1, 2. (a) Ko e ha ne galo ai e palepale fulufuluola he toko 24,000 he tau Isaraela? (e) Ko e ha ne aoga ai e tala nei ki a tautolu?

NAKAI leva to hohoko atu e kautu ko Isaraela ke he Motu he Maveheaga, hogofulu e tau afe he tau tagata taane ne kaumahala ai ke he mahani “feuaki mo e tau fifine Moapi.” Ko e fakahikuaga ne 24,000 he tau Isaraela ne mamate. Kua leva e fakatalitali ti kua tata lahi a lautolu ke moua e tufaaga! Ka e momoko ai he galo kehe e palepale fulufuluola ha kua kaumahala a lautolu ke he mahani feuaki.​—Numera 25:1-5, 9.

² Ko e fakafifitakiaga matematekelea ia “kua tohi foki ke eke mo [hatakiaga] ma tautolu kua hohoko mai ke he vaha ke fakahiku ai.” (1 Korinito 10:6-11) Kua nonofo a tautolu he matahiku he “tau aho fakamui” ti kua tata lahi ke he lalolagi foou. (2 Timoteo 3:1; 2 Peteru 3:13) Ka e momoko, ha ko e falu ne tapuaki ki a Iehova kua lolelole ke he tau mahani ti kaumahala ke he tau kamatamata he mahani feuaki. Ko e magaaho nei kua mamahi a lautolu ha ko e tau fua he tau mahani ha lautolu, ti ka nakai tokihala a lautolu to liga galo kehe ia  lautolu e amaamanakiaga ke moui tukulagi he lalolagi Parataiso.

3. Ko e ha ne kua lata ai e tau hoa mau mo e takitakiaga mo e puipuiaga ha Iehova? (Kikite fakatino he kamataaga.)

³ Ko e tau taane mo e tau hoana kua lata mo e takitakiaga mo e puipuiaga ha Iehova ke laveaki e tau fakamauaga ha lautolu ha kua hufia e lalolagi ke he agaaga he mahani fakataane mo e fifine. (Totou Salamo 127:1.) He vala tala nei to fakatutala a tautolu ke he puhala ka puipui ai he tau hoa e fakamauaga ha laua. Kua lata ke puipui e tau loto ha laua, fakatata ke he Atua, fakatapulu ke he tagata foou, mitaki e matutakiaga, ti fakamooli ke he tau mena kua lata mo e fakamauaga.

4. Ko e ha e falu Kerisiano ne kua kamatamata ai ke taute e mahani feuaki?

⁴ Maeke fēfē he Kerisiano ke kaumahala ka kamatamata ke he mahani feuaki? Fa mahani ke kamata mai ai he tau mata. Fakamaama e Iesu: “Ka kikite atu taha ke he fifine kia manako ki ai, kua faivao tuai a ia ke he hana loto.” (Mataio 5:27, 28; 2 Peteru 2:14) Tokologa ne kua kaumahala ke he mahani feuaki, kua lolelole e tau mahani ha kua onoono ke he tau fakatino telefua, totou e tau tohi fakalagalaga loto, po ke kitekite ke he tau mena keleaina he Initanete. Falu kua kitekite ke he tau ata kifaga, tau taute tala, po ke tau fakaholoaga he televisoni ne kua taute pauaki e tau aga fakataane mo e fifine. Falu kua o atu ke he tau kalapu-pō mo e tau fale ne fakakitekite e tau tagata telefua po ke o atu ke he tau fale ke mulu e tau tino mo e taute falu mena kolokolovao.

5. Ko e ha kua lata ke puipui e tau loto nakai mitaki katoatoa ha tautolu?

⁵ Falu kua kaumahala ha kua fakakapitiga atu a lautolu ke he taha ne nakai ko e tau hoa mau ha lautolu. Kua nonofo a tautolu he lalolagi ne nonofo ai e tau tagata kua temotemoai lahi e mahani fakalatalata ka e moua e lautolu e fiafia ke he tau mahani feuaki oti. Ha ko e tau loto nakai mitaki katoatoa ha tautolu ne fa fakavaia mo e manako lahi, liga mukamuka ia tautolu ke feaki e manako loto ke he hoana po ke taane he taha tagata. (Totou Ieremia 17:9, 10.) Pehē a Iesu: “Kua hake mai he loto e tau manatu kelea, ko e keli tagata, ko e faivao, ko e feuaki.”​—Mataio 15:19.

6, 7. (a) Ko e heigoa ka hoko kaeke kua tupu e tau manako kelea he tau loto ha tautolu? (e) Kalo kehe fēfē a tautolu he agahala ki a Iehova?

⁶ Ka kamata e manako kelea ke tupu he tau loto ha laua tokoua ne femanakoaki, liga to maeke a laua ke kamata e tau fakatutalaaga ke he tau mena kua lata ke tutala ni e taane mo e hoana ki ai. Nakai leva to kumi lagatau tumau a laua ke fakalataha. To feleveia tumau a laua, ka e fakatupua ke pehē ko e feleveia noa ni. Ka hokulo lahi e femanakoaki ha laua to uka ke taute e mena kua hako. Ko e tupu lahi ki mua he fakafetuiaga ha laua to uka lahi ke fakaoti, pete ni kua iloa e laua kua hepe e mena ha laua ne taute.​—Tau Fakatai 7:21, 22.

⁷ To nimopō ia laua e tau tutūaga he tau mahani ha Iehova ha kua holo e tau fakatutalaaga mo e tau manako kelea ke tau tuilima, taufigita, tau amoamo, mo e tau fotafota ke he puhala feuaki. Momoko ai ha kua taute e laua e tau mena kua lata ni ke taute he hoana mo e taane. Kua “toho mo e hele” a laua he ha laua a tau manako lahi. Fakahiku mogoia ka malolō lahi e  manako, to holifono ai ke he mahani feuaki. (Iakopo 1:14, 15) Kua mua e kelea ha ko e mena maeke a laua ke kalo kehe mai he agahala ki a Iehova, ane mai fakaatā e laua a ia ke fakamalolō e tau fakamauaga takitaha ha laua. Maeke fēfē he tagata ke feaki e fakalilifuaga pihia?

8. Puipui fēfē he fakafetuiaga kapitiga ha tautolu mo Iehova a tautolu mai he mahani feuaki?

⁸ Totou Salamo 97:10. Ko e kapitiga mo Iehova ka puipui a tautolu mai he mahani feuaki. Ka iloa e tautolu e tau fua mua ue atu Haana, to lali a tautolu ke ‘fifitaki ke he Atua tuga e tau fanau fakahelehele. Kia mahani a tautolu mo e fakaalofa.’ Ko e fua, to moua e tautolu e malolō ke tiaki e “feuaki, mo e tau mena kelea oti.” (Efeso 5:1-4) Ko e tau taane mo e tau hoana kua iloa na fakafili “he Atua e tau tagata feuaki mo e faivao” kua gahua fakamalolō ke fefakamooliaki tumau na laua ni.​—Heperu 13:4.

9. (a) Tumau fēfē a Iosefa ke he mahani fakamooli pete ni kua kamatamata a ia he hoana he takitaki gahua haana? (e) Ko e heigoa e tau fakaakoaga ka ako e tautolu mai he fakafifitakiaga ha Iosefa?

⁹ Falu Kerisiano kua fakateaga ke he tau mahani ha lautolu ha kua lafi mo e tau tagata gahua ne nakai ko e Tau Fakamoli ka tuku e tau magaaho gahua. Falu kua kamatamata foki ka ha ha he tau gahuaaga. Pihia e mena ne tupu ke he taha fuata ne higoa ko Iosefa. He gahuaaga, ne mailoga e ia kua loto lahi e hoana he takitaki gahua haana ki a ia. Ke he taha aho mo e taha aho, ne kamatamata e ia a Iosefa ke mahani feuaki mo ia. Fakahiku, ne “toto ai a ia ke he hana tapulu, kua pehe mai, Kia momohe a taua.” Ka e nakai talia e Iosefa ti hola ni a ia. Maeke fēfē a Iosefa ke tumau e malolō ke he mahani fakamooli? Ha ko e haana a eketaha ke puipui haana a fakafetuiaga kapitiga mo e Atua. Ne galo e gahua ha Iosefa ti tuku a ia he fale puipui, ka e fakamonuina e Iehova a ia. (Kenese 39:1-12; 41:38-43) Kaeke kua ha ha a tautolu he tau gahuaaga po ke taha mena foki kua lata ni ke kalo kehe a tautolu he tau tuaga kamatamata.

10. Lagomatai fēfē he tapulu ke he tagata foou ke puipui e fakamauaga?

¹⁰ Ko e tapulu ke he tagata foou “kua eke ke lata mo e Atua, ke he tututonu mo e mahani mitaki ke fakamoli ai” ka puipui e taane mo e hoana mai he holifono ke mahani feuaki. (Efeso 4:24) Ka tapulu a tautolu ke he tagata foou to “tamate” e tautolu e tau faahi tino ha tautolu ke totoko e “feuaki, ko e mahani kelea, ko e manako kelea, ko e foli kelea, mo e mahekeheke [lotokai].” (Totou Kolose 3:5, 6.) He mena nei, ko e kupu “tamate” kua kakano ke taute e tautolu e tau mena kua lata ke totoko e tau manako he mahani feuaki. To kalo kehe a tautolu mai he ha mena ka fakaohooho a tautolu ke taute e tau manako feuaki. (Iopu 31:1) Ka momoui fakatatau a tautolu ke he tau puhala he Atua, to fakaako a tautolu ke vihiatia e “tau mena kelea” ti kuku mau ke he “tau mena mitaki.”​—Roma 12:2, 9.

11. Maeke fēfē ka fakatapulu ke he tagata foou ke fakamalolō e fakamauaga?

¹¹ Ka fakatapulu a tautolu ke he tagata foou, kua fifitaki a tautolu ke he tau fua ha Iehova. (Kolose 3:10) Ka fakakite he taane mo e hoana e “fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka,” to malolō e fakamauaga mo e to fakamonuina e Iehova a laua. (Kolose 3:12) To olioli foki e  laua e kaufakalataha kua lahi ka fakaatā e pule he mafola mai he Keriso ke he tau loto ha laua. (Kolose 3:15) Ka ha ha i ai e “fakaalofa hohofi noa,” to maeke he taane mo e hoana ke taute e tau lakaaga ke fefakakiteaki e tau levekiaga mo e fakalilifu.​—Roma 12:10.

12. Ko e heigoa e tau fua he haau a manatu kua aoga ke lata mo e fakamauaga fiafia?

¹² Ko e magaaho ne hūhū ke he taha hoa mau ko e heigoa e tau fua ne lagomatai aki a laua ke moua e fakamauaga fiafia, ne pehē a Sid ko e taane: “Ko e fakaalofa ko e fua mua ue atu ne gahuahua tumau a maua ki ai. Ti mailoga ai foki e maua ko e mahani molū kua aoga lahi foki.” Ne talia foki e Sonja ko e hoana haana, ti pehē: “Ko e mahani totonu ko e fua kua aoga mooli. Ti lali foki a maua ke fakakite e mahani fakatokolalo, pete ni kua nakai mukamuka tumau.”

13. Ko e heigoa kua lata ma e fakamauaga malolō mo e ko e ha?

¹³ Taha he tau puhala kua mua e mitaki ke tumau e malolō ke he fakamauaga ko e tutala he puhala totonu ke he taane po ke hoana ha tautolu. Ka e momoko ai, ha ko e falu he tau taane mo e tau hoana kua nakai fakalilifu ka fetutalaaki, nakai pihia ka tutala ke he tau tagata kehe po ke tau manu fao foki ha laua. Ka ha ha i ai e “fakafiu oti mo e vale, mo e ita, mo e miha, mo e kupu kelea” i loto he fakamauaga, to lolelole fakahaga e fakafetuiaga ha laua. (Efeso 4:31) Ko e aga tuhituhi mo e fakamamahi to moumou ai e fakamauaga. Ti kua lata e taane mo e hoana ke fakamalolō e fakafetuiaga ha laua ka vagahau ke he puhala totonu, hofihofi, mo e fakaalofa noa.​—Efeso 4:32.

14. Ko e heigoa kua nakai lata a tautolu ke taute?

¹⁴ Pehē e Tohi Tapu kua fai “vaha ke fakanono ai.” (Fakamatalaaga 3:7) Mooli, kua nakai kakano e mena nei ke fakaoti e tutala ha tautolu ke he tau hoa mau ha tautolu, ha ko e matutakiaga ko e mena aoga lahi ma e fakamauaga mitaki. Taha e hoana i Sihamani ne pehē: “I lalo hifo he tau tuaga pihia, ko e fakanonono kua maeke ke fakamamahi haau a hoa.” Lafi e ia: “Pete ni kua nakai mukamuka ke fakatotoka tumau i lalo he pehiaaga, nakai ko e mena mitaki ke pā mai e ita. Ti talahau pulenoa po ke taute e koe taha mena ne maeke ke fakamamahi aki haau a hoa, ti au atu ai ni e kelea.” Nakai moua he tau taane mo e tau hoana e mafola ke he tau mena vihi ha laua ka taufetoko fakaleolahi po ke fakanonono mo e nakai fetutalaaki. Ka e, maeke he tau hoa ke fakamalolō e fakamauaga ka fifili a laua ke fakamafola fakamafiti e tau fekehekeheaki ti ua fakaatā ke hoko atu ke he taufetoko.

15. Maeke fēfē he matutakiaga mitaki ke fakamalolō e fakamauaga?

¹⁵ Maeke ia koe ke fakamalolō e fakamauaga  haau ka fakaatā e koe taha magaaho ke fetogitogiaki e tau manatu mo e tau logonaaga haau mo e hoa. Ko e puhala ka vagahau e koe taha mena kua aoga tuga e mena ne talahau e koe. He tau tutūaga uka foki, kia eketaha ke fakaaoga e tau kupu totonu ti vagahau ke he puhala totonu. Ti mukamuka agataha he haau a taane po ke hoana ke fanogonogo ki a koe. (Totou Kolose 4:6.) Ko e hoa mau kua maeke ke fakamalolō e fakamauaga ha laua kaeke kua mitaki e matutakiaga mo e fakaaoga e tau kupu fakamafana mo e fai kakano.​—Efeso 4:29.

16, 17. Ko e ha ne kua lata ke mailoga fakamitaki e tau logonaaga mo e tau manako he vahāloto he taane mo e hoana?

¹⁶ Maeke foki he hoa mau ke ati hake e malolō he fakamauaga ka tuku fakamua e tau manako he hoa ke he haana. (Filipi 2:3, 4) Ko e taane ti pihia foki mo e hoana kua lata ke mailoga fakamitaki e tau logonaaga mo e tau manako he mahani fakataane mo e hoana.​—Totou 1 Korinito 7:3, 4.

¹⁷ Momoko ai, kua nakai fakakite he falu hoa mau e fakaalofa hofihofi po ke fepipikiaki a laua. Ti ko e falu tagata taane ne manatu ka fakaeneene a lautolu mo e tau hoana ha lautolu, kua kakano e mena ia kua lolelole a lautolu. Ka e pehē e Tohi Tapu: “Ko mutolu ko e tau taane kia eketaha ke maama e tau hoana ne nonofo mo mutolu.” (1 Peteru 3:7, Phillips) Kua lata he taane ke maama ko e tau mena kua lata mo e fakamauaga, nakai ni lauia ai ka femomoheaki e taane mo e hoana. Kua lata a ia ke ofania mo e hofihofi e fakaalofa he tau magaaho oti. Ti liga mukamuka he hoana haana ke talia e fakafetuiaga he vahāloto he taane mo e hoana. Kaeke ke fakakite tokoua e laua e ofania mo e hofihofi e fakaalofa, to mukamuka ke fefakamakonaaki e tau logonaaga he loto mo e tino ha laua.

18. Maeke fēfē he tau taane mo e tau hoana ke fakamalolō e fakafetuiaga ha laua?

 ¹⁸ Pete ni kua nakai fai fakaatāaga ke ua fakamooli ke he hoa mau he fakamauaga ha tautolu, ko e tote he fakaalofa hofihofi kua maeke ke eke mo taha kakano he taane po ke hoana ke kumi fakaalofa mo e pipikiaga mai he taha tagata kehe ke lata mo e tau manako fakataane mo e hoana. (Tau Fakatai 5:18; Fakamatalaaga 9:9) Ko e mena haia ne hataki mai e Tohi Tapu ke ua “totoko [lamakai] e taha ke he taha” he tau mena kua lata mo e fakamauaga ka nakaila talia tokoua e laua ke taofi ke he magaaho kū. Ko e ha? “Neke kamatamata e Satani a mua he nakai fahia a mua he fakauka ai.” (1 Korinito 7:5) To mua e kelea ma e hoa mau ka fakaaoga e Satani ha laua a “nakai fahia” ke kaumahala ke he kamatamata he mahani faivao! Ka foaki e tau mena kua lata mo e fakamauaga, igatia e tau hoa mo e “[nakai] kumi e taha e mitaki hana ni, ka kia takitokotaha mo e kumi e mitaki he falu.” Taute e laua e mena nei ha ko e fefakaalofaaki ha laua, nakai ko e matagahua. Ko e tau mahani fakaalofa hofihofi mo e pipikiaga he taane mo e hoana kua fakamalolō aki e fakafetuiaga ha laua.​—1 Korinito 10:24.

19. Ko e heigoa kua lata ia tautolu ke eketaha ke taute, ti ko e ha?

¹⁹ Kua tata lahi a tautolu ke hohoko atu ke he lalolagi foou! Ko e hagahaga kelea mooli ka fakaatā e tautolu e tau manako hepe, tuga ni e tau Isaraela ne 24,000 he Kelekele Tatai a Moapi. He mole e fakamaama e mena ne tupu, ne hataki he Tohi Tapu: “Hanai, ko ia kua manatu kua tu a ia, kia fakaeneene a ia neke veli.” (1 Korinito 10:12) Ke fakamalolō e fakamauaga ha tautolu, kua lata ia tautolu ke fakatumau ke mahani fakamooli ki a Iehova mo e ke he hoa ha tautolu. (Mataio 19:5, 6) Nakaila pihia ia fakamua, kua latatonu ia tautolu ke “lalilali atu a [ta]utolu, kia moua e ia a [ta]utolu mo e monuina, kua nakai fai ila, mo e nakai talahaua kelea.”​—2 Peteru 3:13, 14.