MANATU e Julian e logonaaga haana he mogo ne fanogonogo a ia ke he fakailoaaga ko e tama taane haana kua nakai fakahigoa ko e taha he Tau Fakamoli a Iehova. “Tuga kua hoko ke he fakaotiaga e moui haaku,” he talahau e ia. “Ko ia ko e tama uluaki haaku, ti to lahi e fetataaki ha maua; ti loga e mena ha maua ne taute tokoua.” Fakamaama e Julian ko e tama haana na mahani totonu a ia, ka e hiki a ia ti kamata ke taute e tau mena kelea. Ko e hoana ha Julian kua fa tagi tumau, ti nakai iloa e Julian e puhala ke fakamafana a ia. Pehē a Julian, “Kua hūhū tumau a maua ki a maua ni, kua kaumahala kia a maua ko e tau mamatua.”

Ko e heigoa e tau kakano ne foaki mai he Tohi Tapu ke tuku taha ki tua? Ti kaeke kua tupu mai ai e tau mamahi lahi, ko e ha kua pehē a tautolu ko e tuku ki tua ko e fakakiteaga he fakaalofa?

Kaeke ko e taha he Tau Fakamoli a Iehova kua papatiso ti holifono a ia ke he agahala kelea muitui ka e nakai tokihala, to tuku ni a ia ki tua.

Nakai amanaki a Iehova ke mitaki katoatoa a tautolu, ka e amanaki a ia ke he haana tau fekafekau ke omaoma ke he haana tau fakatufono mo e tumau ke tapu. Ma e fakatai, kua poaki age a Iehova ke he haana tau fekafekau ke kalo kehe mai he tau agahala kelea muitui tuga e mahani feuaki, tapuaki atua, kaiha, fofō mena, kelipopo tagata, mo e agaaga taulatua.​—1 Korinito 6:9, 10; Fakakiteaga 21:8.

Ko e amaamanakiaga ha Iehova mai ia tautolu kua fai kakano mo e ko e puipuiaga ma tautolu. Ma e fakatai, manako a tautolu ke nonofo auloa mo lautolu ne mafola, mitaki, mo e mahani fakamooli, ko e mena haia ne kua iloa ke he vahāloto ha tautolu mo e tau matakainaga fakaagaaga. Ko e ha ne kua pihia ai a lautolu? Ha kua tukulele a lautolu ki a Iehova mo e mavehe foki ke mumuitua a lautolu ke he tau talahauaga haana i loto he Tohi Tapu.

Ka e kua ka holifono e Kerisiano kua papatiso ke he agahala muitui ha ko e lolelole  fakatagata? Tupu e mena nei ke he falu he tau fekafekau ha Iehova he vahā kua mole, ka e nakai tiaki katoatoa e Iehova a lautolu. Ma e fakatai, pete ni kua holifono e Patuiki ko Tavita ke he mahani faivao mo e kelipopo tagata, ne pehē e perofeta ko Natano ki a Tavita kua fakamagalo e Iehova haana agahala.​—2 Samuela 12:13.

Ko e ha ne fakamagalo e Iehova a Tavita? Ha kua kitia e Iehova kua tokihala mooli a Tavita. (Salamo 32:1-5) He vahā nei foki ko e tagata ne agahala to fakamagalo kaeke kua tokihala mooli a ia mo e nakai liu taute ha mena kua kelea. (Gahua 3:19; 26:20) Kaeke kua nakai mailoga he tau motua he komiti fakafili e tokihala mooli he tagata, ti kua lata ni a ia ke tuku ki tua.

Kaeke ko e taha mai he magafaoa haau po ke taha kapitiga ne kua tuku ki tua, liga to uka a koe ke talia e fifiliaga ia mo e manatu kua kākā lahi ke he haau a logonaaga. Pete ia ko e Kupu ha Iehova kua fakakite fakamaali mai ki a tautolu ko e tuku ki tua ko e fakakiteaga he fakaalofa.

Pehē a Iesu “talahaua tututonu e pulotu” ha ko e tau fua ne moua mai ai. (Mataio 11:19) O mai la tautolu ke fakatutala ke he tolu e kakano ne kua pulotu ai e fifiliaga ke tuku ki tua taha kaeke kua nakai tokihala a ia.

Puipui he tuku ki tua e higoa ha Iehova mai he nakai fakalilifu. Ko e tau mena ka taute e tautolu kua tamai ai e fakalilifu po ke nakai fakalilifu ki a Iehova ha ko tautolu ko e Tau Fakamoli kua fua haana higoa. (Isaia 43:10) Tuga ni e mahani he tama kua maeke ke fakalilifu po ke nakai fakalilifu haana tau mamatua, ko e mahani he tau fekafekau ha Iehova kua maeke ke fakalilifu po ke nakai fakalilifu a Iehova. He vahā ha Esekielu, ko e tau tagata he tau motu kehe kua matutaki e tau Iutaia mo e higoa ha Iehova. (Esekielu 36:19-23) Tuga ni he vahā nei, kua matutaki he tau tagata e Tau Fakamoli a Iehova mo e higoa ha Iehova. Ti ka omaoma a tautolu ke he tau fakatufono ha Iehova, to tuku age e tautolu e fakalilifu ki a ia.

Kua fakatonu mai he aposetolo ko Peteru ke he tau Kerisiano: “Kia tuga e fanau omaoma, aua neke fakatai e mutolu a mutolu ke he tau manako lahi tuai ha mutolu ke goagoa ai a mutolu; Ka e tuga ne tapu a ia kua ui kia mutolu, kia pihia foki a mutolu ke tapu ke he tau mahani oti ha mutolu; Ha kua tohi Kia tapu a mutolu, ha ko au nai kua tapu ni au.” (1 Peteru 1:14-16) Ma e fakatai, ka kaumahala tumau a tautolu ke he mahani feuaki, to nakai fakalilifu e tautolu e higoa he Atua. Ka e kaeke ke tumau a tautolu ke he mahani meā, to fakalilifu e tautolu a Iehova.

Kaeke kua tumau taha he Tau Fakamoli a Iehova ke taute taha mena kelea, to maeke he tau tagata ne iloa a ia ke mailoga e tau mena haana ne taute. Ti kaeke ke iloa e lautolu kua nakai eke tuai a ia mo taha he Tau Fakamoli a Iehova, to mailoga ai e lautolu kua omaoma e tau tagata ha Iehova ke he tau mena ne talahau he Tohi Tapu mo e fakatumau e meā he fakapotopotoaga. Ma e fakatai, taha e tagata taane ne fano ke he feleveiaaga i Switzerland ti pehē, manako a ia ke eke mo taha matakainaga he fakapotopotoaga. Ko e mahakitaga haana ne tuku ki tua ha ko e mahani feuaki ti ko e magaaho nei kua manako a ia ke fakalataha mo e taha fakatokatokaaga ne “nakai talia e tau mahani kelea.”

Ko e tuku ki tua kua tumau e meā he fakapotopotoaga Kerisiano. Ne hataki he aposetolo ko Paulo e tau Korinito ke he hagahaga kelea he tagata agahala kua nakai tokihala ne kua fakaatā ke nofo i loto he fakapotopotoaga. Ne fakatatai e ia e fakaohoohoaga kelea he tau tagata agahala nei ke he fakaea he lakuaga falaoa. Pehē a Paulo: “Ko e mena tote kua  fakaea, kua fakaea aki e ia e lakuaga falaoa katoa.” Ti hataki e ia a lautolu: “Kia tuku kehe e mutolu e tagata mahani kelea nā ia mutolu.”​—1 Korinito 5:6, 11-13.

Ko e “tagata mahani kelea” ia kua kaumahala ke he mahani feuaki kua taute e ia mo e nakai mā. Falu i loto he fakapotopotoaga haana kua kamata ke nakai fakateaga e mahani kelea haana. (1 Korinito 5:1, 2) Kua hagahaga kelea e mena nei ha ko e falu Kerisiano kua lauia ke he moui feuaki nei ne kua mahomo atu i Korinito. Tuga ni he vahā nei kaeke kua fakatikai he fakapotopotoaga e agahala kelea muitui, liga to onoono e falu ke he tau tuaga ha Iehova ko e mena nakai aoga. (Fakamatalaaga 8:11) Tuga ne tau ie, po ke tau maka ne galo he tahi ti malona e toga, ko e tagata agahala ne nakai tokihala kua maeke ke moumou e tua he falu he fakapotopotoaga.​—Iuta 4, 12.

Liga lagomatai he tuku ki tua e tagata agahala ke mailoga kua hepe a ia. Fakaaoga e Iesu e fakatai hagaao ke he fuata ne toka e kaina he matua haana ti moumou oti e tufaaga ke he tau puhala nakai faka-Atua. Fakahiku ti mailoga he fuata ko e nofo kehe mai he kaina he matua haana kua nakai fai kakano. Ti tokihala a ia mo e fifili ke liu ke he magafaoa haana. Ne fiafia lahi e matua he kitia e tama haana kua hiki e mahani haana, ti fakaatā a ia ke liu mai ki kaina. (Luka 15:11-24) Lagomatai he fakataiaga nei a tautolu ke maama e logonaaga ha Iehova ka fakatokihala e taha. Pehē a ia: “Nakai fiafia au ka mate e tagata mahani kelea, ka kia liu mai a ia ne mahani kelea he tau mahani hana mo e moui ai.”​—Esekielu 33:11.

Ko e fakapotopotoaga Kerisiano ko e magafaoa fakaagaaga ha tautolu. Ka tuku ki tua e taha, kua nakai eke tuai a ia mo vala he magafaoa ia. He mole e lauia he tau fua he mahani kelea haana, to liga mailoga e ia e hepe haana ti manatu kua lahi atu e fiafia haana he mogo ne mitaki e fakafetuiaga haana mo Iehova mo e fakapotopotoaga. Liga omoomoi he mena nei a ia ke liu mai ke he magafaoa fakaagaaga haana.

Ke lagomatai e tagata ne tuku ki tua ke liu mai ke he fakapotopotoaga, lata ia tautolu ke fakakite ki a ia e fakaalofa he tumauokafua. Ma e fakatai, manamanatu ke he tokoua e tagata ō hui ne fakatali ke moua e fakahaoaga he taha aho makalili. He to lahi e makalili, ne lolelole lahi e taha tagata fano hui ti manako ke mohe. Kaeke ke mohe a ia he sinō to mate a ia. Ke lagomatai a ia ke ala tumau, ne pati he kapitiga e tau mata haana. Pete ne mamahi e mena nei, ka e maeke ai ke fakahao e moui haana. Fakakite e Tavita e manatu pihia he pehē: “Kia fahi au he tagata tututonu, ko e fakaalofa haia.” (Salamo 141:5) Mailoga e Tavita pete ne mamahi e akonakiaga, to lagomatai ai ki a ia.

Tuga ne pati ia, ko e tuku ki tua ko e mena ne lata ma e tagata ke liu mai ki a Iehova. Ko e tama taane ha Julian ne totoku he kamataaga he vala tala nei, kua hiki e moui haana ti liu atu ke he fakapotopotoaga hogofulu e tau he mole e tuku ki tua haana. Ko ia ko e motua mogonei. Pehē a ia: “He tuku ki tua kua maeke ia au ke kitia mata e tau fua he puhala moui haaku. Latatonu au ma e akonakiaga pihia.”​—Heperu 12:7-11.

Ko e mena uka lahi ka tuku ki tua e taha. Ka e nakai kakano kua nakai maeke a ia ke liu mai ki a Iehova. Kua aoga ma tautolu oti ke fakaatā e akonakiaga ke gahua. Maeke fēfē a tautolu ke taute pihia?

Lali tumau e tau motua ke fifitaki e fakaalofa ha Iehova, mua atu ka tala age ke he taha kua nakai eke tuai a ia mo taha he Tau Fakamoli a Iehova. Fakamaama totonu mo e  fakamaaliali e lautolu ke he tagata e mena kua lata a ia ke taute ke liu mai ki a Iehova mo e liu eke mo vala he fakapotopotoaga. Ka fakakite he taha ne kua tuku ki tua kua manako a ia ke liu mai ke he fakapotopotoaga, maeke he tau motua ke ahiahi a ia he falu magaaho ke fakamanatu ki a ia e tau mena kua maeke a ia ke taute ke liu mai ki a Iehova. *​—Kikite matahui tala.

Kua fakakite he tau tagata he magafaoa e fakaalofa ma e fakapotopotoaga mo e tagata ne tuku ki tua ka lalago e lautolu e fifiliaga ne taute he tau motua. Fakamaama e Julian, “Ko e tama taane agaia haaku a ia, ka ko e puhala moui haana kua fakakaupā a maua.”

Kua fakakite e lautolu oti he fakapotopotoaga e fakaalofa mooli ke he tagata ne tuku ki tua he lalago e akonakiaga ne foaki e Iehova ki a ia puhala he tau motua. Kakano ai kua nakai lata a lautolu ke taute mena auloa mo ia po ke tutala foki ki a ia. (1 Korinito 5:11; 2 Ioane 10, 11) Lata foki he fakapotopotoaga ke foaki fakalahi e fakaalofa mo e lalagoaga ke he magafaoa he tagata ne tuku ki tua. Ko e magaaho uka lahi anei ma e magafaoa. Nakai lata a tautolu ke taute a lautolu ke logona hifo kua vevehe foki a lautolu mai he fakapotopotoaga.​—Roma 12:13, 15.

“Ko e tuku ki tua ko e fakaholoaga kua lata mo tautolu, ti lagomatai a tautolu ke momoui fakatatau ke he tau puhala ha Iehova,” he fakahiku e Julian. “Ke he vahā loa, to tamai ai e tau fua mitaki, pete ne mamahi mogonei. Kaeke fakaatā e au e mahani kelea he tama haaku, to nakai liliuina a ia.”