KE HE feleveiaaga pauaki ne taute i Nagoya i Sapanī, ia Aperila 28, 2013, ne fakailoa e Anthony Morris he Kau Fakatufono e fakailoaaga ofoofogia: ko e fakatoka mai he tohi foou faka-Sapanī ne mataulu The Bible​—The Gospel According to Matthew. Molea 210,000 e tagata ne fakalataha ke he feleveiaaga po ke matutaki he vitiō. He mole e logona e lautolu e fakailoaaga, ne fakakite he toloaga e olioli ha lautolu he leva e patipati.

Ko e fufuta nei he Evagelia ha Mataio ne liu lomi mai he New World Translation. Ka e matakehe e tohi nei ne 128 e lau. Ne fakamaama he Matakainaga ko Morris kua talaga ai ke lagomatai e tau tagata he fonua Sapanī. Ko e heigoa ati kehe e tohi nei? Ko e ha kua fai ai? Ti tali atu fēfē e tau tagata?

Tokologa e tagata ne ofo ke he puhala ne tohia aki e tohi a Matthew. Maeke he tau matatohi Sapanī ke tuku fakatū po ke fakalava, ti ko e tau kupu he tau tohi lomi loga, putoia ai foki e tau tohi ha tautolu kua tuku fakalava. Ka ko e tau kupu he tohi foou nei kua tuku fakatū, tatai ke he puhala he tau nusipepa loga mo e falu tohi faka-Sapanī. Ma e laulahi he tau tagata Sapanī, kua mukamuka lahi e puhala nei ke totou. Ko e tau mataulu foki ne fa toka i luga he lau kua hiki ki loto he tohi ke eke mo tau vala mataulu ke lagomatai e tagata totou ke mukamuka ia ia ke kitia e tau matapatu manatu.

Kua kamata e tau matakainaga i Sapanī ke totou a Matthew. Ko e matakainaga fifine he atu tau 80 ne pehē: “Lagaloga tuai e totou e au e tohi a Matthew he mogo fakamua, ka ko e puhala fakatū mo e tau vala mataulu kua lagomatai au ke maama katoatoa e Lauga he Mouga.” Taha e matakainaga fifine fuata ne tohi: “Totou oti e au e tohi a Matthew he taha ni e mogo. Mahani au ke he puhala ne tohi fakalava, ka e tokologa e tagata Sapanī ne manako ke he puhala ne tohi fakatū.”

Ko e ha e tohi nei a Matthew he Tohi Tapu kua aoga pauaki he fonua Sapanī? Pete ne nakai maama lahi he tokologa he tau Sapanī e Tohi Tapu, kua makai a lautolu ke totou ai. Tokologa ne nakaila kitia e Tohi Tapu kua maeke mogonei ke moua e vala i loto mo e totou ai.

Ko e ha ne fifili e tohi a Matthew? Ka logona he laulahi he tau Sapanī e kupu “Tohi Tapu,” ne manamanatu a lautolu ki a Iesu Keriso. Kua fifili ai e tohi a Matthew ha kua putoia ai e tala ke he matohiaga mo e fanauaga ha Iesu, haana Lauga he Mouga ne mahuiga, mo e haana perofetaaga fakalagalaga hagaao ke he tau aho fakamui. Ko e tau matakupu oti anei ne fiafia e tokologa he tau tagata Sapanī ki ai.

Ko e tau tagata fakailoa i Sapanī ne fakamakutu he kamata ke foaki e tohi foou nei mai he taha fale  ke he taha fale mo e tau liu aahi atu. Taha e matakainaga fifine ne tohi: “Loga atu e magaaho haaku mogonei ke tufatufa e Kupu he Atua ke he tau tagata he fonua ha mautolu. Ti maeke au ke age e lagaki he tohi a Matthew he afiafi ia he feleveiaaga pauaki!”

Foaki fēfē he tau tagata fakailoa e tohi foou nei? Tokologa e Sapanī ne iloa e tau talahauaga tuga e “gutuhala pukilu,” “tau penina ki mua he tau puaka,” mo e “aua neke fakaatukehe . . . ke he aho a pogipogi.” (Mataio 6:34; 7:6, 13) Ofo a lautolu ke iloa ko e tau kupu ha Iesu Keriso anei. Ka kitia e lautolu e tau kupu nei ia Matthew, tokologa ne pehē: “Manako tu+mau au ke lagataha e totou he Tohi Tapu.”

Ka liliu e tau tagata fakailoa ke aahi a lautolu ne talia e lagaki ha Matthew, fa talahau he tau tagata he kaina na totou agataha e lautolu e falu vala po ke tohi katoa. Ko e tagata he atu tau 60 ne tala age ke he taha tagata fakailoa: “Lagaloga e totou e au ti logona e mafanatia. Fakamolemole ti fakaako fakalaulahi la au ke he Tohi Tapu.”

Kua foaki foki e tohi a Matthew he fakamatala ke he matakavi ne loga e tau tagata. He fakamatala, ne age he taha Fakamoli e meli hila he kaina haana ke he taha fifine fuata ne talia e tohi. Taha e tulā he mole, ne meli e fifine ke he matakainaga fifine ti tala age kua totou e ia e taha vala he tohi ti fia iloa atu foki. Taha e faahi tapu he mole, ne fakaako fakapā e fifine ke he Tohi Tapu, mo e nakai leva ti fano a ia ke he tau feleveiaaga.

Molea e 1,600,000 lagaki he tohi a Matthew ne kua fakafano ai ke he tau fakapotopotoaga i Sapanī. He tau mahina takitaha, totou hogofulu afe e tau lagaki ne age he Tau Fakamoli ke he tau tagata. Ko e tau kupu ne hafagi aki e fufuta nei kua fakakite e tau logonaaga he tau tagata fakailoa he tohi ne pehē: “Amanaki mooli a mautolu ko e totou he tohi nei to fakahokulo e fiafia haau ke he Tohi Tapu.”