue ti fakakite e loto fakaaue. Kumi ke he tau mena ke navanava atu ke he hoa haau. Ka taute pihia to maeke a koe ke totoko e aga ke nakai fia fakamagalo atu. (Kolose 3:15) Ko e fua, to moua e koe e mafola ke he loto, kaufakalataha, mo e taliaaga he Atua.​—Roma 14:19.

14, 15. Ko e heigoa e Fakatufono Auro, ti maeke fēfē ke fakamalolō e fakamauaga kaeke kua fakagahuahua ai?

¹⁴ Liga manako a koe ke fakakite he tau tagata e fakalilifu ki a koe. Loto fakaaue a koe kaeke kua fanogonogo e falu ki a koe mo e manamanatu ke he haau a logonaaga. Ka kua logona nakai e koe taha ne pehē, “To taute e au ki a ia tuga ne taute e ia ki a au”? Falu magaaho maama e aga nei. Pete ia, pehē mai e Tohi Tapu: “Aua neke pehe a koe, Tuga he eke he tagata kia au, to eke pihia ni e au kia ia.” (Tau Fakatai 24:29) Fakaako e Iesu e tau tagata ke he puhala mitaki lahi ke lata mo e tau tutūaga vihi. Ko e mena ne talahau e Iesu kua fa mahani ke fakahigoa ko e Fakatufono Auro: “Tuga ne loto a mutolu kia eke he tau tagata kia mutolu, kia eke pihia foki e mutolu kia lautolu.” (Luka 6:31) Ko e kakano he manatu ha Iesu ke taute e tautolu ke he falu tuga ne manako a tautolu ke taute ki a tautolu. Kakano he mena nei ke foaki e tautolu ke he fakamauaga tuga ne manako a tautolu ke moua mai ai.

¹⁵ To fakamalolō he tau hoa e fakafetuiaga ha laua ka igatia mo e manamanatu fakamooli ke he tau logonaaga he taha. “Kua lali a maua ke fakagahuahua e Fakatufono Auro,” he talahau he taha taane i Aferika Toga. “Mooli, ha ha i ai falu mogo ne ita a maua, ka e gahua fakamalolō a maua ke taute e taha ke he puhala kua manako tokoua a maua ki ai​—he fakalilifu.”

16. Ko e heigoa kua nakai lata he tau taane mo e tau hoana ke taute ki a laua ni?

¹⁶ Ua fakatapakupaku e tau lolelole he hoa haau ke he falu po ke fatiaki tumau e tau mahani ne vihiatia e koe, pete ni ko e fefeua a koe. Manatu ko e fakamauaga, nakai ko e laga ke kitia ko hai kua mua e malolō, po ke ko hai ne leo lahi, po ke ko hai ne maeke ke vagahau e tau kupu ne mua atu e mamahi. Mooli, nakai mitaki katoatoa oti a tautolu ti falu mogo fakaita e falu. Ka e nakai fai kakano mitaki ma e hoa mau ke fefakamāaki he fakaaoga e tau kupu fakamamahi ka fetutalaaki po ke, mua atu e kelea, ke poka po ke keli he taha e taha.​—Totou Tau Fakatai 17:27; 31:26.

17. Nonofo fakatatau fēfē e tau taane mo e Fakatufono Auro?

¹⁷ He falu aga fakamotu, ne fa keli he tau taane e tau hoana ke fakamooli aki ko e mena malolō a lautolu. Ka e pehē e Tohi Tapu: “Ko e tagata kua fakatuai ke ita, kua mua hana mitaki ke he toa; kua mua foki a ia kua pule ke he hana loto kia ia kua moua e maga motu he tau.” (Tau Fakatai 16:32) Kua lata he tagata ke moua e malolō ki loto ia ia ke fakakite e mahani fakalatalata ke tuga a Iesu Keriso, ko e tagata mua ue atu ne moui. Ko e tagata ne vale po ke keli haana hoana ko e tagata lolelole, to galo ni haana fakafetuiaga mo Iehova. Ko e salamo ko Tavita, ko e tagata malolō mo e loto malolō ne pehē: “Kia vivivivi a mutolu, aua foki neke hala; kia manamanatu hifo ke he tau loto  ha mutolu ke he tau moheaga ha mutolu, kia fakamamate foki a mutolu.”​—Salamo 4:4.

18. Ko e ha ne aoga ai ke fakakite tumau e fakaalofa?

¹⁸ Totou 1 Korinito 13:4-7. Ko e fakaalofa ko e fua uho lahi i loto he fakamauaga. Pehē e Tohi Tapu: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka . . . Ka e ha i luga he tau mena oti ia e fakaalofa ko e pipi haia ke fakamaopoopo ai.” (Kolose 3:12, 14) Kua lata he tau taane mo e tau hoana ke fakakite e fakaalofa nakai lotokai mo e fifitaki a Iesu Keriso, ne kua fiafia ke poa lukutoto a ia ma e falu. Kaeke kua fakavē e fakamauaga ke he fakaalofa pihia, to malolō ai pete ne tau aga fakahogohogo manava, tau paleko ke he malolō tino, tau lekua fakatupe, ti pihia mo e tau tuaga uka mo e tau matua fugavai.

19, 20. (a) Maeke fēfē e tau hoa ke kautū, ke ati hake e fakamauaga kua malolō mo e fiafia? (e) Ko e heigoa ka fakatutala ki ai ke he vala tala ka mui mai?

¹⁹ Ko e fakaalofa, mahani fakamooli, mo e tau gahua mitaki kua latatonu kaeke ke kautū e fakamauaga. Kaeke kua ha ha i ai e tau mena vihi, kua nakai lata e tau hoa ke tiaki e fakamauaga. Kua lata a laua ke eketaha ke fakatata ke he taha mo e taha. Ko e tau hoa ne fakaalofa ki a Iehova mo e ki a laua ni kua lata ke eketaha ke fakatonu e tau mena vihi ha laua, ha ko e mena “nakai tuai oti e fakaalofa.”​—1 Korinito 13:8; Mataio 19:5, 6; Heperu 13:4.

²⁰ Kua mua atu e uka ke ati e fakamauaga kua malolō mo e fiafia mua atu ke he “tau aho uka” nei. (2 Timoteo 3:1) Ka e maeke ha ko e lagomatai ha Iehova. Pete ia, fakamalolō agaia e tau hoa ke totoko e agaaga ne kua hufia ai e lalolagi katoa ke he mahani fakataane mo e fifine. Ke he vala tala ka mui mai, o mai ā ke kitia e puhala ne maeke he tau taane mo e tau hoana ke taute e fakamauaga ha laua ke tumau e malolō.