KO E magaaho ne eke a Anita mo taha he Tau Fakamoli a Iehova, kua hogohogomanava lahi mahaki e tokoua haana. * (Kikite matahui tala.) Lali a ia ke taofi a Anita ke ua fano he tau feleveiaaga mo e poaki ki a ia ke ua talahau e higoa he Atua. He logona a Anita ne talahau e higoa Iehova, kua fakaita lahi ki a ia.

Lafi ki ai, ne nakai manako e taane ha Anita ki a ia ke fakaako e tau tama ha laua hagaao ki a Iehova po ke uta a lautolu ke he tau feleveiaaga. Uka lahi e mena nei ki a Anita ha kua lali a ia ke lagomatai e tau tama ha laua ka e nakai iloa he taane e mena ne tupu.

Tuga ne fakakite he mena ne tupu ki a Anita, liga lali taha he magafaoa haau ke taofi a koe he fekafekau ki a Iehova. Po ke liga fai tuaga uka foki a koe. Liga kua leva lahi e gagao haau. Liga mate e haau a tama, taane, po ke hoana. Po ke liga taha he magafaoa ne ofania e koe kua toka a Iehova. He tau tuaga nei, ko e heigoa haau ka taute ke fakamooli tumau ki a Iehova?

Pehē e aposetolo ko Paulo: “Nukua aoga kia mutolu e fakauka.” (Heperu 10:36) Ti ko e heigoa ka lagomatai a koe ke fakauka?

Ka matematekelea a koe, manatu kua lata ia koe ke falanaki ki a Iehova ke lagomatai a koe ke fakauka. Liogi ki a ia ma e lagomatai. Ko e mena ia ne taute e Ana he mogo ne mate fakaofo e taane haana. Ne 30 e tau he mau a laua. Pehē a Ana: “Nakai liu mai a ia ki kaina he gahua. Ne 52 ni e tau haana he moui.”

Ne lavelave lahi mahaki e gahua ha Ana, ka e nakai utakehe ai e mamahi haana. Ko e heigoa ne taute e ia? Pehē a ia: “Liligi atu e au e loto haaku ki a Iehova ti olelalo ki a Ia ke lagomatai au.” Iloa e ia na lagomatai e Iehova a ia ha ko e mogo ka oti e liogi haana, logona hifo e ia e mafola mo e totoka. Ti pehē a ia: “Nakai fakauaua au to fakaliu tu mai e Iehova e taane haaku.”​—Filipi 4:6, 7.

Mavehe a Iehova ke he tau fekafekau haana to logona e ia e tau liogi ha lautolu. (Salamo 65:2) Mo e to foaki e ia e tau mena oti kua lata mo lautolu ke matutaki ke fekafekau ki a ia. To lagomatai e Iehova a koe ke fakamooli ki a ia he tau tuaga vihi foki.

Taha puhala foki ne lagomatai e Iehova a tautolu ke fakauka. Foaki mai e ia ki a tautolu e tau matakainaga he fakapotopotoaga. Maeke ia tautolu ke fakaako e puhala ne felagomataiaki e tau matakainaga i Tesalonia he mogo ne favale fakakelea ki a lautolu. He magaaho ia, ne lata lahi a lautolu ke fetomaaki tumau e taha mo e taha. (1 Tesalonia 2:14; 5:11) Ne lagomatai e lautolu e tau matakainaga ha lautolu ke fakamooli tumau ki a Iehova he fakalataha auloa ti eke mo tau kapitiga tata. Ko e heigoa ha tautolu ka taute ke fakamooli tumau tuga a lautolu i Tesalonia?

Lata a tautolu ke moua e tau kapitiga tata i loto he fakapotopotoaga ti fakamalolō e taha ke he taha, mua atu he tau magaaho vihi. (Roma 14:19) Ne matematekelea e aposetolo ko Paulo ha ko e favale mo e falu lekua, ka e foaki e Iehova ki a ia e malolō ke fakauka. Ma e fakatai, ne foaki e Iehova e tau matakainaga ke fakamalolō a Paulo. Pehē e aposetolo hagaao ke he tau kapitiga haana: “Ne eke foki a lautolu mo fakamafanatia kia au.” (Kolose 4:10, 11) Ne ofania he tau matakainaga nei a Paulo. Ti ko e mogo ne manako lagomatai a ia, ne fakamafana mo e fakamalolō e lautolu a ia. Liga maeke a koe ke manamanatu ke he tau mogo ne talahau po ke taute he tau matakainaga  he fakapotopotoaga haau taha mena ke fakamalolō a koe.

Kua foaki foki e Iehova ki a koe e tau motua he fakapotopotoaga. Maeke he tau tagata taane nei ke fakamalolō a koe mo e foaki ki a koe e tau fakatonuaga mitaki mai he Tohi Tapu. Ko lautolu ne tuga e “fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he motu nakai fai vai.” (Isaia 32:2) Kua fakamafana he mena ia a tautolu ke iloa kua mautali e tau matakainaga nei ke lagomatai a tautolu. Ti ka fai magaaho vihi, fano ke he tau motua. Maeke a lautolu ke lagomatai a koe ke tumau e fekafekau ki a Iehova.

Mooli, nakai maeke e tau motua ke fakamafola e tau lekua oti haau. Ti nakai mitaki katoatoa a lautolu tuga a koe. (Gahua 14:15) Ka e moua e koe e logonaaga mitaki ka fina atu a koe ke he motua ti liogi a ia ki a Iehova hagaao ke he lekua haau. (Iakopo 5:14, 15) Ma e fakatai, ne fakamalolō he tau motua e matakainaga taane i Italia ne kua totou tau he lauia ke he gagao hagahagakelea. Ka e pehē a ia: “Ko e fakaalofa hofihofi noa mo e tau ahiahi tumau he tau matakainaga ki a au ne lagomatai au ke fakauka.” Ka matematekelea a koe, manako a Iehova ki a koe ke ole ke he tau motua ke lagomatai a koe.

Ka hagaaki a tautolu ke fekafekau ki a Iehova, to kitia e tautolu e puhala ka lagomatai e Iehova a tautolu. Pihia e mena ne taute e John. He mogo ne 39 e tau haana he moui, ne iloa e ia kua moua a ia he kenesā. Nakai tonu ke he logonaaga haana ha kua gagao lahi a ia, mua atu ha kua fuata agaia a ia. Ti tupetupe a ia ke he haana hoana mo e tama taane ha laua ne tolu laia e tau. Pehē a ia: “Nakai ni leveki he hoana haaku e tama ha maua ka e leveki foki ki a au, mo e lagomatai tumau au ka fina atu ke he toketā.” Ha ko e tau tuluiaga fakaekekafo, ne lolelole lahi a ia ti lauia e manava he tau lekua. Nakai kuenaia. Ne iloa e John kua teitei mate e matua taane haana ti lata ke fai tagata ke leveki e matua.

Ko e heigoa ne lagomatai a John mo e magafaoa haana he mogo vihi ia? Pete ne fa lolelole a John, ne mailoga tumau a ia kua hagaaki tumau e magafaoa haana ke fekafekau ki a Iehova. Pehē a ia: “Kua ō a mautolu ke he tau feleveiaaga oti, fai vala he gahua he fonua he faahi tapu, mo e taute tumau e tapuakiaga he magafaoa pete ni ka uka.” Iloa e John e aoga ke tumau e malolō he fakafetuiaga haana mo Iehova. Pete ne ofo mo e tupetupe a ia he mogo fakamua, nakai leva ti totoka lahi e logonaaga haana. Iloa e ia na fakaalofa a Iehova ki a ia ti foaki ki a ia e malolō kua lata. Maeke a Iehova ke lagomatai a koe he puhala taha ia ka tupetupe po ke matakutaku a koe. Pehē a John: “Foaki e Iehova e malolō ki a koe, tuga kua taute e ia ki a au.”

Ka matematekelea a koe, manatu e tau kupu ha Paulo: “Nukua aoga kia mutolu e fakauka.” Falanaki ki a Iehova he liogi ki a ia. Fakatata tumau ke he tau matakainaga haau he fakapotopotoaga, ole ke he tau motua ma e lagomatai, ti hagaaki tumau ke he tapuakiaga haau ki a Iehova. To lagomatai e ia a koe mo e ha lekua ne liga lauia a koe mogonei po ke ha mena vihi ne liga felauaki mo koe he tau mogo i mua.