1. Ko e ha kua fakaaue a tautolu ki a Iehova?

FOAKI e Iehova ki a tautolu e “tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki.” (Iakopo 1:17) Ko ia ko e ha tautolu a Leveki Mamoe fakaalofa, ti leveki fakamitaki e ia e tau manako oti ha tautolu. (Salamo 23:1-3) Mooli, kua lata a Iehova ke moua e tau fakaheke po ke, fakaaue mai he tau loto ha tautolu. Ko ia ko e ha tautolu a ‘taue mo e malolo,’ mua atu ka matematekelea a tautolu. (Salamo 46:1) Logona hifo a tautolu tuga ne tohi he salamo: “Kia fakaheke atu a mutolu kia Iehova, ha kua mitaki ni a ia; ha kua tukulagi ni hana fakaalofa.”​—Salamo 106:1.

2, 3. (a) Ko e heigoa e tau hagahaga kelea he aga nakai fakaaue? (e) Ko e heigoa e tau hūhū ka fakatutala a tautolu ki ai he vala tala nei?

² Ko e ha kua lata ia tautolu ke aga fakaaue ki a Iehova? He talahau tuai, ko e tau tagata he tau aho fakamui to nakai loto fakaaue. (2 Timoteo 3:2) Tokologa kua nakai loto fakaaue ke he tau mena mitaki kua taute e Iehova ma lautolu. Kua  momoui a tautolu he lalolagi velevelekoloa ne fakamalolō e tau miliona tagata ke fakatau loga e tau koloa kua nakai aoga mooli ki a lautolu. Ti ko e fua, tokologa ne nakai makona ke he tau mena ne fitā he moua e lautolu. Tuga e tau Isaraela i tuai, liga to nakai aga fakaaue a tautolu ti galo ai e loto fakaaue ma e ha tautolu a tau monuina mo e fakafetuiaga uho mo Iehova.​—Salamo 106:7, 11-13.

³ Manamanatu foki ke he mena ka tupu kaeke ka matematekelea a tautolu ke he tau kamatamata. Ko e tau lekua ha tautolu kua liga molea e tupetupe ti hagaaki a tautolu ki ai ka e nakai ke he tau monuina ha tautolu. (Salamo 116:3) Maeke fēfē a tautolu ke fakatumau e aga fakaaue? Maeke fēfē a tautolu ke tumau e loto mitaki pete ne tau kamatamata kelea lahi? Kitekite la tautolu ki ai.

4. Maeke fēfē a tautolu ke fakatumau ke aga fakaaue ki a Iehova?

⁴ Kua lata ke eketaha ke fakatumau ke aga fakaaue ki a Iehova. Fakamua, kua lata ia tautolu ke kumi e tau puhala kua fakamonuina e Iehova a tautolu takitokotaha. Ti lata ia tautolu ke manamanatu fakamitaki ke he puhala kua fakakite he tau monuina ia e fakaalofa lahi he Atua ki a tautolu. He taute pihia he salamo, ne ofomate a ia he tau mena homo ue atu oti ne taute e Iehova ma haana.​—Totou Salamo 40:5; 107:43.

5. Ko e heigoa kua fakaako e tautolu mai he aposetolo ko Paulo hagaao ke he aga fakaaue?

⁵ Maeke a tautolu ke fakaako e puhala ke aga fakaaue ki a Iehova he manamanatu ke he fakafifitakiaga he aposetolo ko Paulo. Iloa e tautolu kua manamanatu fakahokulo a ia ke he tau monuina haana ha kua fakaaue tumau a ia ke he Atua he liogi. Mailoga ai e Paulo ko ia ko e tagata kua ‘vagahau kelea fakamua, ti favale, ti fakakelea atu.’ Ne aga fakaaue a ia pete he moui fakamua haana, ha kua fakakite he Atua mo e Keriso ki a ia e fakaalofa hofihofi mo e foaki ki a ia e kotofaaga he fakamatala ke he falu. (Totou 1 Timoteo 1:12-14.) Loto fakaaue lahi foki a Paulo ke he tau matakainaga Kerisiano haana ti fa fakaaue ki a Iehova ma e ha lautolu a tau mahani mitaki mo e fekafekauaga fakamooli. (Filipi 1:3-5, 7; 1 Tesalonia 1:2, 3)  Ne mafiti a Paulo ke fakaaue ki a Iehova ma e tau mena oti ne taute he haana a tau matakainaga ki a ia he mogo ne fakauka a ia ke he tau kamatamata. (Gahua 28:15; 2 Korinito 7:5-7) Nakai ofo a tautolu ha kua fakamalolō e Paulo e tau Kerisiano ke he puhala nei: “Kia mahani foki a mutolu ke fakaaue . . . , tomatoma e mutolu ko e taha kia taha ke he tau salamo, mo e tau lologo, mo e tau ulutapu ke lata mo e agaga, ko e fakaalofa noa [po ke, aga fakaaue].”​—Kolose 3:15-17.

6. Ko e ha kua aga fakaaue a koe ki a Iehova?

⁶ Maeke fēfē a tautolu ke muitua e fakafifitakiaga ha Paulo? Maeke ia tautolu ke manamanatu fakahokulo ke he tau mena ne taute e Iehova ma tautolu. (Salamo 116:12) Ka hūhū taha tagata ki a koe, “Ko e heigoa e tau monuina mai ia Iehova kua fakaaue a koe ki ai?” to fēfē e tali haau? To putoia nakai e koe e fakafetuiaga uho haau mo Iehova? Po ke fakamagaloaga he tau agahala haau ha ko e poa lukutoto he Keriso? To totoku nakai e koe e tau matakainaga Kerisiano ne lagomatai a koe he tau magaaho uka? To talahau nakai e koe e puhala ne aga fakaaue a koe ke he haau a hoa mau po ke fanau? Fakaatā e magaaho ke manamanatu fakahokulo ke he tau puhala loga ne fakamonuina he Atua a koe. To fakalagalaga he mena nei a koe ke fakaaue ki a ia he tau aho takitaha.​—Totou Salamo 92:1, 2.

7. (a) Ko e ha kua lata ia tautolu ke fakaaue ki a Iehova ke he tau liogi ha tautolu? (e) To aoga fēfē a koe he fakaaue ki a Iehova ke he tau liogi haau?

⁷ Ka manamanatu fakahokulo a tautolu ke he tau monuina oti ha tautolu, to manako a tautolu ke fakaaue ki a Iehova he liogi. (Salamo 95:2; 100:4, 5) Ne fakaaoga ni he falu tagata e liogi ke ole mena ke he Atua. Ka e fiafia a Iehova ka putoia he tau liogi ha tautolu e tau fakaaue ki a ia ke he tau mena kua fitā he moua e tautolu. I loto he Tohi Tapu, kua moua e tautolu loga e fakafifitakiaga he tau fekafekau he Atua tuga a Hana mo Hesekia, ne fakaaue ki a Iehova he tau liogi ha lautolu. (1 Samuela 2:1-10; Isaia 38:9-20) Kia fifitaki e tau aga fakaaue ha lautolu ti fakaaue ki a Iehova ma e tau mena ne taute e ia ma haau. (1 Tesalonia 5:17, 18) Ka taute pihia e koe, to logona e koe e totokaaga, to tupu e fakaalofa haau ma e Atua, mo e to eke a koe mo kapitiga tumau haana.​—Iakopo 4:8.

8. Ko e heigoa ka fakatupu a tautolu ke nakai aga fakaaue?

⁸ Ka nakai mataala a tautolu, maeke ia tautolu ke galo e loto fakaaue ma e tau mena fakaalofa mitaki ha Iehova. Ko e ha? Ha kua nakai mitaki katoatoa a tautolu ti moua e aga nakai fakaaue mai he tau matua fakamua ha tautolu. Ne tuku age e Iehova ki a Atamu mo Eva e kaina parataiso mo e matakite ki ai kua moua e laua e tau mena oti kua lata mo laua. Na maeke a laua ke momoui tukulagi mo e mafola. (Kenese 1:28) Ka e nakai loto fakaaue a  laua ke he tau monuina ha laua. Ne lotokai mo e manako lahi atu foki a laua. He fakahikuaga, ne galo katoatoa e laua e tau mena oti. (Kenese 3:6, 7, 17-19) Momoui a tautolu he lalolagi nakai fakaaue, ti maeke foki a tautolu ke nakai loto fakaaue ke he tau mena oti kua taute e Iehova ma tautolu. Maeke ia tautolu ke galo e loto fakaaue ha tautolu ma e tuaga kapitiga tata ha tautolu mo e Atua po ke ha tautolu a lilifu he fai vala mo tau matakainaga he lalolagi katoa. Liga fakatauhele a tautolu ha ko e tau mena he lalolagi nei. (1 Ioane 2:15-17) Ke kalo kehe he matahele ia, kua lata ia tautolu ke manamanatu fakahokulo ke he tau monuina loga ha tautolu mo e fakaaue tumau ke he Atua ke he kotofaaga kua moua e tautolu he eke mo tau tagata haana.​—Totou Salamo 27:4.

9. Ka matematekelea he tau kamatamata kelea lahi, ko e ha kua lata ke manamanatu fakahokulo ke he tau monuina ha tautolu?

⁹ Ko e aga fakaaue to lagomatai a tautolu ke fakauka ke he tau kamatamata kelea lahi mahaki. Liga to fakaatukehe e tau logonaaga ha tautolu ha ko e tau tuaga kelea kua hiki fakaofo e tau momoui ha tautolu, tuga e nakai mahani fakamooli he hoa mau ha tautolu, gagao hagahaga kelea lahi, mate he fakahele, po ke mena matematekelea tupu pauaki. Ko e manamanatu fakahokulo ke he tau monuina ha Iehova to foaki ki a tautolu e mafanatia mo e to fakamalolō a tautolu ke fakauka. Manamanatu ke he tau mena tutupu nai.

10. Aoga fēfē a Irina mai he manamanatu fakahokulo ke he tau monuina haana?

¹⁰ Ko Irina, ko e paionia tumau i North America, ne mau ke he motua ne nakai mahani fakamooli ki a ia ti tiaki a ia mo e tau tama ha laua. * (Kikite matahui tala.) Ko e heigoa ne lagomatai a Irina ke fakatumau e fekafekau fakamooli ki a Iehova? Pehē a ia: “Kua aga fakaaue au ke he levekiaga fakatagata ha Iehova ki a au ni. He fifili ke manamanatu ke he tau monuina haaku he tau aho takitaha, maeke ia au ke kitia e lilifu ke iloa mo e ofania he ha tautolu a Matua puipui he lagi. Iloa e au to nakai tiaki e ia au.” Pete he fakauka a Irina ke he loga e tau tuaga kelea he moui haana, ko e aga fiafia haana kua lagomatai a ia ke fahia fakamitaki mo e fakamafana e falu.

11. Ko e heigoa ne lagomatai a Kyung-sook ke fahia he gagao kelea lahi?

¹¹ Ko Kyung-sook, ne nofo i Asia, ne paionia mo e taane haana ke molea 20 e tau. Fakaofo ai, ne moua a ia he gagao kenesā he māmā ti kua mafiti e tupu mo e kua tala age ki a ia ko e tolu ke he ono e mahina ke moui a ia. Pete he loga e tau kamatamata he magaaho fakamua ne fakauka a ia mo e taane haana ki ai, na tino malolō tumau a laua. Pehē a ia: “Lauia lahi au he paleko nei he gagao e tino. Logona hifo e au kua galo e au e tau mena oti, ti matakutaku lahi au.” Ko e heigoa ne lagomatai  a Kyung-sook ke fahia? Pehē a ia: “He tau pō oti ato fano au ke mohe, ne fina atu au ke he tuafale he kaina ha maua ti liogi fakaleo lahi hagaao ke he lima e mena ne aga fakaaue au ki ai he aho ia. Ti logona e au e totokaaga ati omoomoi au ke fakakite e fakaalofa haaku ki a Iehova.” Aoga fēfē a Kyung-sook mai he tau liogi nei he tau pō takitaha? Pehē a ia: “Ati mailoga e au mogonei kua fakatumau e Iehova a tautolu puhala he tau tuaga kamatamata mo e mua atu e loga he tau monuina he tau momoui ha tautolu ke he tau kamatamata.”

12. Mafanatia fēfē a Jason he mole e mate he hoana haana?

¹² Ko Jason ne gahua he la ofisa i Aferika, ne fekafekau tumau ke molea 30 e tau. Pehē a ia: “Fitu e tau kua mole, ne mate e hoana haaku ti molea e mamahi. He fakaatā au ke hagaaki ke he mena ne tupu ki a ia he totoko ai ke he kenesā kua maeke ke fakamamahi lahi e loto.” Ko e heigoa kua foaki ki a Jason e fakatotokaaga? Pehē a ia: “Taha mogo ne manatu e au e magaaho mitaki ne fakalataha tokoua au mo e hoana haaku, ti fakaaue au ki a Iehova he liogi ma e fakamanatuaga ia. Ne logona hifo e au e totokaaga ti kamata mogoia he mogo fakamui ke fakaaue tumau ki a Iehova ma e tau fakamanatuaga fiafia pihia. Ko e aga fakaaue lahi ne fai kehe ke he onoonoaga haaku. Logona agaia e au e mamahi he mate, ka kua fakaaue ki a Iehova he mitaki e fakamauaga mo e kotofaaga ke fekafekau ki a ia mo e taha kua fakaalofa hokulo ki a Ia kua fakaholo ki mua e onoonoaga haaku.”

13. Ko e heigoa kua lagomatai a Sheryl ke fakauka ke he tokologa he magafaoa haana ne galo?

¹³ He to e Super Typhoon Haiyan ke he lotouho ha Filipaina he matahiku he 2013, ko Sheryl ne 13 laia e tau he moui he mogoia ne teitei ke galo e tau mena oti. Pehē a ia: “Ne galo e kaina haaku ti tokologa foki e magafaoa haaku ne galo.” Ko e matua taane, matua fifine, mo e tokotolu he lafu haana ne mamate he afā malolō lahi mahaki. Ko e heigoa ne lagomatai a Sheryl ke fakauka ke he  matematekelea nei ka e nakai loto kona? Aga fakaaue agaia a Sheryl ki a Iehova ha kua manamanatu fakahokulo a ia ke he tau monuina oti ne moua e ia. Pehē a ia: “Kitia e au kua taute he tau matakainaga e tau mena oti ke maeke ke tamai e tau lagomataiaga mo e tau fakamafanaaga ke lata mo lautolu kua manako lagomatai. Iloa e au kua liogi e tau matakainaga oti he lalolagi katoa ma haaku.” Lafi e ia: “Kua fakaaue lahi au ha ko Iehova ko e Atua haaku. Foaki tumau e ia ki a tautolu e tau mena oti kua lata mo tautolu.” Ē, ka fakaaue a tautolu ke he tau monuina ha tautolu, kua kalo kehe a tautolu he molea e maanu. To lagomatai he mena nei a tautolu ke fakauka ke he tau mena vihi ka fehagai mo tautolu.​—Efeso 5:20; totou Filipi 4:6, 7.

14. Ko e heigoa e amaamanakiaga fiafia kua moua e tautolu? (Kikite fakatino he kamataaga.)

¹⁴ He fakamauaga tuai, kua aga fakaaue e tau tagata ha Iehova ke he tau monuina ha lautolu. He mole e fakahao ha lautolu mai ia Farao mo e tau kautau haana he Tahi Kula, ne uhu lologo fiafia, fakaheke mo e fakaaue e tau Isaraela ki a Iehova. (Esoto 15:1-21) He vahā nei, taha he tau monuina tokiofa lahi ha tautolu ko e iloa to nakai leva ti nakai liu fai mamahi. (Salamo 37:9-11; Isaia 25:8; 33:24) Manamanatu la ke he puhala kua logona e tautolu he magaaho ka tamate e Iehova e tau fī oti haana mo e fakafeleveia a tautolu ke he lalolagi foou he mafola mo e tututonu. To fakaaue lahi a tautolu ki a Iehova he aho ia!​—Fakakiteaga 20:1-3; 21:3, 4.

15. Ko e heigoa haau kua eketaha ke taute he 2015?

¹⁵ He 2015, to amaamanaki atu a tautolu ke he loga he tau monuina mai ia Iehova. Mooli, liga to matematekelea a tautolu he falu kamatamata. Ka ko e heigoa ni ka tupu, iloa e tautolu to nakai tiaki e Iehova a tautolu. (Teutaronome 31:8; Salamo 9:9, 10) To matutaki a ia ke foaki ki a tautolu e tau mena oti kana kua lata ia tautolu ke fekafekau fakamooli ki a ia. Kia eketaha a tautolu ke fifitaki e aga he perofeta ko Hapakuka ne pehē: “Pete he nakai fiti mai e mati, ti nakai fai fua foki e tau vine, ti fakahiku ai foki e tau fua olive, ti nakai tutupu mai foki e tau mena kai he fonua; ti fakaoti foki e fuifui mamoe ke he lotopa mamoe, ti nakai ha i ai e tau povi ke he tau fale povi; Ka ko au to olioli ni au kia Iehova, to fiafia ni au ke he Atua he haku a Fakamouiaga.” (Hapakuka 3:17, 18) He tau kahau, kia matutaki a tautolu ke manamanatu fakahokulo ke he tau monuina oti ha tautolu mo e kia fakamalolō ke omaoma e fakatonuaga he ha tautolu a lauga he tau ma e 2015: “Kia fakaheke atu a mutolu kia Iehova, ha kua mitaki ni a ia.”​—Salamo 106:1.