1, 2. Ko e heigoa ne taute e Iesu he afiafi he Nisana 14, 33 V.N.? (Kikite fakatino he kamataaga.)

I IERUSALEMA, he pō he Nisana 14, 33 V.N., ha ha i ai e mahina kau. Ne fakamanatu e Iesu mo e tau aposetolo haana e Paseka, ko e fakamanatuaga ne fakamanatu ke he tau tagata e puhala ne fakahao e Iehova a Isaraela mai i Aikupito he 1,500 tau fakamua atu. Ne kai pauaki a Iesu mo e tau aposetolo fakamooli haana ne toko 11, ko e kaiaga ka fakamanatu tumau he tau tutaki haana he tau tau takitaha ke manatu aki e mate haana.​—Mataio 26:1, 2.

² Ne liogi a Iesu, tufatufa e areto nakai fakaea ke he tau aposetolo haana, ti pehē age: “Kia toto a mo e kai.” Ti uta e ia e kapiniu uaina, mo e liogi foki, ti pehē age: “Kia inu ai a a mutolu oti kana.” (Mataio 26:26, 27) Ko e areto mo e uaina ne fai kakano uho lahi. Loga e mena ne fakaako he tau aposetolo fakamooli ha Iesu he pō aoga lahi ia.

3. Ko e heigoa e tau hūhū ka fakatutala a tautolu ki ai he vala tala nei?

³ Manako a Iesu ke manatu he tau tutaki haana e mate  haana he tau tau oti. Ne fakahigoa ai he mogo fakamui ko e ‘Kaiaga Afiafi he Iki,’ po ke Fakamanatuaga. (1 Korinito 11:20) Ne lagā mai falu hūhū. Ko e ha kua lata ke manatu e tautolu e mate ha Iesu? Ko e heigoa e kakano he areto mo e uaina? Maeke fēfē a tautolu ke tauteute ma e Fakamanatuaga? Ko hai kua lata ke kai mo e inu? Ti fakakite fēfē he tau Kerisiano kua uho ki a lautolu e amaamanakiaga ha lautolu?

4. Ko e heigoa ne maeke he mate ha Iesu ke taute ke moua e tautolu?

⁴ Ha kua agahala a Atamu, ne moua e tautolu e agahala mo e mate. (Roma 5:12) Ai fai tagata nakai mitaki katoatoa ka foaki ke he Atua e lukutoto ma e moui haana po ke moui he falu. (Salamo 49:6-9) Ka e foaki e Iesu e moui mitaki katoatoa haana ma tautolu ti tuku atu ke he Atua e uho he lukutoto ia. He eke pihia, ne taute e Iesu ke maeke ia tautolu ke moua e amaamanakiaga he moui tukulagi, ti atāina mai he agahala mo e mate.​—Roma 6:23; 1 Korinito 15:21, 22.

5. (a) Iloa fēfē e tautolu kua fakaalofa e Atua mo Iesu ki a tautolu? (e) Ko e ha kua lata ia tautolu ke o atu ke he Fakamanatuaga?

⁵ Ne fakakite he Atua haana fakaalofa ma e tau tagata he foaki e lukutoto. (Ioane 3:16) Fakakite foki e Iesu haana fakaalofa he foaki mai e moui haana ma tautolu. Ato hau a Iesu ke he lalolagi, ne ‘fiafia foki a ia ke he fanau he tau tagata haia.’ (Tau Fakatai 8:30, 31) Kua loto fakaaue lahi a tautolu ke he mena ne taute e Iehova mo Iesu ma tautolu! Ko e kakano haia ne omaoma a tautolu ke he poakiaga ha Iesu “kia eke e mutolu e mena nai mo fakamanatuaga kia au” he o atu ke he Fakamanatuaga.​—1 Korinito 11:23-25.

6. Ko e heigoa e maamaaga ha tautolu ke he areto mo e uaina he Fakamanatuaga?

⁶ He kaiaga fakahiku haana mo e haana tau aposetolo, ne nakai taute e Iesu e mana he fakafaliu e areto ke he tino haana po ke uaina ke he toto haana. Pehē a ia hagaao ke he areto: “Ko e haku a tino a enei.” Ne pehē a ia hagaao ke he uaina: “Ko e haku e toto a enei, ko e toto he maveheaga fou, kua fakamaligi mo e tau tagata tokologa.” (Mareko 14:22-24) Maaliali ai ko e areto mo e uaina ko e tau fakamailoga, po ke tau mena fakatai.

7. Ko e heigoa kua hukui he areto nakai fakaea?

⁷ He pō aoga lahi ia, ne fakaaoga e Iesu e areto nakai fakaea mai he kaiaga Paseka. (Esoto 12:8) Ne fakaaoga he Tohi Tapu falu mogo e fakaea ke fakakite e agahala. (Mataio 16:6, 11, 12; Luka 12:1) Ko e areto nakai fakaea ne fakaaoga e Iesu ke hukui aki e tino nakai agahala haana. (Heperu 7:26) Ko e kakano hanei kua fakaaoga e tautolu e areto nakai fakaea he Fakamanatuaga.

8. Ko e heigoa ne hukui he uaina?

⁸ Ko e uaina ne fakaaoga e Iesu ne hukui e toto, po ke moui haana, tuga e uaina ne fakaaoga e tautolu he Fakamanatuaga he vahā nei. He matakavi i  fafo ha Ierusalema ne higoa ko Kolokota, ne mate a ia ma tautolu ti foaki haana moui “ke fakamagalo aki e tau hala.” (Mataio 26:28; 27:33) Ka loto fakaaue a tautolu ke he mena fakaalofa uho ia, to tauteute a tautolu takitokotaha he tau tau takitaha ke lata mo e magaaho uho nei. To taute fēfē e tautolu e mena ia?

9. (a) Ko e ha kua lata ia tautolu ke fakaaoga e setulu totou Tohi Tapu he Fakamanatuaga? (e) Fēfē e logonaaga haau ke he lukutoto?

⁹ Taha puhala ke tauteute ma e Fakamanatuaga he fakaaoga e setulu totou Tohi Tapu he Fakamanatuaga ne moua he Kumikumi e Tau Tohiaga Tapu he Tau Aho Takitaha. He totou e tau tala he Tohi Tapu ka lagomatai a tautolu ke manamanatu fakahokulo ke he mena ne taute e Iesu ato mate a ia. * (Kikite matahui tala.) “Onoono lahi atu a mautolu ke he Fakamanatuaga,” he tohi he taha matakainaga fifine. “Ne mua atu ai e uho he tau tau takitaha. Manatu e au he tū i loto he fale mate . . . , ti onoono ke he matua taane fakahele haaku mo e logona e loto fakaaue mooli ke he lukutoto. . . . Ae, na iloa e au e tau kupu tohi oti mo e puhala ke fakamaama ai! He mogo ni ne logona hifo e au e mamahi mooli he mate ne malagaki e fiafia haaku he loto ke he mena ka taute ma tautolu puhala he lukutoto ia ne uho lahi.” He manamanatu fakahokulo ke he poa ha Iesu ka lagomatai a tautolu takitokotaha ko e vala aoga he tauteute ma e Fakamanatuaga.

10. Ko e heigoa falu mena ka tauteute e tautolu ke lata mo e Fakamanatuaga?

¹⁰ Taha puhala foki ke tauteute a tautolu he fakalahi e magaaho kua fakaaoga e tautolu he gahua he fonua, he uiina e tau tagata tokologa ke he Fakamanatuaga. Liga maeke a tautolu ke paionia fakakū. Ka tutala a tautolu ke he falu hagaao ke he Atua, haana Tama, mo e amaamanakiaga he moui tukulagi,  to logona e tautolu e makona ha kua taute e tautolu e mena ne manako e Atua ki a tautolu ke taute.​—Salamo 148:12, 13.

11. Ko e ha ne talahau a Paulo kua kai mo e inu e falu Korinito ka e nakai lata he Fakamanatuaga?

¹¹ Ka tauteute ma e Fakamanatuaga, manamanatu fakahokulo ke he mena ne tohi e Paulo ke he tau Kerisiano i Korinito. (Totou 1 Korinito 11:27-34.) Pehē a ia ka kai he tagata e areto mo e inu e uaina ka e nakai lata, po ke nakai fakalilifu, to holifono a ia hagaao ke he “tino mo e toto he Iki.” Ti ka taute he tagata fakauku e mahani hepehepe mo e fakalataha ke kai mo e inu e tau mena fakatai, “kua kai a ia mo e inu ke he hana fakahala.” He vahā ha Paulo, tokologa e tau Korinito ne putoia he tau mahani hepehepe. Liga falu ia lautolu ne kai mo e inu lahi ato kamata po ke he magaaho Fakamanatuaga ti taveli mohe ai. Ne fakakite e lautolu e nakai fakalilifu lahi ke he fakamanatuaga, ti ko e magaaho ne fakalataha a lautolu ke he kai mo e inu, ne nakai talia he Atua.

12. (a) Ko e heigoa ne fakatatai e Paulo e Fakamanatuaga ki ai? Ko e heigoa e hatakiaga ne tuku age e ia ke he tau tagata ne kai mo e inu he tau mena fakatai? (e) Ko e heigoa kua lata ke taute he tagata ne kai mo e inu ka agahala kelea lahi mahaki a ia?

¹² He fakatatai e Fakamanatuaga ke he mena kai, ne hataki e Paulo a lautolu ne kai mo e inu: “Mena nakai maeke ia mutolu ke inu ke he kapiniu he Iki katoa mo e kapiniu he tau temoni; ti nakai maeke ke fai tufaaga he laulau he Iki katoa mo e laulau he tau temoni.” (1 Korinito 10:16-21) Kaeke ko e tagata ne kai mo e inu he tau mena fakatai kua agahala kelea lahi, kua lata a ia ke fano ke he tau motua ma e lagomatai. (Totou Iakopo 5:14-16.) Kaeke kua fakakite he tau mahani haana kua tokihala mooli a ia, ti kua fakakite e ia e fakalilifu ke he poa ha Iesu ka kai mo e inu a ia he Fakamanatuaga.​—Luka 3:8.

13. Ko e ha kua lata ia tautolu ke liogi hagaao ke he amaamanakiaga ne foaki mai he Atua ki a tautolu?

¹³ Maeke foki a tautolu ke tauteute ma e Fakamanatuaga he liogi mo e manamanatu fakahokulo ke he amaamanakiaga ne foaki mai he Atua ki a tautolu takitokotaha. To nakai manako a tautolu ke fakakite e nakai fakalilifu ke he poa ha Iesu. Ti nakai kai mo e inu a tautolu ke he tau mena fakatai kaeke ke nakai maama mahino to eke nakai a tautolu mo tau tagata fakauku. Ti ko hai mogoia kua lata ke kai mo e inu ke he tau mena fakatai?

14. Ha ko lautolu ne fakauku ko e vala he maveheaga foou, ko e heigoa ha lautolu kua taute he Fakamanatuaga?

¹⁴ Ko lautolu ka kai mo e inu he tau mena fakatai he Fakamanatuaga kua iloa tonuhia ko lautolu ko e vala he maveheaga foou. Pehē a Iesu hagaao ke he uaina: “Ko e kapiniu nai, ko e maveheaga fou ia ke he haku a toto.” (1 Korinito 11:25) Ne fakatū e Iehova e maveheaga he Fakatufono mo e tau Isaraela ka e tala age he mogo fakamui to hukui ai e ia aki  e maveheaga foou. (Totou Ieremia 31:31-34.) Ne taute he Atua e maveheaga foou nei mo lautolu ne fakauku. (Kalatia 6:15, 16) Ko e mate ha Iesu ati maeke e maveheaga nei. (Luka 22:20) Ko Iesu e Hulalo he maveheaga foou. Ko lautolu ne fakauku kua mahani fakamooli ko e vala he maveheaga foou to fakalataha mo Iesu ke he lagi.​—Heperu 8:6; 9:15.

15. Ko hai he vala he maveheaga he Kautu? Ka mahani fakamooli a lautolu, ko e heigoa e lilifu ka moua e lautolu?

¹⁵ Iloa e lautolu ne fakauku ko e vala he maveheaga he Kautu foki a lautolu. (Totou Luka 12:32.) Ko e maveheaga nei ne taute he vahāloto ha Iesu mo e tau tutaki fakauku haana ne fakamooli, kua fakalataha “ke he hana tau mamahi.” (Filipi 3:10) Ko lautolu ne fakauku ne fakamooli mogonei ko e vala foki he maveheaga nei. To pule tukulagi a lautolu ko e tau patuiki mo Keriso ke he lagi. (Fakakiteaga 22:5) Kua kautū a lautolu ke kai mo e inu ke he tau mena fakatai he Kaiaga Afiafi he Iki.

16. Fakamaama fakakū e kakano he Roma 8:15-17.

¹⁶ Kua mauokafua katoatoa a lautolu ne fakauku ko lautolu ko e tau tama he Atua ti maeke a lautolu ke kai mo e inu he tau mena fakatai. (Totou Roma 8:15-17.) Pehē a Paulo kua tauhea atu a lautolu: “Ava, ko e Matua na e.” Ko e kupu faka-Aramaika “Abba” kua mafanatia, tuga e “papa,” mo e fakalilifu, tuga e “matua taane.” Kua fakakite e fakafetuiaga pauaki ha lautolu ne fakauku mo Iehova he mogo ne moua e lautolu e “Agaga ke hiki tama.” Kua ‘fakamoli mai e agaaga’ ia he Atua mo lautolu, ti iloa mooli e lautolu ko lautolu ko e tau tama fakauku haana. Nakai kakano kua ai manako a lautolu ke momoui he lalolagi. Iloa e lautolu kaeke ke mahani fakamooli a lautolu ato hoko ke he mate, to patuiki a lautolu mo Iesu he lagi. Ti iloa e lautolu ko lautolu kua moua e “fakaukuaga mai ia ia kua Tapu,” ko Iehova. He vahā nei ko e tokogahoa ni a lautolu nei he 144,000 he tau tama he Atua ne toe he lalolagi. (1 Ioane 2:20; Fakakiteaga 14:1) Ne tata lahi a lautolu ki a Iehova ti fakahigoa e lautolu a ia “Ava, ko e Matua na e.”

17. Ko e heigoa e amaamanakiaga ne moua e lautolu ne fakauku? Iloa fēfē e lautolu kua fakauku a lautolu?

¹⁷ Kaeke ko koe e Kerisiano fakauku, to fa totoku e koe e amaamanakiaga haau he lagi he tau liogi fakatagata haau. To aoga lahi e tau Tohiaga Tapu ki a koe. Ma e fakatai, he tutala e Tohi Tapu hagaao ke he fakamauaga he lagi he vahāloto ha Iesu mo e “kitofaitane” haana, iloa e koe kua hagaao e mena nei ki a koe mo e to amanaki atu a koe ki ai. (Ioane 3:27-29; 2 Korinito 11:2; Fakakiteaga 21:2, 9-14) Po ke ka fakamaama he Tohi Tapu e fakaalofa he Atua ma lautolu ne fakauku, iloa e koe kua vagahau a ia ki a koe. Ti ka totou e koe e tau fakatonuaga i loto he Kupu he Atua ne hagaao lahi ki a lautolu ne fakauku, kua omoomoi he agaaga tapu a koe ke omaoma ai. Ko e agaaga tapu he Atua ne “fakamoli” ki a koe ko e amaamanakiaga haau ke hake ke he lagi.

18. Ko e heigoa e amaamanakiaga kua moua he ‘tau mamoe kehe’? Fēfē e logonaaga haau ke he amaamanakiaga nei?

 ¹⁸ Kaeke ko koe taha he “moto tagata tokologa” he ‘tau mamoe kehe,’ kua tuku atu he Atua ki a koe e magaaho ke moui tukulagi he Parataiso he lalolagi. (Fakakiteaga 7:9; Ioane 10:16) Fēfē e logonaaga haau ke he vahā haau anoiha? Fiafia lahi a koe ka manamanatu fakahokulo ke he tau mena ne talahau he Tohi Tapu hagaao ke he vahā anoiha he Parataiso. Amaamanaki lahi a koe ke nofo he lalolagi mafola mo e magafaoa mo e tau kapitiga haau. Manako a koe ke kitia e fakaotiaga he hoge, mativa, matematekelea, gagao, mo e mate. (Salamo 37:10, 11, 29; 67:6; 72:7, 16; Isaia 33:24) Amanaki lahi atu a koe ke kitia e tau fakahele haau ka fakaliu tu mai. (Ioane 5:28, 29) Kua fakaaue lahi mahaki a koe ki a Iehova ma e amaamanakiaga homo ue atu nei! Pete he nakai kai mo e inu a koe ke he tau mena fakatai, kua fina atu a koe ke he Fakamanatuaga ha kua loto fakaaue a koe ke he poa lukutoto ha Iesu.

19, 20. (a) Maeke fēfē a koe ke moui tukulagi? (e) Ko e ha kua fina atu a koe ke he Fakamanatuaga?

¹⁹ Maeke a koe ke moui tukulagi ke he lalolagi po ke lagi, kaeke ke fakagahua e koe e tua ki a Iehova ko e Atua, Iesu Keriso, mo e lukutoto. Ka fina atu a koe ke he Fakamanatuaga, manamanatu fakahokulo ke he amaamanakiaga haau mo e aoga lahi he mate ha Iesu. He mole e toaga laā he Aho Faraile, ia Aperila 3, 2015, totou miliona he tau tagata he lalolagi katoa ka o atu ke he Fakamanatuaga he tau Fale he Kautu mo e falu matakavi foki.

²⁰ Ka tauteute a tautolu ke o atu ke he Fakamanatuaga mo e aga hako, to hokulo lahi mahaki e fakaaue ha tautolu ma e poa lukutoto ha Iesu. He fanogonogo fakamatafeiga ke he lauga he Fakamanatuaga, to omoomoi a koe ke fakakite e fakaalofa ke he falu mo e tala age ki a lautolu hagaao ke he fakaalofa ha Iehova mo e haana finagalo ma tautolu oti. (Mataio 22:34-40) Eketaha ke haia i ai.