1. Ko e ha kua lata ia tautolu ke fakamalolō tumau e fakafetuiaga ha tautolu mo Iehova?

KAEKE ko e Fakamoli ha Iehova a koe kua papatiso, ha ha ia koe e mena uho lahi. Moua e koe e fakafetuiaga fakatagata mo Iehova. Ka ko e fakafetuiaga ia kua totoko he lalolagi ha Satani ti maeke foki ke lolelole ha ko e tau nakai mitaki katoatoa ni ha tautolu. Ko e kakano haia kua lata ia tautolu oti ke fakamalolō tumau e fakafetuiaga ha tautolu mo Iehova.

2. (a) Ko e heigoa e fakafetuiaga? (Kikite matahui tala.) (e) Maeke fēfē a tautolu ke fakamalolō e fakafetuiaga ha tautolu mo Iehova?

² Mooli nakai a Iehova ki a koe? Logona hifo nakai e koe ko ia ko e Kapitiga haau? Manako nakai a koe ke he fakafetuiaga haau mo ia ke lahi atu foki e malolō? Talahau he Iakopo 4:8 ki a koe e mena kua lata ia koe ke taute: “Kia fakatata atu a mutolu ke he Atua, ti fakatata mai ai a ia kia mutolu.” Ko e fakafetuiaga haau mo Iehova kua putoia a koe mo Iehova. *  (Kikite matahui tala.) Ka taute e koe e tau lakaaga ke fakatata atu ki a Iehova, to taute e ia e tau lakaaga ke fakatata atu ki a koe. He lahi e taute e koe e mena nei, to mooli lahi a ia ki a koe, mo e to tata lahi e fakafetuiaga haau ke tuga e puhala ne logona hifo e Iesu he mogo ne pehē a ia: “Kua moli ni a ia ne fakafano mai au” ti, “iloa e au a ia.” (Ioane 7:28, 29) Ka ko e heigoa falu mena ka taute e koe ke fakatata lahi atu ki a Iehova?

3. Matutaki fēfē a tautolu mo Iehova?

³ Ka manako a koe ke fakatata ki a Iehova, kua aoga lahi ke matutaki tumau a koe mo Iehova. Ka e maeke fēfē e mena nei? Manamanatu ke he puhala matutaki haau mo e kapitiga ne nofo mamao. Maeke a koe ke fetohitohiaki mo e tutala tumau he telefoni. Tutala a koe ki a Iehova ka tumau a koe ke liogi ki a ia. (Totou Salamo 142:2.) Ka e fakaatā fēfē e koe a Iehova ke tutala ki a koe? Taute e koe e mena nei ka tumau e totou e haana kupu ko e Tohi Tapu, mo e manamanatu fakahokulo ki ai. (Totou Isaia 30:20, 21.) Kia kitekite la tautolu ke he matutakiaga nei he vahāloto haau mo Iehova ka fakamalolō e fakafetuiaga haau mo ia mo e taute a ia mo Kapitiga mooli ki a koe.

4, 5. Tutala fēfē a Iehova ki a koe ka fakaako e koe e Tohi Tapu? Talahau e fakatai.

⁴ Iloa e tautolu ko e Tohi Tapu ko e fekau he Atua ma e tau tagata oti. Ka e maeke nakai he Tohi Tapu ke lagomatai a koe ke fakatata lahi atu ki a Iehova? Ē! He totou mo e fakaako tumau e koe e Tohi Tapu, manamanatu ke he puhala ne logona hifo a koe ke he mena haau hane totou. Ti manamanatu ke he puhala ka fakagahua e koe e mena haau ne fakaako. Ka taute e koe e mena nei, kua fakaatā e koe a Iehova ke tutala ki a koe. Ati eke a ia mo Kapitiga tata kua lagomatai a koe, ti fakatata lahi a koe ki a ia.​—Heperu 4:12; Iakopo 1:23-25.

⁵ Ma e fakatai, fēfē e logonaaga haau ka totou e koe e tau kupu ha Iesu: “Aua neke tanaki e mutolu e tau koloa ma mutolu ke he lalolagi”? Ka taute e koe e tau mena oti ke tuku fakamua a Iehova he moui haau, to logona hifo e koe kua fiafia a ia ki a koe. Ka e liga totou e koe e tau kupu ha Iesu ti mailoga e koe kua lata a koe ke fakamukamuka e moui haau ti hagaaki  fakalahi he fekafekau ke he Atua. Ka pihia, kua lagomatai e Iehova a koe ke maama e mena ka taute e koe ke fakatata lahi atu ki a ia.​—Mataio 6:19, 20.

6, 7. (a) Ka fakaako e tautolu e Tohi Tapu, ko e heigoa ka tupu ke he fakaalofa ha tautolu ki a Iehova mo e fakaalofa haana ki a tautolu? (e) Ko e heigoa kua lata ke eke mo matapatu foliaga ha tautolu ka fakaako e tautolu e Tohi Tapu?

⁶ Mooli ka fakaako e tautolu e Tohi Tapu, fakaako e tautolu e tau hikiaga ka taute ke maeke ia tautolu ke fekafekau fakamitaki ki a Iehova. Ka e fakaako foki e tautolu hagaao ke he tau mena mitaki ne taute e ia mo e aga futia mitaki haana, ne taute a tautolu ke lahi atu e fakaalofa ki a ia. He tupu e fakaalofa ha tautolu ki a ia, kua tupu foki e fakaalofa haana ki a tautolu, ti malolō fakahaga e fakafetuiaga ha tautolu mo ia.​—Totou 1 Korinito 8:3.

⁷ Ka manako a tautolu ke fakatata ki a Iehova, kua aoga ke fakaako e tautolu e Tohi Tapu ma e kakano hako. Pehē a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Maeke ia tautolu ke fakaako loga e mena foou mo e ofoofogia ka totou e tautolu e Tohi Tapu, ka ko e foliaga pauaki ha tautolu kua lata ke iloa mitaki a Iehova ko e Atua.​—Totou Esoto 33:13; Salamo 25:4.

8. (a) Liga fēfē e manatu he falu ke he puhala ne taute e Iehova e Patuiki ko Asaraia? (e) Ka iloa e koe a Iehova, fēfē e logonaaga haau ke he mena ne taute e ia?

⁸ Ka iloa e tautolu ko e Kapitiga tata a Iehova, to nakai tupetupe a tautolu ka nakai fakamaama tumau he Tohi Tapu e kakano ne taute pihia e ia. Ma e fakatai, he mogo ne patuiki a Asaraia i Iuta, ne tapuaki he tau tagata e tau atua fakavai. Nakai fakalataha a Asaraia mo lautolu. “Ne eke ai e ia e mahani tututonu ki mua a Iehova.” (2 Tau Patuiki 15:1-5) Ka e fakahala e Iehova a Asaraia aki e lepela. Ko e ha? Nakai talahau he vala nei he tala ki a tautolu. Ti fēfē e logonaaga haau ke he mena ne taute e Iehova? Tupetupe kia a koe ti taute a koe ke logona hifo kua nakai tonu a Iehova, ha kua fakahala teao e ia a Asaraia? Nakai. Ka iloa mitaki e koe a Iehova, iloa e koe kua hako tumau e akonakiaga haana. Ne “akonaki fakalata” tumau a ia. (Ieremia 30:11) Ti pete he nakai iloa e koe e kakano ne fakahala e Iehova a Asaraia, maeke ia koe ke iloa tonu na taute e Iehova e mena hako.

9. Ko e heigoa e tau vala tala kua lagomatai a tautolu ke maama e kakano ne fakahala e Iehova a Asaraia aki e lepela?

⁹ Kua talahau foki he Tohi Tapu ki a tautolu e tau vala tala hagaao ke he moui he Patuiki ko Asaraia, ne iloa foki ko e Patuiki ko Usia. (2 Tau Patuiki 15:7, 32) Ko e vala ne toe he tala ia 2 Nofoaga he Tau Patuiki 26:3-5, 16-21 ne pehē kua eke ai e ia e “mahani tututonu ki mua a Iehova.” Ka e talahau foki he mogo fakamui ne “fakatokoluga ai hana loto, ke fakahiku ai ke he hana malaia.” Lali ai e patuiki ke taute e mena ne kua fakaatā ni ke he tau ekepoa ke taute. Ne valugofulu ma taha e ekepoa ne tala age ki a ia kua hepe a ia ti lali ke taofi a ia. Tali atu fēfē a ia? Kua fakatokoluga lahi a ia ti ita ki a lautolu! Ko e tau vala tala nei ne lafi ki luga kua lagomatai a tautolu ke maama e kakano ne fakahala e Iehova e patuiki aki e lepela.

10. Ko e ha kua nakai lata ia tautolu ke iloa e tau kakano oti he tau mena ne taute e Iehova? Moua fēfē e tautolu e falanaki lahi na taute tumau e Iehova e mena hako?

¹⁰ Ti ko e heigoa e fakaakoaga aoga kua  iloa e tautolu? He tala ke he Patuiki ko Asaraia, loga e vala tala ke lagomatai a tautolu ke maama e kakano ne fakahala e Iehova a ia. Ka e, kaeke ke nakai talahau oti he Tohi Tapu e tau vala tala, ko e heigoa haau ka taute? To manatu nakai a koe kua taute mooli e Iehova e mena hako? Po ke logona hifo a koe kua lahi e vala tala he Tohi Tapu ke falanaki e koe kua hako tumau e mena ne taute he Atua? (Teutaronome 32:4) Ko e lahi e iloa e koe a Iehova ko e Atua, to lahi e fakaalofa mo e falanaki haau ki a ia. Ti nakai ni lata ia koe ke iloa e tau kakano ma e tau mena oti ne taute e ia. He fakaako e koe e Tohi Tapu, to mooli lahi a Iehova ki a koe mo e to fakatata lahi atu a koe ki a ia.​—Salamo 77:12, 13.

11-13. Iloa fēfē e koe kua fanogonogo a Iehova ke he tau liogi? (Kikite fakatino he kamataaga.)

¹¹ Ka liogi a tautolu, kua fakatata a tautolu ki a Iehova. Fakaheke e tautolu a ia, fakaaue ki a ia, mo e ole lagomatai ki a ia. (Salamo 32:8) Ka manako a koe ke kapitiga tata mo Iehova, kua lata ia koe ke talitonu kua logona e ia e tau liogi.

¹² Falu tagata ne pehē kua nakai fanogonogo e Atua ke he tau liogi ti ko e talahau he liogi ko e taha mena noa ni ke moua e koe e logonaaga mitaki. Ne talitonu a lautolu kua lagomatai he liogi a koe ke manamanatu fakamitaki ke he tau lekua haau mo e ke moua ne koe e tau tali. Mooli ai kua liga lagomatai he liogi a koe ke he tau puhala nei. Kaeke ke tutala a koe ki a Iehova he liogi, kua fanogonogo mooli a ia ki a koe. To iloa mooli fēfē e koe?

¹³ Manamanatu ke he mena nei: Ato  hau a Iesu ke he lalolagi, ne kitia e ia kua tali e Iehova e tau liogi he tau fekafekau Haana. He haia a Iesu he lalolagi, ne liogi a ia ke he Matua haana he lagi hagaao ke he tau manatu mo e tau logonaaga haana. Taha magaaho, ne liogi foki a ia he pō katoa. (Luka 6:12; 22:40-46) To taute nakai e Iesu e mena ia ane mai manatu e ia na nakai fanogonogo mooli a Iehova? Ne fakaako foki e Iesu e tau tutaki haana ke he puhala ke liogi ki a Iehova. To taute pihia nakai e ia ane mai manatu e ia na nakai fanogonogo a Iehova ke he tau liogi? Maaliali ai, ne iloa e Iesu kua fanogonogo a Iehova ke he tau liogi. Ne pehē foki a ia: “Ma Matua na e, kua fakaaue atu au kia koe, he fanogonogo mai a koe kia au. Kua iloa foki e au, kua fanogonogo mai a koe kia au nakai noa.” Maeke foki ia tautolu ke iloa tonu kua fanogonogo a Iehova ke he tau liogi ha tautolu.​—Ioane 11:41, 42; Salamo 65:2.

14, 15. (a) Aoga fēfē a tautolu ka liogi a tautolu ma e falu mena pauaki? (e) Lagomatai fēfē he tau liogi ha Kathy a ia ke fakatata lahi atu ki a Iehova?

¹⁴ Ko e tau tali ke he tau liogi haau ne liga nakai kitia maali tumau. Ka liogi a koe ma e falu mena pauaki, to maeke a koe ke kitia maali e tau tali ha Iehova, mo e to mooli lahi a ia ki a koe. Ka fakailoa e koe ki a Iehova e tau mena oti kana kua tupetupe a koe ki ai, to fakatata lahi a ia ki a koe.

¹⁵ Ma e fakatai, ne fa fano a Kathy ke he gahua he fonua, ka e nakai fia loto a ia. * (Kikite matahui tala.) Pehē a ia: “Ai fiafia au ke he gahua he fonua. Kakano, nakai fia loto mooli au ki ai.” He mogo ne litaea a ia mai he gahua tupe, ne fakamalolō he motua a ia ke eke mo paionia  tumau. Pehē a ia: “Mai foki e ia e tohi ole ki a au. Ti fifili au ke paionia, ka e kamata foki au ke liogi ki a Iehova he tau aho takitaha ke fakalagalaga au ke loto ke gahua he fonua.” Tali nakai e Iehova e tau liogi haana? He mole e paionia ke tolu e tau, pehē a ia mogonei: “Ko e fua he lahi e magaaho ne fakaaoga ke he gahua he fonua ti fakaako mai he falu matakainaga fifine, ne holo ki mua fakahaga e lotomatala haaku ke fakamatala. Mogonei, kua nakai fia loto au ke gahua he fonua​—kua manako lahi au ki ai. Mua atu, kua tata lahi mahaki e fakafetuiaga haaku mo Iehova nakai tuga fakamua.” Ne lagomatai mooli he tau liogi ha Kathy a ia ke fakatata lahi atu ki a Iehova.

16, 17. (a) Ko e heigoa kua lata tumau ia tautolu ke taute ke fakamalolō ha tautolu a fakafetuiaga mo Iehova? (e) Ko e heigoa ka fakatutala a tautolu he vala tala ka mui mai?

¹⁶ Maeke ia tautolu ke tumau e fakatata atu fakalahi ki a Iehova. Kia matutaki a tautolu ke fanogonogo ki a ia he fakaako tumau e Tohi Tapu, ti matutaki a tautolu ke tutala ki a ia he liogi. Ka taute e tautolu e mena nei, to malolō lahi fakahaga e fakafetuiaga ha tautolu mo Iehova, mo e to maeke he lagomatai haana ke fahia a tautolu ke fakauka ke he tau kamatamata.

¹⁷ Ka e falu mogo kua taufetului a tautolu mo e tau lekua fakatagata, pete ne matutaki a tautolu ke liogi ki a Iehova. He tau magaaho pehēnei, maeke a tautolu ke kamata ke galo e falanaki ha tautolu ki a Iehova. Liga logona hifo e tautolu kua nakai fakateliga a Iehova ke he tau liogi ha tautolu ti liga manamanatu kaeke ko e tau kapitiga mooli haana a tautolu. Ka kamata a koe ke logona hifo pihia, ko e heigoa haau ka taute? To lagomatai he vala tala ka mui mai a koe.