Ke he loga e tau tau ko e tau tohi ha tautolu kua fakamaama e higoa Koku ha Makoku kua hagaao ki a Satani he mole e liti hifo a ia mai he lagi. Ko e ha? Ha kua fakakite mai he tohi a Fakakiteaga ko Satani ko e takitaki he favaleaga ke he tau tagata he Atua he lalolagi katoa. (Fakakiteaga 12:1-17) Ti maama ai e tautolu ko Koku ko e taha higoa foki ha Satani.

Pete ia, ha ha i ai falu lekua ke he fakamaamaaga nei. Manamanatu la ke he mena nei: Ka fakatutala ke he moumouaga ha Koku, pehē a Iehova to foaki age e ia a Koku “ke he tau manu lele favale kua tapakau kehekehe, mo e tau manu he vao, kia kai ai ni a koe.” (Esekielu 39:4) Ti lafi atu ai e Iehova: “Ko e aho ia to foaki age e au [ki a Koku] e mena ke eke mo tukuaga ke he motu a Isaraela.” (Esekielu 39:11) Ka e maeke fēfē a Satani, ko e mena fakaagaaga nakai kitia, ke kai he tau manu lele mo e tau manu vale? Maeke fēfē a ia ke tanu he lalolagi? Kua fakakite fakamaaliali mai he Tohi Tapu to liti a Satani ke he pahua ke he 1,000 tau. To nakai kai po ke tanu a ia.​—Fakakiteaga 20:1, 2.

Pehē e Tohi Tapu ke he fakahikuaga he 1,000 tau, to fakatokanoa mai a Satani he pahua mo e “to fina atu foki a ia ke fakahehe e tau motu ha he tau fahi ne fa he lalolagi, ko Koku mo Makoku, ke fakapotopoto a lautolu ke tau.” (Fakakiteaga 20:8) Ka e kaeke ko Satani a Koku, kua kakano e mena nei to fakahehē ni e Satani a ia. Ko e mena ia, nakai hagaao a “Koku” ki a Satani he tohi a Esekielu po ke tohi a Fakakiteaga.

Ti ko hai a Koku ha Makoku? Ke moua e tali ke he hūhū ia, kua lata ia tautolu ke kumikumi ke he Tohi Tapu ke iloa ko hai ne favale ke he tau tagata he Atua. Pehē mai e Tohi Tapu ko e favale ha ‘Koku ha Makoku,’ ko e favale mai he “patuiki he fahi tokelau,” mo e favale mai he “tau patuiki he lalolagi.” (Esekielu 38:2, 10-13; Tanielu 11:40, 44, 45; Fakakiteaga 17:14; 19:19) Ko e tau vahega favale kehekehe kia anei? Nakai liga pihia. Tuga kua fakaaoga he Tohi Tapu e tau higoa kehekehe ke fakamaama aki e favaleaga taha nei. Ko e ha ne kua talahau pihia ai e tautolu? Ha kua pehē mai e Tohi Tapu ki a tautolu ko e tau kautu oti he lalolagi to putoia fakalataha ai ke he favaleaga fakahiku nei ka kamata he tauaga i Amaketo.​—Fakakiteaga 16:14, 16.

Kaeke ke fakatatai e tautolu e tau fakamauaga oti nei he Tohi Tapu hagaao ke he favaleaga fakahiku  ke he tau tagata he Atua, kua maaliali ai ko e higoa a Koku ha Makoku kua nakai hagaao ki a Satani. Ka e ko Koku ha Makoku kua hagaao ke he taha matakau he tau kautu kehekehe. To takitaki nakai he “patuiki he fahi tokelau” e matakau nei? Nakai maeke ia tautolu ke talahau fakamooli. Ka ko e fakamaamaaga nei tuga kua lagotatai mo e talahauaga ha Iehova hagaao ki a Koku: “Ti hau ai ni a koe he hau a mena kua nofo ai ke he fahi tokelau, ko koe mo e tau motu loga fakalataha mo koe, kua heke solofanua a lautolu oti, ko e motu o tagata tokologa, mo e kau lahi mahaki.”​—Esekielu 38:6, 15.

Ti pihia foki e talahauaga he perofeta ko Tanielu ne moui he vahā a Esekielu, hagaao ke he patuiki he faahi tokelau: “To fakaatukehe ai a ia ha ko e tau ogo mai he fahi uta, mo e fahi tokelau; ti fina age a ia mo e ita lahi kia fakaoti ai e ia mo e kelipopo ai e tau tagata tokologa. To fakatu e ia e tau fale ie he hana fale iki ke he vaha he tahi mo e mouga fulufuluola mo e tapu; ka to hoko atu ke he hana fakahikuaga, to nakai ha i ai taha ke lagomatai kia ia.” (Tanielu 11:44, 45) Kua teitei tatai foki e mena nei mo e talahauaga he tohi a Esekielu hagaao ke he mena ka taute e Koku.​—Esekielu 38:8-12, 16.

Ko e heigoa ka tupu ka mole e favaleaga fakahiku? Pehē mai a Tanielu: “Ko e vaha ia to tu ki luga [i Amaketo] a Mekaeli [Iesu Keriso], ko e iki ne mua, ko ia ne tu [tali mai he 1914] ha ko e tau tagata he hau a motu; to hohoko mai foki e tau aho ke matematekelea [ko e matematekelea lahi] ai; nakai kitia ha vaha pihia tali he fakatoka eke e tau motu ke hoko mai ke he vaha ia; ko e vaha foki ia to laveaki ai hau a tau tagata, ko lautolu oti kua tohi ke he tohi.” (Tanielu 12:1) Totou foki e tautolu e talahauaga pihia ke he mena ka taute e Iesu ia Fakakiteaga 19:11-21.

Ka ko hai a “Koku mo Makoku” ne tohia ia Fakakiteaga 20:8? Ko e higoa nei kua hagaao ki a lautolu oti kua totoko ki a Iehova mo e favale ke he haana tau tagata he vahā he kamatamataaga fakahiku he fakaotiaga he 1,000 tau. To ha ha ia lautolu e agaaga vihiatia tuga ia Koku ha Makoku, ko e tau kautu ne favale ke he tau tagata he Atua he matahiku he matematekelea lahi. Ti tuga ni e tau kautu ia ka moumou ia Amaketo, to moumou pihia foki a Koku mo Makoku. (Fakakiteaga 19:20, 21; 20:9) Ti tuga kua latatonu ki a lautolu oti kua totoko he fakaotiaga he 1,000 tau ke fakahigoa ko “Koku mo Makoku.”

Ha ko tautolu ko e tau tagata kumikumi fakamakutu ke he Tohi Tapu, kua manako lahi a tautolu ke iloa ko hai e “patuiki he fahi tokelau,” he vahā kua tata mai i mua. Ka e ko hai ni mo hai ka totoko ke he tau tagata he Atua, kua ha ha ia tautolu e mauokafua ke he ua e mena: (1) Ko Koku ha Makoku mo e haana tau kautau to kaumahala mo e to fakaotioti. (2) Ha tautolu a Patuiki ko Iesu Keriso, to fakahao e tau tagata he Atua mo e takitaki atu a lautolu ke he lalolagi foou ne mafola mo e haohao mitaki mooli.​—Fakakiteaga 7:14-17.