1. Fakamaama e puhala ne eke e agelu mo Satani.

HE TAHA MAGAHALA, ne ha ha ia ia e fakafetuiaga mitaki mo Iehova. Ka e he mogo fakamui ko e mena moui fakaagaaga, po ke agelu nei, ne manako ke he tau tagata ke tapuaki ki a ia. He nakai fakamafiti ke tiaki e manako hepe nei, ne fakaatā e ia ke tupu ti fua mai e agahala. (Iakopo 1:14, 15) Nakai iloa e tautolu e higoa mooli haana, ka kua fakahigoa a ia mogonei ko Satani. “Nakai tumau ni a ia ke he mena moli.” Ne totoko e ia a Iehova ti eke mo “matua he pikopiko.”​—Ioane 8:44.

2, 3. Ko e heigoa e tau kupu “Satani,” “Tiapolo,” “gata,” mo e “tarako” kua fakakite hagaao ke he fī mua ue atu ha Iehova?

² Tali mai he totokoaga ha Satani, ne eke a ia mo fī mua ue atu ha Iehova mo e ko e fī he tau tagata oti kana. Maeke a tautolu ke kitia e matahavala ha Satani he kitekite ke he fakamaamaaga he Tohi Tapu hagaao ki a ia. Kakano e Satani ko e  “Totoko,” nukua fakakite ko e agelu kelea nei kua fakavihia e pule he Atua ti totoko ai mo e haana malolō katoa. Ko e manako mooli ha Satani ke kitia e fakaotiaga he pule ha Iehova.

³ Ia Fakakiteaga 12:9, ne fakahigoa a Satani ko e Tiapolo, ne kakano ko e “Pikopiko.” Nakai fakalilifu e Satani e Atua he fakahigoa a ia ko e pikopiko. Ko e talahauaga “gata tuai” ne fakamanatu ki a tautolu e puhala ne fakaaoga e Satani e gata ke fakahehē a Eva. Ko e talahauaga “tarako lahi” e puhala mitaki foki ke fakamaama aki a Satani. Ko ia ne favale, aga vale, mo e kelea muitui. Manako a ia ke taofi e fakamooliaga he finagalo ha Iehova mo e kelipopo e tau tagata he Atua.

4. Ko e heigoa ha tautolu ka fakatutala ki ai he vala tala nei?

⁴ Maaliali ai, ko Satani ko e fakahagahaga kelea mua ue atu he mahani fakamooli ha tautolu. Ko e kakano haia ne hataki he Tohi Tapu a tautolu: “Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia.” (1 Peteru 5:8) Ko e mena ia, to fakatutala e vala tala nei ke he tolu e aga ha Satani ne fakakite e kakano kua lata ia tautolu ke puipui a tautolu mai he fī kelea lahi nei ha Iehova mo e tau tagata Haana.

5, 6. (a) Talahau e tau fakataiaga ke fakakite kua “malolo lahi” e tau agelu. (e) He puhala fe kua ha ha ia Satani e “kautu ke mate ai”?

⁵ Kua “malolo lahi” e tau agelu. (Salamo 103:20) Ha ha ia lautolu e iloilo mo e malolō ne mua atu mai he tau tagata. Mooli, kua fakaaoga fakamitaki he tau agelu fakamooli e malolō ha lautolu. Ma e fakatai, taha he tau agelu ha Iehova ne tamate 185,000 he tau fī he kautau Asuria. To nakai maeke he taha e tagata ke taute e mena nei mo e uka foki ma e kautau katoa. (2 Tau Patuiki 19:35) He taha mogo foki, ne fakaaoga he agelu e makaka mo e malolō haana ke fakatokanoa e tau aposetolo ha Iesu mai he fale puipui. Pete he tutū tata e tau leoleo, ne nakai mailoga e lautolu kua hafagi he agelu e tau gutuhala, mo e fakaatā e tau aposetolo ke o mai ki fafo, ti tamau ai e tau gutuhala i tua ha lautolu!​—Gahua 5:18-23.

⁶ Fakaaoga fakamitaki he tau agelu fakamooli e malolō ha lautolu, ka e fakaaoga fakakelea e Satani e malolō haana. Ti ha ha mooli ia Satani e lahi he malolō mo e fakaohoohoaga. Hagaao e Tohi Tapu ki a ia ko e “iki he lalolagi nai” mo e “atua he lalolagi nai.” (Ioane 12:31; 2 Korinito 4:4) Ha ha foki ia Satani “e kautu ke mate ai.” (Heperu 2:14) Nakai kakano e mena nei kua kelipopo mooli e ia e tau tagata oti kana. Ko e heigoa mogoia e kakano he mena nei? Fakamua, kua pukeina e lalolagi nei he aga vihiatia mo e aga vale ha Satani. Uaaki, ha kua talitonu a Eva ke he pikopiko ha Satani ti liuliu a Atamu ke he Atua, kua agahala e tau tagata oti kana ti mamate. (Roma 5:12) Ne fakahigoa e Iesu a Satani, ko e “keli tagata.” (Ioane 8:44) Ko ia mooli ko e fī malolō lahi.

7. Fakakite fēfē he tau temoni kua malolō lahi a lautolu?

⁷ Ka totoko e tautolu a Satani, totoko foki e tautolu a lautolu oti kua lalago a ia mo e totoko ke he pule he Atua. Putoia ai e matakau lahi he falu agelu totoko ne fakahigoa ko e tau temoni. (Fakakiteaga 12:3, 4) Lagaloga e fakakite e lautolu kua mua atu e malolō ha lautolu mai he tau tagata he fakatupu e matematekelea lahi  ki a lautolu. (Mataio 8:28-32; Mareko 5:1-5) Ua nimo ko e mena malolō lahi e tau temoni mo e ha lautolu a pule. (Mataio 9:34) Ka noa mo e lagomatai ha Iehova, to nakai maeke a tautolu ke kautū e tau ha tautolu ki a Satani.

8. (a) Ko e heigoa e foliaga ha Satani? (Kikite fakatino he kamataaga.) (e) Mai he mena ne kitia e koe, aga vale fēfē e lalolagi nei tuga a Satani?

⁸ Ne fakatatai he aposetolo ko Peteru a Satani ke he “leona tagi.” Taha e tohi ne fakamaama ko e kupu Heleni ne fakaliliu “tagi” kua kakano “ko e gugulu he manu ka ita lahi mahaki he hoge.” Ko e puhala mitaki lahi ke fakamaama e aga vale mo e aga kelea lahi a Satani! Fitā he pule a ia ke he lalolagi katoa, ka e nakai kuenaia he manako haana. Ko Satani kua tuga e leona ne hoge ke moua e falu ke faiola ai. (1 Ioane 5:19) Ko e tau matapatu matafī haana ko lautolu ne fakauku kua haia agaia he lalolagi, ne fakalataha mo e ‘tau mamoe kehe.’ (Ioane 10:16; Fakakiteaga 12:17) Ko e foliaga ha Satani ke moumou e tau tagata a Iehova. Ko e favaleaga ke he tau Kerisiano mooli he senetenari fakamua ato hoko ke he mogonei kua fakamooli e aga vale ha Satani.

9, 10. (a) Tau atu fēfē a Satani ke he motu ko Isaraela? (Talahau e tau fakataiaga.) (e) Ko e ha kua ha ha ia Satani e kakano uho ke matafī ki a Isaraela i tuai? (i) Fēfē e logonaaga ha Satani he manatu haau, ka taute he taha he tau fekafekau ha Iehova e agahala hagahaga kelea lahi he vahā nei?

⁹ Ne fakakite e Satani e aga vale haana he taha puhala foki. Ko e leona hoge kua nakai fai logonaaga ke he matafī haana. Nakai fai logonaaga fakaalofa a ia ato  tamate ai, ti nakai fai logonaaga kelea ka mole e tamate. He puhala pihia foki, nakai fai logonaaga fakaalofa a Satani ki a lautolu ne totoko e ia. Ma e fakatai, fēfē e logonaaga ha Satani he manatu haau, he tau mogo takitaha ne kitia e ia e tau Isaraela ne mahala ke he tau agahala tuga e mahani feuaki mo e lotokai? Maeke nakai a koe ke logona e fiafia lahi ha Satani ha kua kautū a ia he kitia e fakahikuaga kelea he mahani feuaki ha Semeri mo e lotokai ha Kehasi?​—Numera 25:6-8, 14, 15; 2 Tau Patuiki 5:20-27.

¹⁰ Ha ha ia Satani e kakano uho ke matafī ki a Isaraela i tuai. Manatu na tupu mai e Mesia he motu ia, ti ko ia ka tatuki a Satani mo e fakakite ko Iehova ne ha ha ai e tonuhia ke pule. (Kenese 3:15) Nakai manako a Satani ke he tau Isaraela ke moua e taliaaga he Atua, ti taute e ia e tau mena oti kana ke fakahehē a lautolu ke agahala. Ua manamanatu na momoko e logonaaga ha Satani ki a Tavita he mogo ne faivao a ia. Ua manatu kua fai fakaalofa a Satani ki a Mose he mogo ne galo e ia e magaaho ke hū atu ke he Motu he Maveheaga. Na fiafia lahi a Satani ke kitia e taha he tau fekafekau he Atua kua taute e agahala hagahaga kelea lahi. Kua fakaaoga he Tiapolo e tau kautūaga pihia ke fakafiufiu aki a Iehova.​—Tau Fakatai 27:11.

11. Ko e ha ne liga matafī a Satani ki a Sara?

¹¹ Ne vihiatia pauaki e Satani e matohiaga he magafaoa ka tupu mai e Mesia. Ma e fakatai, manamanatu ke he mena ne tupu he mole e tala age a Iehova ki a Aperahamo to eke a ia mo “motu lahi.” (Kenese 12:1-3) He haia a Aperahamo mo Sara i Aikupito, ne tamai e Farao a Sara ke he kaina haana ti manako ke eke a ia mo hoana haana. Ka e puipui e Iehova a Sara ti fakahao a ia mai he tuaga uka nei. (Totou Kenese 12:14-20.) Pihia foki e mena ne tupu he maaga ko Kira ato fanau a Isaako. (Kenese 20:1-7) Fai vala kia a Satani ke he tau tuaga pehēnei? Manatu na toka e Sara e maaga monuina ko Uro ke nofo he tau fale ie. Ti amaamanaki kia a Satani ke kamatamata a Sara aki e tau fale patuiki maukoloa ha Farao mo Apimeleko? Manatu kia a Satani to moumou e Sara e mahani fakamooli ke he taane haana mo Iehova foki he mau ke he taha he tau patuiki ia? Nakai talahau he Tohi Tapu, ka e liga molea e fiafia he Tiapolo ane mai galo e Sara e tuaga ke fai vala he matohiaga he magafaoa he Mesia. To nakai tokihala e logonaaga ha Satani ane mai fakakelea e fakamauaga, matahigoa, mo e fakafetuiaga he fifine mitaki ia mo Iehova. Aga vale mo e kelea lahi mooli a Satani!

12, 13. (a) Fakakite fēfē e Satani e aga vale haana he mole e fanau ha Iesu? (e) Fēfē e manatu haau ke he logonaaga ha Satani ki a lautolu ne ikiiki ne fakaalofa ki a Iehova mo e lali ke fekafekau ki a Ia he vahā nei?

¹² Ne fanau a Iesu totou teau e tau tau he mole a Aperahamo. Ua manamanatu na kitia e Satani e tama mukemuke nei kua fulufuluola po ke ofania. Iloa e Satani to lahi hake e tama mukemuke nei ke eke mo Mesia ne mavehe. Ko e vala pauaki a Iesu he mataohi a Aperahamo, mo e he mogo fakamui to “moumou e ia e tau gahua he tiapolo.” (1 Ioane 3:8) To manatu  nakai a Satani ko e tamate he tama ko e aga vale lahi? Nakai. Kua nakai popole a ia ke he mena hako po ke hepe. Ti gahua fakamafiti a ia ke lali ke tamate e tama ko Iesu. Fēfē?

¹³ Ko e mogo ne logona he Patuiki ko Herota mai he tau makoi kua fanau tuai e “patuiki he tau tagata Iutaia,” ne ita lahi a ia ti manako ke tamate e tama mukemuke. (Mataio 2:1-3, 13) Ti poaki e ia ke tamate e tau tama taane oti ne ua e tau he moui mo e ikiiki foki i Petelehema mo e tau katofia oti i ai. (Totou Mataio 2:13-18.) Ne hao a Iesu he kelipopoaga lahi ia, ka ko e heigoa ne talahau he mena nei ki a tautolu hagaao ke he ha tautolu a fī ko Satani? Nakai uho e moui he tagata ke he Tiapolo. Ti nakai fakaalofa foki a ia ke he tau fanau. Ko e “leona tagi” mooli a Satani. Ua nimo e aga vale mooli haana!

14, 15. Maeke fēfē a Satani ke “fakapouli . . . e tau manatu ha lautolu kua nakai tua”?

¹⁴ Ko e puhala ni ka fuluhi kehe e Satani e tau tagata ke totoko ke he ha tautolu a Atua fakaalofa ko Iehova, ko e fakahehē a lautolu. (1 Ioane 4:8) Fakahehē e Satani e tau tagata ke nakai loto a lautolu ke he tau mena fakaagaaga, kakano ai kua nakai mailoga e lautolu kua lata a lautolu ke fai fakafetuiaga mo e Atua. (Mataio 5:3) Ko e Tiapolo ne “fakapouli . . . e tau manatu ha lautolu kua nakai tua” ke nakai maeke a lautolu ke kitia e kupu mooli hagaao ki a Iehova.​—2 Korinito 4:4.

¹⁵ Taha he tau puhala mua ue atu ha Satani he fakahehē e tau tagata ko e lotu fakavai. Iloa e ia kua lata a Iehova ke moua e [“mahani fakamooli katoatoa,” NW]. (Esoto 20:5) Ti manamanatu la ke he fiafia ha Satani ka kitia e ia e tau tagata ne tapuaki ke he ha lautolu a tau tupuna po ke tau mena momoui po ke tau manu, kakano ko e ha tagata po ke ha mena ne nakai ko Iehova. Momoko ai, tokologa foki ne manatu ko e tapuakiaga ha lautolu kua talia ke he Atua na omoomoi he tau taofiaga fakavai mo e tau aga fakamotu nakai aoga. Ko e tau Isaraela he vahā a Isaia ne pihia foki e tuaga. Ne hūhū a Iehova ki a lautolu: “Ko e ha ne uta ai e mutolu e tau tupe ke he tau mena nakai ko e tau mena kai, mo e uta e tau mena ne gahua ai a mutolu ke he tau mena ke nakai makona ai? Kia fanogonogo fakamitaki mai a mutolu kia au, mo e kai e mutolu e tau mena mitaki, ti fiafia ha mutolu a tau loto ke he tau mena lolo.”​—Isaia 55:2.

16, 17. (a) Ko e ha ne tala age a Iesu ki a Peteru: “Ma Satani na e, kia fano a koe ki tua haku”? (e) Fakahehē fēfē e Satani a tautolu ke nakai mataala a tautolu?

¹⁶ Maeke a Satani ke fakagoagoa foki e tau fekafekau fakamakutu ha Iehova. Ma e fakatai, manamanatu ke he mena ne tupu he tala age a Iesu ke he tau tutaki haana to nakai leva ti tamate a ia. Ko e aposetolo ko Peteru kua fakaalofa ki a Iesu ne pehē: “Ko e Iki na e, kia mamao ia koe e mena ia [po ke, totonu ki a koe ni]; nakai ni hoko e mena ia kia koe.” Tala age a Iesu ki a Peteru: “Ma Satani na e, kia fano a koe ki tua haku.” (Mataio 16:22, 23)  Ko e ha ne ui e Iesu a Peteru ko “Satani”? Ha kua iloa e Iesu e mena ka tupu. Nakai leva, to mate a Iesu mo poa lukutoto mo e to fakamooli ko e Tiapolo ko e pikopiko a ia. Ko e magaaho uka lahi anei he fakamauaga tala tuai he tagata ti nakai ko e mogo ma Iesu ke ‘totonu’ ki a ia ni. To fiafia lahi a Satani ke he mena ia ane mai nakai mataala a Iesu.

¹⁷ Kua tata mai tuai e moumouaga ke he fakatokaaga nei, ti nonofo foki a tautolu he magaaho uka lahi. Manako a Satani ki a tautolu ke ‘totonu’ ki a tautolu ni he hagaaki ke kautū he lalolagi nei. Manako a ia ke nimo e tautolu kua nonofo a tautolu he tau aho fakamui ti nakai mataala. Ua fakaatā e mena ia ke tupu ki a koe! Ka “kia mataala.” (Mataio 24:42) Ua talitonu ke he pikopiko ha Satani kua mamao agaia e fakaotiaga po ke to nakai fai mena ka tupu.

18, 19. (a) Liga lali fēfē a Satani ke eke lagatau ki a tautolu mo e taute a tautolu ke manamanatu kua nakai lata a tautolu mo e fakaalofa ha Iehova? (e) Lagomatai fēfē e Iehova a tautolu ke fakatumau e mataala?

¹⁸ Eke lagatau a Satani ki a tautolu ke he taha puhala foki. Manako a ia ki a tautolu ke talitonu kua nakai lata a tautolu ke moua e fakaalofa ha Iehova mo e to nakai fakamagalo he Atua e tau agahala ha tautolu. Ka ko e tau pikopiko anei mai ia Satani. Manamanatu ki ai, ko hai mooli kua nakai lata ke moua e fakaalofa ha Iehova? Ko Satani. Ko hai ka nakai fakamagalo he Atua? Ko Satani. Ma tautolu, pehē e Tohi Tapu: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” (Heperu 6:10) Loto fakaaue a Iehova ke he tau mena oti kua taute e tautolu ke fakafiafia a ia, ti ko e fekafekauaga ha tautolu ki a ia kua nakai fakateaga. (Totou 1 Korinito 15:58.) Ti ua goagoa ha ko e tau pikopiko ha Satani.

¹⁹ Fitā e kitia e tautolu ko Satani kua malolō lahi, aga vale, mo e fakahehē. Maeke fēfē a tautolu ke kautū he tau ha tautolu ke he fī tuga anei? Foaki mai e Iehova e lagomatai ki a tautolu. Fakaako mai he Kupu Haana ki a tautolu e tau puhala ha Satani ke “nakai pouli a tautolu ke he hana tau lagatau.” (2 Korinito 2:11) Ka maama e tautolu e tau puhala kehekehe ne tau mai a Satani ki a tautolu, kua mukamuka lahi ma tautolu ke fakatumau e mataala. Ka e nakai lahi ni e iloa he tau lagatau ha Satani. Pehē e Tohi Tapu: “Kia totoko atu a mutolu ke he tiapolo, ti hola kehe ai a ia ia mutolu.” (Iakopo 4:7) Ko e vala tala ka mui mai to fakatutala ke he tolu e faahi ka tau atu a tautolu ki a Satani mo e kautū ai.