1. Ka fakamatala a tautolu, liga fakaaoga fēfē e tautolu e liogi ha Iesu ia Mataio 6:9-13?

TOKOLOGA e tagata ne iloa e tau kupu he liogi ia Mataio 6:9-13. Ka fakamatala a tautolu, fakaaoga e tautolu e tau kupu he liogi nei ke fakaako e tau tagata ko e Kautu ko e fakatufono mooli mai he Atua ka hiki e lalolagi ke he parataiso. Fakaaoga foki e tautolu e tau kupu “kia tapu hau a higoa” ke fakakite kua fai higoa e Atua ti kua lata mogoia ia tautolu ke fakatapu ai.​—Mataio 6:9.

2. Iloa fēfē e tautolu kua nakai manako a Iesu ki a tautolu ke fatiaki e tau kupu taha ia he tau magaaho oti kua liogi a tautolu?

² Manako kia a Iesu ke fatiaki tumau e tautolu e tau kupu ne fakaaoga e ia he tau magaaho oti kua liogi a tautolu, tuga ne taute he tokologa? Nakai. Pehē a Iesu: “Ka liogi a mutolu, aua neke pola mau ha mutolu a tau kupu.” (Mataio 6:7) He taha magaaho foki, he fakaako e ia e tau tutaki haana ke liogi, ne fatiaki e ia e liogi ka e nakai fakaaoga ai e tau kupu taha ia. (Luka 11:1-4) Ti kua foaki mai e Iesu e liogi fakatai ki a tautolu ke fakaako a tautolu ke he tau mena kua lata ia tautolu ke liogi.

3. Ko e heigoa e tau hūhū ka hūhū hifo e koe he fakaako e koe e liogi fakatai?

 ³ He vala tala nei mo e vala tala kahau, to fakaako fakamatafeiga e tautolu e liogi fakatai. He taute e tautolu e mena nei, hūhū ki a koe, ‘Maeke fēfē he liogi nei ke lagomatai au ke talahau e tau liogi fai kakano?’ Mua atu ai, ‘Moui fakatatau nakai au mo e liogi fakatai?’

4. Ko e heigoa ne fakamanatu he tau kupu “ha mautolu a Matua” ki a tautolu, ti eke fēfē a Iehova mo Matua ha tautolu?

⁴ Ne kamata e Iesu e liogi he pehē, “Ha mautolu a Matua.” Fakamanatu he mena nei ki a tautolu ko Iehova e Matua ke he tau matakainaga oti ha tautolu he lalolagi katoa. (1 Peteru 2:17) Ko lautolu ne fifili e Iehova ke momoui he lagi ne hiki mo tau tama haana, ti ko ia ko e Matua ha lautolu he puhala pauaki. (Roma 8:15-17) Ko lautolu ka momoui tukulagi he lalolagi ka hea foki a ia ko e “Matua.” Foaki age e Iehova e moui ki a lautolu ti leveki fakalahi ke he tau manako ha lautolu. To hea foki a lautolu ko e “fanau he Atua” he mole e mitaki katoatoa ha lautolu mo e fakatumau e mahani fakamooli ki a Iehova he kamatamata fakahiku.​—Roma 8:21; Fakakiteaga 20:7, 8.

5, 6. Ko e heigoa e mena fakaalofa mua ue atu ka foaki he tau matua ke he tau tama ha lautolu, ti ko e heigoa ka igatia e tama mo e lata ke fakaaoga ki ai e mena fakaalofa nei? (Kikite fakatino he kamataaga.)

⁵ Foaki he tau matua ke he tau tama ha lautolu e mena fakaalofa ka lagomatai e lautolu e tau tama ke iloa ko Iehova ko e ha lautolu a Matua he lagi ti ka fakaako e lautolu e tau tama ke liogi ki a Ia. Ko e leveki takaiaga i Aferika Toga ne pehē: “Tali mai he aho ne fanau e tau tama fifine ha maua, ne liogi au mo lautolu he tau pō oti ato kehe ai ka nakai haia au i kaina. Fa mahani e tau tama fifine ha maua ke ui na ai manatu e lautolu e tau kupu takitaha he tau liogi ia he tau pō takitaha. Ka e manatu e lautolu e takatakaiaga, he tapu he matutakiaga mo e ha mautolu a Matua ko Iehova, mo e logonaaga he fakatotoka mo e haohao mitaki. He mogo ne maeke a lautolu ke liogi, ne fakamafana e au a lautolu ke liogi fakaleolahi ke logona e au a lautolu ne fakakite e tau manatu mo e tau logonaaga ha lautolu ki a Iehova. Ko e magaaho mitaki lahi anei ke kitia e tau mena he tau loto ha lautolu. Ti maeke ia au ke takitaki fakatekiteki a lautolu ke fakaaoga falu vala aoga he liogi fakatai ke maeke he tau liogi ha lautolu ke hokulo e fakavēaga.”

⁶ Ne matutaki e tau tama fifine haana ke fakatata atu ki a Iehova pete he lalahi hake a lautolu. Kua fai taane a lautolu mogonei ti fekafekau mau mo e ha lautolu a tau taane ki a Iehova. Ko e mena fakaalofa mua ue atu ka foaki he tau matua ke he ha lautolu a tau tama ke fakaako a lautolu ko Iehova ko e Atua mooli ti eke a lautolu mo kapitiga tata Haana. Ka e igatia e tama mo e lata ke fakatata tumau e fakafetuiaga nei mo Iehova.​—Salamo 5:11, 12; 91:14.

7. Ko e heigoa e lilifu ne moua e tautolu, ka ko e heigoa kua lata ia tautolu ke taute?

⁷ Ha ha ia tautolu e lilifu he iloa e higoa he Atua ti eke mo “tau tagata māna.” (Gahua 15:14; Isaia 43:10) Liogi a tautolu, “Kia tapu hau a higoa,” kakano ke fakatapu ai. Ole foki a tautolu ki a Iehova ke lagomatai a tautolu ke nakai taute po ke talahau e tau mena ne liga ekefakakelea aki a ia. Nakai lata a tautolu ke tuga e falu he senetenari fakamua ne nakai taute e  tau mena ne fakaako e lautolu ke he falu ke taute. Tohi a Paulo ki a lautolu: “Kua eke fakakelea e higoa he Atua ha ko mutolu, ke he tau motu kehe.”​—Roma 2:21-24.

8, 9. Talahau e fakataiaga he puhala ne lagomatai e Iehova a lautolu kua manako ke fakatapu e higoa Haana.

⁸ Taute e tautolu e tau mena oti kua maeke ke fakalilifu e higoa ha Iehova. Ko e matakainaga fifine i Norway ne toka teao mo e tama taane ne ua e tau, ne pehē he mole e mate e taane haana: “Ko e mogo uka lahi anei he moui haaku. Ne liogi au he tau aho takitaha, teitei he tau tulā takitaha, ma e malolō ke lagotatai tumau e tau logonaaga haaku ke nakai fakaatā e au a Satani ke fakafiufiu a Iehova ha ko e tau fifiliaga nakai pulotu po ke nakai mahani fakamooli haaku. Manako au ke fakatapu e higoa ha Iehova, ti manako au ke he tama taane haaku ke liu kitia e matua taane haana he Parataiso.”​—Tau Fakatai 27:11.

⁹ Tali nakai e Iehova e tau liogi haana? Ē. Ne mafanatia a ia he fakalataha tumau mo e tau matakainaga. Lima e tau he mole, ne mau e ia e motua. Ko e tama taane haana ne 20 e tau mogonei, ko e matakainaga papatiso. Pehē a ia: “Ne fiafia lahi au ha kua lagomatai he taane haaku au ke feaki hake a ia.”

10. Fakalilifu katoatoa fēfē he Atua e higoa haana?

¹⁰ To fakatapu katoatoa e Iehova e higoa haana ka utakehe e ia a lautolu oti kua ekefakakelea a ia mo e tiaki a ia ko e ha lautolu a Pule. (Totou Esekielu 38:22, 23.) He magahala ia, to mitaki katoatoa e tau tagata oti, mo e to tapuaki a lautolu oti he lagi mo e lalolagi ki a Iehova, mo e fakalilifu e higoa tapu haana. Fakahiku ai, to eke ha tautolu a Matua fakaalofa ke “pule okooko . . . ke he tau mena oti kana.”​—1 Korinito 15:28.

11, 12. He 1876, ko e heigoa ne lagomatai e Iehova e tau tagata haana ke iloa?

¹¹ Ato liu hake a Iesu ke he lagi, ne hūhū e tau tutaki haana: “Ko e Iki na e, ko e vaha nai kia ke liu fakafou mai ai e koe e kautu kia Isaraela?” Ne tala age a Iesu kua nakaila hoko e magaaho ma lautolu ke iloa e kamataaga he pule e Kautu he Atua. Tala age a ia ke he tau tutaki haana ke hagaaki ke he gahua aoga lahi he fakamatala. (Totou Gahua 1:6-8.) Ka e fakaako foki e ia a lautolu ke liogi ma e Kautu he Atua ke hoko mai mo e amanaki atu ke he magaaho ia. Kakano haia ne liogi agaia a tautolu ma e Kautu ke hoko mai.

¹² He tata e magaaho ke kamata a Iesu ke pule he lagi, ne lagomatai e Iehova e tau tagata haana ke maama ko e tau fe ka tupu e mena ia. He 1876, ne tohi e Charles Taze Russell e vala tala “Vahā he Tau Motu Kehe: To Oti A Fe?” Ne fakamaama e ia ko e “fitu e tau” he perofetaaga ha Tanielu kua tatai ke he “tau vaha he tau motu kehe” he perofetaaga ha Iesu. Ne fakamaama he vala tala to fakaoti e tau vahā ia he 1914. * (Kikite matahui tala.)​—Tanielu 4:16; Luka 21:24.

13. Ko e heigoa ne tupu he 1914, ti ko e heigoa ne fakamooli he tau mena tutupu he lalolagi tali mai he 1914?

¹³ He 1914, ne kamata e felakutaki i Europa ti nakai leva lahi ne holofa ai ke he lalolagi katoa. Ha ko e felakutaki, ne ha ha i ai e tau hoge lahi mahaki. He matahiku he felakutaki he 1918, ne tokologa atu e tagata he lalolagi katoa ne mamate ha ko e  gagao hagahaga kelea lahi mahaki he fakatatai ke he felakutaki ia. Ko e tau vala oti nei he “fakamailoga” ne fakakite e Iesu. Ne fakamooli he fakamailoga kua eke a Iesu mo Patuiki he lagi he 1914. (Mataio 24:3-8; Luka 21:10, 11) He tau ia, ne “fina atu ai a ia kua kautu, to kautu ni a ia.” (Fakakiteaga 6:2) Ne tolo hifo e Iesu a Satani mo e tau temoni haana he lagi ke he lalolagi. Mole e mena ia, ne kamata e perofetaaga ke fakamooli: “Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.”​—Fakakiteaga 12:7-12.

14. (a) Ko e ha kua liogi agaia a tautolu ke hoko mai e Kautu he Atua? (e) Ko e heigoa e gahua aoga kua lata ia tautolu ke taute mogonei?

¹⁴ Ko e perofetaaga ia he Fakakiteaga veveheaga 12 ne lagomatai a tautolu ke iloa e kakano ne kamata e tau mena matematekelea ke tutupu he lalolagi kavi ke he magaaho ne eke a Iesu mo Patuiki he Kautu he Atua. Pete ni kua pule a Iesu he lagi, kua pule agaia a Satani he lalolagi. Ka e nakai leva to “kautu ni a ia” ko Iesu he utakehe e tau mena kelea oti kana he lalolagi. Ato hoko e mogoia, liogi tumau a tautolu ke hoko mai e Kautu he Atua, ti nakai okioki a tautolu he fakamatala hagaao ke he Kautu ia. Fakamooli he gahua ha tautolu e perofetaaga ha Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—Mataio 24:14.

15, 16. Kuenaia kia he mena ke liogi ke eke e finagalo he Atua ke he lalolagi? Fakamaama.

¹⁵ Kavi ke he 6,000 tau kua mole, ne eke e finagalo he Atua ke he lalolagi. Kakano haia ne pehē a Iehova “kua mitaki lahi ni” e tau mena oti. (Kenese 1:31) Ti totoko a Satani, tali mai he magahala ia, laulahi he tau tagata ne nakai eke e finagalo he Atua.  Ka e mogonei kavi ke he valu e miliona tagata kua fekafekau ki a Iehova. Ne liogi a lautolu ma e finagalo he Atua ke eke ke he lalolagi, mo e taute foki e lautolu e finagalo he Atua. Nukua momoui a lautolu he puhala kua fakafiafia e Atua mo e fakaako fakamakutu e falu hagaao ke he Kautu haana.

¹⁶ Ma e fakatai, ko e misionare kua 80 e tau he moui i Aferika ne papatiso he 1948 ne pehē: “Fa liogi au kua lata e tau tagata oti ne tuga e tau mamoe ke matutaki ki ai mo e lagomatai ke o mai ke iloa a Iehova neke mule lahi ai. Ti ka amanaki au ke fakamatala ke he taha tagata, ne ole au ma e pulotu ke hokotia ke he loto he tagata. Hagaao ki a lautolu ne tuga e tau mamoe kua fitā he moua, ne liogi au ke fakamonuina e Iehova e tau laliaga ha mautolu ke leveki a lautolu.” Lagomatai he matakainaga fifine motua nei e tokologa ke iloa a Iehova. Manatu nakai e koe falu ne momotua hane taute fakamakutu e finagalo ha Iehova?​—Totou Filipi 2:17.

17. Fēfē e logonaaga haau ke he mena ka taute e Iehova anoiha ma e tau tagata mo e lalolagi?

¹⁷ Ato utakehe e Iehova e tau fī haana mai he lalolagi, to tumau a tautolu ke liogi ke eke e finagalo haana. Ti eke mogoia e lalolagi mo parataiso, mo e totou piliona e tau tagata ka fakaliu tu mai. Ne pehē a Iesu “ko e mena hoko ke he aho ke logona ai ke he hana leo a lautolu katoa ha he tau [“tuagamau fakamanatu,” NW], mo e o mai ai.” (Ioane 5:28, 29) Manamanatu la ke he fiafia ha tautolu ka fakafeleveia e tautolu e tau fakahele ha tautolu! “To holoholo kehe he Atua e tau hihina mata oti” mai he tau mata ha tautolu. (Fakakiteaga 21:4) Laulahi ia lautolu ka fakaliu tu mai ko “lautolu ne hepehepe,” ko lautolu haia kua nakai fakaako e kupu mooli hagaao ki a Iehova mo Iesu. To fiafia a tautolu he fakaako ki a lautolu e finagalo he Atua ke maeke a lautolu ke moua e “moui tukulagi.”​—Gahua 24:15; Ioane 17:3.

18. Ko e heigoa he tau tagata oti kua lata lahi ke moua?

¹⁸ Ka hoko mai e Kautu he Atua, to fakatapu ai e higoa haana, mo e to tapuaki fakalataha he tau tagata oti he lagi mo e lalolagi katoatoa a Iehova. Ē, to tuku age he Atua ke he tau tagata oti e tau mena kua lata mooli mo lautolu he tali e ia e tau ole tolu fakamua he liogi fakatai. He vala tala ka mui mai, to fakatutala a tautolu ke he falu manako aoga foki ne fakaako e Iesu ki a tautolu ke liogi.